Muena lubabu
TSHIENA-EBELU tshidi anu ne muaku wa nshindamenu umue bua “mukawu.” Padiwu ufunkuna bantu bena mpekatu, muaku eu wa tshiena-Ebelu udi mua kukudimunyibua “lubabu” anyi “mutshiawudi.” (Genese 26:14; Muambi 4:4, NW) Kadi, tshiena-Greke tshidi ne miaku mipite pa umue bua “mukawu.” Muaku zeʹlos, bifuanangane ne muaku udi muakanangane nawu wa mu tshiena-Ebelu, udi mua kufunkuna mukawu muakane ne wa mpekatu. Muaku mukuabu wa tshiena-Greke, phthoʹnos, udi ufunkuna anu mukawu wa mpekatu. Mu nkudimuinu wa Traduction du monde nouveau, mmukudimunyibue pa tshibidilu “lubabu.”
Mmunyi muvuabu batumika ne muaku phthoʹnos mu tshiena-Greke tshia kale? Nkonga-miaku wa The Anchor Bible Dictionary udi wamba ne: “Bishilangane ne muena lukuka, muntu udi mukokeshibue kudi phthonos kêna usua patupu anu bua kupeta bintu bidi bakuabu nabi bidiye mutekele njiya; tshidiye usua ntshia se: muntu mukuabu kabipetshi. Mmushilangane ne mutembanganyi bualu tshipatshila tshiende, bishilangane ne tshia mutembanganyi, katshiena tshia kutshimuna kadi ntshia kupumbisha bakuabu ku ditshimuna.”
Muena lubabu misangu yonso ki mmumanye ne: mmuenenu wende nkayende ke mpokolo munene wa ntatu yende. “Umue wa ku ngikadilu misunguluke ya phthonos,” ke mudi nkonga-miaku umue umue eu umvuija, “ndipanga budimanyi. Phthoneros (muntu udi mukokeshibue kudi phthonos) bialombibuaye bua kubingisha bienzedi biende, neadiambile munda munda ne neambile bakuabu se: aba badiye ubunda mbabiakanyine ne se: bupangi bua buakane bua nsombelu ke budi bumusaka ku dijanangana. Biamuebejabu mudiye mua kufika ku diakula bua mulunda wende wa pa muoyo mushindu au, neambe ne: bijanu biende bidi nangananga bua diakalenga dia mulunda wende.”
Bafundi ba Evanjeliyo Matayo ne Mâko mbatumike ne muaku wa tshiena-Greke phthoʹnos bua kumvuija tshisonsodi tshivua tshisake aba bakashipa Yezu. (Matayo 27:18; Mâko 15:10) Bushuwa, bavua basaka kudi lubabu. Nyanji mibi imue imue eyi mmikudimune batontolodi bakinyi babi ba bana babu ba kale. (1 Timote 6:3-5) Kabiena bikemesha bu mudi bena lubabu bakandikibue dibuela mu Bukalenge bua Nzambi! Yehowa Nzambi mmuele mukandu ne: buonso badi batungunuke ne kuikala “buule ne lubabu” mbantu “bakanyine lufu.”—Lomo 1:29, 32; Galatia 5:21, NW.
[Bimfuanyi mu dibeji 7]
Kulekedi lubabu lunyanga nsombelu webe