Bamanyishi ba Bukalenge badi balonda

‘Dîyi dia Nzambi diakadiundadiunda’

TSHISUMBU tshia bena nkristo tshiakadiunda kumbukila ku bantu batue ku 120 kupitabu 3 000 mu ndambu mukese wa mêba panyima pa dienjibua diatshi. (Bienzedi 1:15; 2:41) Bible udi umvuija ne: ‘dîyi dia Nzambi diakadiundadiunda, bayidi bakavulangana ba bungi mu Yeruzaleme.’ (Bienzedi 6:7) Kunyima kua bidimu bikese tshianana, tshisumbu etshi tshipiatshipia tshìvuà tshifuma ku dienjibua tshiakalua bulongolodi bua pa buloba bujima buvua ne bena nkristo mu Afrike, mu Azi, ne ku Mputu.

Tshisumbu tshia bena nkristo lelu’eu tshidi mu mushindu wa muomumue tshipeta didiunda dia lukasa. Tshilejilu, ku Mexique, bungi bua bamanyishi ba Bukalenge mbudiunde mu bidimu bitanu tshianana kumbukila ku bungi bupite pa 100 000 bua kufika ku 443 640! Mu 1995, muntu 1 pa 59 ku Mexique wakabuela mu Tshivulukilu tshia lufu lua Yezu tshisekelela kudi Bantemu ba Yehowa. Pabi, dinowa dia mu nyuma mu ditunga adi ki ndijikijibue, anu bu mudibi bileja kudi bualu bumona budi bulonda ebu.​—Matayo 9:37, 38.

Mu tshimenga kampanda mu ditunga dia Chiapas, muntu nansha umue kavua muanyishe dilonga dia Bible ku mbelu ne Bantemu ba Yehowa, nansha kunyima kua bamane kuyisha lumu luimpe munkatshi mua bidimu bitue ku 20 mu muaba au. Mbimueneke patoke se: bavule ba ku bena tshimenga etshi bavua batshinyishibua kudi mulume kampanda uvua muende lumu bua dikala muena tshikisu. Bavua batshina ngandamuinu wende bu yeye musokolole se: bavua balonga Bible ne Bantemu.

Bantemu babidi bena dikima bakaya ku muaba eu bakapangadija bua kujandula lutatu elu pa kuya buludiludi kudi mulum’eu. Pakafikabu ku mbelu kuende, mukajende wakunzulula tshiibi ne kuteleja ne ntema yonso mukenji wabu. Uvua mu mushindu wa pa buawu usua kumanya bivule pa bidi bitangila kuikala ne muoyo mu mparadizu pa buloba. Kadi wakatonda ne: bayende uvua mua kumukoleshila malu bu yeye ne bua kulonga Bible. Bantemu bakamumvuija ne: bu yeye kayi mukonkonone ne ntema tshidi Bible wamba, kavua nansha bia munyi mua kumanya mushindu wa kusadila Nzambi ne kupeta bua kashidi muoyo pa buloba. Wakitaba dilonga dia Bible.

Anu bu muvuabi bitekemena, bayende kavua musankishibue kudi dipangadika diende. Wakamukandika ditumika ne mashinyi ende bua kuya mu bisangilu bia bena nkristo, nansha muvuaye mumupe dianyisha dia kutumika nawu bua bipatshila bikuabu. Nansha muvuaye umuluisha, uvua pa tshibidilu uya lua makasa ku Nzubu wa Bukalenge wa Bantemu ba Yehowa wa pabuipi, uvua ku mutantshi wa kilometre 10. Kabiakanenga bua bakuabu kumonabu dikima diende ne dipangadija. Bantu bakatuadija kuteleja pavua Bantemu babakumbula ku mabu. Bamue bakatuadija mene ne kuya mu bisangilu ne mukaj’eu. Kunyima kua tshikondo tshîpi, Bantemu bakavua balombola malonga a Bible bu 20 mu tshimenga atshi!

Mulunda kampanda wa mukaj’eu wakapangadija pende bua kulonga Bible nansha muvua bayende umuluisha. Bualu bua dikema, uvua mukankamijibue bua kuenza nunku kudi bayende wa mukaji wa kumpala. Kunyima kua mulume eu mumane kuyukidilangana ne bayende, buluishi buakajika. Nunku nkunyima kua bidimu 20 kuvua bulelela bua mu Bible bukuame ndekelu wa bionso mamuma, ne bantu bapite pa 15 badi balonga Bible ne babuela mu bisangilu bia bena nkristo, pa kukonga ne bakaji babidi aba, badi mpindieu batangalaja lumu luimpe.