Disanka didiku bua badi bapeta bulelela
MU TSHIBAMBALU tshiende tshia kuulu, mulume kampanda muena Finlande wakapeta mukanda wa Le divin plan des âges. Wakaditua diakamue mu diwubala ne katupa kakese kunyima wakadiambila ne: ‘Ke bulelela ebu; ke bulelela ebu.’ Kunyima kua kutuluka ku tshibambalu etshi, wakambila mukajende se: “ngapetshi tshitendelelu tshilelela.”
Muand’eu ng’wa pa buawu bua mushindu udi muntu’eu mupete bulelela, kadi bavule ba ku Bantemu ba Yehowa badi mua kulonda ne: bakandamuna pabo bia muomumue. Buonso buabo badi mua kukuambila mutu dipeta bulelela dituala disanka. Malu mamonamona adi alonda aa adi aleja bualu ebu.
Malongesha malelela a mu Bible adi afila disanka
Margarita Königer wakakolela mu [tshimenga tshia] Munich, mu Allemagne, mu Mvita Mibidi ya Buloba Bujima. Nzubu miosha ne mibumbula kudi bombe ke bintu bivua bimueneka pa tshibidilu. Tutuende wakafua mu mvita. Mu dibuela diende mu misa ya ekleziya Katolike uvua umvua masambila menza bua basalayi bena Allemagne ne bua führer, Hitler. Kunyima kua mvita, wakapeta dipa dia mbulamatadi bua kuya kulonga ku Etats-Unis mu programe wa dishintakajangana balongi pankatshi pa matunga. Wakajingulula ne: bantu bavua nende bulunda, ke bua tshinyi wakadiebeja tshivua bumue tshisaka bantu, bavua ne dijinga dia kuikala mu ditalala, bua kupanga kueyemenangana ne kukinangana mu tshikondo tshia mvita. Pakapinganaye mu Munich, wakapetangana ne Bantemu ba Yehowa, ne ku diambuluisha dia dilonga dia Bible nabo, wakapeta mandamuna ku nkonko yende. Udi wamba se: “Bakandeja ku butuangaji bua Bible ne: spiritu mibi mmidibuejakaje mu bualu ebu . . . Bible udi uyibikila ‘bakokeshi ba bukua panu,’ ne, mene, udi wamba ne: Satana ‘udi upambuisha buloba buasa buonso.’ . . . Bu muakashindamenadi pa ngenzelu ya dipepeja Nzambi ne mibiamibi ya matunga ne bantu bua kukomesha, mmushindu kayipu udi diandamuna edi dia meji ne diakanyine!”—Efeso 6:12; Buakabuluibua 12:9.
Margarita udi utungunuka ne: “Biakantuadila disanka dia bungi bua kulonga dilongolola dia Nzambi bua kujikija ntatu ya buloba. Tòo, kabiakuikala ku diambuluisha dia ngenyi anyi ndongoluelu bia bantu bu mudi bashidimunyi ba mu bulongolodi ebu bamba. Bishilangane, Bible udi uleja se: mbulamatadi mupiamupia wa mu diulu neadiangatshile malu a pa buloba mu bianza. . . . Yezu Kristo wakalongesha bayidi bende bua kusambila ne: ‘Bukalenge buebe bulue.’ . . . Ngakabanga kumona se: bukalenge ebu mmbulamatadi mulelela ne se: amu ku diambuluisha diabo ke kualua ditalala dilelela ne dia pa buloba bujima.” Munkatshi mua bidimu bitue ku 30, Margarita uvua musadile bu misionere mu matunga atanu a mu Afrike—bidimu 19 biashadi mmubipitshishe mu mudimu wa dimanyisha bulelela kudi bantu badipuekeshi ba ku [tshimenga tshia] Ouagadougou, mu Burkina Faso.
Bualu bumona ebu bua Margarita kabuena nkayabo nansha. Bavule mbandamune bia muomumue pakajingululabo se: bamfumu ba bitendelelu badi ku nseke yonso ibidi ya mvita balomba Nzambi ditshimuna. Bantu ba muoyo mululame badi bajingulula mudi diumvuija dia mu Bible dia se: Nzambi kêna ne bualu bua kuenza nansha bumue mu mvita ya bantu kadi idi ijuka bualu “bulongolodi ebu buonso mbulale mu bukole bua mubi” dikala dia meji. Bakebi ba bulelela aba badi bajingulula se: bena nkristo balelela badi ne bua kuikala “kabayi bena bulongolodi ebu” kadi badi ne tshia kushala ne ndubidila mu malu abu. Pa kujingulula se: Bantemu ba Yehowa badi ne nsombelu wa mushindu eu, basankididi bapiabapia ba bulelela aba badi balua batuishibue ne: mbapete bulelela. Bantu ba mushindu eu badi bakola mu ditekemena ne mu disanka eku bapeta dimanya divule pa bidi bitangila kabingila ka dilekelela malu mabi dia Nzambi ne mualuaye mu katupa emu kufila ditalala ne buakane pa buloba ku diambuluisha dia Bukalenge buende.—1 Yone 5:19, NW; Yone 17:16, NW; Matayo 6:9, 10.
Mêyi-maludiki malelela a mu Bible adi atuala disanka
Daniel Rosero wa mu Equateur uvua umvua se: muoyo kawena ne tshipatshila, nenku wakatuadija bunuavi. Mu ekleziya muvuaye uya bakamulongesha ne: tshintu tshivuaye ne bua kuindila tshivu’anu lufu ne inferno wa kapia. Wakandamuna se: “Nengosheka, nunku lekela nnue!” Uvua ne dîku dia bantu muanda-mukulu ne kavua ufilamu kantu, ne uvua dîba dionso uluangana ne mukajende, Delia. Malu akakudimuka Dia-lumingu kampanda mu dinda pakabakumbula Bantemu ba Yehowa ne kutuadijabo kulonga Bible. Musangu wa kumpala wakaya Daniel mu mpuilu wa tshijengu wa Bantemu ba Yehowa, wakajingulula se: uvua mupete bulelela. Udi wamba ne: “Bulongame buakankemesha. Bantu bavua mu diumvuangana, bavule bavua pamue. Mvua mmona dinanga munkatshi mua musumba. Kakuyi muntu unua mfuanka. Kakuyi ngakuilu mubi. . . . Ndi mvuluka mumvua ngela meji ne: ‘Ke bulelela ebu!’ Kabivua ditshina lufu anyi ditshina nshikidilu wa bulongolodi ebu biakansaka. Bivua bukezuke bua bulongame.”
Bena dîku dijima dia Rosero bakalua Bantemu ba Yehowa. Mu ditumika ne mêyi-maludiki a mu Bible, nsombelu wa dîku diabo ne wa mfranga wakalongolodibua. Delia Rosero udi wamba ne: “Nudi bamanye ne: bionso ebi mbilue anu ku diambuluisha dia bulelela bua Bible. Nnganyi udi mua kumanya muaba uvua mua kuikala bana banyi bu kakuyi Dîyi dia Nzambi? Buonso buabo muanda-mutekete badi babatijibue ne badi ne nkatshinkatshi. Buanyi meme bulelela budi bumvuija nsombelu mupiamupia menemene ne disanka dipiadipia.”
Bualu bumona kudi dîku edi dia Rosero kabuena bumue nkayabo. Bavule mu matuku etu aa badi batatshishibua kudi ntatu. Kabingila kamue nka se: mêyi-makulu a malu a tshitembu adi mu Bible kaena mu kabujima manemekibue, bu muvuabi mu bipungu bishale. Bitendelelu bivule mbilonde njila eu, mu dîna dia dilekelela anyi bualu bidi bimona se: bu mukadi bikondo bishintuluke, bienzedi bilenga bia kale ki mbiakanyine tshikondo tshia lelu. Nenku, anu bu bakuabo, dîku dia Rosero divua dibabata kadiyi bulombodi bua Bible. Kadi, padi bantu badipuekeshi ba mushindu’eu bafika ku dijingulula mmuenenu wa Nzambi pa bikadilu bilenga ne nsombelu wa dîku, kakuyi dijingakana badi batumika ne bidibo balonga. Ku miyuki yabo tudi tumona bipeta bilenga bia kuenza nunku.
Disanka didi ne bua kudimibua
Kadi, ebi kabiena bisua kumvuija ne: muena nkristo udi’amu ne disanka to. Bushuwa, ntatu idi bantu pa tshibidilu batutakena nayi, bu mudi bulofua, bubedi, ne lufu, idi ikuata bena nkristo kabidi. Bena nkristo pabo badi ne bua kuditua mu diluangan’anu mvita ne dipanga dia bupuangane ne mateketa biabo. Muyuki wa mu Bible udi wamba ne: Lota uvua ‘mutatshishibue ku bienzedi bia bundu bia bashipi ba mikenji’ mu tshimenga tshia Sodome. Bena nkristo ba lulamatu kabena mua kuepuka nyanji ya muomumue padibo bamona nsombelu mibi mikalaku.—2 Petelo 2:7, 8.
Nansha nanku, aba badi bapete bulelela badi ne muabi kampanda. Tshilejilu, muena ditabuja udi udila bua muntu kampanda udi mufue kêna umvua nyanji ya “dibungama bu mudi bakuabo kabidi badi kabayi ne ditekemena.” Dibungama diende kadiakupita mikalu to. Bidi bilelela kabidi mu malu makuabo. Muntu udi mupete bulelela mmumanye se: makenga a mpindieu ng’a tshitupa tshîpi. Ditekemena didi divuija kutuala ntatu bualu bupepele. Nsombelu wa nkatshinkatshi udi kabidi wambuluisha.—1 Tesalonike 4:13, NW.
Paulo wakapesha bena nkristo mubelu’eu: “Nusanke mu Mukelenge misangu yonso, nengambe tshiakabidi ne, Nusanke.” (Filipoi 4:4) Ebi bidi biumvuija ne: nansha mudi buonso mua kupeta disanka, didi kabidi mua kupangika. Maditatshisha a mu bulongolodi ebu bukulukulu adi kabidi tshipumbishi. Kusangisha apu, Bible udi utuambila ne: bidi bikengela bua tuetu kudima disanka, dimue dia ku mamuma a spiritu wa Nzambi. (Galatia 5:22) Biwatungunuka ne kupeta dimanya dia bulelela ne kudivulukila maneme a mu nyuma adidi dikutuadile ne atshididi dikutuadila, disanka diebe kadiakukepela to. Nedilue dikole bu mutudi tusema ku tshikondo tshikala Nzambi mua ‘kukupula tshinsonji tshionso’ ku mêsu a bantu ne pikalaku kakuyi kabidi ‘madilu nansha muadi nansha kanyinganyinga.’—Buakabuluibua 21:4.
[Bimfuanyi mu dibeji 8]
Disanka ne bulongame mu mpuilu ya Bantemu ba Yehowa bitu bikemesha bavule