Bena disanka bua mpindieu ne bua kashidi

“Tshionkomokayi, ne ikalayi ne disanka bua kashidi mu bindi mfuka. Bualu, monayi, ndi mfuka Yeruzaleme tshiledi tshia disanka ne bantu bende tshiledi tshia ditshionkomoka.”​—YESHAYA 65:18, NW.

1. Mmunyi mudi ntendelelu mulelela muikale ne buenzeji pa bantu mu kupita kua siekele mivule?

MUNKATSHI mua siekele mivule, misumba bungi kabuyi kubala mmipete disanka divule mu disadila Nzambi mulelela, Yehowa. Davidi uvua umue wa ku bavule uvua ne disanka mu ntendelelu mulelela. Bible udi ulonda ne: tshikondo tshiakatualabu mushete wa tshiovo ku Yeruzaleme, ‘Davidi ne bena Izalele bonso bakalua ne mushete wa Yehowa, benda bela mbila ne tshiona tshia mpungi.’ (2 Samuele 6:15) Disanka dia mushindu’eu mu disadila Yehowa ki mbualu buakenzeka anu kale nansha. Udi mua kudipeta pebe. Ne udi mua kupeta mu katupa kîpi emu nansha ndambu mipiamipia ya disanka!

2. Pa kumbusha dikumbana dia kumpala dia Yeshaya nshapita wa 35 pa balukidi bena Yuda, mbanganyi lelu’eu badi dikumbana dikuabu ditangila?

² Mu tshiena-bualu tshishale, tuvua bakonkonone dikumbana dia kumpala dia mulayi udi ujula mioyo kuulu mufunda mu Yeshaya nshapita wa 35. Tudi ne kabingila bua kuubikila ne: mulayi wa diasulula bualu ke muakaluawu kumueneka bua bena Yuda ba kale. Udi ne dikumbana dia muomumue mu tshikondo tshietu etshi. Mu mushindu kayi? Ee, kutuadija ku bapostolo ba Yezu ne bakuabu ku Pentekoste wa 33 B.B., Yehowa udi muikale utumika ne bena Izalele ba mu nyuma. Bine aba mbantu bela manyi a spiritu munsantu wa Nzambi badi balua bena mu tshidi mupostolo Paulo ubikila ne: ‘Izalele wa Nzambi.’ (Galatia 6:16; Lomo 8:15-17) Kabidi, vuluka ne: mu 1 Petelo 2:9 (NW), bena nkristo aba mbabikidibue “tshisa tshisungula, buakuidi bua bukalenge, ditunga dinsantu, tshisamba tshidianjila kufunkuna bua kuikalatshi bumpianyi bua pa buabu.” Petelo udi utungunuka ne kuleja mudimu mupesha Izalele eu wa mu nyuma: “‘[Nudi ne bua] kumanyisha ngikadilu milenga’ ya eu wakanubikila ku mîdima bua kunubueja mu butoke buende bua dikema.”

Dikumbana mu tshikondo tshietu etshi

3, 4. Nnsombelu kayi uvuaku pakakumbana Yeshaya nshapita wa 34 mu bikondo bia buena-lelu?

³ Kuvua tshikondo kampanda ku ntuadijilu wa siekele eu tshivua bashadile ba Izalele wa mu nyuma pa buloba kabayi bakanzabale mu mushindu mutungunuja mu dimanyisha dia mukenji wa mushindu’eu. Kabavua basanka menemene mu butoke bua dikema bua Nzambi. Bushuwa, bavua mu mîdima mikole. Ntshikondo kayi atshi? Ne ntshinyi tshiakenza Yehowa Nzambi pa bualu ebu?

⁴ Bivua mu lupolu lua Mvita ya Buloba bujima I, katupa kîpi kunyima kua ditekibua dia Bukalenge bua Masiya bua Nzambi mu diulu mu 1914. Bisamba, bituibue nyama ku mikolo kudi bamfumu ba bitendelelu mu matunga kabukabu, biakumvuilangana tshiji tshikole. (Buakabuluibua 11:17, 18) Bushuwa, Nzambi wakela Bukua-buena-nkristo butontolodi nyima pamue ne kasumbu kabu katumbuke ka bamfumu ba bitendelelu anu bu muakenzelaye ditunga diditambishi dia Edome. Nunku, Bukua-buena-nkristo, tshimfuanyi tshia Edome, mbukumbanyine kupeta dikumbana dia buena-lelu dia Yeshaya nshapita wa 34. Dikumbana edi ku diambuluisha dia dibutudibua dia kashidi didi dijadika anu bu muvua dikumbana dia kumpala pa Edome wa kale.​—Buakabuluibua 18:4-8, 19-21.

5. Mmu mushindu kayi mudi Yeshaya nshapita wa 35 mukumbane mu bikondo bietu ebi?

⁵ Netuambe tshinyi pa bidi bitangila nshapita wa 35 wa mulayi wa Yeshaya, pamue ne dizangika diawu dia disanka? Mmukumbane kabidi mu tshikondo tshietu etshi. Mu mushindu kayi? Mmukumbajibue mu diasuludibua dia Izalele wa mu nyuma kumbukila ku mushindu kampanda wa dikuatshibua ku bupika. Tuanji kukonkonona malu menzeka mu tshidi bushuwa muyuki wa teokrasi wa matuku mashale aa, adi enzeka mu matuku a muoyo a bavule batshidi ne muoyo.

6. Bua tshinyi tudi mua kuamba se: bashadile ba Izalele wa mu nyuma bavua mu nsombelu wa dikuatshibua ku bupika?

⁶ Bua lupolu kampanda luîpi mu tshikondo tshia Mvita ya Buloba bujima I, bashadile ba Izalele wa mu nyuma kabakadilama bapeluke menemene ne badilongamije mu disua dia Nzambi. Bamue ba kudibu bakaditobakaja ne ntupakanyi ya malongesha ne bakadibuejakaja pa kubenga kuditeka patoke ku luseke lua Yehowa pakabenzejabu bua kutua matunga avua aluangana mvita nyama ku mikolo. Mu bidimu abi bia mvita, bakapetangana ne dikengeshibua dia mishindu yonso, ne nansha mikanda yabu miumvuiji ya Bible yakakandikibua mu miaba ya bungi. Ndekelu wa bionso, bamue ba ku bana betu bavua ne bujitu bua kulombola bakapishiibua ne kuedibua mu buloko bua mabandu a dishima. Pa kutangila malu aa akapita, kabiena bikole bua kumona se: mu mushindu kampanda, bantu ba Nzambi, pamutu pa kuikala badikadile, bavua mu nsombelu wa dikuatshibua ku bupika. (Fuanyikija ne Yone 8:31, 32.) Bavua bushuwa bapange lumonu lua mu nyuma. (Efeso 1:16-18) Bakaleja tshitudi mua kubikila bu bumàmà pa bidi bitangila disamuna Nzambi, ne tshipeta tshia se: kabavua bapatula mamuma mu malu a mu nyuma. (Yeshaya 32:3, 4; Lomo 14:11; Filipoi 2:11) Udiku mumone mudi nsombelu eu mufuanangane ne wa bena Yuda ba kale mu dikuatshibua ku bupika ku Babilone anyi?

7, 8. Ndiasulula dia mushindu kayi diakenzekela bashadile ba buena-lelu?

⁷ Kadi Nzambi uvua ne bua kulekela basadidi bende ba buena-lelu mu nsombelu au anyi? Tòo, uvua mupangadije bua kubajadikulula, mu diumvuangana ne tshivuaye mudianjile kuamba ku butuangaji bua Yeshaya. Nunku mulayi umue umue eu mu nshapita wa 35 udi ukumbana mu mushindu musunguluke mu tshikondo tshietu etshi, ne diasuludibua dia bashadile ba Izalele wa mu nyuma mu bubanji ne makanda a mubidi mu mparadizu wa mu nyuma. Mu Ebelu 12:12, Paulo wakatumika ne Yeshaya 35:3 mu ngakuilu wa mu tshimfuanyi, ushindika bujalame bua ditumika dietu dia mu nyuma ne tshitupa etshi tshia mulayi wa Yeshaya.

⁸ Mu tshikondo tshiakalonda mvita, bashadile bela manyi ba Izalele wa mu nyuma bakapatuka, mu ngakuilu wa mu tshimfuanyi, mu bupika. Yehowa Nzambi wakatumika ne Yezu Kristo, Cyrus Munene, bua kubapikula. Nunku, bashadile aba bavua mua kuenza mudimu kampanda wa diibakulula, mufuanangane ne mudimu wa bashadile bena Yuda ba kale, aba bakapingana mu ditunga diabu bua kuibakulula ntempelu muena dîna mu Yeruzaleme. Kupita apu, bena Izalele aba ba mu nyuma mu bikondo bia buena-lelu bavua mua kutuadija didima ne dipatula mparadizu wa mu nyuma wa mâyi a matamba, budimi bua Edene bua mu tshimfuanyi.

9. Mmunyi muvua bualu bu ebu budi bumvuija mu Yeshaya 35:1, 2, 5-7 buenzeke mu tshikondo tshietu etshi?

⁹ Bikale ne bidi kuulu eku mu lungenyi, tutangilayi musangu eu kabidi mu Yeshaya nshapita wa 35, ne tuanji kubala mvese 1 ne 2. Etshi tshiakamueneka bu rejon kampanda ukena ne mâyi tshiakatuadija bushuwa kukuama bilongo ne kupatula mamuma amu bu mpata bia kale bia Shalona. Pashishe, bala kumbukila ku mvese 5 too ne ku wa 7. Bashadile, bungi kampanda bua ba kudibu batshidi ne muoyo ne batumika mu mudimu wa Yehowa, bakunzuludibua mêsu abu a tshiumvuidi. Bavua mua kumona bimpe bitambe diumvuija dia malu akenzeka mu 1914 ne pashishe. Abi bivua kabidi ne buenzeji pa bavule ba kutudi badi benza “musumba munene,” udi mpindieu usadila pamue ne bashadile.​—Buakabuluibua 7:9, NW.

Udi usanganyibua mu dikumbana edi anyi?

10, 11. (a) Mmunyi mudi dikumbana dia Yeshaya 35:5-7 dikutangila? (b) Mmunyi mûdi wela meji wewe nkayebe bua mashintuluka aa?

¹⁰ Udiangate wewe muine bu tshilejilu. Kumpala kua wewe kupetangana ne Bantemu ba Yehowa, uvuaku ubala Bible pa tshibidilu anyi? Né uvua ubala, ndijingulula dia bunene kayi diuvua nadi? Tshilejilu, udi mpindieu mumanye bulelela budi butangila ngikadilu wa bafue. Pamu’apa udi mua kutelela muntu kampanda udi usua kumanya bivule pa bualu ebu mifundu mifidi bijadiki mu Genese nshapita 2, Muambi nshapita wa 9, ne Yehezekele nshapita wa 18, pamue ne mvese mikuabu ya bungi. Eyowa, udi pamu’apa umvua tshidi Bible ulongesha pa biena-bualu anyi nkonko mivule. Mu mushindu mupepele, tudi mua kuamba ne: Bible mmukuteketele, ne údí mua kumvuija bivule bidi munda muende kudi bakuabu, bu mûdi mua kuikala mumane kuenza kabiyi mpata.

¹¹ Kadi, muntu ne muntu wa kutudi udi ne bua kudiebeja ne: ‘Mmunyi mungakalonga bionso bindi mumanye pa bulelela bua mu Bible? Kumpala kua kulonga ne bantu ba Yehowa, nkavuaku musokolole mvese yonso ituatedi eyi anyi? Mvuaku mujingulule ngumvuilu wayi ne mufike ku nkomenu miakane idi itangila mushinga wayi anyi?’ Diandamuna dilelela ku nkonko eyi didi pamu’apa ne: tòo. Muntu kumvu bibi bua tshiambilu tshia mushindu’eu, kadi tudi mua kuamba mu bulelela buonso ne: uvua mufofo pa bidi bitangila mifundu eyi ne ngumvuilu wayi. Ki mmuomu anyi? Ivua mu Bible, kadi kuvua mua kuyimona anyi kujingulula ngumvuilu wayi. Mpindieu, mmunyi muakatabala mêsu ebe mu nyuma? Bivua ku diambuluisha dia tshidi Yehowa muenze mu dikumbaja Yeshaya 35:5 pa bashadile bela manyi. Pashishe, mêsu ebe kutabalawu pawu. Kutshiena kabidi mu mîdima ya mu nyuma nansha. Udi mua kumona.​—Fuanyikija ne Buakabuluibua 3:17, 18.

12. (a) Bua tshinyi tudi mua kuamba ne: etshi ki ntshikondo tshia bishima bia ku mubidi bia luondapu? (b) Mmunyi muvua tshilejilu tshia muanetu F. W. Franz tshileje mushindu udi Yeshaya 35:5 ukumbana mu tshikondo tshietu etshi?

¹² Balongi ba lungenyi lutue ba Bible ne bienzedi bia Nzambi mu kupita kua siekele mivule mbamanye se: etshi ki ntshikondo tshia mu miyuki ya bantu tshia bishima bia ku mubidi bia luondapu to. (1 Kolinto 13:8-10) Nenku katuena tutekemena Yezu Kristo bua kuikalaye utabeja mêsu a bafofo bua kuleja mudiye Masiya, Muprofete wa Nzambi. (Yone 9:1-7, 30-33) Kupita apu kêna wondapa bena mapapa bua kumvuabu tshiakabidi. Pakaavua Frederick W. Franz, umue wa ku bela manyi ne uvua tshikondo atshi mulombodi wa Société Watch Tower, pa kukumbaja bidimu 100, ukavua kana mufofo ne uvua ne bua kutumika ne tuamu tua mu matshi. Munkatshi mua bidimu bungi kampanda katshivua kabidi mua kumona bua kubala; kadi, nnganyi uvua mua kumuangata bu mufofo anyi muena mapapa mu ngumvuilu wa Yeshaya 35:5? Lumonu luende lua mu nyuma lutue luvua dibenesha bua bantu ba Nzambi pa buloba bujima.

13. Ndishintuluka anyi ndiasulula kayi divuabu benzele bantu ba Nzambi ba lelu?

¹³ Anyi netuambe munyi bua ludimi luebe? Bela manyi ba Nzambi bavua mua kuikala tumama mu kupita kua dikuatshibua diabu ku bupika dia mu nyuma. Kadi pakashintulula Nzambi diakamue nsombelu au, ndimi yabu yakatuadija kuela mbila ne disanka pa malu avuabu bamanye pa Bukalenge bua Nzambi bubanjija ne pa milayi yende bua matuku atshilualua. Pamu’apa mbakuambuluishe pebe bua kusulula ludimi luebe. Mmisangu bungi kayi iwakayukila ne bakuabu pa bulelela bua mu Bible ku kale? Pamu’apa tshikondo kampanda wakela meji ne: ‘Ndi nsanka bua dilonga, kadi tshiakupatuka bua kuyukila ne bantu bandi tshiyi mumanye nansha.’ Kadi, kabienaku bilelela se: “ludimi lua kamama” ludi mpindieu ‘luimba misambu’ anyi?​—Yeshaya 35:6.

14, 15. Mmunyi mudi bavule bendele mu “Njila wa Tshijila” mu tshikondo tshietu etshi?

¹⁴ Bena Yuda ba kale bàvuà bapikudibue ku Babilone bakenza luendu lule bua kualukila mu ditunga diabu. Luendu alu ndufuanangane ne tshinyi mu tshikondo tshietu etshi? Ee, bala Yeshaya 35:8: ‘Tshibebe ntshikaleku, ne njila, nebamubikile ne: Njila wa Tshijila; badi kabayi balengejibue ku bubi buabu kabena bamanye mua kupitshilaku.’

¹⁵ Katshia ku dilekeledibua diabu ku dikuatshibua ku bupika dia mu nyuma, bashadile bela manyi, badi bambuluishibue mpindieu kudi miliyo ya mikoko mikuabu, mbapatuke mu Babilone Munene bua kubuela mu tshibebe tshia mu tshimfuanyi, njila mupeluke wa tshijila udi ufikisha muntu mu mparadizu wa mu nyuma. Tudi tuenza madikolela wonso bua kukumbaja ngikadilu milomba ne kushala mu Tshibebe etshi tshia Tshijila. Elaku meji buebe wewe muine. Mêyi-makulu ne mêyi-maludiki ebe a malu a tshitembu awudi mulamate bikole kaenaku matambe kutumbuka mpindieu kupita tshikondo tshiuvua muena mu bulongolodi ebu anyi? Kuenaku wenza madikolela mapitshidile bua kuakaja ngelelu webe wa lungenyi ne ngikadilu webe ku ngelelu wa lungenyi ne ngikadilu bia Nzambi anyi?​—Lomo 8:12, 13; Efeso 4:22-24.

16. Nnsombelu kayi itudi mua kulabula patudi tuendela mu Njila wa Tshijila?

¹⁶ Bu mûdi utungunuka mu Njila eu wa Tshijila, udi mu bulelela buonso mupikudibue ku buôwa bua bantu bàdì bu nyama. Bushuwa, mu bulongolodi ebu udi ne bua kutabala bua bantu bena lukuka ne bakinyanganyi kabalu kukudia wewe ne muoyo mu ngakuilu wa mu tshimfuanyi. Bantu bapite bungi badi ne lukuka mu malanda abu ne bakuabu. Ndishilangana kayipu munkatshi mua bantu ba Nzambi! Munkatshi muabu údí mu muaba mukubibue. Bushuwa, bena nkristo nebe kabena bapuangane; imue misangu umue udi mua kuenza tshilema anyi kukebesha bubi. Kadi udi mumanye se: bana benu kabena benza ku tshikama bua kukutapa ku muoyo anyi kukudia nansha. (Musambu wa 57:4; Yehezekele 22:25; Luka 20:45-47; Bienzedi 20:29; 2 Kolinto 11:19, 20; Galatia 5:15) Bishilangane, badi bakutabalela; mbakuambuluishe; mbasue kusadila pamue nebe.

17, 18. Mmu ngumvuilu kayi mudi mparadizu kampanda muikalaku mpindieu, ne bidi ne buenzeji kayi kutudi?

¹⁷ Nunku tudi mua kutangila Yeshaya nshapita wa 35, pa kuikala ne dikumbana dia mpindieu dia mvese 1 too ne ku wa 8 mu tshieledi tshia lungenyi. Kabienaku bimueneka patoke se: tudi bapete tshidi mua kubikidibua ne kabingila kuonso ne: mparadizu wa mu nyuma anyi? Tòo, ki mmupuangane​—ki mmuanji kuikala nanku. Kadi udi bushuwa mparadizu, bualu muaba’eu, anu bu mudibi biamba mu mvese 2, tudi mua kudianjila ‘kutangila butumbi bua Yehowa ne bulengele bua Nzambi wetu.’ Ne tshipeta tshidi tshinyi? Mvese wa 10 udi wamba ne: “Bapikula mene ba Yehowa nebalukile ne bushuwa nebafike ku Siona ne mbila ya disanka; ne musangelu bua bikondo bikena bijadika newikale pa mitu yabu. Ku ditshionkomoka ne ku musangelu nebakufike, ne kanyinganyinga ne ditua mikemu nebikale ne bua kunyema.” Bushuwa, diumbuka dietu mu bitendelelu bia dishima ne dipatshila dietu dia ntendelelu mulelela ku dianyisha dia Nzambi mbipeteshi bia disanka.

¹⁸ Disanka disuikakaja ku ntendelelu mulelela didi ditungunuka ne kudiunda, ki mmuomu anyi? Udi mumone mudi basankididi bapiabapia benza mashintuluka ne balua kushindama mu bulelela bua mu Bible. Udi mumone bimpe mudi bansonga benda bakola ne balubuluka mu nyuma mu tshisumbu. Kudi batismo, kuudi umona bantu baudi mumanye batambuishibua. Bionso abi kabienaku tubingila tua disanka, tua disanka divulavulayi, lelu’eu anyi? Eyowa, ndisanka kayipu padi bakuabu badisangisha netu mu budikadidi buetu bua mu nyuma ne mu ngikadilu ya mu mparadizu!

Dikumbana ditshidi kumpala!

19. Ndindila kayi dia ditekemena didi Yeshaya nshapita wa 35 utuuja nadi?

¹⁹ Tudi bakonkonone mu buondoke kuulu eku Yeshaya nshapita wa 35 pa bidi bitangila dikumbana dia kumpala ne dipingana dia bena Yuda ne pa dikumbana dia mu nyuma ditshidi ditungunuka too ne ku lelu. Kadi abi ki nndekelu to. Kudi bia bungi bipite. Mbisuikakaja ku dishindika dia mu Bible dia diasulula ditshilualua dia ngikadilu ya mparadizu muena dîna pa buloba.​—Musambu wa 37:10, 11; Buakabuluibua 21:4, 5.

20, 21. Bua tshinyi bidi bia meji ne biumvuangane ne Mifundu bua kuitabuja ne: nekuikale kabidi dikumbana dikuabu dia Yeshaya nshapita wa 35?

²⁰ Kabivua mua kuikala bipungakane bua Yehowa kufila mumvuija a mparadizu adi ashiya bimfuanyi mu lungenyi bu nunku ne pashishe kuimanyika makumbana amu ku bintu bia mu nyuma. Bushuwa, ebi kabiena bisua kuamba ne: makumbana a mu nyuma kaena ne mushinga. Nansha bikala mparadizu muena dîna mua kuashibua, kavua mua kutusankisha bu tuetu bikale munkatshi mua bimuenenu bilengele ebi ne nyama ya ditalala banyungulula kudi bantu banyanguke mu nyuma, bantu badi benza malu bu nyama ya luonji. (Fuanyikija ne Tito 1:12.) Eyowa, dikumbana dia mu nyuma didi ne bua kulua diambedi, bualu didi ne mushinga mukole.

²¹ Nansha nanku, Mparadizu utshilualua kêna ushikila amu ne makumbana a mu nyuma atudi tusanka bualu buawu mpindieu ne atuasankila kabidi bipitshidile mu matuku atshilualua. Tudi ne kabingila kimpe ka kutekemena dikumbana diena dîna dia milayi bu mudi eu wa Yeshaya nshapita wa 35. Bua tshinyi? Ee, mu nshapita wa 65, Yeshaya wakadianjila kuakula bua ‘diulu dipiadipia ne buloba bupiabupia.’ Mupostolo Petelo wakatumika ne mvese au pakumvuijaye tshidi tshilonda dituku dia Yehowa. (Yeshaya 65:17, 18; 2 Petelo 3:10-13) Petelo uvua uleja ne: ngikadilu yakaleja Yeshaya ivua ne bua kuikalaku bushuwa padi “buloba bupiabupia” bulua bualu bulelela. Abi bidi bikonga mumvuija audi mua kuikala mumanye bimpe​—diibaka nzubu ne disombelamu; dikuna mvinyo mu madimi ne didia bimuma; dipeta disanka divule mu mudimu wa ku bianza bia muntu ne muntu; mubuabua ne muan’a mukoko bisombe pamue; ne bualu bubi nansha bumue kabuyi buenzeka pa buloba bujima. Mu mêyi makuabu, muoyo bua matuku a bungi, nzubu kayiyi ya njiwu, biakudia bivulavulayi, mudimu udi usankisha, ne ditalala munkatshi mua nyama ne pankatshi pa nyama ne bantu.

22, 23. Nnshindamenu kayi bua disanka wikalaku pakumbana Yeshaya nshapita wa 35 mu matuku atshilualua?

²² Ditekemena adi kadienaku dikuuja ne disanka anyi? Bidi ne bua kuikala nanku, bualu Nzambi wakatufuka bua tuikale ne muoyo wa mushindu’au. (Genese 2:7-9) Nunku, ntshinyi tshidibi biumvuija bilondeshile mulayi wa mu Yeshaya nshapita wa 35 utudi tukonkonona? Bidi biumvuija ne: tudi ne kabingila ka pa mutu ka kuela mbila ya disanka. Bipela biena dîna ne rejon miûme nebikuame bilongo, nebitupeteshe disanka. Pashishe bantu badi ne mêsu mafikuluke, anyi makunzubile, anyi a mekala kayi makuabu, kadi badi mpindieu bafofo, nebakumbane mua kumona. Bena nkristo netu badi ne mapapa, anyi mene aba ba kutudi badi bumvua ne lutatu, nebakumbane mua kumvua bimpe. Ndisanka kayipu pa kutumika ne bukokeshi abu bua kuteleja babala ne bumvuija Dîyi dia Nzambi, pamue ne diteleja tshiona tshia kapepa munkatshi mua mitshi, tuseku tua muana, kasambu ka nyunyu!

²³ Nebiumvuije kabidi ne: balema, pa kukonga ne aba badi basama binyoka mpindieu, nebende kakuyi lutatu nansha lukese. Ndisulakana kayipu! Pashishe misulu ya mâyi miena dîna neyipatuke mu tshipela. Netumone dipatuka dia mâyi ne kuteleja disabakana diawu. Netukumbane mua kuendela kuinaku ne kulenga bisosa bia mâyi a matamba ne mitshi ya nyandu. Nebikale bushuwa Mparadizu muasulula. Ndisanka kayi dikalaku pa kuikala munyunguludibue kudi ntambue anyi kudi nyama mukuabu wa mushindu’eu kakuyi buôwa? Katuena mene ne bua kutuadija kubilonda, bualu tuetu buonso tukadi bafuanyikije mu lungenyi ne banyishe nsombelu eu.

24. Bua tshinyi udi mua kuitaba tshiambilu tshia mu Yeshaya 35:10?

²⁴ Yeshaya udi utujadikila ne: “Bapikula mene ba Yehowa nebalukile ne bushuwa nebafike ku Siona ne mbila ya disanka; ne musangelu bua bikondo bikena bijadika newikale pa mitu yabu.” Nunku tudi mua kuitaba se: tudi ne kabingila ka kuela mbila ya disanka. Disanka bua bionso bidi Yehowa mumane kuenzela bantu bende mu mparadizu wetu wa mu nyuma, ne disanka bua bionso bitudi mua kutekemena mu Mparadizu muena dîna ukaadi pabuipi. Bua bena disanka​—buetu tuetu—​Yeshaya udi ufunda ne: “Ku ditshionkomoka ne ku musangelu nebakufike, ne kanyinganyinga ne ditua mikemu nebikale ne bua kunyema.”​—Yeshaya 35:10, NW.

Uvua mubambishe anyi?

◻ Ndikumbana dibidi kayi didi ditangila Yeshaya nshapita wa 35 didi dienzeke?

◻ Ntshinyi tshidi tshiakanangane mu nyuma ne mashintuluka a bishima akadianjila kumanyisha Yeshaya?

◻ Mmunyi mûdi usanganyibua mu dikumbana dia mulayi eu?

◻ Bua tshinyi tudi mua kuamba se: Yeshaya nshapita wa 35 udi utuuja ne ditekemena bua matuku atshilualua?

[Tshimfuanyi mu dibeji 15]

Nzubu wa lukanu mu musesu wa Raymond ku Brooklyn, New York, muaba wakalamabu bana betu balombodi muanda-mutekete mu Kabalashipu 1918

[Tshimfuanyi mu dibeji 16]

Nansha muvuaye kana mufofo mu bidimu biende bia ku ndekelu, lumonu lua mu nyuma lua muanetu Franz luakashala lutue

[Bimfuanyi mu dibeji 17]

Didiunda ne dilubuluka bia mu nyuma bidi tubingila tua disanka