Ditshimuna Satana ne midimu yende

“Nunku nukokele nuenu bine Nzambi; kadi nukandamena Diabolo ne yeye neanunyeme.”​—YAKOBO 4:7, NW.

1. Mmunyi mudi “tshianza tshia muena bubi” ne buenzeji pa bukua-bantu lelu’eu?

YOBO wakamba dîyi dijalame ne: “Buloba buine mbufidibue mu tshianza tshia muena bubi.” (Yobo 9:24, NW) Ne mpindieu tudi mu bikondo bitamba kukola mu mianda ya bantu. Bua tshinyi? Bualu tudi mu “matuku a ku nshikidilu” wa bukokeshi bua tshikisu bua Satana bua buloba. Kabiena bikemesha padi, ku bulombodi bua Satana, ‘bantu babi ne babembetedi benda badiundadiunda mu bubi, bapambuishangana ne bapambuishibue.’ (2 Timote 3:1, 13, NW) Kusakidila dikengeshibua, dipanga buakane, tshikisu, dibunda bibawu, ntatu ya lupetu, masama a munanunanu, bisama bia bukulakaja, diletela dia mu mpampakenu​—malu aa ne makuabu adi mua kutomekela bujitu bukole.

2. Mmunyi mutudi mua kuakama dibunda dia kudi Satana lelu’eu?

² Muluishi munene, Satana Diabolo udi mutangija dibunda diende pa bukua-bantu ne nangananga pa batendeledi balelela ba Nzambi. Tshipatshila tshiende ntshia kupambuisha buonso badi mua kulama muoyo mutoke kudi Nzambi ne kubaponesha bua bafue nende pamue ne banjelu bende ba-demon. Kadi mbatujadikile ne: tuetu bananukila ne muoyo mutoke, Diabolo neatunyeme. Anu bu Yezu, tudi mua ‘kulonga ditumikila’ Nzambi ku butuangaji bua bintu bidi bitukengesha, ne tudi mua kupeta muoyo wa kashidi ku bulenga Buende bukena-butuakanyine.​—Ebelu 5:7, 8; Yakobo 4:7; 1 Petelo 5:8-10.

3, 4. (a) Mateta kayi a pambelu avua Paulo ne bua kuluisha? (b) Ntshinyi tshivua tshitangila Paulo bu muvuaye mukulu muena nkristo?

³ Mupostolo Paulo pende uvua mutetshibue mu mishindu mivule. Utela bijadiki bidi bimufunkuna bu ministre wa Kristo, wakafunda ne: “Ndi mu mushindu mutamba kumueneka: mu midimu mivulavulayi, mu nkanu mivulavulayi, mu mitutu mipitshidile, mu njiwu ya lufu misangu mivule. Ngakatutshibua misangu itanu kudi bena Yuda fimbu makumi anayi kumbusha umue, misangu isatu ngakakumibua milangala, musangu umue ngakashibua mabue, misangu isatu tuakadina mu mâyi ne buatu, ngakapitshisha dituku dia munya ne dia bufuku mu ndondo; mu ngendu misangu mivule, mu njiwu ya ku misulu, mu njiwu ya kudi biivi banene, mu njiwu ya kudi bena tshisamba tshianyi, mu njiwu ya kudi bena bisamba bia bende, mu njiwu ya mu tshimenga, mu njiwu ya mu tshipela, mu njiwu ya mu mbuu, mu njiwu ya munkatshi mua bana betu ba dishima, mu mudimu ne lutatu, mu tshitabela bufuku misangu mivule, mu nzala ne nyota, mu dipanga biakudia misangu mivule, mu mashika ne butaka.

⁴ “Ku luseke lua malu aa adi mafumina pambelu, kudi bualu budi bungosha munda ku dituku ne ku dituku, disuyakana bua bisumbu bionso. Nnganyi udi mutekete ne meme tshiyi mutekete? Nnganyi udi ulenduka tshiyi mufika munda?” (2 Kolinto 11:23-29, NW) Nunku, Paulo wakalama muoyo mutoke pavuaye wakama makengeshibua ne mateta bia kudi ba pambelu, ne bu mukulu muena nkristo uvua uditatshisha bikole bua kukolesha bana babu balume ne bakaji bavua batekete mu tshisumbu ne ubambuluisha bua kulama muoyo mutoke. Tshilejilu buimpe kayipu bua bakulu bena nkristo lelu’eu!

Muoyo mutoke mu dikengeshibua

5. Ntshinyi tshidi diandamuna ku dikengeshibua dia buludiludi?

⁵ Mbiamu kayi bidi Satana ukuata nabi mudimu bua kujimija muoyo mutoke? Anu bu mudibi bileja kulu eku, umue wa ku ntumikilu ya Satana ya tshikisu ndikengeshibua dia buludiludi, kadi diandamuna didiku. Efeso 6:10, 11 (NW) udi utubela ne: “Tungunukayi ne kupeta bukole mu Mukalenge ne mu tshikandi tshia dikanda diende. Nuvuale bia-mvita bionso bia kudi Nzambi bua numone mua kutantamena mateyi [anyi, “bienzedi bia budimu,” note kuinshi kua dibeji] a Diabolo.”

6. Mmunyi mudibi mua kumueneka se: Bantemu ba Yehowa mbalue “batshimunyi bajima”?

⁶ Misangu mivule mu matuku aa a ku nshikidilu, Bantemu ba Yehowa badi ne bua kuluisha mateta. Nenku, tudi mua kuamba ne Paulo ne: “Mu bionso ebi kabivua bikole bua tuetu kutshimuna ku bukole bua udi mutunange.” (Roma 8:37, Mukenji Mulenga) Ebi mbijadika kudi luapolo lua muoyo mutoke wa Bantemu ba Yehowa mu tumponya tua dikengeshilangana mu Allemagne, Autriche, Pologne, ne Yougoslavie tshikondo tshia bena Nazi pankatshi pa 1933 ne 1945, mu difinakaja dia ba koministe ku Mputu wa ku Est munkatshi mua 1945 ne 1989, ne munkatshi mua makengeshibua akadituta pa bitupa bia Afrike ne bia Amerike Latine mu matuku mashala aa.

7. Mbilejilu kayi bidi bilenga ku muoyo bia muoyo mutoke bitudi bumvua mu Ethiopie?

⁷ Bantemu ba Yehowa ba ku Ethiopie bakafila tshilejilu tshidi tshitua ku muoyo tshia muoyo mutoke munkatshi mua 1974 ne 1991. Mukudimunyanganyi wa ngenyi pa malu a tshididi wakambila muanetu kampanda uvua mu lukanu ne: “Mbitamba buimpe kulekelela nyama ya ntambue ya mu zoo pamutu pa kunulekela nuenu!” Bakengeshanganyi bena tshikisu aba bakasubisha basadidi ba Yehowa, ne kunyima kua bidimu bivule, kabadi kanene kakakosa bibawu bia lufu. Mubidi wa umue wa ku bana betu abu wakatekibua patoke bu tshilejilu bua kudimuija bakuabu. Bana betu bakuabu bakakoselabu tshibawu tshia lufu bakafundulula tshilumbu ku kabadi kanene kakababingisha, ne bamue ba ku ‘batshimunyi’ aba bena lulamatu bakalonda malu mamonamona mu programe wa Mpuilu wa Distrike “Dilongesha dia Nzambi” ku Addis Abeba ku ntuadijilu wa 1994.a​—Yone 16:33; fuanyikija ne 1 Kolinto 4:9.

8. Mmunyi mudi Satana uteta kubabidila “dikezula dia bisa”?

⁸ Satana mmupangile bua kujimija muoyo mutoke wa bana betu balume ne bakaji bena bulamatshi ku mikenji ba mushindu eu ku dibunda dia mpala ne mpala. Pa nunku, mbiamu kayi bikuabu bia budimu bidiye ukuata nabi mudimu? Buakabuluibua 12:12 (NW) udi wamba nunku bua matuku a ku nshikidilu aa ne: “Diakabi kudi buloba ne mbuu, bualu Diabolo wapueki kunudi muikale ne tshiji tshikole, bu mudiye mmumanye ne: udi ne tshikondo tshîpi.” Mumane kupangila bua kubutula bantu ba Nzambi bena bulamatshi ku mikenji ku makengeshibua, ne tshiji tshikole udi uteta bua kushipa bisamba bijima, kabiyi mpata ne lungenyi lua kubutula tshisamba tshia Yehowa pamue nabu. Nenku, tshidi tshibikidibua ne: dikezula dia tshisa kampanda ntshidituta mu bitupa bia Yougoslavie wa kale, ne bakateta dibutula dia bisa bijima mu Liberia, Burundi, ne mu Rwanda.

9. Bua tshinyi ngenzelu ya Satana itu misangu mivule ifunka? Fila bilejilu.

⁹ Kadi, misangu mivule, ntumikilu ya Satana itu imupinganyina bualu ntatu ya kudi Satana itu itabeja bena mioyo milulame bua bajingulule ne: ditekemena diabu dimu’epele ndiashila pa Bukalenge bua Nzambi budi Bantemu ba Yehowa bamanyisha ne tshisumi tshionso. (Matayo 12:21) Eyowa, badi ne dijinga dia kumanya bivule badi bakukila ku Bukalenge! Tshilejilu, mu Bosnie ne Herzegovine mudi mvita itua ipela, mu dia 26 Tshisanga 1994, bantu 1 307 bakabuela mu disekelela dia Tshivulukilu tshia lufu lua Yezu ne bantu ba pa mutu kupita tshidimu tshishale bavua 291. Luapolo ludi luleja bungi bubandile bua bavua babuele mu Tshivulukilu ku Sarajevo (414), Zenica (223), Tuzla (339), Banja Luka (255), ne bimenga bikuabu. Mu Croatie udi ku mutumba bungi bubandile bua bavua babuele mu Tshivulukilu buvua bua 8 326. Tshivundu tshidi tshibanyunguluke katshivua tshipumbisha Bantemu ba Yehowa mu matunga aa bua kutumikila dîyi-dituma dia “kutungunuka ne kumanyisha lufu lua Mukalenge too ne paluaye.”​—1 Kolinto 11:26, NW.

Mu Rwanda mudi mvita itua ipela

10, 11. (a) Ntshinyi tshidi tshienzeka mu Rwanda udibo bamba ne: ng’wa bena nkristo? (b) Ntshinyi tshivua ba-misionere ba lulamatu bamba?

¹⁰ Mu 1993, Rwanda uvua ne bamanyishi ba Bukalenge 2 080 ne bantu 4 075 bakabuela mu Mpuilu wa Distrike “Dilongesha dia Nzambi”, ne bantu 230 bakatambula. Ku bantu aba, 142 bakatuadija diakamue mudimu wa bumpanda-njila buambuluishi. Bungi bua malonga a Bible a ku nzubu malombola akavula kufike ku 7 655 mu 1994​—mu butoke buonso, didiunda edi kadivua mua kusankisha Satana to! Nansha mudi bantu bavule badiamba mudibu bena nkristo, dishipangana pankatshi pa bisamba diakatuadija. Tshikandakanda tshia ku Vatican tshia L’Osservatore Romano tshiakamba ne: “Etshi ndibutulangana dia bisa dia patoke, diakabi, nansha bena Katolike mbadituemu.” Balume, bakaji ne bana batua ku tshia-bibidi tshia muliyo umue mbafue ne bantu batue ku miliyo ibidi mbashala kabayi nzubu anyi mbenzejibue bua kunyema. Balama ndubidilu wabu wa buena nkristo ukena tshikisu, Bantemu ba Yehowa bakateta mua kusomba pamue. Nkama ne nkama ya bana betu balume ne bakaji yakashipibua. Kadi mu tshisumbu kampanda tshia bamanyishi ba Bukalenge 65 muvua bamanyishi 13 bashipibua, bungi bua babuedi mu bisangilu buakavula kufika ku 170 mu Tshimungu 1993. Bintu bia dikuatshishangana nabi bia kudi Bantemu ba mu matunga makuabu bivua ku bia kumpala biakafika. Tudi tusambila bua badi bapanduke.​—Lomo 12:12; 2 Tesalonike 3:1, 2; Ebelu 10:23-25.

¹¹ Munkatshi mua tshipapu tshionso tshia buôwa etshi, ba misionere basatu bavua mu Rwanda bakapanduka. Badi bafunda ne: “Tudi tumona ne: pa buloba bujima bana betu badi bapetangana ne malu a muomumue anyi mapita kubipa, ne tudi bamanye ne: ntshitupa tshijime tshia tshimanyinu tshia matuku a ku nshikidilu wa ndongoluelu eu mubi. Ne padibi bifikila muntu pa nkayende, udi umanya menemene bulelela bua malu ne bidi bimufikisha ku dianyisha mushinga mukole udi nawu muoyo. Imue mvese idi ne diumvuija dipiadipia kutudi, ne tudi batangila ne luzuku luonso tshikondo tshikale malu a kale kâtshiyi mua kulua kabidi mu lungenyi. Mpindieu tudi basue kuikala ne bivule bia kuenza mu mudimu wa Yehowa.”

Bansonga balami ba muoyo mutoke

12, 13. (a) Ntshinyi tshiakenzeka bua dilama muoyo mutoke dia nsonga kampanda? (b) Nkuepi kudi bansonga betu mua kupeta dikankamijibua lelu’eu?

¹² Yezu wakaleja ne: aba babengibua kudi bena dîku diabu bua bulelela nebafutshibue “misangu lukama.” (Mâko 10:29, 30) Ke muvuabi bua Entellia, muana wa bakaji wa bidimu dikumi mu Afrike wa ku Nord, uvua munange dîna dia Nzambi​—Yehowa—​anu utshidi udiumvuilaku. Wakalonga ne Bantemu ba Yehowa ne uvua wenda minite 90 bua kuya ne kupingana mu bisangilu, ne nansha muvua dîku diende divua dimuluisha misangu mivule dimukangila tshiibi pavuaye upingana. Wakatuadija kuyisha ku nzubu ne ku nzubu ne bidimu 13, ne buluishi bua dîku buakadiunda. Dimue dituku, balela bende bakamusuika bianza ne makasa ne bakamuladika mu munya wa lufiondola mbua makoba munkatshi mua mêba muanda-mutekete, imue misangu bamuela mâyi a bukoya. Bakamututa bikole bitambe, kumushipa dîsu, ne ndekelu wa bionso kumuipata ku nzubu. Kadi wakapeta mudimu mu lupitadi kampanda ne kunyima wakashala munganga. Wakatambula ne bidimu 20 ne wakabuela diakamue mu mudimu wa bumpanda-njila buambuluishi. Bakema bua muoyo mutoke wende, bena dîku bakamupingaja ku nzubu, ne tshitema ba kudibu bakitaba malonga a Bible a ku nzubu.

¹³ Entellia wakapeta dikankamija divule mu Musambu wa 116 nangananga mvese ya 1-4, ivuaye ubala ku musangu ne ku musangu ne: “Ndi munange Yehowa, bualu bua wakunvua dî dianyi ne kutendakena kuanyi. Bualu bua wakuteleja matshu andi kundi, nunku nendile kudiye matuku onso antshidi ne muoyo. Mionshi ya lufu yakunyunguluka; makenga a mu Muaba wa Bafue akankuata; nakasangana ntatu ne kanyinganyinga. Hashishe, nakabikila dîna dia Yehowa ne, Yehowa, ndi nkusengelela ne, Upandishe muoyo wanyi.” Yehowa utu wandamuna masambila a mushindu’eu!

14. Mmunyi mudi Bantemu ba mu Pologne baleja muoyo mutoke wa pa buawu?

¹⁴ Anu bu mu matuku a Yezu, Satana misangu mivule utu utumika ne bitabataba bia malu a Nzambi bua kujudija dikengeshibua​—kadi kayi utshimuna. Tshilejilu tshia pa buatshi ntshia bana betu ba mu Pologne anu bu mudibi biumvuija mu Annuaire des Témoins de Jéhovah 1994. Biakakengedibua bua se: nansha bansonga badileje balami ba muoyo mutoke. Mu 1946, bakambila nsongakaji bu nunku wa bidimu 15 ne: “Enz’anu tshimanyinu tshia nkuruse tshia bena Katolike. Tshianana disashi ndikuindile!” Muvuaye mulama muoyo mutoke, bakamupulumuna mu dîtu, bakamusubisha bikuata buôwa, ne bakamuasa tshingoma.​—Fuanyikija ne Matayo 4:9, 10.

Bikuabu biamu bia mudimu bia Satana

15, 16. (a) Ntshididi kayi tshia bu-demon tshidi natshi Satana, ne mmunyi mutudi mua kumutantamena? (b) Bua tshinyi bansonga betu kabena ne pa kulendukila?

¹⁵ Bushuwa, tshididi tshia bu-demon tshia Satana ntshia “kukokesha anyi kubutula”! Udi ne bia-mvita bivule bia tshikisu. Nunku kabiena bitukemesha padi mupostolo Paulo udimuija ne: “Kuluangana kuetu ki nkua kuluishangana ne mashi ne mubidi, kadi, nkua kuluishangana ne mbulamatadi, ne bakokeshi, ne bamfumu ba buloba ba mîdima eyi, ne biluilu bia ba-spiritu babi badi mu miaba ya mu diulu. Bua bualu ebu luatayi bia-mvita bionso bia kudi Nzambi, bua numone mua kutua nkanana mu dituku dibi ne kukandamena kunyima kua nuenu bamane kuenza malu wonso nkong.” (Efeso 6:12, 13, NW) Majinga a bintu bia ku mubidi, diendeshila bintu lumu ne dijikija lutetuku bibipa, mijiki ya Satana, buenzeji bua balongi netu mu kalasa, dinua dia bintu bia lulengu, ne bunuavi​—bumue bua ku malu aa budi mua kunyanga mioyo yetu. Nunku, mupostolo udi utungunuka ne kubela ne: “Pa mutu pa bintu bionso, tekayi ngabu munene wa ditabuja wikala mua kujima mikete yonso ya kapia yakupa muena bubi.”​—Efeso 6:16, NW.

¹⁶ Ebi bidi bia mushinga wa pa buawu lelu’eu pa kutangila mijiki mibiamibi idi Satana muuja mu bulongolodi ebu. Mu imue nsombelu, kudi diumvuangana dia buludiludi ne ditendelela Satana. Luapolo lufumina ku biro bia mutangidi wa tshimenga tshia Rejon wa San Diego (U.S.A.) ludi luamba ne: “Bakimba mijiki munemu ne kuvua tshisumbu tshia bana 15 000 bakimba ne: ‘Natas’​—mbuena kuamba ne: Satan mu maleta makudimuna.” Ditendelela Satana mbadiumvuije bu tshiina mudi bansonga bapona “bualu badi nkayabo benda balalakana ne tshiji tshikole kabayi ditekemena.” Nuenu bansonga badi mu tshisumbu tshia bena nkristo, kakuena kabingila ka kulendukila! Yehowa udi unupa tshizubu tshia mu nyuma tshidi mikete ya Satana kayiyi mua kutubula nansha kakese.​—Musambu wa 16:8, 9.

17. Mmunyi mutudi mua kutshimuna diletela dia mpampakenu?

¹⁷ Mikete ya kapia ya Satana mmilongolola bua kutshikisha mpampakenu. Ku bifinakaji bia mu nsombelu, bu mudi disama dia ku mubidi anyi diletela dia mu lungenyi diondoke, muluishi wetu udi mua kufikisha bamue ku didiumvua se: kabena ne mushinga. Muntu kampanda udi mua kuteketa mu mikolo bualu kêna ufika ku dipitshisha mêba a bungi mu mudimu wa Nzambi anyi bualu utu upumbisha bimue bisangilu bia tshisumbu. Ditabalela dia dinanga dia bakulu ne bakuabu bana betu ba balume ne ba bakaji bena muoyo mulenga didi mua kuambuluisha bua kutshimuna mpampakenu mikole. Misangu yonso vuluke se: Yehowa mmunange basadidi bende ba lulamatu. (1 Yone 4:16, 19) Musambu wa 55:22 udi wamba ne: “Teka bujitu buebe ham’bidi ha Yehowa, ne yeye neakukoleshe; kena witabusha tshiendelele bua bantu bakane banyungishibue.”

18. Mateyi kayi a Satana adi bamue ne bua kuluisha?

¹⁸ “Mateyi” a Satana a budimu akadi matuku adi panshi aa amueneka mu mushindu mukuabu. Mu amue matunga bakulumpe bavule bakamone ne bavua ne ngenyi idi kayiyi ibashila muaba idi ibapesha mmuenenu udi ubazengeja wa se: patshivuabu bana, bakabanyanga ne tshikisu tshionso kudi ntendelelu ya Satana. Ngenyi bu nunku idi ifumina kuepi? Mmuenenu ya bashikuluji mmishilangane bikole nansha mudibu benza makebulula muondoke. Bamue badi bamona ngenyi ya mushindu’eu bu malu malelela adibu bavuluka, kudi bakuabu mbingenyingenyi patupu​—imue misangu bifumine kudi ngondapilu idi mua kuedibua mpata—​ne kudi bakuabu kabidi mbu dilotakana dia mushindu kampanda difumina ku mputa ya ku muoyo ya ku buana.

19. (a) Ngenyi kayi ivua Yobo ne bua kuluisha? (b) Mmunyi mudi bakulu mua kulonda tshilejilu tshia Elihu?

¹⁹ Bidi bia mushinga bua muvua Yobo musadidi wa Nzambi ne bua kuluisha “ngenyi milubakaji” ivua Satana mumuambile mukana mua Elifaze ne Zofare. (Yobo 4:13-18; 20:2, 3, NW) Yobo wakakenga bua “lunsuya” luakamufikisha ku didifila mu “biakulakula” bua “buôwa” buvua butatshisha tshieledi tshiende tshia lungenyi. (Yobo 6:2-4; 30:15, 16, NW) Elihu wakateleja Yobo ne bupole buonso ne wakamuambuluisha ne muoyo mujima bua amanye mmuenenu mene wa meji wa Yehowa wa malu. Bia muomumue lelu’eu, bakulu bumvuidianganyi badi baleja ne: badi batabalela badi mu dibungama pa kubenga kubasakidila “difinakaja” dia pa mutu. Pamutu pa nanku, anu bu Elihu, badi babateleja ne lutulu luonso ne pashishe babela manyi mapoleshi a mu Dîyi dia Nzambi. (Yobo 33:1-3, 7, NW; Yakobo 5:13-15) Nunku muntu kayi yonso udi mpampakenu yende milubakaja kudi mputa ya ku muoyo milelela anyi mifuanyikija, peshi udi “mukuatshishibua buôwa . . . kudi bilota, ne kudi bikena-kumona” bu Yobo, udi mua kupeta dikuatshisha dipoleshi dia mu Mifundu munda mua tshisumbu.​—Yobo 7:14, NW; Yakobo 4:7.

20. Mmunyi mudi bena nkristo badi banyingalala mua kuambuluishibua bua kulama nkatshinkatshi wabu wa mu nyuma?

²⁰ Lelu’eu, muena nkristo kampanda udi mua kuikala mujadike ne: mu mushindu kansanga anyi kankenga, Satana udi kunyima kua ngenyi ya tshipapu eyi. Bikala bamue mu tshisumbu bakenga mushindu’eu, bidi bia meji bua bamone ngenyi mifidi ya ditshina ya nunku bu ditetshibua dia buludiludi dia kudi Satana bua kunyanga nkatshinkatshi wabu wa mu nyuma. Badi bakengela dikuatshisha dia lutulu ne dia muoyo mulenga dia mu Mifundu. Pa kudifila kudi Yehowa mu masambila ne pa kupeta bukubi bua mu nyuma, badi mu tshinyongopelu nebapete bukole budi butamba bua pa tshibidilu. (Yeshaya 32:2; 2 Kolinto 4:7, 8) Nunku nebafike ku dinanukila ne lulamatu luonso ne kubenga kulekela ngenyi mibi idi idiluila bua kunyanga ditalala dia tshisumbu. (Yakobo 3:17, 18) Eyowa, nebakumbane mua kuluisha Diabolo, baleja lungenyi lua muomumue ne luvua Yezu nalu pakambaye ne: “Satana, umuka!”​—Matayo 4:10; Yakobo 4:7.

21. Mmunyi mudi Mifundu itudimuija ku mishindu ya dilobesha ya Satana?

²¹ Tudi bamanye ne: tshipatshila tshia Satana ntshia kunyanga mu mishindu yonso bieledi bietu bia lungenyi, anu bu mudi mupostolo Paulo udimuija mu 2 Kolinto 11:3 (NW) ne: “Ndi ntshina bua se: mu mushindu kampanda anyi kansanga, anu bu muvua nyoka mudinge Eva ku budimu buende, bieledi bienu bia lungenyi kabivu kunyanguka ne kusesuka ku bululame ne budipope bia kudi Kristo.” Dinyanguka dia lelu’eu dia mubidi kayi wonso, anyi nsangilu wa bantu badi kule ne Nzambi, didi dituvuluija divuambuka difumba kudi “Baponeshanganyi” (bantu ba mpolondo) ba mashi masanga banyanguke ne bena tshikisu ba mu matuku a Nowa. (Genese 6:4, 12, 13, NW, note udi kuinshi kua dibeji; Luka 17:26) Nunku, kabiena bikemesha padi Satana utumika ne bienzedi bia budimu ne bia dilobesha bua kujikija tshiji tshiende, nangananga kutshijikijila tshisamba tshia Nzambi.​—1 Petelo 5:8; Buakabuluibua 12:17.

22. Pikala Satana katshiyiku kabidi, mmabenesha kayi atudi mua kutekemena?

²² Satana kêna nansha mutedibua mu nshapita ya ndekelu ya mukanda wa mu Bible wa Yobo to. Dibanda diende dibi dia se: bantu kabena mua kulama muoyo mutoke kudi Nzambi diakalejibua dia dishima kudi muoyo mutoke wa Yobo. Bia muomumue, mu matuku atshilualua akadi pa buipi pikala “musumba munene” wa balami ba muoyo mutoke “mufumine ku dikenga dinene,” nebeele Satana mu dijimba. Balume ne bakaji bena ditabuja, kusakidila ne muena lulamatu Yobo, nebadisangishe ne “musumba munene” awu bua kubabidila mabenesha a mu mparadizu, malenga mapita avua Yobo mupeta!​—Buakabuluibua 7:9-17, NW; 20:1-3, 11-13; Yobo 14:13.

[Mêyi adi kuinshi]

Nkonko ya diambulula

◻ Mbilejilu kayi bia muoyo mutoke bivua Yobo, Yezu ne Paulo bashiya?

◻ Mmunyi muvua balami ba muoyo mutoke batuila Satana nkanana?

◻ Mmunyi mudi bansonga mua kutantamena biamu bia mudimu bia budimu bia Satana?

◻ Ntshinyi tshitudi mua kuenza bua kutshimuna mateyi a Satana?

[Tshimfuanyi mu dibeji 7]

Mu Ethiopie, Meswa ne Yoalan badi mpindieu basadila Yehowa ku dîba ne ku dîba pa kulonda tshilejilu tshia tatuabu wakashipibua

[Tshimfuanyi mu dibeji 7]

Entellia, nsonga mulami wa muoyo mutoke mu Afrike wa ku Nord