Bantemu ba Yehowa pa buloba bujima: Suède

SUÈDE udi ku luseke lua est wa tshitupa tshia buloba tshidi tshibuela mu mâyi tshia Scandinavie (Mputu wa ku mutu menemene) ne mmudialabaje ku mutu kua Tshijengu tshia Arctique. Mumanyibue bikole bua mêtu ende a mitshi ya mabeji akena afubidila lukasa, bia muomumue ne bua majiba manene, ne mikuna biende, Suède udi dimue dia ku matunga a ku Mputu adi ne bantu bakese [kadi] batangalakangane. Kadi, Bantemu ba Yehowa mbakeba ne mbapeta muaba awu banangi ba bulelela katshia ku ndekelu wa bidimu bia 1 800. Tangila tshilejilu tshia mu matuku adi panshi aa.

Mamu kampanda uvua ulonga Bible ne Bantemu, kadi bayende kavua musue to. Wakambila mukajende bua kuimanyika dilonga, ne ke tshiakenzaye. Mulum’eu uvua wenza mudimu ku tshilaminu tshia maluvu. Dimue edi muendeshi wa kaminyo kampanda wakalua ku tshilaminu etshi ne muikulu wende wa balume wa bidimu dikumi. Kaku eu e kuambila mulum’eu bua kumutangidila muana padiye wela bintu mu kaminyo. Bua kumona mua kuyikila nende, mulum’eu wakebeja muana tudo tuvuaye mupete mu mufikilu mushale wa diledibua diende. Mulum’eu wakakema pakamuambila muana se: yeye ne dîku diende kabavua basekelela maledibua bualu bavua Bantemu ba Yehowa. Muana eu wakamuambila kabidi se: uvua mupete tudo mu bikuabo bikondo bia mu tshidimu ne kavua mupange tshintu nansha tshimue, bualu uvua ne dîku dia musangelu ne dia dinanga. Kakuvua tudo tupita dinanga ne musangelu to, ke muakasakidilaye.

Muana eu wakapingana ne kakuende misangu mivule. Musangu wonso, mulum’eu uvu’amu wela muana nkonko ya bungi, ne uvua ukemeshibua bikole bua mushindu uvua muana ufila mandamuna ne bululame, buludiludi kakuyi dielakana. Uvua kabidi ukemeshibua ku dianyisha divua nadi muana bua malu a mushinga mukole malelela. Butuku kampanda kunyima kua dibandila programe ku televizion uvua wakula bua nsombelu ya dikenga idi pa buloba, wakamona se: uvua ne bua kukonkonona ne disuminyina malu a mu nyuma. Wakela Ntemu [mukaji] uvua ulonga Bible ne mukajende nshinga ne kumulomba bua kupinguluka. Katupa kîpi kunyima, mulum’eu wakatuadija kulonga Bible ne Ntemu [mulume] kansanga, ne wakenza malubuluka a lukasa. Wakabatijibua mu dia 10 Tshisanga 1994. Mukajende udi mpindieu pende mubatijibue.

Didiunda didi dilomba diibaka

Suède nditunga didi ne bena tshimuangi bavule badi baluila ku matunga makuabo, ne Bantemu bena Suède bakapeta bipeta bimpe mu dibayisha. Bua kumona dilubuluka didi mudimu mupete mu tshi-bungi, Nzubu ya Bukalenge mipiamipia idi ikengedibua bua kuakamangana ne didiunda edi. Kumbukila ku 1986 too ne ku 1993, Nzubu ya Bukalenge 37 yakibakibua ne diibaka dia lukasa lukasa, ne bakadiundisha ne kulongolola Nzubu 8. Mu 1994 nkayamu, Nzubu ya Bukalenge ya pa mutu muanda-mutekete yakibakibua, ne isatu yakalongolodibua.

Mpindieu, kudi bisumbu 65 bidi bindile diambuluisha bua kuasa anyi kudiundisha anyi kulongolola Nzubu yabi ya Bukalenge. Bena budisuile batue ku 2 500 badi bambuluisha mu malongolola a diibaka a nunku, ne bisumbu bidi bianyisha bikole diela diboko diabo dia dinanga.

Tshitupa tshia ku nord tshia Suède, tshidi tshidialabaje ku mutu kua Tshijengu tshia Arctique, batu imue misangu batshibikila ne: buloba bua dîba dia munda-nkulu. Badi batshibikila nanku bualu dîba kaditu dibuela mu muvu wa été to. Kadi mu Suède mujima, bukenke bua bulelela budi pabo butungunuka ne kukenka bikole. Ne dibenesha dia Yehowa, bukenke bua mu nyuma abu kabuakubuitshidila nansha kadi nebuikale buenda bukenkesha bikole bitambe.

[Kazubu mu dibeji 8]

NSOMBELU WA DITUNGA

Tshidimu tshia mudimu 1994

BUNGI BUBANDILE BUA BAMANYISHI: 24 246

MUAYENE: Ntemu 1 bua bantu 362

BAKABUELA MU TSHIVULUKILU: 40 372

MUAYENE WA BAMPANDA-NJILA: 2 509

MUAYENE WA MALONGA A BIBLE: 11 306

BUNGI BUA BABATIZA: 850

BUNGI BUA BISUMBU: 358

BIRO BIA FILIALE: ARBOGA

[Tshimfuanyi mu dibeji 9]

Biro bia filiale ne Nzubu wa Betele ku Arboga

[Tshimfuanyi mu dibeji 9]

Bantemu ba kumpala mu Hjo bavua batumika ne bise mukese eu bua kumanyisha mu teritware wa kilometre karé mitue ku 5 000