Bamanyishi ba Bukalenge badi balonda

“Mêyi-matuma ebe onso adi bulelela”

KATUPA kîpi kumpala kua lufu luende, Mozese wakalanga tshisamba tshia Izalele bua kutumikila mêyi-matuma onso a Yehowa. Wakamba ne: ‘Tekayi mêyi onso andi nnuambila lelu mu mitshima yenu, mêyi onso a mikenji mene inudi nuambila bana benu bua bobo kuyenza. Ebu ki mbualu bua patupu kunudi; kadi budi muoyo buenu.’​—Dutelonome 32:46, 47.

Nkama ya bidimu pashishe, mufundi wa misambu wakazangika mushinga wa malongesha onso a Nzambi pakambaye ne: “Udi pabuipi, O Yehowa, ne mêyi-matuma ebe onso adi bulelela.” (Musambu wa 119:151, NW) Mu siekele wa kumpala, Yezu yeye muine wakakula pa bidi bitangila mushinga wa ‘mêyi onso adi alopoka mukana mua Nzambi.’ (Matayo 4:4) Ne ku bulombodi bua Nzambi mupostolo Paulo wakafunda ne: “Mufundu wonso mmufunda ku spiritu wa Nzambi ne udi ne mushinga.”​—2 Timote 3:16, NW.

Mbimueneke patoke se: Yehowa Nzambi mmutekemene bua bamutendeledi kuangatabu ne mushinga mukenji mujima mututuadila mu mabeji a Dîyi diende. Kakuena mufundu nansha umue mu Bible udi kawuyi ne mushinga. Ke tshidi mmuenenu wa Bantemu ba Yehowa pa bidi bitangila Dîyi dia Nzambi, anu bu mudibi bileja kudi bualu bumona budi bulonda ebu bua ku tshidiila tshia Maurice.

Mukalenge D—— uvua musombele mu musoko wa kule kule, muvuaye nsentedi butuku. Munkatshi mua tshikondo tshile, uvua wenda ukeba ne muoyo umue mushindu muimpe wa kutendelela Nzambi. Butuku pavuaye ku bunsentedi buende, wakatuadija kubala Bible. Ndekelu wa bionso, wakafika ku dimubala yonso mujima. Wakamanya se: dîna dia Nzambi n’Yehowa​—dîna dìdì dimueneka misangu mivule mu Bible wende wa tshiena-Hindi. Wakamona se: mukanda wa Buakabuluibua uvua utamba kukoka ntema.

Pashishe wakadiebeja yeye muine né kuvua tshitendelelu kampanda tshivua tshilonda Bible mu ka-bujima kende. Wakabambisha ne: bitendelelu bikavuaye mumanye bivua, padi nsombelu mitambe buimpe, bilonda amu bimue bitupa bia Bible. Bimue bitendelelu bivua bianyisha Mifundu ya tshiena-Ebelu ne bibenga Mifundu ya tshiena-Greke ya Buena-nkristo. Bikuabu pabi bivua bilengulula Mifundu ya tshiena-Ebelu, bizangika amu Mifundu ya tshiena-Greke ya Buena-nkristo bua mushinga wayi ùdì upetesha dikuatshisha.

Dimue dituku Mukalenge D—— wakamona bena dibaka babidi babola mvula ne kubabikila bua kubuelabu kuende bua kuepela dibola. Bavua Bantemu ba Yehowa. Mukaji uvua mukuate mukanda wa Buakabuluibua​—Nkomenu wabu munene ukadi pabuipi!a Diakamue Mukalenge D—— wakabalomba mukanda eu. Bantemu aba kumonabu se: malu a mu milayi ya mu Buakabuluibua avua matambe kumukolela bua kuumvua, nunku bakamupa mukanda mukuabu pamutu pawu. Kadi Mukalenge D—— wakalomba amu kulomba bua kupeta mukanda wa Buakabuluibua.

Pakapetaye wende kopi, wakabala mukanda eu lukasa. Pashishe wakitaba dilonga dia Bible pamue ne Bantemu ba Yehowa. Lupolo luîpi pashishe wakakemeshibua pa kumona se: Bantemu badi bangata Bible mujima ne mushinga wa bungi. Wakatuadija kubuela pa tshibidilu mu bisangilu ku Nzubu wa Bukalenge wa Bantemu ba Yehowa, muaba udibu balonga ne ntema yonso Mifundu ya tshiena-Ebelu ne Mifundu ya tshiena-Greke ya Buena-nkristo. Udi mpindieu mumanyishi wa Bukalenge ne muena mu tshisumbu tshia bena nkristo mutambule.

[Mêyi adi kuinshi]