Bapele nebindile tshikondo bule munyi?

“Pikala nsangilu wa bantu mudikadile kayi mua kuambuluisha bavule badi bapele, kêna mua kupandisha bakese badi babanji.”​—John F. Kennedy.

“NDI musue matuku atshilualua ikale mimpe bua muntu yonso​—kakuyi bupele, kakuyi muntu mupange nzubu, mparadizu!” Ke muakamba nsongalume wa bidimu 12 wa ku Saõ Paulo, mu Brésil. Kadi kudi mushindu wa kumbusha bupele anyi? Bapele nebindile tshikondo bule munyi?

Bamue badi badimona bapele bualu kabena mua kusumba bintu bidibo nabi dijinga. Kadi, ela meji ku nsombelu ya dibungama ya aba badi bupele bukole bukuate. Udi mua kufuanyikija ntatu mikole ne dipanga disanka bia bantu aba anyi? Bamue badi baluangana ne nyunyu ya mouette ne mpuku, padibu bakala bimanshilu bia bukoya bua kukeba biakudia! Ntshikondo bule munyi tshidi bupele budi bukuata bantu ebu ne tshia kunenga? Lubila lua Federico Mayor, direktere-jenerale wa UNESCO (Ndongoluelu wa Matunga Masanga wa bushidimunyi ne bushikuluji), luvua lukumbanyine: “Tudilamunayi ku dilekelela dibi didi ditufikisha ku dilengulula malu akena ne bua kulenguludibua​—bupele, nzala ne dikengakana dia bantu.”

Ditekemena dia dikala-bilenga dia bantu buonso nedikumbane anyi? Nditekemena kayi didi nadi bapele?

Mmalu kayi adi mindile bapele?

Balombodi bena ngenyi milenga badi ne tshipatshila tshia kupetesha midimu mivule, mafutu mimpe, programe muimpe wa dikubibua dia nsangilu wa bantu, ne dikosolola dimpe dia buloba bua kudima. Badi batua ku tshia mfumu wa kale wa Etats-Unis John F. Kennedy: “Pikala nsangilu wa bantu mudikadile kayi mua kuambuluisha bavule badi bapele, kêna mua kupandisha bakese badi babanji.” Kadi, meji mimpe, kaena nkayawu mua kumbusha bupele. Tshilejilu, ditantamuka dia malu a mfranga didi mua kuambuluisha bapele mu tshi-bungi anyi? Ki mmenemene to. Mulombodi wa kale wa [ditunga dia] Inde Jawaharlal Nehru wakamba ne: “Makole a nsangilu ya bantu ya kapitalizme, wowo kaayi makontolola, adi afikisha babanji, babanji menemene ne bapele, bapele menemene.” Kadi, pa kumbusha ntatu ne dipangika, nyanji ya didiumvua bu bapange mushinga idi ivudija kabidi bujitu bua bapele. Balombodi bantu badi mua kuambuluisha bapele bua kutshimuna nyanji ya didiumvua bu bapange diambuluisha ne ditekemena anyi?

Bushuwa, bapele bavule bavua bapange ditekemena mbalonge mua kupita ne bupele ne kutshimuna nyanji ya didipuekesha mushinga kumpala kua ntatu minene, bu mudi dipueka dinenanenayi dia mushinga wa mfranga ne bulofua. Kusakidila apu, nzala, dipanga nzubu, ne dikenga nebishimbudibue kakuyi mpata. Bidi bikukemesha anyi? Tudi tukulomba bua kubala tshiena-bualu tshidi tshilonda etshi: “Mu katupa kîpi emu, muntu nansha umue kakuikala mupele!”