Tshiudi ne bua kumanya pa bidi bitangila mukawu

MUKAWU ntshinyi? N’lupampu lua bukole butambe ludi mua kuenza ne: muntu adiumvue mulubakane, mubungame anyi muikale ne tshiji. Tudi mua kumvua mukawu padi muntu kampanda umueneka muikale ulubuluka mu dienza mudimu kansanga kutupita. Anyi tudi mua kumvua mukawu padi mulunda kampanda utumbishibua bipitshidile mutudi tuetu tutumbishibua. Kadi bitu misangu yonso bibi kuikala ne mukawu anyi?

Bantu badi bakokeshibue kudi mukawu mbinyikibue ku dilua ne muoyo wa kufuikakaja dikalaku dia baluishi ba ngelanganyi. Mfumu wa Izalele wa kale Shaula uvua tshilejilu pa bualu ebu. Kumpala uvua munange disalayi diende Davidi, ne wakamubandisha muanzu bua kuluaye muludiki wa tshisumbu tshia masalayi. (1 Samuele 16:21; 18:5) Pashishe dimue dituku Mfumu Shaula kumvuaye bakaji batumbisha Davidi ne mêyi aa: ‘Shaula wakashipa binunu bia bantu, Davidi wakashipa binunu makumi bia bantu.’ (1 Samuele 18:7) Shaula kavua ne bua kulekelela bualu ebu bunyanga malanda ende malenga ne Davidi. Kadi, wakafiika munda. ‘Shaula wakabanga kuteka mêsu ende kudi Davidi ku dituku adi.’​—1 Samuele 18:9.

Muntu muena mukawu udi mua kupanga kujingila mukuabu diakabi. Udi mua kusuyibua patupu bua dikasa dimpe dia mukuende ne kusua bua ne: ikale ne ngikadilu anyi nsombelu ya mumue nende. Ku luseke lukuabu, mutshiawudi mmushindu mubi wa pa buawu wa mukawu. Muntu muena mutshiawudi udi mua kubenga mu musokoko bua kuenzela eu udi musonsola mukawu wende bimpe anyi udi mua kujinga ne: bubi bumufikile. Imue misangu, muntu muena mutshiawudi kêna mua kubutshika mpampu yende. Udi mua kusakibua bua kuenzela mukuabu bibi patoke, anu bu muakateta Mfumu Shaula bua kushipa Davidi. Ku misangu mipita pa umue, Shaula wakakupa difuma mu diteta “kupopela Davidi ku tshimanu.”​—1 Samuele 18:11; 19:10, NW.

‘Kadi meme tshiena muena mukawu to,’ ke muudi mua kuandamuna. Bushuwa, mukawu udi mua kupanga kukokesha nsombelu webe. Kadi, mu bualabale kampanda, mukawu udi ne buenzeji pa yonso wa kutudi​—nyanji ya mukawu yetu nkayetu ne ya bakuabu. Nansha bikale ne lukasa lua kumona mukawu kudi bakuabu, tudi mua kuikala ne lujoko bua kuumona munda muetu nkayetu.

“Dinyikibua ku Mutshiawudi”

Muyuki udi utangila bumuntu bua mpekato bu mudibu bumvuija mu Dîyi dia Nzambi, mu Bible, udi misangu mivule uzangika mpekatu ya mutshiawudi. Udi uvuluka muyuki wa Kaina ne Abele anyi? Umue ne mukuabo wa ku bana ba Adama ne Eva abo wakafila mulambu kudi Nzambi. Abele wakenza nenku bualu uvua muntu wa ditabuja. (Ebelu 11:4) Uvua ne ditabuja mu bukokeshi bua Nzambi bua kukumbaja disua Diende dia mushinga pa bidi bitangile buloba. (Genese 1:28; 3:15; Ebelu 11:1) Abele uvua kabidi witabuja ne: Nzambi udi mua kufuta bantu bena lulamatu muoyo mu Mparadizu wa pa buloba utshilualua. (Ebelu 11:6) Nenku, Nzambi wakaleja mulowo wende bua mulambu wa Abele. Bu Kaina muikale bushuwa munange muanabu, uvua mua kusanka muvua Nzambi mubeneshe Abele. Bishilangane, Kaina “wakakuna tshiji tshinene.”​—Genese 4:5, NW.

Nzambi wakabela Kaina bua kuenzaye malu mimpe bua yeye pende kupetaye dibenesha. Pashishe Nzambi wakamumanyisha ne: “Biwikala kuyi wenza bimpe, bualu bubi budi bualamina ku mbelu kuebe; mutshima wa bubi newikale kûdi, kadi wewe ubukokeshe.” (Genese 4:7) Bia dibungama, Kaina kakakokesha tshiji tshiende tshia mukawu nansha. Tshiakamusaka ku dishipa muanabu muena buakane. (1 Yone 3:12) Katshia apu, diluangana ne mvita bidi bilandula nkama ya miliyo ya mioyo ya bantu. “Tumue tua ku tubingila tua nshindamenu tua mvita tudi mua kuikala dizuka dia kupeta bitupa bia buloba bipitshidile, dizuka dia kupeta bubanji, dizuka dia kupeta bukole bupitshidile anyi bukubi,” mmudibo bumvuije mu mukanda wa The World Book Encyclopedia.

Bena nkristo balelela kabena babuelakana mu mvita ya bulongolodi ebu to. (Yone 17:16) Kadi bia dibungama, bantu bena nkristo badi misangu mikuabo balobeshibue mu difuilangana ne miaku ya mukana. Pikale bena mu tshisumbu bakuabu babuelakanamu, difuilangana edi didi mua kuandamuka mvita mibi ya miaku ya mukana. ‘Mvita ne difuilangana bia munkatshi muenu mbifumina penyi?’ mmuvua mufundi wa Bible Yakobo webeja bena kuitabuja nende. (Yakobo 4:1) Wakandamuna ku lukonko elu pa kusokolola lukuka luabu lua bunangi bua bintu bia ku mubidi ne wakasakidila ne: “Nudi batungunuke ne . . . kubaba,” anyi ne kuikala ne “mukawu.” (Yakobo 4:2, NW, note kuinshi kua dibeji) Eyo, bunangi bua bintu bia ku mubidi budi mua kusaka muntu ku dibaba ne ku dikala ne mukawu kudi aba badi bamueneke balabula nsombelu mulenga. Pa bualu ebu, Yakobo wakadimuija bua “dinyikibua ku lubabu dia buntu.”​—Yakobo 4:5, NW.

Ntshipeta tshimpe kayi tshidiku mu disulakaja dia mpokolo ya lubabu? Ee, ebi bidi mua kutuambuluisha bua kuikala bena kuamba mpoko ne kushemesha malanda malenga ne bakuabu. Bidi kabidi mua kutuambuluisha bua kuikala bena muoyo mulenga, bena kulama lutulu ne bafuidianganyi ba luse. Bipite buimpe ku bionso, bidi bileja patoke dijinga dikole didi nadi bantu bua dilongolola dia dinanga dia Nzambi dia dipandishibua ne dipikudibua ku dinyikibua ku mpekatu dia bantu.​—Lomo 7:24, 25.

Bulongolodi bukena mukawu wa mpekatu

Ku mmuenenu wa bantu, bulongolodi bukena mukawu wa mpekatu budi mua kumueneka bu tshintu katshiyi buenji. Mufundi Rom Landau wakitabuja ne: “Meji makongoloja a bidimu bivule, pamue ne bionso biakambabu kudi bena filozofi . . . ne bashikuluji ba malu a tshieledi tshia lungenyi pa bualu ebu kabiena bifile buludiki kudi aba badi batatshishibue kudi mukawu. . . . Kudiku munganga kampanda ukadi muondopa muntu muena mukawu anyi?”

Kadi Dîyi dia Nzambi didi dishindika bualu bua ditekemena dia kufika ku muoyo wa bumuntu mupuangane mu bulongolodi bupiabupia muikale muntu nansha umue kayi kabidi usuyibua kudi mukawu ukena wa buena Nzambi anyi kudi mutshiawudi. Kabidi, ditalala dia mu bulongolodi bupiabupia abu kadiakunyangibua kudi bantu badi baleja nsombelu wa buntomboji wa buena eu nansha.​—Galatia 5:19-21; 2 Petelo 3:13.

Kadi, ki mmukawu wonso udi mubi to. Pa bualu ebu, Bible udi umanyisha ne: Yehowa “udi Nzambi wa mukau.” (Ekesode 34:14) Mbisue kumvuija tshinyi? Bible udi wamba tshinyi pa bidi bitangila mukawu muakane? Bia muomumue, mmunyi mudi muntu mua kupeta bukokeshi pa mukawu ukena muakane? Bala biena-bualu bidi bilonda.