Mpuilu wa distrike bua 1996 “Batuadi ba mukenji wa ditalala dia Nzambi”

MU BIKONDO bia kale bantu ba Yehowa bavua basekelela mafesto asatu manene ku tshidimu. Bia muomumue, mu bikondo bietu ebi bantu badi babikidibua ku dîna dia Yehowa batu badisangisha misangu isatu ku tshidimu bua bikondo bia disanka. Badi basanka bua kudisangisha bua mpuilu wa pa buende wa dituku dimue, mpuilu wa tshijengu wa matuku abidi, ne mpuilu wa distrike wa matuku asatu peshi anayi. Tshidimu etshi, tshiena-bualu tshia mpuilu wa distrike tshidi: “Batuadi ba mukenji wa ditalala dia Nzambi.”

Mmunyipu mudi tshiena-bualu atshi tshiakanyine! Nzambi wetu, Yehowa, udi “Nzambi wa ditalala,” eyowa, ‘Nzambi udi upetesha ditalala.’ Mulombodi wetu, Yezu Kristo, udi ‘Muana wa mukalenge wa ditalala,’ ne mukenji udi basadidi ba Yehowa batuala udi mukenji wa ditalala dia Nzambi. (Filipoi 4:9; Lomo 15:33; Yeshaya 9:6; Nahuma 1:15) Programe muimpe wa mpuilu wa distrike mmulongolola bua kuambuluisha bonso bua kuanyisha tshishiki mushinga wa ditalala dia Nzambi.

Tshidimu etshi mu Burundi, Congo ne Zaïre, nemuikale mpuilu ya distrike 42. Pamu’apa, nekuenzeke mpuilu ya distrike kampanda pabuipi nebe. Bua tshinyi kubenga kuebeja Bantemu ba Yehowa bena mutumba nebe pa bidi bitangila dîba ne muaba bijadika wenzekelaye ne nunku kuenza malongolola bua kubuelamu? Aba bonso badi basue kumanya bivule pa bidi bitangila ditalala dilelela, didi dinenga nebabakidile ne musangelu.