“Tshitu muanji kumona tshintu bu etshi to!”

MU 1993 bakalomba biro bia filiale wa Société Watch Tower mu Argentine bua kutumabi baleji-mpala tshinunu ku Santiago, mu Chili, bua Mpuilu wa Distrike wa Bantemu ba Yehowa wa matuku anayi wa “Dilongesha dia Nzambi.” Ebi bivua musangu wa kumpala uvua tshisumbu tshialabale tshia Bantemu bena Argentine balombibua bua kuya ku mpuilu wa ku ditunga dienyi.a Diandamuna divua tshinyi? Malomba mapite pa 8 500 akaloka bu mvula, ku malomba awu bakasungula baleji-mpala 1 039.

Pa kusangisha, bakasomba bise 14 bua kuenza luendu elu lua kilometre 1 400 kumbukila ku Buenos Aires too ne ku Santiago. Luendu elu lua mêba 26 bavua balulengeja kudi bintu bia mu bufuki bia dikema. Pa kupitshila mu Mikuna ya Andes, baleji-mpala bakapitshila pabuipi ne Aconcagua, ku metre 6 960 mukuna mutumbuke kupita yonso mu Amerike wa ku Ouest. Tshintu tshia kuvuluka mu mushindu wa pa buawu ndipueka matelu, a njila wa bibenda ku Chili. Bakatutshila bendeshi ba mashinyi bikashi bua musangu mule bua mbabi yabu mu dinyemesha bise mu njila mubiamubi wa mushindu’eu!

Kadi, bualu bupite wonso bulenga, buvua ne bua kusanganyibua ku mpuilu yeye nkayende. Mu bulongolodi ebu bua mvita pankatshi pa matunga ne matandu pankatshi pa bisa, mmushindu kayipu uvuabi bikankamija bua kumona buobumue bua musumba wa bateleji 80 000 bavua bafumina ku matunga 24​—bulelela, bu-wetu bua bukua-matunga! Bu muakadimuenenabu buludiludi buobumue munkatshi mua babuedi ba mu mpuilu, bamue ba ku bendeshi ba bise bakaleja disankidila pa kukeba bua kumanya bivule pa bidi bitangila Bantemu ba Yehowa. “Tshitu muanji kumona tshintu bu etshi to!” ke muakakatshila umue wa kudibu.

[Mêyi adi kuinshi]