Kashete ka biakudia kadi kafila bumanyishi

MU MATUKU akalonda tshikumina tshia ku Kobe, mu Japon, mu ngondo wa Tshiongo mushale, bantu mu tshitupa etshi bakapeta lutatu lukole bua kupeta biakudia. Pabi, Bantemu ba Yehowa kabakapanga kupeta dikuatshisha, ku diambuluisha dia kalolo dia balunda babu. Munkatshi mua matuku abidi anyi asatu kunyima kua tshikumina, bisumbu bia pabuipi biakatuma bibombi bia luosa. Mu katupa kîpi, balunda baditatshishi bua bakuabu bakatuma tushete tua biakudia. Ku tushete tua biakudia etu, bavule bakalamika tukanda tukese tuvua tumvuija diditatshisha diabu bua bavua mu dikenga. Aba bakapeta biakudia bakamba ne: biakudia bionso bivua “bitue luepu” bu muvuabu kabayi mua kukanda binsonji biabu pa kubala tukanda etu.

Bantemu ba Yehowa bakabanyangana biakudia biabu ne aba bavua mu dikengela. Ntemu kampanda uvua udia tshiakudia tshiende pavuabu mu njila mu mashinyi ne muena mudimu nende ukena Ntemu uvuabu nende mu kumpanyi umue. Nunku wakabanyangana nende kashete kamue ka biakudia kavuaye mupete.

“Nkuepi kuuvua musumba kashete ka biakudia aka?” ke muakebeja muena mudimu nende. Muanetu eu wa balume wakamumvuija mudimu wa diambuluishangana wa Bantemu. “Tshiena mudie bisekiseki kukadi matuku a bungi. Ndi musue kulama ndambu bua kutuadila bena dianyi kumbelu,” ke muakamba mulume eu ne dianyisha dionso.

Musangu muisatu wakenzekabi nunku, muena mudimu nende eu wakapesha Ntemu yen 3 000 (pamue ne dolare 35) ne kuamba ne: “Ndi mulue kujingulula midimu yenu mpindieu, nunku bu wewe mua kusua anyisha mfile dipa bua mudimu wenu. Ndi nganyisha muudi muabanyangane nanyi biakudia biebe. Bushuwa, balunda benu badi buonso bantu ba muoyo muimpe.”