Manême a babedi adi anemekibua

‘Kakuena mushindu mukuabu undi mua kuenza dipanda edi kakuyi diela mashi. Biwasua kupandibua, newikale ne bua kuanyisha ngondapilu wanyi. Tshianana, newikale ne bua kukeba munganga mukuabu.’

MÊYI aa a munganga kaakanyungusha ditabuja dia Cheng Sae Joo, umue wa ku Bantemu ba Yehowa udi musombele mu Thaïlande. Mupetshibue ne disama dia meningioma, mushindu kampanda wa tshiûja mu buongo, Cheng uvua ukengela dipandibua kakuyi ditekemena. Kadi uvua mupangadije bua kutumikila dîyi-dituma edi dia mu Bible: ‘Tungunukayi ne kudilama . . . ku mashi.’​—Bienzedi 15:28, 29, NW.

Cheng wakaya ku mpitadi mikuabu ibidi, pa kusungula bua kuondapibua mu ditunga diende né bivua mua kuenzeka. Bia dibungama buende, ba-minganga ba ku mpitadi mikuabu eyi bakabenga pabu bua kuenza dipanda kakuyi diela mashi. Ndekelu wa bionso, Cheng wakatumibua ku Institut Neurologique wa ku Université wa diondapa bakaji wa Tokyo kudi Midimu ya dikebulula ngumu ya luondapu [HIS, mu anglais] mu Thaïlande. Lupitadi alu lukavua luondape babedi bena tshiûja mu buongo bapite pa 200 pa kutumika ne kela ka nsense ya gamma, dimue dia ku malubuluka mapiamapia mu ngondapilu udi utumika ne nsense.

Malongolola akenjibua bua Cheng kushalaye pamue ne Bantemu bena Japon bavua basombele pabuipi ne lupitadi. Kasumbu kampanda ka Bantemu kakamushindikija ku tshipalu tshia ndeke, pamue ne Bantemu ba Yehowa babidi badi bakula muakulu wa Thai ne muleji-mpala umue wa HIS. Kunyima kua lumingu bu lujima lua ditetshibua mubidi kudi ba-minganga, Cheng wakabuejibua mu lupitadi muakondapibuaye ne kela ka nsense ya gamma. Diondapibua edi diakanenga dîba bu dimue tshianana. Mumane kupatuka mu lupitadi dituku diakalonda, Cheng wakasa luendu mutangile ku Thaïlande dituku diakalonda adi.

“Tshivua ngela meji nansha kakese ne: diambuluisha dinene dia mushindu’eu divua mua kupeteshibua ku butuangaji bua dilongolola edi,” ke muakamba Cheng. “Mvua mukemeshibue bushuwa kudi dinanga diakalejabu ne kudi diumvuangana pankatshi pa bitupa bivua bualu ebu butangile.”

Mu dimanyisha ngumu pa muanda eu, tshikandakanda tshia bena Japon tshia Mainichi Shimbun tshiakela nseka ne: “Too ne mpindieu, tubingila tua malu a ntendelelu bua dibenga kuedibua mashi ntuzangikibue. Kadi, diedibua mashi didi ne ntatu ya pashishe bu mudi disama dia Sida, njiwu ya dipia tuîshi tua disama dia hépatite C, ne dibengangana ne mubidi. Bua kabingila aka kudi babedi badi kabayi basua diedibua mashi kabiyi kutangila ditabuja diabu dia mu malu a ntendelelu.”

Tshikandakanda etshi tshiakamba pashishe ne: “Babedi bavule bàvuà babenga diedibua mashi bakenzejibua ku bukole bua kushintulula mpitadi, kadi nzubu ya luondapu idi ne bua kushintulula mmuenenu wayi pa bidi bitangila dinemeka disua dia mubedi. Dianyisha dimanyisha (dipetesha mubedi diumvuija dijima dia tshikala ne bua kuenjibua didi pashishe difikisha ku dianyisha dia ngondapilu) ndilombibue, ne dianyisha edi nditangile kabidi mianda ya diela mashi. Bidi ne bua kuanyishibua se: eu ki mmuanda udi utangila amu ntendelelu kampanda.”

Amu bu Cheng Sae Joo, bavule bàdì basue diondapibua kakuyi diedibua mashi badi ne bua kuya ku mpitadi mikuabu. Nansha nanku, badi banyisha madikolela a ba-minganga badi basue kunemeka manême a babedi babu.

Midimu ya dikebulula ngumu ya luondapu yakenjibua kudi Bantemu ba Yehowa mu filiale ya Société Watch Tower bua kukeba diumvuangana ne buondapi badi banemeka mitabuja abu. Pa buloba bujima, Midimu eyi idi ipunga malanda ne mpitadi, buondapi, bena mudimu wa ditabalela makanda a mubidi, balumbuluidi, ne banzuji.