‘Mufina panshi, kadi tshiyi mubutula’

ANU BU MUDIBI BILONDA KUDI ULF HELGESSON

Mu Kashipu 1983, munganga uvua muiname pa mutu panyi wakela dîyi ne: “Mmutabale!” Munkatshi mua mêba 15 a dipandibua dikole, tshiwuja tshia bule bua santimetre 12 tshivua tshiumbushibue ku buôngo buanyi bua mu muongo. Mvua mushale muena tuneke menemene.

PANYIMA pa matuku makese, ngakatekibua mu lupitadi luvua lushilangane kilometre 60 ne musoko wanyi wa Hälsingborg, mu Suède wa ku sud. Ku muaba au ngakabuejibua mu programe wa disangulujibua. Munganga wakaleja ne: nebikengele malu a bungi, nenku mvua nsumpakana bua kutuadijabo dingondapa. Bulelela, mvua njinga kuenda tshiakabidi. Pa kulonda ne disuminyina programe wa didibidija wa mêba atanu ku dituku, mvua muenze dilubuluka dia lukasa.

Kunyima kua ngondo umue pakalua mutangidi wa tshijengu kukumbula tshisumbu tshietu, yeye ne bakulu bena nkristo bakuabu kuenzabu luendu lule elu too ne mu nzubu wa lupitadi mumvua ne kumuenzelabu tshisangilu tshia bakulu ba mu tshisumbu. Ndisanka kayipu mu mutshima wanyi pa kumona nshindikilu eu wa dinanga dia buena-muntu! Kunyima kua tshisangilu, tshisumbu tshionso tshiakapeshibua tshiayi ne mampa kudi buondapi.

Kumpala ba-minganga bakakema pa kumona dilubuluka dianyi. Kunyima kua ngondo isatu mvua mua kusomba mululame mu nkuasa wanyi wa nkata ne kabidi nansha kuimana katantshi. Mvua ne disanka ne mvua ne tshipatshila tshia kuenda tshiakabidi. Dîku dianyi pamue ne bana betu bena nkristo bavua bankankamija bia bungi mu makumbula abu. Mvua nansha muakanyine kualukila ku mbelu bua tshikondo tshîpi.

Dipingana dia disama

Pabi, kunyima kua nsombelu au, tshivua kabidi ngenza dilubuluka dikuabu. Pashishe munganga wakangambila bualu bua dibungama ebu: “Kuena mua kumvua bimpe bipitshidila mpindieu nansha!” Tshipatshila tshivua mpindieu tshia kunkankamija bua kudiendela nkayanyi mu nkuasa wa nkata. Mvua ndiebeja tshivua mua kumfikila. Mmushindu kayi wakokesha mukajanyi malu? Yeye pende wakenjibua dipandibua dinene ne uvua ukengela diambuluisha dianyi. Mvua ne bua kulomba diambuluisha dia kashidi kudi mbulamatadi anyi?

Ngakumvua kanyinganyinga kakole. Bukole buanyi bua mubidi ne bua muoyo ne dikanda bivua bienda bijika. Matuku akapita, ne mvua mushale tshiyi nnyunga. Tshivua amu ne tuneke tua mubidi, mvua kabidi mupate matshi mu mpampakenu ne mu nyuma. Mvua ‘mufina panshi.’ Mvua misangu yonso ndiangata nkayanyi bu muntu udi ne bukole bua mu nyuma. Mvua ne ditabuja dishindamija bikole mu Bukalenge bua Nzambi. (Danyele 2:44; Matayo 6:10) Mvua mutuishibue pa dilaya dia mu Bible dia se: masama wonso ne bulema nebiondapibue mu bulongolodi bupiabupia buakane bua Nzambi ne se: bukua-bantu buonso nebupingajibue ku muoyo mupuangane. (Yeshaya 25:8; 33:24; 2 Petelo 3:13) Mvua ndiumvua mpindieu ne tuneke mu mubidi ne mu nyuma kabidi. Mvua ndiumvua ‘mubutula.’​—2 Bena Korente 4:9, MMM.

Kumpala kua kuya kule, ndi nganji kunulondela bikese pa nsombelu wanyi wa diambedi.

Dîku dia disanka

Mvua muledibue mu 1934, ne bukole buanyi bua mubidi buvua matuku wonso buimpe. Ku ntuadijilu kua bidimu bia 1950, tuakapetangana ne Ingrid, tuakaselangana mu 1958 ne pashishe tuakasa mu musoko wa Östersund, munkatshi mua Suède. Bualu bunene mu nsombelu wetu buakenzeka mu 1963 patuakatuadija dilonga dia Bible ne Bantemu ba Yehowa. Tshikondo atshi tuvua ne bana basatu bakese​—Ewa, Björn, ne Lena. Katupa kîpi panyima dîku dietu dijima diakatuadija kulonga ne kulubuluka bimpe mu dimanya dia bulelela bua mu Bible.

Mutantshi mukese panyima pa dituadija kulonga, tuakamuangala ne kuya kuasa ku Hälsingborg. Ke muaba utuvua baditshipe meme ne mukajanyi kudi Yehowa ne tuakatambuishibua mu 1964. Disanka dietu diakavula pakatambuishibua Ewa, muanetu wa bakaji mukole, mu 1968. Kunyima kua bidimu muanda-mutekete, mu 1975, Björn ne Ewa bakatambuishibua pabu, mu tshidimu tshivua tshilonda ngakatekibua mukulu mu tshisumbu tshia bena nkristo.

Mudimu wanyi wa ku mubidi uvua umpetesha mushindu wa kukumbaja bimpe majinga a bena mu dîku dianyi. Ne disanka dietu diakavula pakatuadija Björn ne Lena mudimu wa ku dîba ne ku dîba. Pashishe Björn wakabikidibua bua kusadila ku biro bia filiale wa Bantemu ba Yehowa ku Arboga. Nsombelu, mu ngakuilu wa mu tshimfuanyi, wakatutuila mimuemue. Pashishe, ku ntuadijilu wa 1980, ngakatuadija kumvua kusama kua tshiwuja tshiakumbushibua mu dipandibua dianyi adi dinene mu 1983.

Ditshimuna tuneke tua mu nyuma

Pakangambilabu ne: tshiena mua kuenda kabidi, nsombelu wanyi wakamueneka bu udi ushimbuka. Mmushindu kayi ungakapetulula bukole bua mu nyuma? Kabivua bikole bu mumvua ngela meji nansha. Ngakangata amu Bible wanyi ne kutuadija dibala. Mu dibala bia bungi, mvua mpeta bukole bua mu nyuma bua bungi. Kupita bionso, ngakafika ku dianyisha muyuki wa Yezu pa Mukuna. Ngakaubala misangu ne misangu ne kuelanganapu meji.

Mmuenenu wanyi wa disanka pa nsombelu wakapingana. Mu dibala ne dielangana meji, pamutu pa kumona njikilu ngakatuadija kumona mushindu wa kupeta disanka. Ngakapetulula dijinga dianyi dia kuyukidilangana ne bakuabu pa bulelela bua mu Bible, ne ngakakumbaja dijinga edi pa kufila bumanyishi kudi bena mu lupitadi ne bakuabu bamvua ntutakena nabu. Dîku dianyi divua dingambuluisha bimpe ne diakapeta mamanyisha pa mushindu wa dinkuba. Ndekelu wa bionso ngakapeta mushindu wa kumbuka mu lupitadi.

Mvua mpindieu ku nzubu. Ndisanka kayipu buetu buonso dituku adi! Dîku dianyi diakalongolola programe ne kutekamu dikubibua dianyi. Muananyi wa balume, Björn, wakapangadija bua kulekela mudimu ku filiale wa Bantemu ba Yehowa, ne kuluaye ku mbelu bua kuambuluisha mu mudimu wa dikubibua dianyi. Bivua dikoleshibua ku muoyo dinene pa kuikala munangibue ne mutabalela mu dîku dianyi.

Kuakama dipingana dikuabu dia disama

Pine apo, pavua matuku apita, bukole buanyi bua mubidi buakateketa, ne bivua binkolele bua kunyungakana. Ndekelu wa bionso, bena mu dîku dianyi kabavua kabidi mua kundama ku mbelu, nansha muvuabo badifile ne madikolela wonso. Nenku ngakamona se: nebilengele mbuele mu nzubu wa bakulakaje. Bivua biumvuija kabidi mashintuluka ne tshibidilu tshipiatshipia. Kadi tshiakabilekelela bua kuluabi disama dia mu nyuma nansha.

Tshiakalekela dibala dia Bible ne makebulula nansha kakese. Mvua ntangila mpindieu malu amvua nkumbana mua kuenza, ki ng’amvua tshiyi mua kuenza nansha. Mvua ngelangana meji pa mabenesha a mu nyuma adi Bantemu ba Yehowa buonso bapete. Ngakashala pabuipi ne Yehowa mu masambila ne mbabidila mushindu wonso bua kuamba lumu luimpe kudi bakuabu.

Mpindieu ndi mpitshisha mêba anyi a butuku ne a munya mu nzubu wa bakulakaje. Ku mêba a dilolo ndi nya ku nzubu peshi mu bisangilu bietu bia bena nkristo. Bena midimu ya diambuluisha ne dikuba bantu bakandongoluela mushindu wa dingambula mu mashinyi misangu yonso imvua nya mu bisangilu peshi ku nzubu kuanyi ne ngalukila kabidi. Ndi mukubibue bimpe bitambe kudi dîku dianyi didifile, kudi bana betu mu tshisumbu ne kudi bena mudimu wa nzubu wa bakulakaje.

Dienza tshindi mua kuenza

Tshiena ndiangata bu muntu muena tuneke, ne bena mu dîku dianyi peshi bana betu bena nkristo kabena bangangata bu muena tuneke nansha. Ndi amu nkubibua ne dinanga, ngambuluishibua bua kutungunuka ne kusadila amu bu mukulu. Ndi ndombola Dilonga dia mukanda mu tshisumbu lumingu luonso, kabidi ne dilonga dia Tshibumba tshia Nsentedi dia lumingu luonso mu nzubu wa Bukalenge. Mbinkolele bua kukudimuna mabeji mu Bible, nenku kudi muntu mutekibua bua kungambuluisha nanku mu bisangilu. Ndi ndombola bisangilu ne ngenza miyuki musombe mu nkuasa wanyi wa nkata.

Nenku ndi mua kuenza kabidi malu a bungi amvua nganyisha kuenza kumpala, nansha makumbula a bulami. (1 Petelo 5:2) Ntu ngenza nunku padi bana betu ba balume ne ba bakaji balua kundi bua diambuluisha peshi mibelu. Ntu kabidi ntumika ne telefone bua kuela bakuabu nshinga. Dikankamijibua dipetelaku didi buetu buonso. (Lomo 1:11, 12) Mu matuku apitshi aa mulunda kampanda uvua ungambila ne: “Amu dîba dindi mutekeshibue ku muoyo, ke diudi umbikila bua kunkankamija.” Kadi meme kabidi ndi mukankamijibue, mumanye se: Yehowa udi ubenesha madikolela anyi.

Kumpala ne kunyima kua bisangilu, ndi nyukila biakane ne bana ba mu thisumbu. Bu mundi musombele mu nkuasa wanyi wa nkata, tudi tuakula batangilangane mu mpala. Ndi nganyisha muoyo muimpe wabu ne kuamba kuabu kua malu malelela. Dimue dituku nsongalume kampanda wakangambila ne: “Udi mulema wa mushinga mukole ne wa pa buende!”

Ndi ne disanka dia kusadila Yehowa pa kueyemena ku bindi mua kuenza pamutu pa kusumpakana pa bindi tshiyi mua kuenza. Ndi mulongele bia bungi pa malu adi mamfikile. Ndi mutuishibue se: tudi bakoleshibue ne bakankamijibue mu diakama ntatu.​—1 Petelo 5:10.

Bantu ba bungi badi ne bukole bua mubidi, bandi mumone, mbapange kuanyisha ne: matuku wonso tudi ne bua kuangata ne mushinga ntendelelu wa Tatu wetu wa mu diulu. Bituabenga kuenza nunku, programe wetu wa dilonga, wa bisangilu ne wa mudimu wa buambi nebifuane kulua anu bu midimu ya buatshiabuatshia ya patupu. Ndi mmona ndongoluelu eyi mikale ya mushinga mukole bua dipanduka ku nshikidilu kua bulongolodi ebu ne kubuela mu mparadizu wa pa buloba mulaya kudi Nzambi.​—Musambu 37:9-11, 29; 1 Yone 2:17.

Matuku wonso tudi ne bua kulama mu mutshima ditekemena dia muoyo mu bulongolodi bupiabupia bua Nzambi butshilualua. (1 Tesalonike 5:8) Ndi mulonge kabidi bua kusuminyina ne diluisha lungenyi kayi luonso ludi mua kusaka ku ditekeshibua ku muoyo. Ndi kabidi mulonge bua kumona Yehowa bu Tatu wanyi ne bulongolodi buende bu Mamu wanyi. Ndi mutuishibue se: bituenza madikolela, Yehowa udi mua kuangata muntu kayi yonso wa kutudi bua kumusadilaye.

Nansha mumvua ngumvua imue misangu ‘mufina panshi,’ mu ngakuilu wa mu tshimfuanyi, tshiena ‘mubutula nansha.’ Tshienaku mulengulula kudi Yehowa ne kudi bulongolodi buende nansha, anyi kabidi kudi dîku dianyi ne bana betu bena nkristo. Ku diambuluisha dia disuminyina dianyi mu dibala dia Bible, ndi mupetulule makanda a mu nyuma. Ndi ne dianyisha kudi Yehowa Nzambi, udi upetesha “bukole bupite bua ku tshilelelu” patudi tumueyemena.​—2 Kolinto 4:7, NW.

Muikale ne ditekemena divule ne dieyemena dionso kudi Yehowa, ndi muindile ne muoyo mujima malu atshilualua. Ndi mutekemene se: mu katupa kîpi emu Yehowa neakumbaje dilaya diende dia mparadizu pa buloba muikala mabenesha malengele.​—Buakabuluibua 21:3, 4.