Nekuikale dibiishibua ku lufu dia bakane
“Ndi ne ditekemena kudi Nzambi . . . bua se: nekuikale dibiishibua ku lufu dia bakane ne dia bakena bakane.”—BIENZEDI 24:15, NW.
1. Nnsombelu kayi udi bantu buonso bakama bituadijile ku dipona mu mpekatu dia Adama ne Eva?
“MALU onso audi wenza wenze ne bukole buebe buonso; bualu bua kakuena mudimu, kakuena kulongolola kua malu, kakuena lungenyi anyi meji [mu sheole muudi, NW] uya.” (Muambi 9:10) Ne mêyi makese aa, masungula bimpe, muena meji Mukalenge Solomo udi umvuija nsombelu udi tshipungu kayi tshionso tshia bukua-bantu bakama bituadijile ku dipona mu mpekatu dia baledi betu ba kumpala, Adama ne Eva. Kakuyi diumusha muntu nansha umue, bu tshipeta lufu ndubutule muntu kayi yonso—mubanji ne mupele, mukalenge ne muntu wa tshianana, muena lulamatu ne udi kayi muena lulamatu. Bushuwa, lufu “ndukokeshe anu bu mfumu.”—Lomo 5:17, NW.
2. Bua tshinyi bena lulamatu bakuabu bakateketa mu mikolo mu tshikondo etshi tshia ku nshikidilu?
2 Nansha mudi malu a diondopangana malubuluke mu mushindu wa tuyayi tukamona, too ne ku lelu’eu lufu lutshidi anu lukokesha bu mfumu. Nansha mudibi kabiyi bikemesha, pamu’apa bamue bakateketa mu mikolo mu mushindu kampanda pakimanabu ndekelu wa bionso mpala ne mpala ne muluishi eu wa musangu mule. Mbua tshinyi? Bualu, mu bidimu bia 1920, Société Watch Tower wakamanyisha mukenji wa se: “Miliyo ne miliyo ya bantu badi ne muoyo mpindieu kabakufua nansha.” Miliyo ne miliyo eyi ya bantu mbanganyi? “Mikoko” idibu batela mu mulayi wa Yezu pa mikoko ne mbuji. (Matayo 25:31-46) Bakadianjila kulaya bua bantu bafuanangane ne mikoko aba ne: nebamueneke mu tshikondo tshia ku nshikidilu, ne ditekemena diabu nedikale muoyo wa kashidi mu mparadizu pa buloba. Bu muvua bikondo bienda bipita, tshisamba tshia Nzambi tshivua patshi tshienda tshipeta bujinguludi buakane bua muaba udi nawu “mikoko” eyi mu malongolola a Yehowa. Bakajingulula se: bena butumike aba bavua ne bua kuikala bashilangane ne “mbuji” ya mutu mukole, ne kunyima kua dibutudibua dia mbuji eyi, mikoko neyipiane buloba muinshi mua Bukalenge buakayilongoluelabu.
Disangisha dia bantu bafuane mikoko
3. Tshisamba tshia Nzambi ntshiditue mu dienza mudimu kayi bituadijile mu 1935?
3 Bituadijile mu 1935, ‘mupika wa lulamatu’ mmuditue mu dikeba bantu ba mushindu’eu bafuane mikoko ne dibabueja mu bulongolodi bua Yehowa. (Matayi 24:45, NW; Yone 10:16) Bena nkristo aba badiakaja bua kulongeshibua mbafike ku dijingulula ne: Yezu udi mpindieu ukokesha mu Bukalenge bua mu diulu bua Yehowa ne se: tshikondo tshia nshikidilu wa ndongoluelu eu mubi wa malu ne tshia dibuela mu bulongolodi bupiabupia muikala buakane ne bua kuasa didi dienda disemena ne lukasa luonso. (2 Petelo 3:13; Buakabuluibua 12:10) Mu bulongolodi abu bupiabupia, mêyi adi atua ku muoyo aa a Yeshayi neakumbane: “Wakumina lufu tshiendelele.”—Yeshaya 25:8.
4. Nansha muvuabu ne diluijakana dionso batekemene bua kumona dibingishibua dia Bumfumu bua Yehowa ku mutu kua bionso ku Armagedon, ntshinyi tshidi tshienzekele bavule ba ku mikoko mikuabu?
4 Bu mudi nshikidilu wa bulongolodi ebu bua Satana muikale pabuipi menemene, bena nkristo bafuane mikoko mbanange bua kuikala ne muoyo too ne pabingishibua bumfumu bua Yehowa budi ku mutu kua bionso munkatshi mua dikenga diafikila Babilone Munene ne bishadile bia bulongolodi bua Satana. (Buakabuluibua 19:1-3, 19-21) Bua musumba munene, ki mbienzeke nunku’eu to. Bavule bavua batekemena bua kuikala munkatshi mua “miliyo ne miliyo” badi kabayi bafua mbamane kufua bushuwa. Bamue bakafuila ditabuja mu maloko ne mu tumponya tua dienzejangana midimu mikole anyi ku bianza bia bena malu a Nzambi basuishi. Bakuabu mbafue mu njiwu anyi ku tshidibu babikila ne: mbikebeshi bia lufu bia ku tshifukilu bu mudi—masama ne bukulakaje. (Musambu wa 90:9, 10; Muambi 9:11) Kakuyi mpata, bavule nebafue kumpala kua nshikidilu kuluaye. Mmunyi muamona bantu ba mushindu’eu dikumbana dia dilaya dia bulongolodi bupiabupia muikala buakane ne bua kuasa?
Ditekemena dia dibiishibua ku lufu
5, 6. Mmalu kayi atshilualua adiku bua aba badi ne ditekemena dia pa buloba badi bafua kumpala kua Armagedon?
5 Mupostolo Paulo wakafila diandamuna pavuaye wakula kumpala kua Felix nguvene muena Roma. Anu bu mudibi bifunda mu Bienzedi 24:15 (NW), ne dikima dionso Paulo wakamanyisha ne: “Ndi ne ditekemena kudi Nzambi . . . bua se: nekuikale dibiishibua ku lufu dia bakane ne dia bakena bakane.” Ditekemena dia dibiishibua ku lufu didi ditupetesha dikima patudi kumpala kua makenga mabiamabi. Bua ditekemena edi, bana betu basuibue ba balume ne ba bakaji badi bakuatshika masama ne bumvua ne: nebafue kabena batamba kuteketa mu mikolo nansha. Nansha bienzeka tshintu kayi tshionso, mbamanye ne: nebanowe difutu dia lulamatu. Bua ditekemena dia dibiishibua ku lufu, bana betu ba balume ne ba bakaji ba dikima badi bakamangana ne lufu lua ku bianza bia babakengeshi mbamanye ne: babakengeshi aba kabena ne mushindu wa kutshimuna to. (Matayo 10:28) Padi muntu mu tshisumbu ufua, tudi ne dibungama bua kujimija muntu awu. Eku, bikalaye umue wa ku mikoko mikuabu, tudi tusanka bualu muena kuitabuja netu wadileji muena lulamatu too ne ku nshikidilu ne udi mpindieu wikisha, windila matuku alua mu bulongolodi bupiabupia bua Nzambi.—1 Tesalonike 4:13.
6 Eyowa, ditekemena dia dibiishibua ku lufu ntshitupa tshinene tshia ditabuja dietu. Kadi, bua tshinyi ditabuja dietu mu dibiishibua ku lufu ndikole nunku’eu, ne mbanganyi badi pabu ne ditekemena adi?
7. Dibiishibua ku lufu ntshinyi, ne mvese kayi idi ijadika bulelela buadi?
7 Muaku wa tshiena-Greke mukudimuna ne: “dibiishibua ku lufu” udi a·naʹsta·sis, udi ku dîna umvuija “kuimana kuulu.” Udi nangananga ufunkuna dijudibua ku bafue. Bualu bua dikema, muaku “dibiishibua ku lufu” kawena mu Mifundu ya tshiena-Ebelu to, kadi mbamumvuije patoke ditekemena dia dibiishibua ku lufu. Tshilejilu, tudi tudisangana mu mêyi mamba kudi Yobo munkatshi mua dikenga diende: “Unsokoke mu [Sheole, NW], . . . bua wewe unsunguile tshikondo tshijalame ne bua wewe unvuluke!” (Yobo 14:13) Bia muomumue, mu Hoshea 13:14, tudi tubala ne: “Nembahikule ku bukole bua [Sheole, NW], anyi? Nembahandishe ku lufu, anyi? Lufu, makenga ebe adi kudi kunyi? [Sheole, NW], kubutula kuebe kudi hanyi?” Mu 1 Kolinto 15:55, mupostolo Paulo wakatela mêyi aa ne kuleja ne: ditshimunyibua dia lufu dilaya didi dikumbajibua ku butuangaji bua dibiishibua ku lufu. (Eyowa, mu mvese awu Paulo uvua wakula bua dibiishibua dia kuya mu diulu.)
Bena kuitabuja badi “bambibua bakane”
8, 9. (a) Mmunyi mudi bantu bapange bupuangane mua kubabidila dibiishibua ku lufu dia bakane? (b) Ntshinyi tshidi nshindamenu wa ditekemena dietu mu muoyo ukena kutuishibua ku tshibungubungu kudi lufu?
8 Mu mêyi ende kudi Felix, matela mu tshikoso 5, Paulo wakamba ne: nekuikale dibiishibua ku lufu dia bakane ne dia bakena bakane. Bakane babiishibua ku lufu mbanganyi? Eyowa, ku tshilelelu muntu nansha umue kêna muakane to. Buonso buetu tudi benji ba mpekatu bituadijile ku diledibua, ne tutu tuenza mpekatu mu kupita kua matuku etu a muoyo—bidi bituvuija bantu bakanyine lufu kubidi. (Lomo 5:12; 6:23) Kadi, mu Bible tudi tusangana tshiambilu “bambibua bakane.” (Lomo 3:28, NW) Tshiambilu etshi tshidi tshifunkuna bantu badi Yehowa ulekelela mpekatu, nansha bikale bapange bupuangane.
9 Tshiambilu etshi badi nangananga batumika natshi bua bena nkristo bela manyi badi ne ditekemena dia kuya mu diulu. Mu Lomo 5:1 (NW), mupostolo Paulo udi wamba ne: “Mpindieu bu mutudi bambibue bakane bu tshipeta tshia ditabuja, tulabulayi ditalala ne Nzambi ku butuangaji bua Mukalenge wetu Yezu Kristo.” Bena nkristo buonso bela manyi badi bambibua bakane bua ditabuja. Ditabuja mu tshinyi? Anu bu mudi Paulo umvuija mu bule ne mu butshiama mu mukanda wa Lomo, nditabuja mu Yezu Kristo. (Lomo 10:4, 9, 10) Yezu wakafua muntu mupuangane ne pashishe wakabiishibua ku bafue ne kubanda mu diulu bua kufila mushinga wa muoyo wende wa bu muntu bua diakalenga dietu. (Ebelu 7:26, 27; 9:11, 12) Eyowa, pakanyisha Yehowa mulambu awu, Yezu wakapikula bukua-bantu ku bupika bua mpekatu ne lufu. Aba badi benza midimu ya ditabuja mu ndongoluelu eu badi batamba kuubabidila. (1 Kolinto 15:45) Ku diambuluisha diawu, balume ne bakaji ba lulamatu badi ne ditekemena dia kupiana muoyo wabenga kutuishibua ku tshibungubungu kudi muluishi mubule luse, lufu.—Yone 3:16.
10, 11. (a) Ndibiishibua ku lufu kayi didi dindile bena nkristo bela manyi ba lulamatu? (b) Ndibiishibua ku lufu dia mushindu kayi divua batendeledi ba kumpala kua Kristo batekemene?
10 Ku diambuluisha dia mulambu wa tshia-bupikudi wa Yezu, bela manyi ba lulamatu, bu mudibu bambibua bakane, badi ne ditekemena dilelela dia kubiishibua ku lufu bu bifukibua bia mu nyuma bikena kufua, anu bu Yezu. (Buakabuluibua 2:10) Dibiishibua diabu ku lufu mbaditele mu Buakabuluibua 20:6 (NW), udi wamba ne: “Wa diakalenga ne munsantu ng’ewu yonso udi ulabula dibiishibua dia kumpala; pa bine aba lufu luibidi kaluena ne bukokeshi. Kadi nebikale bakuidi ba Nzambi ne ba Kristo, ne nebakokeshe pamue nende munkatshi mua bidimu ebi tshinunu.” Edi ndibiishibua ku lufu dia kuya mu diulu. Kadi, bambisha ne: Bible udi udibikila ne: “dibiishibua dia kumpala,” muomumue ne: kudi bantu ba bungi badi ne bua kubiishibua ku lufu.
11 Mu Ebelu nshapita wa 11, Paulo wakafunkuna mulongo mulemule wa basadidi ba Nzambi ba kumpala kua Kristo [kuluaye pa buloba] bakaleja ditabuja dikole kudi Yehowa Nzambi. Buobo pabu bavua ne ditabuja mu dibiishibua ku lufu. Mu mvese wa 35 wa nshapita awu, Paulo udi wakula bua mabiishibua ku lufu a mu tshishima akenzeka mu malu a kale a Izalele, pa kuamba ne: “Bakashi bakangata bafue babo ku dibisha dia ku lufu; bakuabo bakashihibua ne mikumu, kabai bitabusha luhandu; bua bamanye mua kuangata dibisha dia ku lufu didi ditamba buimpe.” Bantemu aba ba kale bavua batekemene dibiishibua ku lufu dimpe ditambe aa akenzeka, tshilejilu, ku butuangaji bua Eliya ne Elisha. (1 Bakelenge 17:17-22; 2 Bakelenge 4:32-37; 13:20, 21) Ditekemena diabu divua dibiishibua ku lufu mu bulongolodi muikala basadidi ba Nzambi kabayi mua kukengeshibua bua ditabuja diabu, mu bulongolodi muikala bakaji kabayi bajimija banangibue babu mu lufu. Eyowa, bavua pabu batekemene dijudibua ku bafue mu bulongolodi bupiabupia butudi petu batekemene. (Yeshaya 65:17-25) Yehowa kakabasokoluela malu mavule bu mudiye mutusokoluele tuetu pa bidi bitangila bulongolodi bupiabupia ebu. Kadi, bavua bamanye ne: buvua bulua, ne bavua basua kuikala mu bulongolodi bupiabupia ebu.
Dibiishibua ku lufu dia pa buloba
12. Bena lulamatu ba kumpala kua Kristo bakambibua bakane anyi? Umvuija.
12 Tudiku mua kuangata ditabala dia balume ne bakaji bena lulamatu ba kumpala kua Kristo mu bulongolodi abu bupiabupia bu tshitupa tshia dibiishibua ku lufu dia bakane anyi? Kakuyi mpata, diandamuna didi eyowa, bualu Bible udi ubafunkuna bu bakane. Tshilejilu, mulongi Yakobo udi utela mulume kampanda ne mukaji kansanga ba mu bikondo bia kale bakambibua bakane. Mukaji uvua Rahabe, uvua kayi muena Izalele wakenza midimu ya ditabuja kudi Yehowa ne kulua umue wa mu tshisamba tshia bena Ebelu. Mulume uvua Abrahama, nkambua wa tshisa tshia bena Ebelu. Pa bidi bimutangila tudi tubala ne: “Abalahama wakitabusha Nzambi ne bakamubadila ditabusha diandi bu buakane buandi; bakamuidika, Mulunda wa Nzambi.” Mukaji uvua Rahabe, uvua kayi muena Izalele wakenza midimu ya ditabuja kudi Yehowa. Uvua “muambibue muakane” ne wakalua umue wa mu tshisamba tshia bena Ebelu. (Yakobo 2:23-25) Nunku, balume ne bakaji ba kale bakenza midimu ya ditabuja dikole kudi Yehowa ne mu malaya ende ne bakashala ne lulamatu too ne ku lufu bakambibua bakane kudi Yehowa ku butuangaji bua ditabuja diabu, ne kakuyi mpata nebababidile ‘dibiishibua ku lufu dia bakane.’
13, 14. (a) Mmunyi mutudi bamanye se: bena nkristo badi ne ditekemena dia pa buloba badi mua kuambibua bakane? (b) Ebi bidi biumvuija tshinyi kudibo?
13 Kadi, netuambe tshinyi bua bantu bafuane mikoko lelu’eu, aba badi ne ditekemena dia pa buloba badi baditshipa kudi Yehowa ne bafua ne lulamatu mu tshikondo etshi tshia ku nshikidilu? Nebababidile dibiishibua ku lufu dia bakane anyi? Ke mudibi bimueneka. Musumba munene wa bena lulamatu ba mushindu’eu bakawumona mu tshikena kumona kudi mupostolo Yone. Umvua mushindu udiye ubaleja: “Kunyima kua malu aa, nakatangila, e kumona musumba munene [wa bantu] udi muntu nansha umue kayi mua kubala, ba mu matunga wonso ne bisa bionso ne bisamba bionso ne miakulu yonso, biimane kumpala kua nkuasa wa bumfumu ne kua Muan’a Mukoko, bavuale nkanzu mitoke; ne bavua ne malala mu bianza biabo. Ne bavua bela mbila ne dîyi dikole kabayi bateketa, bamba ne: ‘Lupandu ndua kudi Nzambi wetu udi musombe mu nkuasa wa bumfumu, ne kudi Muan’a Mukoko.’”—Buakabuluibua 7:9, 10, NW.
14 Bambisha ne: badipuekeshi aba badi ne dijadika dikole bua lupandu luabu, ne badi balulamika Yehowa ne Yezu, “Muan’a Mukoko.” Kusakidila apu, mbimane kumpala kua Yehowa ne Muan’a Mukoko, buonso bavuala bivualu bitoke. Bua tshinyi bivualu bitoke? Tshifukibua tshia mu diulu tshidi tshiambila Yone ne: “Bavua basukule nkanzu yabo ne bayitokeshe mu mashi a Muan’a Mukoko.” (Buakabuluibua 7:14, NW) Mu Bible, butoke ntshimanyinu tshia bukezuke, buakane. (Musambu wa 51:7; Danyele 12:10; Buakabuluibua 19:8) Bu mudibu bamona musumba munene muvuale bilamba bitoke, abi bidi biumvuija ne: Yehowa udi ubangata bu bakane. Mmushindu kayi? Bualu badi, mu ngakuilu wa mu tshimfuanyi, basukule nkanzu yabu mu mashi a Muan’a Mukoko. Badi benza midimu ya ditabuja mu mashi mapongolola a Yezu Kristo ne nunku badi bambibua bakane bu balunda ba Nzambi ne ditekemena dia kupanduka ku dikenga dinene. Nunku, muena nkristo kayi yonso muena lulamatu muditshipe udi mpindieu umue wa ku bena “musumba munene” udi ufua kumpala kua dikenga dinene udi mua kuikala ne dishindika dia kubabidila dibiishibua ku lufu dia bakane pa buloba.
15. Nansha muabiishibua bakane ne bakena bakane, buimpe bua dibiishibua ku lufu dia bakane ntshinyi?
15 Dibiishibua adi mbadiumvuije mu Buakabuluibua nshapita wa 20, mvese wa 13, mu mêyi aa: “Mai manene kabidi, akahatula bafue bakadimu, ne lufu ne [Hades, NW] biakahatula bafue bakadimu, ne bakalumbuluisha muntu yonso bu muakadi bienzedi biandi.” Nunku, munkatshi mua Dituku dinene dia Yehowa dia Dilumbuluisha dia bidimu tshinunu, aba buonso badi mu tshivulukilu tshia Nzambi nebabiishibue ku lufu—ne bakane ne bakena bakane. (Bienzedi 17:31) Kadi, mbualu butambe buimpe kayipu bua bakane! Mbamane kuibidilangana ne nsombelu ya ditabuja. Mbamane kushemesha malanda ne Yehowa ne badi ne dieyemena mu dikumbana dia malongolola ende. Bantemu bakane biangatshile ku tshikondo tshia kumpala kua Kristo nebabike ku lufu ne diluijakana bua kulonga mushindu wakakumbana malaya a Yehowa adi atangila Dimiinu. (1 Petelo 1:10-12) Aba ba munkatshi mua mikoko mikuabu badi Yehowa wangata bu bakane mu matuku etu aa nebapatuke mu nkita ne diluijakana bua kubandila Mparadizu wa pa buloba wakakulabu bualu buende pakamanyishabu lumu luimpe mu ndongoluelu eu wa malu. Ntshikondo kayipu tshia disanka tshikalabi!
16. Ntshinyi tshitudi mua kuamba bua dibiishibua ku lufu mu Dituku dia Dilumbuluisha dia aba badi bafua mu tshikondo tshietu etshi?
16 Munkatshi mua Dituku dia Dilumbuluisha dia bidimu tshinunu, ndîba kayi menemene diabiishibua ku lufu aba bavua bafue ne lulamatu mu bidimu ebi bia ku nshikidilu wa ndongoluelu wa malu wa Satana? Bible kêna ubuakula to. Kadi, bidi bia meji bua kukomesha ne: aba badi bambibua bakane badi bafua mu tshikondo tshietu etshi nebababidile dibiishibua ku lufu dia kumpala ne nunku kumona mua kuditua ne musumba munene wa bapanduki ba ku Armagedon mu mudimu wa diakidila bipungu bia bantu ba kale bafumina ku bafue anyi? Eyowa, mmudibi!
Ditekemena didi dipetesha disambibua
17, 18. (a) Ndisambibua kayi didi ditekemena dia dibiishibua ku lufu dipetesha? (b) Tudi basakibue bua kumanyisha tshinyi pa bidi bitangila Yehowa?
17 Ditekemena dia dibiishibua ku lufu didi dipetesha bukole ne disambibua kudi bena nkristo buonso lelu’eu. Bituashala ne lulamatu, bualu bua mu tshintuluntulu nansha bumue ne muluishi nansha umue kabiena mua kutuiba difutu dietu nansha! Tshilejilu, mu Annuaire des Témoins de Jéhovah 1992, mu dibeji dia 177, mudi foto ya bena nkristo ba dikima mu Ethiopie bakafua pamutu pa kuvila ditabuja diabu. Mêyi adi kuinshi kua foto adi amba ne: “Mpala itudi batekemene bua kumona mu dibiishibua ku lufu.” Ndiakalenga kayipu bua kufika ku dimanya bantu ba mushindu’eu ne bakuabu bakena kubadika bakaleja lulamatu lua muomumue kumpala kua lufu!
18 Netuambe tshinyi bua bana betu basuibue ba balume ne ba bakaji bapumbishibua kudi bukulakaje anyi bulema kampanda bua kupanduka dikenga dinene? Mu diumvuangana ne ditekemena dia dibiishibua ku lufu, badi ne matuku atshilualua a mpatshi biashalabu ne lulamatu. Ne tuetu petu bituenza ne dikima dionso midimu ya ditabuja mu mulambu wa tshia-bupikudi wa Yezu, tudi ne matuku atshilualua a mpatshi. Bua tshinyi? Bualu, anu bu Paulo, tudi batekemene “dibiishibua ku lufu dia bakane ne dia bakena bakane.” Ne mitshima yetu mijima, tudi tuela Yehowa tuasakidila wa manza tente bua ditekemena edi. Bushuwa, bidi bitusaka ku diambulula mêyi a mufundi wa misambu aa: “Nuambile ba munkatshi mua bantu ba bende butumbi [bua Nzambi], numanyishe ba munkatshi mua bantu bonso malu a kukema akenzeye. Bualu bua Yehowa udi munene, budiye n’abu mbua kutumbishibua bikole.”—Musambu wa 96:3, 4.
Udi mua kumvuija anyi?
◻ Mmvese kayi idi mua kuambuluisha bua kujadika ditekemena dietu mu dibiishibua ku lufu dia pa buloba?
◻ Bena nkristo mbambibue bakane pa nshindamenu kayi lelu’eu?
◻ Mmunyi mudi ditekemena dia dibiishibua ku lufu mua kutupetesha dikima ne dipangadika?
[Tshimfuanyi mu dibeji 9]
Anu bu Paulo, bena nkristo bela manyi badi ne ditekemena mu dibiishibua ku lufu bua kuya mu diulu