Ditalala didiku mua kupeteka anyi?

“NEKUIKALE misangu yonso mvita muaba kampanda. Etshi mbulelela bua dibungama budi butangila bukua-bantu.” Mmuenenu eu ukena wa ditekemena uvua muleja mu mukanda mufume kudi mubadi kampanda mu tshibejibeji tshia Newsweek. Udi witaba bualu ebu anyi? Mvita kayena mua kuepukibua ne ditalala kadiena mua kupeteka anyi? Bitueyemena amu ku miyuki ya bantu, mbikole bua kubenga kuandamuna eyowa ku nkonko yonso ibidi eyi. Pa kutangila miyuki mifunda, bukua-bantu buvua buditua mu mvita imue kunyima kua mikuabu, ne tshinyangu tshia mvita tshiakatamba kuvula pavua bantu baya kumpala mu dienza bia dishipangana nabi bitambe bukole.

Siekele wa 20 ki mmumbushibue mu malu aa nansha. Bushuwa, mmumone mvita idi mimuangalaje mashi mavule itu kayiyi mianji kuenzeka, kadi mmumone kabidi bualu bukuabu bupiabupia. Kukadi bidimu makumi atanu, États-Unis uvua munzulule tshikondo tshia bingoma bia nikleere pa kuela bombe atomike ibidi mu Japon. Mu milunguluku itanu ya bidimu dikumi katshia pin’apu, bisamba mbienze mishiki mivulavulayi ya bingoma bia nikleere bidi mua kubutula bukua-bantu misangu mipite bungi. Dikalaku dia bingoma bia nikleere neditekesheku bantu mu maboko bua kubengabu kukeba mvita anyi? Mianda nkayayi idi yakula. Biangatshile mu 1945 miliyo mivule ya bantu mbafue mu mvita​—nansha mudi bombe ya nikleere kayiyi miedibue kabidi too ne ku lelu.

Bua tshinyi bukua-bantu mbunange mvita nunku? Mukanda wa Encyclopedia Americana udi uleja imue ngikadilu idi munkatshi mua bantu itu mibafikisha ku mvita. Kudi dipanga dianyishangana dia bitendelelu, ditapuluka dia makoba, nshidimukilu mishilangane, dishilangana dia ngenyi-milombodi (bu mudi kominisme ne kapitalisme), dinanga dinekesha dia ditunga ne dilongesha dia budikadidi bua ditunga, nsombelu wa malu a bubanji, ne ditabija mvita kudi bantu. Paudi ubala mulongolongo wa malu aa, udiku umona bualu budi mua kushintuluka mu matuku makese atshilualua aa anyi? Matunga neatekeshe dipangadika diawu dia kukuba budikadidi buawu anyi? Bantu nebakepeshe ditapululangana dia makoba anyi? Bena mu ekleziya milamatshi ya mitabuja makulukulu nebakepeshe kuleleka kuabu anyi? Kabiena pa kuamba mua kuenzeka.

Nunku kakuenaku ditekemena nansha dikese, dia se: dimue dituku malu nealengele ne nekuikale ditalala dia kashidi anyi? Eyowa, kudi ditekemena. Nansha mudi bulongolodi ebu busaluke, kudi mushindu lelu’eu wa kupeta ditalala. Miliyo ya bantu mbapete ditalala. Suaku bua tukulondele pa bidi bitangila bakese ba ku bantu aba ne neumone tshidi malu mamonamona kudibu mua kumvuija buebe wewe.

[Mêyi a dianyisha bua tshimfuanyi mu dibeji 2]

Tshimfuanyi pa tshizubu ne dibeji dia 32: Reuters/​Bettmann

[Mêyi a dianyisha bua tshimfuanyi mu dibeji 3]

Reuters/​Bettmann