Dimiinu dia Nyoka​—Mmunyi mudidi diedibue patoke?

“Nenteke lukuna pankatshi pebe ne mukaji, ne pankatshi pa dimiinu diebe ne dimiinu diende.”​—GENESE 3:15, NW.

1. (a) Bua tshinyi Yehowa udi Nzambi wa disanka? (b) Ntshinyi tshidiye mutuenzele bua tuetu kulabula disanka diende?

YEHOWA udi Nzambi wa disanka, ne mmuakanyine kuikala nadi. Udi Mupeshanganyi mutambe bunene ne wa kumpala ku bonso wa bintu bimpe, ne kakuena tshintu nansha tshimue tshidi mua kupumbisha dikumbana dia malongolola ende. (Yeshaya 55:10, 11; 1 Timote 1:11; Yakobo 1:17) Mmusue bua basadidi bende balabule disanka diende edi, ne udi ubapetesha tubingila tuakanyine bua kudilabula. Nenku, mu tshimue tshia ku bikondo bia mîdima mikole mu mianda ya bantu​—tshia buntomboji mu Edena—​wakatupetesha tshishimikidi bua tuetu kuindila matuku atshilualua ne ditekemena.​—Lomo 8:19-21.

2. Pakamanyishaye dilumbuluisha difundila bantomboji mu Edena, mmunyi muakajadika Yehowa tshishimikidi tshia ditekemena bua ndelanganyi ya Adama ne Eva?

² Umue wa ku bana ba Yehowa ba mu nyuma, pa kutuila Nzambi nkanana ne pa kumushiminyina, wakadivuija yeye muine Satana Diabolo. Bantu ba kumpala, Eva pashishe Adama, bakapona mu buenzeji buende ne bakatupa ku mukenji wa Yehowa muleja patoke. Bavua bakumbanyine tshibawu tshia lufu. (Genese 3:1-24) Pabi, pakamanyishaye dilumbuluisha difundila bantomboji aba, Yehowa wakajadika tshishimikidi tshia ditekemena bua ndelanganyi ya Adama ne Eva. Mmu mushindu kayi? Anu bu mudibi bifunda mu Genese 3:15 (NW), Yehowa wakamba ne: “Nenteke lukuna pankatshi pebe ne mukaji, ne pankatshi pa dimiinu diebe ne dimiinu diende. Neakutape ku mutu ne wewe neumutape ku tshikankanyi.” Mulayi eu ke nsapi wa dijingulula dia Bible mujima pamue ne malu a kale ne a lelu adi atangila bulongolodi ebu ne basadidi ba Yehowa.

Tshidi mulayi eu umvuija

3. Anu bu mudibi bitela mu Genese 3:15, sunguluja (a) Nyoka, (b) “mukaji,” (c) “dimiinu” dia Nyoka, (d) “dimiinu” dia mukaji.

³ Bua kujingulula bimpe diumvuija diawu, konkonona mu tshikoso bitupa bishilashilangane bia muine mulayi eu. Eu udibu bambila mêyi a mu Genese 3:15 n’Nyoka​—ki nnyoka wa patupu, kadi eu wakatumika nende. (Buakabuluibua 12:9) “Mukaji” ki ng’Eva, apu mbulongolodi bua mu diulu bua Yehowa, mamu wa basadidi bende bela manyi a spiritu bàdì pa buloba. (Galatia 4:26) “Dimiinu” dia Nyoka, ndimiinu dia Satana, ndelanganyi yende​—ba-demon ne bantu pamue ne malongolodi a bantu adi amuenesha ngikadilu ya Satana ne adi aleja “dimiinu” dia mukaji lukuna. (Yone 15:19; 17:15) “Dimiinu” dia mukaji didi bangabanga Yezu Kristo, eu wakedibua manyi a spiritu munsantu mu 29 B.B. Bantu 144 000, badi ‘baledibue tshiakabidi . . . ku mâyi ne ku spiritu’ ne badi bapianyi ba Bukalenge bua mu diulu pamue ne Kristo, mbenze tshitupa tshisakidila tshia dimiinu adi dia dilaya. Bobu aba bakatuadija kubasakidila ku dimiinu dia mukaji kubangila ku Pentekoste wa 33 B.B.​—Yone 3:3, 5; Galatia 3:16, 29.

4. Mmunyi mudi Genese 3:15 mu diumvuangana ne dikudimuna dia buloba mparadizu, buule ne bantu bapikula ku mpekatu ne lufu?

⁴ Nyoka muena-dîna mu Edena bakatumika nende bu tshiamu bua diyukidilangana kudi muena mashimi akafikisha bukua-bantu ku dijimija Mparadizu. Genese 3:15 wakadianjila kufunkuna tshikondo tshiazajibua eu wakatumika ne nyoka. Pashishe, njila neunzuludibue tshiakabidi bua basadidi ba Nzambi kuikalabu mu Mparadizu, bapikula ku mpekatu ne lufu. Nebikale tshikondo kayipu tshia disanka!​—Buakabuluibua 20:1-3; 21:1-5.

5. Nngikadilu kayi idi isunguluja ndelanganyi ya mu nyuma ya Diabolo?

⁵ Kunyima kua buntomboji mu Edena, bantu ne malongolodi bakatuadija kumueneka, bine bavua bamuenesha ngikadilu ya muomumue ne ya Satana Diabolo​—buntomboji, didingangana, didingidilangana malu, ne dishipangana, bisuikakaja ku diluisha dia disua dia Yehowa ne aba badi bamutendelela. Ngikadilu eyi yakasunguluja ndelanganyi ya Diabolo, anyi bana bende ba mu nyuma. Munkatshi muabu muvua Kaina, eu wakashipa Abela pakanyisha Yehowa ntendelelu wa Abela pamutu pa wa Kaina. (1 Yone 3:10-12) Nimerode uvua umue wa kudibu muena dîna mene divua dimusunguluja bu ntomboji ne wakalua tshilembi ne mukokeshi wa bukole muluishi wa Yehowa. (Genese 10:9) Kusakidila apu kuvua dilondangana dia makalenge a kale, pa kukonga Babilone, ne bitendelelu biawu bitua nyama ku mikolo kudi mbulamatadi biashila pa mashimi, ne makalenge aa akakengesha batendeledi ba Yehowa ne tshikisu.​—Yelemiya 50:29.

“Lukuna pankatshi pebe ne mukaji”

6. Mmu mishindu kayi mudi Satana muleje mukaji wa Yehowa lukuna?

⁶ Mu bule bua tshikondo etshi tshionso, kuvua lukuna pankatshi pa Nyoka ne mukaji wa Yehowa, pankatshi pa Satana Diabolo ne bulongolodi bua mu diulu bua Yehowa bua bifukibua bia mu nyuma biena bulamatshi. Lukuna lua Satana luakalejibua pakatuilaye Yehowa nkanana ne kuteta bua kuabulula bulongolodi bua mu diulu bua Yehowa, pa kulobesha banjelu bua kushiyabu tshisombedi tshiabu tshine. (Nsumuinu 27:11; Yuda 6) Biakamueneka patoke pakatumika Satana ne ba-demon bende bua kutshiamakana kumpala kua banjelu batuadi ba mikenji batuma kudi Yehowa. (Danyele 10:13, 14, 20, 21) Bivua bimueneke patoke mu mushindu wa dikema mu siekele eu wa 20 pakakeba Satana bua kubutula Bukalenge bua Masiya ku diledibua diabu.​—Buakabuluibua 12:1-4.

7. Bua tshinyi banjelu bena bulamatshi ku mikenji ba Yehowa bakumvua lukuna bua Nyoka wa mu tshimfuanyi, kadi ndidikanda kayi didibu baleje?

⁷ Kuvua kabidi lukuna ku luseke lua mukaji wa Yehowa, kasumbu ka banjelu bena bulamatshi, bua Nyoka wa mu tshimfuanyi. Satana uvua muendeshile dîna dimpe dia Nzambi lumu lubi; uvua kabidi mujule mpata pa bidi bitangila muoyo-mutoke wa tshionso tshia ku bifukibua bia Nzambi bia lungenyi, pa kukonga ne banjelu bonso, ne uvua wenza muende muonso bua kunyanga bulamatshi buabi kudi Nzambi. (Buakabuluibua 12:4a) Banjelu bena bulamatshi ku mikenji, bakeluba, ne baselafima kabavua mua kuenza tshintu tshikuabu pa kumbusha diumvua muênge bua eu wakadivuija yeye nkayende Diabolo ne Satana. Kadi, mbindile Yehowa bua yeye kujikija malu mu tshiende tshikondo ne mu wende mushindu.​—Fuanyikija ne Yuda 9.

Diluisha Dimiinu dia mukaji wa Nzambi

8. Nnganyi uvua Satana ukeba ne ntema?

⁸ Mu lupolo elu, Satana uvua ukeba ne ntema Dimiinu dia mukaji didianjila kumanyisha, eu uvua Yehowa muambe muvuaye ne bua kutapa Nyoka ku mutu. Pakamanyisha muanjelu mufumine mu diulu ne: Yezu, eu wakaledibua ku Beteleme, uvua “Mupandishi, [udi] Kristo Mfumu,” etshi tshivua tshijadiki tshikole tshia se: uvua ne bua kulua Dimiinu dia mukaji didianjila kumanyisha.​—Luka 2:10, 11, MMM.

9. Kunyima kua diledibua dia Yezu, mmunyi muakaleja Satana lukuna lubi?

⁹ Lukuna elu lubi lua Satana luakamueneka pashishe pakenzejaye bena lubuku lua mitoto bampangano luendu kampanda luakabafikisha diambedi kudi Mukalenge Herode mu Yeruzaleme ne pashishe ku nzubu mu Beteleme kuakasanganabu muana eu wa balume mutekete Yezu ne mamuende, Mariya. Katupa kîpi kunyima Mukalenge Herode wakatuma dîyi bua kushipabu bana batekete bonso ba balume bavua ne bidimu bibidi anyi bishadile, mu Beteleme ne ku mpenga kuende. Ku bualu ebu, Herode wakaleja lukinu lua Satana bua Dimiinu. Mbimueneke patoke se: Herode uvua mumanye tshishiki ne: uvua uteta bua kushipa eu uvua ne bua kuikala Masiya. (Matayo 2:1-6, 16) Miyuki ya bantu idi ijadika se: Mukalenge Herode uvua muenzavi, muena mayele mabi ne mushipianganyi​—bushuwa umue wa ku dimiinu dia Nyoka.

10. (a) Kunyima kua batismo wa Yezu, mmunyi muakateta Satana yeye nkayende bua kupumbisha dilongolola dia Yehowa didi ditangila Dimiinu dilaya bua kadikumbanyi? (b) Mmunyi muakatumika Satana ne balombodi bena malu a Nzambi bena Yuda mu dikumbaja bipatshila biende?

¹⁰ Kunyima kua Yezu mumane kuedibua manyi a spiritu munsantu mu 29 B.B. ne Yehowa mumane kuakula biangatshile mu diulu ujadika Yezu mudiye Muanende, Satana wakateta misangu ne misangu bua kuponesha Yezu mu ditetshibua, ukeba nunku bua kupumbisha dilongolola dia Yehowa didi ditangila Muanende bua kadikumbanyi. (Matayo 4:1-10) Mumane kupangila, wakanyemena pashishe ku ditumika ne bantu bua kukumbaja bipatshila biende. Munkatshi mua bantu batumika nabu bua kuteta mua kunyangila Yezu lumu muvua balombodi bena malu a Nzambi bena lubombo. Bavua batumika ne mashimi ne dishiminyinangana malu, ngenzelu itu Satana yeye muine utumika nayi. Pakambila Yezu muena tuneke kampanda ne: ‘Kolesha mutshima webe, mibi yebe idi mijimijibue,’ ba-skribe, pamutu pa kuanji kuindila bua kumona muntu né uvua muondapibue bushuwa, bakamba patoke muvua Yezu mupendi wa Nzambi. (Matayo 9:2-7) Pakondopa Yezu bantu dia Nsabatu, Bafarizeyi bakamubanda bu musambuki wa mukenji wa Nsabatu ne kumuyila mu tshipangu bua kumushipa. (Matayo 12:9-14; Yone 5:1-18) Pakapatula Yezu ba-demon munda mua bantu, Bafarizeyi bakamubanda muvuaye muena dia ‘Belzebube, mfumu wa ba-demon.’ (Matayo 12:22-24) Kunyima kua Lazaro mumane kujudibua ku bafue, bantu bavule bakitabuja Yezu, kadi bakuidi bamfumu ne Bafarizeyi bakamuyila tshiakabidi mu tshipangu bua kumushipa.​—Yone 11:47-53.

11. Matuku asatu kumpala kua lufu lua Yezu, mbanganyi bakasungulujaye bu tshitupa tshia dimiinu dia Nyoka, ne mbua tshinyi?

¹¹ Mu dia 11 Nizan 33 B.B., nansha muvuaye mumanye bimpe bivuabu balongolola, Yezu wakaya ne dikima dionso mu muaba wa ntempelo mu Yeruzaleme ne kuineku, kumanyishaye patoke dilumbuluisha divua ne bua kubavuila. Bu kasumbu, ba-skribe ne Bafarizeyi bakaleja misangu yonso tshivuabu; nenku Yezu wakamba ne: “Diakabi kunudi nuenu, ba-skribe ne Bafarizeyi, bena lubombo! bualu nudi nukanga bukalenge bua mu muulu kumpala kua bantu; bualu nuenu bine kanuena nubuelamu, ne kanuena nansha nupesha aba badi mu njila wabu mushindu wa kubuelamu.” Yezu wakamanyisha bualu pa buobu ne: bavua tshitupa tshia dimiinu dia Nyoka, pa kuamba ne: “Nyoka, ndelanganyi ya ntoka, nenunyeme dilumbuluisha dia Ngena munyi?” (Matayo 23:13, 33, NW) Ngakuilu wende udi uvuluija mulayi udi mu Genese 3:15.

12, 13. (a) Mmunyi muakafila bakuidi bamfumu ne ba-skribe tshijadiki tshia pa mutu tshia eu uvua tatuabu wa mu nyuma? (b) Mbanganyi bakadisangisha kudibu? (c) Mu dikumbana dia Genese 3:15, mmunyi muvua Dimiinu dia mukaji ditapa ku tshikankanyi?

¹² Pa kumvua mêyi a Yezu, biakabatapaku ku mutshima, bibafikisha nenku ku dilomba dilekedibua dia kudi Nzambi anyi? Bakanyingalalaku bua bubi buabu anyi? Tòo! Mâko 14:1 (NW) udi umanyisha ne: dituku mene dine diakalonda, mu tshisangilu kampanda mu lubanza lua muakuidi munene, “bakuidi bamfumu ne ba-skribe bavua bakeba mushindu wa kukuata [Yezu] ne budimu bua kumushipa.” Bakatungunuka ne kuleja mmuenenu wa bushipianganyi wa Satana, ukavua Yezu mufunkune bangabanga bu mushipi wa bantu. (Yone 8:44) Katupa kakese pashishe bakabatua mu nyima kudi Yudase Iskariote, uvua Satana muvuije mutontolodi. Yudase wakalekela Dimiinu dikena katoba dia mukaji wa Nzambi ne kubuela mu dimiinu dia Nyoka.

¹³ Dia 14 Nizan pa kabundubundu, bena mu kabadi ka bena Yuda ka malu a Nzambi bakatuala Yezu bu muena buloko kua nguvernere wa bena Roma. Apa, bakuidi bamfumu ke bakatuadija kuela mbila bua kupopelabu Yezu pa mutshi. Pakakonka Pilato ne: “Mpopele mfumu wenu pa mutshi wa tshibawu anyi?” bakuidi bamfumu ke bakandamuna se: “Katuena ne munga mfumu, amu Kezare!” (Yowanese 19:6, 15, MMM) Bushuwa, bakajadika mu mishindu yonso ne: bavua tshitupa tshia dimiinu dia Nyoka. Kadi, kabavua anu bobu nkayabu. Muyuki mufundisha ku spiritu mu Matayo 27:24, 25 udi ufila dimanyisha edi: ‘[Pilato] wakangata mâyi, wakavuwa bianza ku mêsu kua bantu bonso.’ Apu bantu bonso kuambabu ne: ‘Mashi ende ikale pambidi petu ne pa bana betu.’ Nunku, bena Yuda bavule ba mu tshipungu atshi bakadisunguluja bobu bine muvuabu tshitupa tshia dimiinu dia Nyoka. Dituku adi kadiyi dianji kutua ku ndekelu, Yezu wakafua. Pa kutumika ne dimiinu diende didi dimueneka, Satana wakatapa Dimiinu dia mukaji wa Nzambi ku tshikankanyi.

14. Bua tshinyi ditapibua ku tshikankanyi dia Dimiinu dia mukaji kadiakumvuija ditshimuna bua Satana?

¹⁴ Satana wakatshimuna anyi? Nansha kakese! Yezu Kristo ukavua mumane kutshimuna bulongolodi ebu ne mukokeshi wabu. (Yone 14:30, 31; 16:33) Wakashala ne bulamatshi buende kudi Yehowa too ne ku lufu. Lufu luende bu muntu mupuangane luakapetesha mushinga wa tshia-bupikudi uvua ukengedibua bua kusumbulula bukenji bua dipeta muoyo buvua Adama mujimije. Nenku, wakunzulula njila wa ku muoyo wa tshiendelele bua aba benza midimu ya ditabuja mu ndongoluelu au ne batumikila mêyi-matuma a Nzambi. (Matayo 20:28; Yone 3:16) Yehowa wakajuula Yezu ku bafue bua muoyo ukena-ufua mu diulu. Mu tshikondo tshijadika kudi Yehowa, Yezu neabutule Satana butubutu. Mu Genese 22:16-18, mbadianjile kumanyisha ne: Yehowa neapeteshe dianyishibua kudi mêku onso a pa buloba adi enza madikolela makanyine bua kubeneshibua ku butuangaji bua Dimiinu adi diena bulamatshi.

15. (a) Kunyima kua lufu lua Yezu, mmunyi muakatungunuka bapostolo bende ne kuela dimiinu dia Nyoka patoke? (b) Mbuluishi kayi bua pa mutu budi bulejibue kudi dimiinu dia Nyoka too ne ku lelu?

¹⁵ Kunyima kua lufu lua Yezu, bena nkristo bela manyi bakatungunuka ne kuela patoke dimiinu dia Nyoka, anu bu muakenza Mfumuabu. Musakibue kudi spiritu munsantu, mupostolo Paulo wakadimuija bua “mupetudi wa mikenji” uvua dikalaku diende ne bua kuenzeka “bilondeshile ditumika dia Satana.” (2 Tesalonike 2:3-10, NW) “Muntu-tshisumbu” eu mbamfumu ba Bukua-buena-nkristo. Ku luadi luseke, dimiinu dia Nyoka diakakengesha balondi ba Yezu Kristo ne tshikisu. Mu mulayi mufunda mu Buakabuluibua 12:17, mupostolo Yone wakadianjila kuamba ne: Satana uvua ne bua kutungunuka ne kubunda bashadile ba dimiinu dia mukaji wa Nzambi mvita too ne ku matuku etu aa. Ke tshidi tshienzeke menemene. Mu matunga mavule, Bantemu ba Yehowa mbakandikibue, batutshibue kudi bisumbu bia bantu, bedibue mu buloko peshi bedibue ku bukole mu tumponya tua disubishangana bua dishala diabu bashindame ku luseke lua Bukalenge bua Nzambi ne njila yende miakane.

Diedibua patoke dia dimiinu dia Nyoka mu matuku etu aa

16. Mu matuku etu aa, mbanganyi badi bedibue patoke bu tshitupa tshia dimiinu dia Nyoka, ne mmunyi?

¹⁶ Pa kuidikija Yezu Kristo, bena nkristo balelela ki mbatekeshe mu diela patoke diabu kadiyi buôwa dia Nyoka ne dimiinu diende. Mu 1917, Balongi ba Bible, bu muvua Bantemu ba Yehowa bamanyike tshikondo atshi, bakapatula mukanda wa Le mystère accompli, muakelabu patoke lubombo lua bamfumu ba Bukua-buena-nkristo. Mukanda eu bakautua mu nyima, mu 1924, kudi dipangadika difunda divua ne tshiena-bualu tshia Difundibua dia bamfumu ba bitendelelu (angl.). Kopi miliyo makumi atanu yakabanyibua pa buloba bujima. Mu 1937, J. F. Rutherford, uvua tshikondo atshi mulombodi wa Société Watch Tower, wakatandula ne bukole dimiinu dia Satana ku miyuki ivua ne tshiena-bualu tshia “Bisokolola” ne “Bitendelelu ne Buena-nkristo.” Tshidimu tshiakalonda, pavua bateleji mu mpuilu 50 mu matunga kabukabu benda bamuteleja ku radiotelefone, wakenza muyuki wa “Tangilayi malu mine” kumbukila ku Londres, mu Angleterre. Ngondo umue pashishe, tudiomba kampanda tuteleja mu miaba ya bungi mu États-Unis tuakatangalaja muyuki wa “Fascisme peshi Budikadidi.” Ebi bivua bisakidila ku biena-bualu bia bukole bitandudi mu mikanda bu mudi Baluishi (angl.) ne Bitendelelu (angl.) ne kabidi mu broshire wa Mutandudibue (angl.). Mu diumvuangana ne bikavua bipatudibue mu bidimu bia 1920, mukanda wa Buakabuluibua​—Nkomenu wabu munene ukadi pabuipi!,a mupatula mpindieu mu miakulu 65, udi usunguluja bakokeshi babi ne bena lukuka bena malu a tshididi, bangenda-mushinga bakena balonda mêyi-maludiki bu badi pabu ba kumpala munkatshi mua bena mu dimiinu dia Nyoka dìdì dimueneka. Patu bamfumu bena malu a tshididi batumika pa tshibidilu ne mashimi bua kupambuisha babakokedi, babenga kuleja kanemu bua ngikadilu wa tshijila wa mashi, ne bakengesha basadidi ba Yehowa (baleja nunku lukuna bua dimiinu dia mukaji wa Nzambi), batu bushuwa badisunguluja nkayabu bu bena mu dimiinu dia Nyoka. Bidi kabidi bilelela bua bangenda-mushinga batu, bua dibula kuondo ka muoyo kasumpakanyi, bashima bua kupeta makasa ne batu benza anyi basumbisha bintu bidi bimanyike bu bituadi bia masama.

17. Ndiakalenga kayi ditshidi kumpala kua bantu bena bunême badi mua kupatuka mu ndongoluelu wa pa buloba bujima?

¹⁷ Muntu yonso munyanga kudi malu a bitendelelu bia mu bulongolodi ebu, a tshididi anyi a bungenda-mushinga neabadibue ndekelu wa bionso bu muena mu dimiinu dia Nyoka. Bamue ba ku balume ne bakaji aba badi bafika ku dianyisha Bantemu ba Yehowa. Badi batumika ne buenzeji budibu nabu bua kubambuluisha ne mu tshikondo tshikumbanyine badi babuela mu ntendelelu mulelela. (Fuanyikija ne Bienzedi 13:7, 12; 17:32-34.) Bantu bonso ba mushindu’eu, mbalabajila dibikila edi: ‘Nunku, nuenu bakalenge, nuikale ne meji; nuyishibue, nuenu bakokeshi ba pa buloba. Nukuatshile Yehowa mudimu ne ditshina, nusanke nende ne nuzakale diatshimue. Nutuangane mishiku ne muanende wa balume, bua Yeye kikadi ne tshiji, ne bua nuenu kanujiminyi mu njila. Bualu bua tshiji tshiende tshidi tshitemeshibua lukasa. Disanka didi kudi bonso badi bamueyemena!’ (Musambu 2:10-12) Eyowa, bidi bia mushinga bua bonso badi bajinga dianyishibua dia kudi Yehowa benze bualu kampanda mpindieu, padi Mulumbuluishi wa mu diulu kayi muanji kuinjila lukasa tshiibi tshia diakalenga!

18. Nansha mudibu kabayi tshitupa tshia dimiinu dia mukaji, mbanganyi badi batendeledi ba Yehowa?

¹⁸ Anu aba benza Bukalenge bua mu diulu ke badi tshitupa tshia dimiinu dia mukaji. Bobu aba badi bungi bukese. (Buakabuluibua 7:4, 9) Pabi, kudi musumba munene wa bakuabu, eyowa, miliyo ya kudibu, bu mudibu batendeledi ba Yehowa, bàdì bindile muoyo wa tshiendelele mu mparadizu pa buloba. Ku miaku ne ku bienzedi, badi bambila bela manyi ba Yehowa ne: “Netuye nenu, bualu tudi bumvue bamba ne: Nzambi udi nenu.”​—Zekâya 8:23, NW.

19. (a) Ndisungula kayi didi bantu bonso ne bua kuenza? (b) Dibikila ne muoyo umue bua kuenza bualu kampanda ne meji patshidi tshiibi tshia diakalenga tshiunzulula nditangile banganyi mene?

¹⁹ Mpindieu ke tshikondo tshidi bukua-bantu buonso ne bua kusungula. Mbasue kutendelela Yehowa ne kubingisha bumfumu buende butambe bunene, peshi nebashiile Satana muaba bua ikale mukokeshi wabu pa kuenza malu adi amusankisha? Bantu bapite pa miliyo itanu ba mu matunga onso mbaditeke ku luseke lua Yehowa, pa kudisangisha ne bashadile ba ku dimiinu dia mukaji, bapianyi ba Bukalenge. Miliyo mikuabu muanda-mukulu mmileje disankidila pa kulonga Bible pamue nabu peshi pa kubuela mu bisangilu biabu. Bantemu ba Yehowa badi bambila bonso aba ne: Tshiibi tshia diakalenga tshitshidi tshiunzulula! Ditekayi kakuyi ditenkakana ku luseke lua Yehowa. Anyishayi Kristo Yezu bu Dimiinu dilaya! Ne disanka, nudisangishe ku bulongolodi bua Yehowa budi bumueneka. Nenulabule mabenesha onso afilaye mu bukokeshi bua Mukalenge, Kristo Yezu.

[Mêyi adi kuinshi]

Udi muvuluke anyi?

◻ Nyoka udibu batela mu Genese 3:15 nnganyi? Ne mukaji nnganyi?

◻ Nngikadilu kayi idi isunguluja dimiinu dia Nyoka?

◻ Mmunyi muakela Yezu dimiinu dia Nyoka patoke?

◻ Mbanganyi badi bedibue patoke bu tshitupa tshia dimiinu dia Nyoka mu matuku etu aa?

◻ Ntshienzedi kayi tshia lukasa tshidi tshilombibue bua kuepuka diangatshibua bu dimiinu dia Nyoka?

[Tshimfuanyi mu dibeji 10]

Yezu wakela patoke balombodi bena malu a Nzambi bena lubombo muvuabu tshitupa tshia dimiinu dia Nyoka