Bamanyishi ba Bukalenge badi balonda

Bena tshisamba tshia Nzambi badi badifila ku budisuile

DÎNA diende divua Yozefe, ne uvua muena ku tshidiila tshia Chipre. Uvua munkatshi mua bena nkristo ba mu siekele wa kumpala bakapanyisha madimi ne nzubu bua kufila mapa a mfranga bua dilubuluka dia Buena-nkristo. Uvua mumanyike bu Barnabase, dîna didi diumvuija se: “Muana wa balume wa Busambi” bualu uvua muena musangelu ne kalolo.​—Bienzedi 4:34-37, NW.

Ditabalela bakuabu dilelela dia mushindu’eu ditu misangu yonso tshimanyinu tshia batendeledi balelela ba Yehowa. Bantemu ba Yehowa lelu’eu kabena bashilangane to, bu mudibi bizangika mu bualu budi bulonda ebu buakenzeka mu Bidiila bia Salomon.

Tshisumbu tshia Bantemu bapite pa 60 ba ku Australie ne Nouvelle-Zélande bakenza luendu ku Honiara, tshimamuende wa bukalenge bua Bidiila bia Salomon ku Guadalcanal. Bavua balue kuambuluisha diibaka Nzubu wa Mpuilu bua bisangilu binene bia bena nkristo. Biakabalomba mbingu pabuipi ne ibidi bua kuibaka nzubu wa miaba ya kusomba mitue ku 1 200!

Pabuipi ne tshikondo atshi, bakokeshi ba mu tshimenga tshikese tshia Munda, mu tshidiila tshia Nouvelle Georgie, bakapesha Bantemu ba Yehowa tshitupa tshia buloba munkatshi menemene mua tshimenga. Bakasua kuibaka Nzubu wa Bukalenge, muaba wa ntendelelu. Ne bulelela bavua bamukengela. Bavua badisangishila mu tshisombelu tshia nzubu mukese wa mabeji, kadi kabavua ne mfranga bua kuibaka Nzubu wa Bukalenge.a Tshisumbu tshivua tshienza nangananga ne bakulakaje, balema ne bana ne kakuvua muntu nansha umue uvua ne dimanya kuenza mu mudimu wa luibaku.

Ku muntatshi wa kilometre pabuipi ne 380, ku tshidiila tshia Guadalcanal, Bantemu ba mu tshimenga tshia Honiara bakadifila ku budisuile. (Misambu 110:3) Bakela meji ne: “Bikale bana betu ba ku matunga makuabu bavua ku budisuile batuibakile Nzubu wa Mpuilu mu mbingu ibidi, nunku tudi mua kuambuluisha kabiyi mpata bana betu ba ku Munda ne kubibakila Nzubu wa Bukalenge mu mbingu ibidi.”

Ke tshivua tshienzeke. Dimue dituku, buatu kampanda buwule ne Bantemu bena budisuile, disanka ne mitalu buakafika ku Munda. Balume ne bakaji, bakulumpe ne bana, buonso buabu bavua mu mudimu wa kutulula bintu ne kudiakaja bua kutuadija luibaku ne mabaya, siman, milonda ya musaka, ne bikuabu bintu biakafika ku Munda kumpala kuabu.

Tshitupa tshîpi kunyima kua mudimu mumane kutuadija, makubakuba ne mipenya biakakosesha mâyi mu tshimenga. Kadi, etshi katshiakamueneka lutatu luvua kaluyi mua kutshimunyibua to. Bantemu bakumbula tshina tshia mâyi tshiakabakuatshisha mu tshikondo tshijima tshia luibaku. Bena mudimu buonso aba bavua badia munyi? Kakuvua lutatu to. Bena budisuile ba ku Honiara bavua balue ne biakudia bivule bifile kudi bisumbu bia ku Honiara. Bavua balue mene ne babalambidi babu!

Bena mutumba bavua babandila dilubuluka dia mudimu ne bakema. Umue wa kudibu wakamba ne: “Midimu minene kayitu ijika mu matuku patupu. Itu ikengela bidimu.” Muena mutumba mukuabu, mfumu kampanda wa tshitendelelu, wakatonda ne: ekleziya wende wakatuadija luibaku kukadi bidimu 20 ne kaluena luanji kujika to. Bishilangane, Nzubu wa Bukalenge mupiamupia wa Bantemu ba Yehowa wa mu Munda wakajika mu matuku dikumi patupu!

[Mêyi adi kuinshi]

[Tuarte mu dibeji 24]

(Bua kumona malu bimpe, tangila mu mukanda)

Mbuu wa Pasifike wa ku Sud

BIDIILA BIA SALOMON

Munda

GUADALCANAL

Honiara

[Karte]

AUSTRALIE

NOUVELLE-ZÉLANDE