Mukawu wakamba kunyanga nsombelu wanyi

MUKAWU wakabanga kuntua ku muoyo bibi dîba dingakasedibua kudi bayanyi muibidi, Mark.a Buonso buetu, tuvua ne bua kutabalela bana balela kumpala ne kuyukidilangana ne bena mabaka betu ba kale. Imue misangu nsombelu eu uvua mukole be. Dîba dionso divuaku tulumbulumbu mu dîku, bivua bimueneka amu ne: Mark kavua utua ku tshianyi to. Ngakabanga kumona se: utshidi munange mukajende wa kale. Pamutu pa kutshimuna mukawu wanyi, ngakaulekelela ukokesha nsombelu wanyi. Mvua ndiumvua mu njiwu dîba dionso divua mukaji wa Mark wa kale muikale mu miaba ya pabuipi.

Mvua ntentekela Mark misangu ne misangu, ne kabidi ntangila nansha mêsu ende bua kumona kuvuaye utangila. Mvua mbala mu lutangilu luende malu avua kâyi nanshamu to. Imue misangu mvua mmubanda patoke se: utshivua munange mukajende wa kale. Musangu mukuabu wakabungama bikole bua bualu ebu ne wakajuka munkatshi mua mpuilu wa bena nkristo ne kuyaye. Ngakadiumvua mubunde tshilumbu kumpala kua Yehowa. Ngakavuija nsombelu wanyi wa mu dîku wa dikenga bualu kunyima biakalua mene ne buenzeji kudi bâna. Ngakadikina nkayanyi bua malu amvua ngenza, kadi nansha mungakateta muanyi muonso, tshivua mfika ku ditshimuna mukawu wanyi to.

Pamutu pa kungambuluisha, Mark wakatuadija kudisombuela. Pamvua mmubanda, uvua untapa dîyi ne: “Muena mukawu, udi amu muena mukawu.” Uvua mene umueneka bu uvua wenza ku bukole bua kumvuija muena mukawu. Pamu’apa wakela meji ne: ebi bivua mua kuondopa mukawu wanyi, kadi biakapita kulua bibi. Wakatuadija kutangila bakaji bakuabo, wela nseka pa mushindu uvuabu balengele. Ebi biakamfikisha ku didiumvua mupuekele ne ntshiyi muanyishibue. Biakalela tshikadilu tshikuabu tshibi​—tshintu tshikena tshimpe—​lukinu. Bu tshipeta, mvua mukodiakajibue ne ngakasua nansha ne: yeye ne dîku diende tuabulukangane.

Padi Bible wamba ne “mutshiaudi udi ubolesha mifuba,” ke mudibi bulelela. (Nsumuinu 14:30) Bukole buanyi bua mubidi buakatuadija kunyanguka. Ngakasama disama dia tshifu diakangata dîba dia bungi bua kupoleshibua. Ngakatungunuka ne kudikengesha mu nsombelu wanyi pa kuela meji mabi pa malu wonso avua Mark wenza. Mvua nkalula mu bibombi biende, ne pamvua mpetamu nimero ya telefone, mvua ngela nshinga bua kumona udi wandamuna. Mu mutshima wanyi mvua ne bundu, mvua ndila bualu bua bundu kumpala kua Yehowa. Kadi tshivua ne mushindu wa kudikanda to. Mvua muena lukuna mutambe bubi wa meme muine.

Bukole buanyi bua mu nyuma buakakepela e kumfikishabi too ne ku dipanga mua kusambila. Mvua munange Yehowa ne musue bushuwa kuenza malu makane. Mvua mumanye mifundu yonso idi itangila balume ne bakaji, kadi tshivua ne bukokeshi bua kuyitumikila to. Bua musangu wa kumpala mu nsombelu wanyi, tshivua kabidi njinga bua kuikala ne muoyo nansha, nansha mumvua ne bana ba nsongo.

Bakulu mu tshisumbu tshia Buena-nkristo bavua bampetesha dikolesha dia muoyo ne bakateta muabu muonso bua kungambuluisha. Kadi pakajulabu tshilumbu tshia mukawu wanyi, mvua mvila bua bundu, tshivua musue kuitabuja bua se: mvua ne tshilumbu tshia mushindu au.

Kunyima, bukole buanyi bua mubidi buakoneshibua mu mushindu wa se: mvua ne bua kubuela mu lupitadi bua dipandibua. Pantshivuamu ngakamona se: nsombelu kavua ne bua kutungunuka mushindu au to. Mark ne meme tuakapangadija bua kuabulukangana bua ngondo isatu bua kukonkonona nsombelu wetu bikale katuyi mu lupampu. Munkatshi mua tshikondo atshi bualu kampanda buimpe buakafika. Mu tshibejibeji tshia Réveillez-vous! muakapatuka tshiena-bualu kampanda tshivua ne mutu wa muanda ne: “De l’aide pour les enfants d’alcooliques (Diambuluisha bua bana ba banu ba maluvu mapite).”b

Tangila, mamu wanyi uvua munu wa maluvu mapite. Nansha mumvua tshiyi mupetangane ne tshinyangu tshia mubidi, baledi banyi kabavua balejangana dinanga umue ne mukuabu anyi kundi meme nansha. Tshienaku mua kuvuluka dituku divua mamu wanyi mungangate mu maboko ende anyi mungambile ne: mmunnange. Nenku mvua bushuwa nkola ntshiyi mumanye menemene mushindu wa kunanga anyi mushindu wa kuikala munangibue.

Mamu uvua misangu mivule undondela malu a tatu ne uvua ungambila se: kavua mua kumueyemena nansha. Nenku ndi ngela meji ne: mvua nkola ntshiyi ngeyemena balume buonso. Bua bualu bua dishidimunyibua dingakapeta, mvua ku misangu ne misangu ndiumvua mupuekele kudi bakuabu, nangananga kudi bakaji bakuabu. Dibala dia tshiena-bualu etshi mu Réveillez-vous! au diakangambuluisha bua kujingulula tshidi malu aa umvuija. Bua musangu wa kumpala, ngakajingulula tubingila tunene tua lutatu luanyi lua mukawu.

Ngakaleja tshiena-bualu etshi tshia Réveillez-vous! kudi bayanyi, Mark, ne tshiakamuambuluisha pende bua kungumvuilaye bimpe. Mpindieu yeye ne meme tuvua baakanyine bua kulonda mibelu ya mu Bible kudi bena dibaka badi bajinga diabulukangana. Tuakadia nende lusona. (1 Kolinto 7:10, 11) Mpindieu dibaka dietu didi dimpe ditambe kupita muvuadi kumpala. Tudi tuenza malu a bungi pamue, nangananga padibi bikale midimu ya buena nkristo. Mark udi upita kuditeka pa muaba wanyi. Matuku kana wonso udi ungambila mudiye munnange bikole, ne mpindieu ndi ngitabija bualu ebu.

Pandi mumanye se: netumonangane ne mukaji wa Mark wa kale, ntu ndomba Yehowa bukole, mmulomba bua kungambuluishaye bua ngikale ne ngikadilu wa muena nkristo mupie. Ne mbipatule bipeta bimpe. Nansha muoyo wa lukuna umvua n’awu kudiye udi wenda ujika. Tshiena kabidi nkalamina mu ngenyi mibi anyi ndekelela ngenyi yanyi inkokesha nansha.

Ntshidi amu mpeta nyanji ya mukawu ikena miakane. Anu muoyo mupuangane mu bulongolodi bupiabupia bua Nzambi ke wankopolau. Mpindieu, ndi mulonga bua kukokesha mukawu pamutu pa kuulekelela unkokesha. Eyo, mukawu wakamba kunyanga nsombelu wanyi, kadi ku diambuluisha dia Yehowa ne bulongolodi buende, ndi mpindieu muntu wa disanka dipitshidile, ne bukole buanyi bua mubidi buapinganyi buimpe. Bua musangu eu kabidi ndi ne malanda mashême ne Nzambi wanyi, Yehowa.​—Wa kùdì umue wa ku babadi betu.

[Mêyi adi kuinshi]