Bamanyishi ba Bukalenge badi balonda

Yehowa mmukole kupita baluishi bende

DIABOLO ne ba-demon bende mbenze madikolela munkatshi mua tshikondo tshile bua kupumbisha bumanyishi bua lumu luimpe ku diambuluisha dia ntendelelu wa dishima ne majimbu. Bible udi wakula bua bipatshila bibi bia Satana mu 2 Kolinto 4:4 (NW) mudiye wamba ne: “nzambi wa bulongolodi ebu bua malu mmufofomije ngenyi ya badi babule ditabuja, bua kabakenkeshibu kudi butoke bua lumu luimpe lua butumbi ludi lutangila Kristo, udi tshimfuanyi tshia Nzambi.”

Kadi Yehowa Nzambi mmukole kupita Satana. Kakuena tshintu nansha tshimue tshidi baluishi ba Yehowa mua kuenza bua kuimanyika dikumbana dia disua diende dia bu-Nzambi, didi dia se: “bantu ba mishindu yonso bapandishibue ne bafike ku dimanya dijalame dia bulelela.” (1 Timote 2:4, NW) Luapolo idi ilonda eyi idi ifumina kudi bamanyishi ba Bukalenge mu Australie idi izangika bualu ebu.

▫ Kunyima kua diditapulula munkatshi mua bidimu 20 ne ntendelelu, mamu kampanda wakatuadijulula kubala Bible. Disankidila edi dipiadipia bua Bible diakamufikisha ku dipeta nkonko ya bungi, ke bualu kayi wakalomba Nzambi diambuluisha bua kupetaye mandamuna. Uvua ujinga kukeba bulelela, kadi uvua mumanye ne: kupinganyinuna ku ntendelelu wende wa kale kakuvua mua kujikija lutatu luende nansha. Pamutu pa nanku, wakatuadija dikebulula diende pa kukumbula nzubu wa disumbisha mikanda mifuatuluka ne kuebeja né bavua ne mikanda kampanda pa malu a ntendelelu.

Muena nzubu wa mikanda eu wakavuluka ne: uvua ne mukanda wa malu a ntendelelu, ki mmuaba uvuaye upanyishila to, apo kumbelu. Tshiena-bualu tshia mukanda tshivua Udi mua kuikala ne muoyo wa kashidi pa buloba bukudimuna mparadizu, mupatula kudi Bantemu ba Yehowa. Ne lukasa luonso, mukaji eu wakabala mukanda awu ne kusangana mandamuna ku mivule ya ku nkonko yende pa Bible. Kunyima kua dikeba Bantemu ba Yehowa mu mukanda wa nimero ya telefone, ndekelu wa bionso wakapetangana nabo ne kutuadija dilonga dia pa tshibidilu dia Bible.

▫ Nsongakaji kampanda wakafuta tshikandakanda tshia muaba uvuaye musombele bua kutembatshi disumbisha dia [tshijimba tshia] buanga kansanga. Ditemba edi divua dibubikila bu ‘buanga bukulukulu budi ne bukole bua dikema.’ Umue wa ku Bantemu ba Yehowa wakabala ditemba adi. Wakapangadija bua kubikila ku nimero wa telefone mufila ne kuakula ne mukaji eu pa bidi bitangila mpokolo wa bukole buvuabu batumbishila buanga abu. Diyukidilangana dishindamena pa mmuenenu wa Bible pa bidi bitangila mudimu wa ba-demon diakatuadija. Nsongakaji eu muena buanga wakasokolola ne: katshia wasambila Nzambi bua kumuambuluisha bua ntatu yende ne ba-demon, kuakapita dituku dimue tshianana. Ntemu wakenza malongolola bua diyukidilangana dikuabo ku telefone.

Pakabikilaye, nsongakaji eu kavua kumbelu to. Mamuende wakandamuna ku nshinga ne kuamba ne: “Tshiena mumanye tshinudi bambile muananyi wa bakaji, kadi tshidi tshienzeke ntshishima!” Wakalonda ne: kunyima kua nshinga wa kumpala wakelabu, muanende wa bakaji wakimansha bimfuanyi ne mikanda biende bionso bia malu a Satana ne kutuadija kubala Bible.

Katupa kîpi kunyima, malongolola akenjibua bua kukumbula nsongakaji awu. Diakamue, wakanyisha dilonga dia Bible dia pa tshibidilu ne Bantemu ba Yehowa. Wakatuadija kabidi kusangila ne Bantemu pa kubuela mu bisangilu biabu bia buena nkristo. Bua musangu eu kabidi, Yehowa wakatshimuna ba-demon pa kukenkesha dimanya dijalame dia malelela a Bible.