Dipetesha diambuluisha kunyima kua bipupu

MADIKOLELA a muntu bua kupetesha diambuluisha kunyima kua tshipupu adi bushuwa makanyine ka-lumbandi. Ndongoluelu mivule ya diambuluisha mmifikishe ku diibakulula nzubu, disangisha tshiakabidi mêku, ne kupita bionso, dipandisha mioyo.

Padi tshipupu tshituta, Bantemu ba Yehowa badi batumika ne​—ne badi ne dianyisha bua—​bintu kayi bionso bidi bifidibue ku butuangaji bua ndongoluelu ya diambuluisha ya mu bulongolodi ebu. Eku kabidi, mbenzejibue kudi Mifundu bua ‘kuenzela bantu bonso bimpe . . . nangananga aba bàdì balela [babu] mu ditabuja.’ (Galatia 6:10, NW) Eyowa, Bantemu badi bamona anu bu se: mbalela; badi bamonangana bamue ne bakuabu bu “dîku.” Ke bualu kayi badi babikilangana umue ne mukuabu bu “muanetu mulume” ne “muanetu mukaji.”​—Fuanyikija ne Mâko 3:31-35; Filemona 1, 2.

Nenku padi tshipupu tshikuata tshitupa tshidi pabuipi, bakulu munkatshi mua Bantemu ba Yehowa badi benza madikolela a muoyo mujima bua kujadika miaba idi muena mu tshisumbu yonso ne bidiye ukengela, ne badi badilongolola bua kupetesha diambuluisha didi dikengedibua. Tutangilayi mushindu uvuabi bilelela mu Accra, ku Ghana; mu San Angelo, ku États-Unis; ne mu Kobe, ku Japon.

Accra​—“Matuku a Nowa mu bukese”

Mvula wakatuadija kuloka bu pa dîba 23 jajaja butuku, ne wakapumuka panshi kayi uteketa munkatshi mua mêba. “Mvula uvua uloka bikole bitambe mu mushindu wa se: dîku dianyi dijima diakashala ditabale,” ke mudi John Twumasi, umue wa ku Bantemu ba Yehowa mu Accra wamba. Tshikandakanda tshia Daily Graphic tshiakabikila mvula eu ne: “Matuku a Nowa mu bukese.” “Tuakateta bua kubandisha bimue bintu bia mushinga kuulu,” ke mudi John utungunuka, “kadi patuakunzulula tshiibi ku luseke lua tshibandilu, mâyi a mvula wa mudimbi akabuela diakamue.”

Bakokeshi bakafila didimuija bua kunyema, kadi bavule bakelakana, batshina bua se: nzubu wa munda mutupu​—nansha muikale mûle ne mâyi—​uvua mua kukoka bapawudi. Bamue kabavua mua kumbuka nansha bu buobu basue kuenza nenku. “Mamu ne meme tuakapanga mua kunzulula tshiibi,” ke mudi nsongakaji mubikila ne: Paulina wamba. “Mâyi avua anu enda abanda, ke tuetu kuimana pa bitupa bia mitshi ne kukuata ku mukamba wa musaka wa nzubu. Ndekelu wa bionso, bu pa dîba itanu jajaja mu dinda, bena mutumba netu bakatuambuluisha.”

Kakuyi dinengakana, Bantemu ba Yehowa bakaditua mu mudimu. Muanetu wa bakaji muena nkristo dîna diende Beatrice udi ulonda ne: “Bakulu mu tshisumbu bavua benda batukeba, ne bakatupeta ku nzubu kua Ntemu netu kampanda, kutuvua banyemene. Anu matuku asatu panyima pa mvula wa tshipupu eu, bakulu ne bansonga bena mu tshisumbu bakalua kutuambuluisha ne kumbusha bitotshi munda mua nzubu ne pambelu. Société Watch Tower wakafila bia kusukula nabi, manga a kushipa nawu tuishi, mukubu, matela, mbulankete, bilamba, ne bivualu bia bana. Bana betu bakatutumina biakudia bua matuku a bungi. Mvua mulengibue ku mutshima!”

John Twumasi, mumana kutela, udi wamba ne: “Ngakambila bafutshidi bakuabu ne: Société wetu uvua mututumine bia kusukula nabi ne manga a kushipa nawu tuishi​—bikumbane bua kusukula nabi nzubu mujima. Bafutshidi bu 40 bakambuluisha ku disukula. Ngakapesha bena mutumba nanyi bimue bia ku bintu bia disukula nabi ebi, pamue ne muntu mukuabu udi nsaserdose mu ekleziya kampanda wa mu muaba au. Bena mudimu nanyi bavua bela meji bibi ne: Bantemu ba Yehowa batu baleja dinanga anu kudi [Bantemu nabu].”

Bana betu bena nkristo balume ne bakaji bakanyisha bikole diambuluisha dia dinanga diakabapeteshabu. Muanetu Twumasi udi ukoma ne: “Nansha muvua bintu bimvua mujimije mu mvula wa tshipupu bikale bia mfranga ya bungi kupita ebi bia diambuluisha, dîku dianyi ne meme tudi tumvua ne: bua diambuluisha edi didi dilenga ku mutshima dia kudi Société, tudi bapete bivule kupita bituakajimija.”

San Angelo​—“Bivua biumvuika anu bu se: buloba buvua butua ku ndekelu”

Mpepele ya mvunde yakasunsula San Angelo mu dia 28 Lumungulu 1995, yakashimbula mitshi, kukosa makunji a nshinga ya nzembu, ne kuimansha nshinga ya nzembu mikosolola njila. Mpepele ivua ne lubilu lua kilometre 160 ku dîba, pa kunyanga midimu idi ikuatshisha bantu. Nzubu mipite pa 20 000 yakashala mu mîdima. Pashishe mabue a mvula akalua. Tshibambalu tshia Ditunga tshia Bimuenekelu bia kuulu tshiakamba ne: kuvua “mabue a mvula bunene bua ndundu wa golf,” pashishe “mabue a bunene bua ndundu wa softball,” ne ndekelu wa bionso, “mabue a bunene bua didima.” Muadi wa mabue a mvula uvua upatshisha matshi. Musombi kampanda wa mu muaba eu wakamba ne: “Bivua biumvuika anu bu se: buloba buvua butua ku ndekelu.”

Panyima pa tshipepele etshi, kuulu kuvua kutalala kua dikema ne kuvua kutshingisha. Bantu bakatuadija kupatuka ku kakese ku kakese mu nzubu yabu minyanga [yonso], bua kutangila bunene bua dinyanguka. Mitshi ìvuà mishale miimane kuulu ivua mipopola mabeji ayi onso. Nzubu ìvuà mishale miimane kuulu ivua imueneka bu se: ivua mitotola. Mu bimue bitupa, mabue a mvula akabuikila buloba ne kuenza mupimbu wa metre umue. Binunu bia madidishi a ku nzubu ne a ku mashinyi bivua bitshibula bitupa bitupa mu tshipepele tshikole atshi, nenku mpindieu bipese bia mmuenu mitayike bivua bikenka pamue ne mabue a mvula avua matangalake panshi ponso. “Pangakalukila ku nzubu,” ke mudi mukaji mukuabu wamba, “Ngakashala musombe anu mu mashinyi anyi mu kajila kakese ne ndila. Dinyanguka divua ditambe bubi, divua dimpite mutu.”

Ndongoluelu ya diambuluisha ne mpitadi biakafila ne lukasa luonso diambuluisha dia mfranga, bintu bia luibaku, luondapu, ne mibelu. Biakanyine ka-lumbandi, bantu bavule bavua bakengesha kudi tshipepele etshi tshikole bakenza tshivuabu mua kuenza bua kuambuluisha bakuabu.

Bisumbu bia Bantemu ba Yehowa biakaditua pabi mu mudimu. Aubrey Conner, mukulu mu tshisumbu tshia mu San Angelo, udi wamba ne: “Diakamue pakajika tshipepele tshikole, tuvua ku nshinga bua kukebangana bamue ne bakuabu. Tuakadiambuluisha tuetu bine kabidi ne bena mutumba netu bavua kabayi Bantemu bua kujika madidishi, kuela tubudimbu pa misaka ya nzubu, ne kukuba nzubu mu mishindu yonso ku bidi mua kumunyanga. Pashishe tuakenza liste bua muntu yonso wa mu tshisumbu muena nzubu uvua munyanguke. Nzubu mitue ku lukama ivua ikengela dilongolola, ne bia kutumika nabi bifila kudi kompanyi ya mambuluisha kabivua bikumbane to. Nenku tuakasumba bia mudimu bia pa mutu ne kudilongolola bua mudimu. Bonso basanga, Bantemu batue ku 1 000 bakambuluisha ku budisuile, bantu bu 250 ku ndekelu yonso wa lumingu. Bakafumina kule bu ku mutantshi wa kilometre 740. Bonso bakenza mudimu kakuyi dipungila, misangu mivule mu munya mukole wa degré 40. Nansha muanetu wa bakaji wa bidimu 70 wakenza netu mudimu ku ndekelu yonso wa lumingu pa kumbusha lumue, ne bivua nanku pavuabu balongolola nzubu wende yeye. Ne ku ndekelu wa lumingu alu uvua kuulu kua musaka wa nzubu wende muine wambuluisha ne dilongolola!

“Misangu mivule tuvua tumvua biambilu bifumina kudi babandidi bu mudi: ‘Kabivuaku mua kuikala bimpe bu bitendelelu bikuabu mua kuenza nenku bua benamu anyi?’ Bena mutumba netu bavua bakemeshibue pa kumona tshisumbu tshia badisuile 10 too ne ku 12 (pamue ne bana betu ba bakaji) bafika mu Ditanu mu dinda menemene ku nzubu kua Ntemu nabu, badipaye bua kulongolola peshi mene bua kutenga tshiakabidi musaka mujima wa nzubu kakuyi difutu. Misangu mivule mudimu wonso uvua wenjibua anu bua ndekelu umue wa lumingu. Ku misangu, muena mudimu kampanda wa luibaku uvua kayi Ntemu uvua mua kuditua pende mu mudimu wa dilongolola musaka pavua tshisumbu tshietu ku tshiibi tshikuabu. Tuvua mua kumbusha musaka wetu wa kale ne kuenzulula mukuabu ne pashishe kusukula mu lubanza kumpala kua buobu kujikija wabu musaka. Imue misangu bavua bimanyika wabu mudimu bua kutubandila!”

Muanetu Conner udi ukoma ne: “Buonso buetu netupangile malu mamona atudi bapete pamue. Tudi bafike ku dimanyangana bamue ne bakuabu ku mmuenenu mushilangane pa kuleja ne pa kuikala baleja dinanga dia buena-muntu kupita muvuabi kumpala. Tudi bumvue ne: ebi bivua anu tshilejilu tshia tshikalaku mu bulongolodi bupiabupia bua Nzambi, ne bana betu balume ne bakaji bambuluishangana bamue ne bakuabu bualu mbasue bushuwa kuenza nenku.”​—2 Petelo 3:13.

Kobe​—“Bisunsukila bia mitshi, bulastala ne bitalu bia bantu”

Bavua bamba muvua basombi ba mu Kobe badilongolole. Bushuwa, mu dia 1 Kabitende dionso batu basekelela Dituku dia Didimuija dia Tshipupu. Bana balongi batu benza manaya a dibidija mubidi bua tshikumina, basalayi bibidija ndeke bua mudimu wa dipandisha bantu, ne kumpanyi ya dijima midilu ipatula mashinyi ayi a didibidija nawu bua tshikumina, mùdì badisuile batumika ne mbabi yabu ya dipandisha nayi munda mua mushete wa bunene bua tshibambalu ùdì unyukuka ne uzakala anu bu mutu tshikumina tshilelela tshienza. Kadi pakenzekatshi mu dia 17 Tshiongo 1995, didilongolola dionso diakamueneka dia patupu. Makumi a binunu bia misaka yakupuka​—muanda utu kauyi muanji kuenzekela bidikiji aba. Tuwulu tuakapampalamuka pa njanja; bitupa bia njila minene biakakoseka; mbungu ya gaz ne milonda ya mâyi biakakoseka; nzubu kupuka anu bu mienza ne karton. Tshikandakanda tshia Time tshiakumvuija muanda eu bu “bisunsukila bia mitshi, bulastala ne bitalu bia bantu.”

Pashishe midilu yakalua. Nzubu yakakuata mudilu pavua eku baluishi ba kapia batekesha mu mikolo, batshikale kule kabayi ne tshia kuenza, bajika kudi musumba wa bantu. Aba bakafika muaba uvua midilu misangu mivule bakasangana se: mâyi kâvua mua kupetshibua mu ndongoluelu munyanguke wa diabanya mâyi mu tshimenga. “Dituku dia kumpala divua dienza ne buôwa,” ke muakamba munene mukuabu. “Tshivuaku muanji kudiumvua mupangile bukole nunku mu nsombelu wanyi, pa kumanya se: kuvua bantu bavule batambe bajiika mu nzubu ivua ibutuka. Ne mvua mumanye se: kakuvua tshintu nansha tshimue tshimvua mua kuenza bua bualu ebu.”

Bonso basanga, bantu bu 5 000 bavua bashipibue, ne nzubu mitue ku 50 000 yakashala bibundu. Tshimenga tshia Kobe tshivua anu ne tshimue tshia bisatu bia biakudia bìvuà bikengedibua. Bua kupeta mâyi bamue bakaya bua kuengulula pa mutu pa mutu mâyi a manyanu a muinshi mua milonda ya mâyi mikoseka. Bavule ba ku bavua kabayi ne nzubu bakanyemena ku miaba ya bisokomenu, mu imue ya kudiyi bantu bakapeta biakudia, bakabanyina muntu yonso ndambu mukese wa losa ku dituku. Mu katupa emu dipanga kusankishibua e kutampakana. “Bakokeshi ki mbenze tshintu nansha tshimue,” ke muakadiabakena muntu kampanda. “Bituatungunuka ne kubeyemena, netufue ne nzala.”

Bisumbu bia Bantemu ba Yehowa bia mu Kobe ne bia mu bitupa bia pabuipi apu biakadilongolola diakamue. Muendeshi kampanda wa elikoptere wakadimuenena ne mêsu mudimu wabu wakamba ne: “Ngakaya ku muaba wa tshipupu dituku dia tshikumina ne kushala lumingu lujima kuine aku. Pangakafika ku muaba mukuabu wa tshisokomenu, bintu bionso bivua binyanguke. Kakuvua mudimu nansha umue wa diambuluishangana uvua wenjibua. Anu Bantemu ba Yehowa ke bantu bavua pa muaba au ba bungi, benza bivua bikengedibua.”

Bushuwa, kuvua mudimu muvule wa kuenza. Nzubu ya Bukalenge dikumi ivua mishale kayiyi kukuata nayi mudimu, ne Bantemu bapite pa 430 kabavua ne nzubu nansha. Bungi bukuabu bua nzubu 1 206 ivuabu basombele yakakengela dilongolola. Kabidi mêku 15 a Bantemu bàvuà bafue mu tshipupu atshi avua mu dikengela dikole dia busambi.

Bamue Bantemu 1 000 ba pabuipi ne ditunga edi bakafila dîba diabu bua kuambuluisha mu mudimu wa dilongolola. “Patuvua tuenza mudimu wa nzubu ya balongi ba Bible bavua kabayi banji kutambula,” ke mudi muanetu mukuabu wamba, “bavua batuebeja misangu yonso ne: ‘Netufute bungi munyi bua bionso ebi?’ Patuvua tubambila ne: mudimu uvua mu bianza bia bisumbu, bavua batuela tuasakidila, bamba ne: ‘Bitudi balonge bidi mpindieu bulelela!’”

Bavule bavua bakemeshibue bua diandamuna dia muoyo mujima ne dia lukasa dia Bantemu ku tshipupu etshi. “Mvua mukemeshibue bikole,” ke mudi muendeshi wa ndeke mumana kutela wamba. “Nudi nubikilangana ne: ‘muanetu mulume’ ne ‘muanetu mukaji.’ Ndi mumone munudi nuambuluishanga bamue ne bakuabu; bushuwa nudi dîku dimue.”

Bantemu buobu bine bakalongela malongesha a mushinga ku tshikumina etshi. Muanetu mukuabu wa bakaji wakitaba ne: “Ntu ngela meji misangu yonso ne: padi bulongolodi budiunda bikole, dileja diditatshisha bua muntu ne muntu didi dikola menemene.” Kadi ditabalela diengeleki diakapetaye diakashintulula mmuenenu wende. “Mpindieu ndi mumanye ne: Yehowa kêna ututabalela anu bu bulongolodi, kadi kabidi ku muntu ne ku muntu.” Nansha nanku, diambuluisha dia kashidi ditshidi kumpala.

Diambuluisha dia kashidi mu katupa emu!

Bantemu ba Yehowa badi batekemena tshikondo tshikala muoyo wa muntu ne nsombelu kabiyi kabidi mua kuikala bipidija kudi bipupu. Mu bulongolodi bupiabupia bua Nzambi, muntu nealongeshibue bua kusomba bimpe ne bintu bia pa buloba bidi bimunyunguluke. Padi bantu bumbusha bibidilu bia budisui, kabakutamba kuteketa kumpala kua njiwu ya ku bintu bifuka nansha.

Kabidi, Yehowa Nzambi​—Mufuki wa makole a ku tshifukilu—​neatabalele bua dîku diende dia bukua-bantu ne bifukibua bia pa buloba kabikadi kabidi nansha kakese mu ditatshishibua dia ku makole a ku tshifukilu. Pashishe buloba nebuikale bushuwa mparadizu. (Yeshaya 65:17, 21, 23; Luka 23:43) Mulayi wa mu Buakabuluibua 21:4 neukumbajibue mu butumbi buonso: ‘Yeye neakupule tshinsonji tshionso ku mesu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’

[Tshimfuanyi mu dibeji 5]

Beatrice Jones (ku dia bakaji) udi uleja muvuabu bakuatangana ku bianza yeye ne bakuabu bua kusambuka mâyi a mvula wa tshipupu

[Tshimfuanyi mu dibeji 6]

Mudimu wa diambuluisha panyima pa mpepele ya mvunde