Bantemu bena nkristo bua bumfumu bukena mikalu bua Nzambi

“‘Numanyishe ngikadilu milenga’ ya eu wakanubikila ku mîdima bua kunubueja mu butoke buende bua dikema.”​—1 PETELO 2:9, NW.

1. Mbumanyishi kayi bua pa buabu buakafidibua pa bidi bitangila Yehowa mu bikondo bia kumpala kua buena nkristo?

MU BIKONDO bia kumpala kua buena nkristo, mulongolongo wa bantemu bakafila ne bukitu buonso bujadiki se: Yehowa udi Nzambi umuepele mulelela. (Ebelu 11:4–12:1) Bakole mu ditabuja diabu, bakatumikila kabiyi ditshina mikenji ya Yehowa ne kubenga bua kutupa ku mikenji mu malu a ntendelelu. Bakafila bumanyishi bukole pa bidi bitangila bumfumu bukena mikalu pa bifukibua bionso bua Yehowa.​—Musambu wa 18:21-23; 47:1, 2.

2. (a) Ntemu mutambe bunene wa Yehowa nganyi? (b) Mbanganyi bakapingana pa muaba wa ditunga dia Izalele bu bantemu ba Yehowa? Mmunyi mutudi babimanye?

² Ntemu wa ndekelu ne mutambe bunene wa kumpala kua buena nkristo uvua Yone Mubatiji. (Matayo 11:11) Wakapeshibua disanka dia mudimu bua kumanyisha dilua dia Musungula, ne wakalubula Yezu bu Masiya mulaya. (Yone 1:29-34) Yezu udi Ntemu mutambe bunene wa Yehowa, “ntemu wa lulamatu ne mulelela.” (Buakabuluibua 3:14, NW) Bu muvua Izalele wa ku mubidi muimanshe Yezu, Yehowa wakamuimansha ne kusungula ditunga dipiadipia, Izalele wa mu nyuma wa Nzambi, bua ikale ntemu wende. (Yeshaya 42:8-12; Yone 1:11, 12; Galatia 6:16) Petelo wakatela mulayi kampanda pa bidi bitangila Izalele ne kuleja ne: uvua utangila “Izalele wa Nzambi;” tshisumbu tshia bena nkristo, pakambaye ne: “Nuenu nudi ‘tshisa tshisungula, buakuidi bua bukalenge, ditunga dinsantu, tshisamba tshidianjila kufunkuna bua kuikalatshi bumpianyi bua pa buabu, bua nuenu numanyishe ngikadilu milenga’ ya eu wakanubikila ku mîdima bua kunubueja mu butoke buende bua dikema.”​—1 Petelo 2:9, NW; Ekesode 19:5, 6; Yeshaya 43:21; 60:2.

3. Bujitu bua kumpala bua Izalele wa Nzambi ne bua “musumba munene” mbujitu kayi?

³ Mêyi a Petelo adi aleja se: bujitu bua kumpala bua Izalele wa Nzambi budi bua kufila bumanyishi bua patoke pa bidi bitangila butumbi bua Yehowa. Mu matuku etu aa “musumba munene” wa bantemu bàdì pabu batumbisha Nzambi patoke mmudisangishe ku ditunga edi. Badi bela lubila ne dîyi dikole bua buonso bumvue ne: “Lupandu, tudi balupetele kudi Nzambi wetu udi musombele mu nkuasa wa bumfumu, ne kudi Muan’a mukoko.” (Buakabuluibua 7:9, 10, NW; Yeshaya 60:8-10) Mmunyi mudi Izalele wa Nzambi ne benzejanganyi nende ba mudimu mua kukumbaja bumanyishi buabu? Nku ditabuja ne butumike biabu.

Bantemu ba dishima

4. Bua tshinyi bena Yuda ba mu matuku a Yezu bavua bantemu ba dishima?

⁴ Ditabuja ne butumike bidi bikonga kuikala ne nsombelu udi mu diumvuangana ne mêyi-maludiki a Nzambi. Mushinga wabi udi umueneka mu tshiakamba Yezu pa bidi bitangila bamfumu ba malu a Nzambi bena Yuda ba mu matuku ende. Bavua “basombe mu nkuasa wa Mozese” bu balongeshi ba Mikenji. Bakatuma too ne ba-misionere bua kukudimuija mitshima ya bakena bena kuitabuja. Kadi, Yezu wakabambila ne: “Nudi nuenda nukosolola mbu ne matunga, nukeba udi mua kunulonda. Nuenu bamane kumupeta, nudi numupisha tshibawu tshipite tshienu misangu ibidi.” Bena malu a Nzambi aba bavua bantemu ba dishima​—badiambi, bena mpala ibidi, ne bakena dinanga. (Matewuse 23:1-12, 15, MMM) Dimu’edi Yezu wakambila bamue bena Yuda ne: “Nuenu nudi nufuma kudi tatuenu Diabolo, ne nudi basue kukumbaja majinga a tatuenu.” Bua tshinyi wakambila bena ditunga disungula dia Nzambi malu a mushindu’eu? Bualu kabakalonda mêyi a Ntemu mutambe bunene wa Yehowa.​—Yone 8:41, 44, 47, NW.

5. Mmunyi mutudi bamanye se: Bukua-buena-nkristo mbufile bumanyishi bua dishima pa bidi bitangila Nzambi?

⁵ Mu mushindu umue, mu kupita kua siekele mivule bituadijile ku tshikondo tshia Yezu, bantu nkama ya miliyo mu Bukua-buena-nkristo mbaditute pa tshiadi mudibu bayidi bende. Kadi, ki mbenze disua dia Nzambi ne nunku ki mbanyishibue kudi Yezu. (Matayo 7:21-23; 1 Kolinto 13:1-3) Bukua-buena-nkristo mbutume ba-misionere, bavule ba kudibu bavua kakuyi mpata bantu ba mpoko. Kadi, bakalongesha bantu bua kutendelela nzambi wa Busatu udi wôsha benji ba mpekatu mu inferno wa kapia, ne bavule ba ku babalondi babu badi baleja anu bijadiki bikese bia mudibu bena nkristo. Tshilejilu, ditunga dia mu Afrike dia Rwanda divua budimi bua bufuke bua ba-misionere bena Katolike wa Roma. Kadi, bena Katolike bena Rwanda bakaditua ne mutshima mujima mu mvita ya pankatshi pa bisa mu matuku adi panshi aa mu ditunga adi. Mamuma mu budimi abu bua ba-misionere adi aleja se: kabuvua bupete bumanyishi bulelela bua buena nkristo kudi Bukua-buena-nkristo.​—Matayo 7:15-20.

Nsombelu udi mu diumvuangana ne mêyi-maludiki a Nzambi

6. Mmu mishindu kayi mudi nsombelu muakane muikale tshitupa tshinene mu difila bumanyishi?

⁶ Nsombelu mubi wa aba badi badituta pa tshiadi se: mbena nkristo udi ukebela “njila wa bulelela” mitobo. (2 Petelo 2:2, NW) Muena nkristo mulelela udi ne nsombelu udi mu diumvuangana ne mêyi-maludiki a Nzambi. Katu wiba, wamba mafi, udinga, anyi wenda masandi. (Lomo 2:22) Kakuyi mpata katu ushipa muntu nende. Balume bena nkristo badi batabalela ne dinanga dionso mêku abu. Ne kanemu kuonso bakaji badi batua ditabalela edi nyama ku mikolo. Bana badi balongeshibua kudi baledi babu ne nunku mbakajibue bua kuikala bena nkristo bakulumpe ba kueyemena. (Efeso 5:21–6:4) Bushuwa, buonso buetu tudi bapange bupuangane ne tutu tuenza bilema. Kadi muena nkristo mulelela udi unemeka mêyi-makulu a mu Bible ne udi wenza madikolela malelela bua kuatumikila. Ebi bidi bijula ntema ya bakuabu ne bidi bifila bumanyishi buimpe. Imue misangu, aba bavua ku kale baluisha bulelela bakamona nsombelu muakane wa muena nkristo kampanda ne bakitabuja bulelela.​—1 Petelo 2:12, 15; 3:1.

7. Bua tshinyi bidi ne mushinga bua se: bena nkristo banangangane umue ne mukuabu?

⁷ Yezu wakaleja ngikadilu munene wa nsombelu wa buena nkristo pakambaye ne: “Ku muanda eu buonso nebanumanye munudi balongi banyi: binuikala ne dinanga munkatshi muenu.” (Yone 13:35, NW) Bulongolodi bua Satana budi bua “malu mabi ne lukuka, dienzelangana dia bibi ne lubabu, dishipangana ne matandu, didingangana ne budimu; [banyangi] ba lumu lua bakuabo, bena bijanu, baluishi [ba Nzambi, NW], bapendianganyi, bena ditambisha, badiambi, bedi ba meji a kuenzelangana bibi, batombokedi ba baledi babo.” (Bena Roma 1:29, 30, MMM) Mu nsombelu wa mushindu’eu, bulongolodi bua pa buloba bujima bua dinanga ntshijadiki tshikole tshia mudi spiritu wa Nzambi utumika​—mbumanyishi bua pa buabu. Bantemu ba Yehowa ke badi benza bulongolodi bua mushindu’eu.​—1 Petelo 2:17.

Bantemu mbalongi ba Bible

8, 9. (a) Mmunyi muvua mufundi wa misambu mukoleshibue kudi dilonga diende dia Mikenji ya Nzambi ne dieleelapu meji? (b) Mmu mishindu kayi muatukolesha dilonga dia Bible ne dieleelapu meji bua kutungunuka ne kufila bumanyishi?

⁸ Bua kulubuluka mu difila bumanyishi buimpe, muena nkristo udi ne bua kumanya ne kunanga mêyi-maludiki makane a Yehowa ne kukina ne muoyo mujima bubi bua bulongolodi ebu. (Musambu wa 97:10) Bulongolodi ebu mbulobeshanganyi mu dilubuluja ngenyi yabu nkayabu, ne mmuenenu wabu udi mua kuikala mukole bua kukandamena. (Efeso 2:1-3; 1 Yone 2:15, 16) Ntshinyi tshidi mua kutuambuluisha bua kulama mmuenenu muimpe mu lungenyi? Dilonga dia pa tshibidilu ne diondoke dia Bible. Mufundi wa Musambu wa 119 wakambulula misangu mivule dinanga diende dia Mikenji ya Yehowa. Uvua pa tshibidilu uyibala ne weleelapu meji, “dinda tô ne ku dilolo.” (Musambu wa 119:92, 93, 97-105) Bu tshipeta, wakafunda ne: “Ndi nkina mashimi, ndi ngalengulula, kadi ndi nnanga mikenji yebe.” Kupita apu, kanemu kende kuondoke kakamusaka ku dienza. Udi wamba ne: “Ndi nkutumbisha misangu muanda mutekete ku dituku ku dituku, bualu bua mei ebe makane majalame.”​—Musambu wa 119:163, 164.

⁹ Mu mushindu wa muomumue, dilonga dietu dia pa tshibidilu dia Dîyi dia Nzambi ne dieleelapu meji nebilenge mitshima yetu ne nebitusake ku ‘dimusamuna’​—kufila bumanyishi pa bidi bitangila Yehowa—​pa tshibidilu, nansha “misangu muanda mutekete ku dituku ku dituku.” (Lomo 10:10, NW) Mu diumvuangana ne muand’eu, mufundi wa musambu wa kumudilu udi wamba ne: eu udi weleela pa tshibidilu meji pa mêyi a Yehowa “neavue bushuwa bu mutshi mukuna ku muelelu wa mâyi, udi ukuama mamuma mu tshitshia tshiawu ne muena mabeji adi kaayi afubidila, ne malu wonso adiye wenza nealubuluke.” (Musambu wa 1:3, NW) Mupostolo Paulo wakaleja pende bukole bua Dîyi dia Nzambi pakafundaye ne: “Mufundu wonso mmufunda ku spiritu wa Nzambi ne udi ne mushinga bua kulongesha, bua kubela, bua kupingajilula malu mu bulongame, bua kubela ne kunyoka mu buakane bua muntu wa Nzambi ikale mukumbane tshishiki, mulongolola biakane bua mudimu wonso muimpe.”​—2 Timote 3:16, 17, NW.

10. Ntshinyi tshidi tshimueneka patoke pa bidi bitangila tshisamba tshia Yehowa mu matuku aa a ku nshikidilu?

¹⁰ Didiunda dia lukasa lukasa dia bungi bua batendeledi balelela mu siekele eu wa 20 didi dileja dibenesha dia Yehowa. Kakuyi mpata, bu tshisumbu, bantemu ba lelu aba bua bumfumu bukena mikalu bua Nzambi mbadime dinanga dia mikenji ya Nzambi mu mitshima yabu. Anu bu mufundi wa misambu, mbasakibue ku ditumikila mikenji Yende ne kufila bumanyishi ne lulamatu luonso “munya ne butuku” pa bidi bitangila Yehowa.​—Buakabuluibua 7:15.

Midimu ya bukole ya Yehowa

11, 12. Ntshinyi tshivua tshikumbajibue kudi bishima bienza kudi Yezu ne bamulondi bende?

¹¹ Mu siekele wa kumpala, spiritu munsantu wakapetesha bantemu bena nkristo bena lulamatu bukole bua kuenza bishima, biakafila tshijadiki tshikole tshia se: bumanyishi buabu buvua bulelela. Pavua Yone Mubatiji mu buloko, wakatuma bayidi bua kuebeja Yezu ne: “Udi ne bua kuvua ngwewe anyi, tuindile mukuabo?” Yezu kakandamuna eyowa anyi tòo nansha. Bishilangane, wakamba ne: “Ndayi, nuambile Yowanese binudi bumvue ne binudi bamone: mpofu idi imona, batebuki benda, bena nsudi bapanda, bena mapapa bumvua, bafue babika, Mukenji Mulenga baumanyisha bapele. Wa diakalenga mmuntu udi kayi ulenduka bualu buanyi.” (Matewuse 11:3-6, MMM) Midimu ya bukole eyi ivua tshijadiki kudi Yone se: Yezu uvua bushuwa eu “udi ne bua kuvua.”​—Bienzedi 2:22.

¹² Mu mushindu wa muomumue, bamue ba ku balondi ba Yezu bakuondapa babedi ne bakabiisha kabidi bafue. (Bienzedi 5:15, 16; 20:9-12) Bishima ebi bivua bu bumanyishi bua kudi Nzambi yeye nkayende bua dilubuluka diabu. (Ebelu 2:4) Ne midimu ya mushindu’eu yakaleja muvua Yehowa Wa-Bukole-Buonso. Tshilejilu, mbilelela se: Satana, “mfumu wa bulongolodi ebu,” udi ne mushindu wa kukebesha lufu. (Yone 14:30, NW; Ebelu 2:14) Kadi pakabiisha Petelo mukaji muena lulamatu Dorkase ku bafue, wakabienza anu ne bukole bua Yehowa, bualu anu Yeye ke udi mua kuakajilula muoyo.​—Musambu wa 16:10; 36:9; Bienzedi 2:25-27; 9:36-43.

13. (a) Mmu mushindu kayi mutshidi bishima bia mu Bible bijadika bukole bua Yehowa? (b) Mmunyi mudi dikumbana dia milayi ne tshitupa tshinene mu difila bujadiki pa Bunzambi bua Yehowa?

¹³ Lelu’eu, midimu ya bishima ayi kayitshitu kabidi yenzeka. Tshipatshila tshiayi ntshimane kukumbajibua. (1 Kolinto 13:8) Kadi, tutshidi ne mikanda idi ilonda bualu buayi mu Bible, mijadika kudi bamonyi bavule. Padi bena nkristo lelu’eu bateya ntema ku miyuki eyi ya kale, midimu ayi itshidi ifila bumanyishi bua pa buabu pa bidi bitangila bukole bua Yehowa. (1 Kolinto 15:3-6) Kupita apu, kale mu matuku a Yeshaya, Yehowa wakaleja milayi mijalame bu tshijadiki tshia pa buatshi tshia se: Udi Nzambi mulelela. (Yeshaya 46:8-11) Mivule ya ku milayi mienzeja ku spiritu wa Nzambi idi yenda ikumbana lelu’eu​—imue ya kudiyi pa tshisumbu tshia bena nkristo. (Yeshaya 60:8-10; Danyele 12:6-12; Malaki 3:17, 18; Matayo 24:9; Buakabuluibua 11:1-13) Pa kumbusha mudidi dizangika se: tudi ne muoyo mu “matuku a ku nshikidilu,” dikumbana dia milayi eyi didi dibingisha Yehowa bu Nzambi umuepele mulelela.​—2 Timote 3:1, NW.

14. Mmu mishindu kayi mudi muyuki wa lelu wa Bantemu ba Yehowa muikale bumanyishi bukole bua se: Yehowa udi Mukalenge Ukena Mikalu?

¹⁴ Ndekelu wa bionso, Yehowa utshidi wenza malu manene, malu a dikema, bua tshisamba tshiende. Butoke budi buenda buvula pa bulelela bua mu Bible mbulombola kudi spiritu wa Yehowa. (Musambu wa 86:10; Buakabuluibua 4:5, 6) Didiunda dia pa buadi pa buloba bujima ntshijadiki tshia se: Yehowa ‘udi wenda wambuluja [muanda eu] mu tshikondo tshiawu.’ (Yeshaya 60:22, NW) Pavua buluishi bua katshi ku dînu bubudike mu ditunga dimue kunyima kua dikuabu mu kupita kua matuku mashale aa, tshisamba tshia Yehowa tshivua tshipete mushindu wa kuleja dinanukila dia dikima ku dikuatshisha dikankamiji dia spiritu munsantu. (Musambu wa 18:1, 2, 17, 18; 2 Kolinto 1:8-10) Bushuwa, muyuki wa lelu wa Bantemu ba Yehowa udi pa nkayawu bumanyishi bukole bua se: Yehowa udi Mukalenge Ukena Mikalu.​—Zekâya 4:6.

Lumu luimpe ludi ne bua kumanyishibua

15. Mbumanyishi kayi bualabale buvua ne bua kufidibua kudi tshisumbu tshia bena nkristo?

¹⁵ Yehowa wakasungula Izalele bu ntemu wende kudi matunga. (Yeshaya 43:10) Kadi, anu bena Izalele bakese ke bavua bapeshibue bukenji kudi Nzambi bua kuya kumanyisha kudi bakena bena Izalele, ne ebi bivua pa tshibidilu bua kumanyisha malumbuluisha a Yehowa. (Yelemiya 1:5; Yona 1:1, 2) Pabi, milayi idi mu Mifundu ya tshiena-Ebelu idi ileja se: Yehowa uvua ne bua kuteya ntema yende dituku kampanda kudi matunga mu mushindu mualabale, ne mmuenze nunku ku butuangaji bua Izalele wa mu nyuma. (Yeshaya 2:2-4; 62:2) Kumpala kua kubanda mu diulu, Yezu wakatumina balondi bende dîyi ne: “Nunku, ndayi ne nuvuije bantu ba mu matunga wonso bayidi.” (Matayo 28:19, NW) Nansha muvua Yezu mushindamene pa “mikoko mijimine ya nzubu wa Izalele,” balondi bende bakatumibua ku “matunga wonso,” nansha “too ne mu bitupa bia kulekule bia buloba.” (Matayo 15:24, NW; Bienzedi 1:8, NW) Bumanyishi bua bena nkristo buvua ne bua kumvuibua kudi bukua-bantu buonso.

16. Mmudimu kayi uvua tshisumbu tshia bena nkristo tshia mu siekele wa kumpala tshikumbaje, ne mmu bualabale kayi?

¹⁶ Paulo wakaleja ne: uvua mubijingulule bimpe. Bu mu tshidimu tshia 61 B.B., wakamba ne: lumu luimpe luvua “lukuama mamuma ne ludiunda pa buloba bujima.” Lumu luimpe kaluvua lushikila anu ku ditunga dimue peshi katendelelu, bu mudi aka kavua kaditue mu “ntendelelu wa banjelo.” Bishilangane, luvua “lumanyishibue [patoke] mu bifukibua bionso bidi muinshi mua diulu.” (Kolosai 1:6, 23; 2:13, 14, 16-18, NW) Nunku, Izalele wa Nzambi mu siekele wa kumpala wakakumbaja mudimu wende wa “‘kumanyisha ngikadilu milenga’ ya eu waka[ba]bikila ku mîdima bua ku[ba]bueja mu butoke buende bua dikema.”

17. Mmunyi mudi Matayo 24:14 mutungunuke ne kukumbajibua mu mushindu mualabale?

¹⁷ Kadi, mudimu eu wa bumanyishi wa mu siekele wa kumpala uvua anu ka-diosha bua tshivua ne bua kuenjibua munkatshi mua matuku a ku nshikidilu. Pa kutuma meji kumpala ne nangananga ku matuku etu aa, Yezu wakamba ne: “Lumu luimpe elu lua bukalenge nelumanyishibue pa buloba bujima, neluikale tshimanyinu bua matunga wonso; pashishe, ke nshikidilu kushishaye kulua.” (Matayo 24:14; Mâko 13:10, NW) Mulayi eu mmukumbajibue anyi? Eyowa, mmukumbajibue. Kumbukila ku dituadija dikese mu 1919, buambi bua lumu luimpe mbualabajibue mpindieu mu matunga mapite pa 230. Bumanyishi budi bumvuibua mu Nord wa mashika a neje ne mu matunga a luya. Kontinan minene mmimanyisha, ne bidiila bia kulekule bidi bikebibua bua se: benabi bapete bumanyishi. Nansha mukantshi mua ndululu minene, bu mudi mvita mu Bosnie ne Herzegovine, lumu luimpe ndutungunuke ne kumanyishibua. Anu bu mu siekele wa kumpala, bumanyishi budi bukuama mamuma “pa buloba bujima.” Lumu luimpe ludi lumanyishibua patoke “mu bifukibua bionso bidi muinshi mua diulu.” Ne tshipeta kayi? Diambedi, bashadile ba ku Izalele wa Nzambi bena “tshisa tshionso, muakulu wonso, tshisamba tshionso ne ditunga dionso” mbasangishibue. Pashishe, miliyo ya bena mu “musumba munene” bena “matunga wonso ne bisa bionso ne bisamba bionso ne miakulu yonso” bakatuadija kusangishibua. (Buakabuluibua 5:9; 7:9, NW) Matayo 24:14 mmutungunuke ne kukumbajibua mu mushindu mualabale.

18. Ng’amue malu kayi adi enda akumbajibua kudi buambi bua lumu luimpe buenza pa buloba bujima?

¹⁸ Buambi buenza pa buloba bujima bua lumu luimpe budi buambuluisha bua kujadika se: dikalaku dia Yezu bu mfumu ndimane kutuadija. (Matayo 24:3) Kupita apu, mmushindu munene udi wambuluisha mu dienza “dinowa dia pa buloba” didi dienda dinowibua, bualu budi buludika bantu ku ditekemena dimuepele dilelela bua bukua-bantu, Bukalenge bua Yehowa. (Buakabuluibua 14:15, 16, NW) Bu mudibi se: anu bena nkristo balelela ke badi badifila mu buambi bua lumu luimpe, mudimu eu wa mushinga udi wambuluisha bua kusunguluja bena nkristo balelela ku ba dishima. (Malaki 3:18) Nunku, budi bupetesha lupandu lua aba badi bayisha pamue ne lua aba badi bandamuna. (1 Timote 4:16) Kupita bionso mushinga, buambi bua lumu luimpe budi buambika Yehowa Nzambi butumbi ne lumu, eu wakatuma dîyi bua buenjibue, udi ukuatshisha aba badi babuenza, ne udi ubukuamisha mamuma.​—2 Kolinto 4:7.

19. Ndipangadika kayi didi bena nkristo buonso bakankamijibue bua kuangata bu mudibu batuadija tshidimu tshipiatshipia tshia mudimu?

¹⁹ Kabiena bikemesha bu muakasakibua mupostolo Paulo ku diamba ne: “Diakabi ndianyi bingikala tshiyi mmanyisha lumu luimpe!” (1 Kolinto 9:16, NW) Bena nkristo lelu’eu badi badiumvua bia muomumue. Ndisanka dinene dia mudimu ne mbujitu bunene bua kuikala “benzejanganyi ba mudimu ne Nzambi,” pa kukenkesha butoke bua bulelela mu bulongolodi ebu budi mu mîdima. (1 Kolinto 3:9, NW; Yeshaya 60:2, 3) Mudimu uvua ne ntuadijilu mukese mu 1919 mmulue mpindieu kutanta bikole. Pabuipi ne bena nkristo miliyo itanu badi bafila bumanyishi bua bumfumu bukena mikalu bua Nzambi bu mudibu bapitshisha mêba mapite pa muliare umue ku tshidimu bua kutuadila bakuabu mukenji wa lupandu. Ndisankapu kayi bua kukumbaja tshitupa mu mudimu eu wa disantuisha dîna dia Yehowa! Bu mutudi tutuadija tshidimu tshia mudimu tshia 1996, tuangatayi dipangadika bua katupungidi. Pamutu pa nanku, tudi ne bua kulonda kupita kumpala mêyi aa a Paulo kudi Timote: “Ambila bantu dî dia Nzambi mene; nanukila.” (2 Timote 4:2) Eku tuenza nunku, tusambile ne mitshima yetu yonso bua se: Yehowa atungunuke ne kubenesha madikolela etu.

Udi uvuluka anyi?

◻ Mbanganyi bakapingana pa muaba wa Izalele bu “ntemu” wa Yehowa kudi matunga?

◻ Mmunyi mudi nsombelu wa buena nkristo ukumbaja tshitupa kampanda mu difila bumanyishi?

◻ Bua tshinyi dilonga dia Bible ne dieleelapu meji bidi ne mushinga bua Ntemu muena nkristo?

◻ Mmu mushindu kayi mudi muyuki wa lelu wa Bantemu ba Yehowa tshijadiki tshia se: Yehowa udi Nzambi mulelela?

◻ Ntshinyi tshidi buambi bua lumu luimpe bukumbaja?

[Bimfuanyi mu dibeji 15]

Bu mudilu kaluyi lutambe kukandikibua, lumu luimpe ludi mpindieu luenda lumanyishibua “mu bifukibua bionso bidi muinshi mua diulu”