Bamanyishi ba Bukalenge badi balonda

Bansonga badi bamba lumu luimpe mu Afrike

KATUPA kîpi kunyima kua dibiishibua ku lufu dia Yezu, mulume kampanda muena Afrike uvua ukumbula Yeruzaleme. Bible kêna ufila dîna diende to. Mmumanyike anu bu “Muntu munene, mulami wa bintu bionso bia Kandase, mukalenge mukaji wa Etiyopia.” Bua tshinyi mmutedibue mu Bible? Bualu muanjelo kampanda wakalombola mumuangalaji wa evanjeliyo muena nkristo Filipe bua kumumanyisha “[Lumu luimpe lua, NW] Yezu.” Mulume eu muena Ethiopie uvua muena Afrike wa nzanzanza mufunda mu Bible wakalua muena tshisumbu tshia bena nkristo.​—Malu Menza 8:26-39, Mukanda wa Mvidi Mukulu

Lelu’eu, kudi nkama ya binunu ya Bantemu ba Yehowa mu Afrike. Batu bababidila bikondo bionso bua kuabanyangana ne bakuabu lumu luimpe lua Yezu. Malu mamona adi alonda aa adi aleja se: nansha bansonga mu Afrike badi ne tshitupa tshinene tshidibu bakumbaja mu bualu ebu.

◻ Sandy ne Priya, bansongakaji ba bidimu 11 mu Naïrobi, ku Kenya, bavua bena mutumba. Bavua banange kunaya pamue ne kushintakajangana mikanda ya miyuki. Baledi ba Priya bakatuadija kulonga Bible ne Bantemu ba Yehowa. Mpindieu Priya ukavua ne mushiki wa mikanda mipiamipia ya kusakidila ku mushiki wende, kusangisha ne umue musunguluke wakalua mukanda wende wa pa muoyo, Telejayi Mulongeshi Munene, mupatula kudi Watchtower Bible and Tract Society. Wakabanyangana mukanda wende wa Mulongeshi Munene ne mulunda wende Sandy, ne bansongakaji aba bakatuadija kuwulonga pa tshibidilu.

Kadi, mamuende wa Sandy, Una, uvua ubuela mu Ekleziya Anglikane ne kavua usua bua muanende wa bakaji abale mikanda ya Bantemu ba Yehowa. Nansha muvua mamuende umuluisha, dilonga diakatungunuka. Dimue edi, Sandy wakasengelela mamuende bua kuteleja diyukidilangana diabu musangu umue tshianana. Nshapita wakabala bansongakaji aba dituku adi uvua ne mutu wa bualu “Balume babidi bakasekelela Mifikilu ya diledibua.” Una wakateleja ne wakatuibua bikole ku muoyo. Ne lukasa luonso wakaya kudi mamuende wa Priya ne nkonko ya bungi pa Bible.

Mamuende wa Priya wakadilongolola bua se: Ntemu kampanda alonge Bible ne Una. Katupa kîpi kunyima, Una ukavua wabanyangana bivuaye ulonga ne muena mudimu nende Dolly. Eku, Priya ukavua ne bidimu 11 wakatungunuka ne kulubuluka ne wakapangadija bua kuleja tshimanyinu tshia diditshipa diende kudi Yehowa Nzambi ku batismo wa mâyi mu mpuilu kansanga wa distrike wa Bantemu ba Yehowa. Bia disanka divule bua Priya, mu mpuilu umue umue awu, Una ne Dolly bakatambushibua pabo!

◻ Kudi amue matunga a Afrike mudi mudimu wa Bantemu ba Yehowa kawuyi mufunda mu mikanda ya mbulamatadi. Mu dimue dia ku matunga a mushindu’eu, mu ka-bujima kamuena tshikisu bua midimu ya malu a Nzambi ne mitabuja bia Bantemu. Mu kalasa kampanda mu ditunga adi, muana mutekete wa balume wa bidimu muanda-mutekete ne muanabu wa balume wa bidimu bisambombo​—bana ba Bantemu—​bakabapesha njila bua kupatuka mu kalasa dîba dia masambila a malu a Nzambi.

Dimue edi, mulongeshi mupiamupia wakalomba bua se: bana batekete ba balume aba badisangishe mu disambila ne bana bakuabu. Mukulu wa ku bana ba balume aba wakabenga ne wakakumibua kudi mulongeshi. Muakunyende wa bidimu bisambombo Shadrack, wakafyatutuka bua kumonangana ne direktere mu biro biende. Direktere ne mulongeshi mupiamupia bakamuebeja bua tshinyi kavua usua bua kudisangisha ne bakuabu. Bakamuebeja né uvua utshina bua kukumibua kudi baledi bende. Wakandamuna mu tshiena-Arabe tshimpe ne: “Tòo, Nzambi undi ntendelela kêna Nzambi wa mukodio nansha kadi udi wa bulongame. Tshiena mua kuikala Ntemu wa Yehowa ku mbelu ne muena ntendelelu mukuabu mu kalasa!” Bu tshipeta, bakamulekela.

Kunyima kua kubatijibua, mulume eu muena Ethiopie mutela mu mukanda wa Bienzedi wakatungunuka “ne luendu ne disanka dipite.” (Malu Menza 8:39, MMM) Bia muomumue lelu’eu, bamanyishi ba Bukalenge mu kontinan eu mualabale wa Afrike badi batshionkomoka bua disanka dia mudimu didibu nadi dia ‘kuamba lumu luimpe lua Yezu.’​—Bienzedi 8:35.