Udi ukenga bua ngenyi midianjila kufumba anyi?

TSHINYANGU munkatshi mua bisa, dishilangana dia dikoba, kansungansunga, diabulukangana, ne dibutulangana mbifuanangane ku tshinyi? Bidi bionso bipeta bia nginyikilu wa bantu mutangalake kuonso​—ngenyi midianjila kufumba!

Ngenyi midianjila kufumba ntshinyi? Tshibungu kampanda tshidi tshiyumvuija bu “mmuenenu midima kakuyi dipitshisha dîba anyi diditatshisha bua kutshinka mu mushindu muakane.” Bu mutudi bantu bapange bupuangane, tudi binyikibue ku dikala ne ndambu wa ngenyi midianjila kufumba. Pamu’apa udi mua kuvuluka bikondo biuvua mufile mmuenenu kampanda pebe kuyi ne bijadiki bionso. Bible udi uleja dishilangana didi pankatshi pa minyikibua a mushindu’eu a ngenyi midianjila kufumba ne mushindu udi Yehowa umona malu mu bululame buonso. Udi wamba ne: “Yehowa kêna utangila bu mudi bantu batangila, bualu bua bantu badi batangila mubidi, kadi Yehowa udi utangila mu mutshima.”​—1 Samuele 16:7.

Ngenyi midianjila kufumba idi mua kukebesha bubi

Kakuyi mpata muntu yonso ukadiku muambe mêyi a dibipisha mukuabu tshikondo kampanda. (Fuanyikija ne Muambi 7:21, 22.) Mu ka-bujima, buonso buetu tudi basuya kudi ngenyi midianjila kufumba. Kadi, padiyi imanshibua ne lukasa, ngenyi midianjila kufumba neyikale pamu’apa mua kukebesha anu bubi bukese anyi kayakubukebesha nansha. Dilama dia ngenyi mibiamibi ya mushindu’eu ke didi mua kukebesha bubi. Didi mua kutudinga pa kutusaka ku ditaba dishima kampanda. Tshilejilu, basaka kudi buenzeji bua ngenyi midianjila kufumba, bamue bantu badi bushuwa bitaba ne: muntu kampanda udi mua kuikala muena lukuka, muena lulengu, muena matshimbu, anyi muditambishi anu bualu mmuena tshisumbu kampanda tshia malu a Nzambi, tshisa, anyi ditunga.

Mu nsombelu ya bungi ditshinka dibi dia mushindu’eu didi dilelela bakuabu bienzedi bikena bia buakane, bia kanyawu, anyi mene bia tshinyangu. Miliyo ya bantu mbajimije mioyo yabu mu dishipangana dia mu tshi-bungi, dibutulangana, dishipangana munkatshi mua bisa, ne mishindu mikuabu minekesha ya ngenyi midianjila kufumba.

Pa buloba bujima, mbulamatadi mmiluishe ngenyi midianjila kufumba pa kulaya bunême bukena kutupa ku budikadidi, dikubibua, ne diakanangana ku butuangaji bua mikenji. Biwabala tshibungu tshia mêyi ne mikandu anyi mushiki munene wa mikenji ya ditunga dienu, kakuyi mpata neupetemu kanungu kampanda anyi diakaja kansanga didi ne tshipatshila tshia kukuba manême a ba-muena-muabu bonso, kabiyi kutangila tshisa tshiabu, dikala balume anyi bakaji diabu, anyi tshitendelelu tshiabu. Nansha nanku, ngenyi midianjila kufumba ne kansungansunga mbitangalake mu bualabale bunene pa buloba bujima.

Udiku mukengesha kudi ngenyi midianjila kufumba anyi? Ukadiku muangatshibue bu muena lukuka, muena lulengu, muena matshimbu, anyi muditambishi anu bua tshisa, bua bungi bua bidimu, bua dikala mulume anyi mukaji, bua ditunga, peshi bua mitabuja pa malu a Nzambi biebe anyi? Badi bakubudisha mishindu ya kupeta dimanya-mukanda, mudimu, nzubu, ne midimu mu nsangilu wa bantu biakane bua ngenyi midianjila kufumba anyi? Bikalabi nunku, mmunyi muudi mua kupita ne nsombelu eu?

[Tshimfuanyi mu dibeji 3]

Dilama ngenyi midianjila kufumba didi dikebesha lukinu munkatshi mua bisa

[Mêyi a dianyisha]

Nina Berman/​Sipa Press