Udi mua kunanga Nzambi bushuwa anyi?

“MUNTU kena mua kumona mpala wanyi ne kuikala ne muoyo,” ke mudi Nzambi wamba. (Ekesode 33:20) Kabidi, katshia ku bikondo bifundilebu Bible kakuena tshijadiki tshidi tshileja muvua muntu kampanda muyukile nende buludiludi. Kabienaku bimueneka bikole​—anyi kabiyi mua kuenzeka—​bua kudima disuangana diondoke bua muntu uutu kuyi muanji kumona peshi kuteleja buludiludi anyi? Kudi mushindu menemene wa kuikala ne malanda a dinanga ne Mufuki wa bukua-mabulunge anyi?

Kakuena mpata bua se: kudi mushindu wa kudima disuikakana dia muntu pa nkayende ne Nzambi. Mu Dutelonome 6:5, tudi tubala se: tshisamba tshia Izalele tshivua tshitumina dîyi ne: “Sua Yehowa, Nzambi webe, ne mutshima webe wonso, ne muoyo webe wonso, ne bukole buebe buonso.” Pashishe Yezu Kristo wakashindika kabidi mukenji eu kudi balondi bende ne kusakidila ne: ‘Ke mukenji munene, udi wa kumudilu.’ (Matayo 22:37, 38) Bible uvua mua kutukankamija bua kunanga Nzambi bu malanda a mushindu’eu kaayi mua kupeteka anyi?

Kadi Yehowa udi utekemena bua tumunange anu bualu udi ututumina dîyi anyi? Tòo. Nzambi wakafuka bena dibaka babidi ba kumpala ne tshipedi tshia kumunanga. Adama ne Eva kabavua benzeja bua kuikala ne malanda a dinanga ne Mufuki wabu. Bishilangane, Nzambi wakabateka mu nsombelu mimpe bua kudimabu disuangana diondoke nende. Bavua ne disungula​—kusemena menemene kudi Nzambi anyi kumbuka kudiye.

Adama ne Eva bakasungula bua kumutombokela. (Genese 2:16, 17; 3:6, 7) Nansha nanku, ndelanganyi yabu ivua mua kupeta mushindu wa kudima malanda a dinanga ne Mufuki.

Kuenda ne Nzambi mulelela

Tshilejilu, badi bakula bua Abrahama mu Bible bu “mulunda” wa Nzambi. (Yakobo 2:23) Kadi, bushuwa, Abrahama kavua muntu umue nkayende uvua mulabule malanda masheme ne Nzambi. Bible udi wakula bua bantu bakuabu bavule bavua baleje disuangana dilelela kudi Yehowa ne ‘bende ne Nzambi mulelela.’​—Genese 5:24, NW; 6:9; Yobo 29:4; Musambu wa 25:14; Nsumuinu 3:32.

Basadidi ba Nzambi ba kale kabavua baledibue ne dinanga ne disuangana bua Nzambi. Bavua ne bua kudidima. Mmunyi? Pa kufika ku dimumanya ku dîna diende nkayende, Yehowa. (Ekesode 3:13-15; 6:2, 3) Pa kuvuluka dikalaku diende ne Bunzambi buende. (Ebelu 11:6) Pa kueleela meji misangu mivule pa bienzedi biende bia dinanga. (Musambu wa 63:6) Pa kuambila Nzambi mu disambila meji adi munda muabu. (Musambu wa 39:12) Pa kulonga malu ende mimpe. (Zekâya 9:17) Pa kudima ditshina dimpe dia Nzambi bua kubenga kumubungamija.​—Nsumuinu 16:6.

Udiku mua kulua mulunda wa Nzambi ne kuenda nende anyi? Ee, kuena mua kumona Nzambi peshi kumvua dîyi diende. Nansha nanku, Yehowa udi ukubikila bua ‘kubuela mu nzubu wende,’ kulua mulunda wende. (Musambo wa 15:1-5, MMM) Nunku, kudi mushindu wa wewe kunanga Nzambi. Kadi mmunyi muudi mua kukuna nende malanda masheme ne a disuangana?