Nuitabuje bantu ba nunku’

MALU kaavua enda bilenga mu tshisumbu tshia ku Kolinto. Muvua tshiendenda tshibiatshibi, ne matapuluka avua munkatshi mua bavuamu. Bamue bavua ne ntatu mikole ya pa nkayabu anyi bavua ne nkonko ivua ikengedibua kuandamuna. Bamue bavua bafundangana ku tubadi; bakuabu bavua bavila mene dibiishibua.

Nkonko minene yakajuka kabidi. Aba bavua mu mêku matapuluke mu malu a ntendelelu bavua ne bua kushala ne bena mabaka nabu bakêna bena kuitabuja, anyi bavua ne bua kuabulukangana? Mmudimu kayi uvua nawu bana betu ba bakaji mu tshisumbu? Kudia munyinyi mulambula mpingu kuvua kubi anyi? Mmunyi muvua bisangilu​—kusangisha ne Didia dia Dilolo dia Mukalenge—​ne bua kulombodibua?​—1 Kolinto 1:12; 5:1; 6:1; 7:1-3, 12, 13; 8:1; 11:18, 23-26; 14:26-35.

Mbimueneke bushuwa ne: bu muvuabu baditatshisha bua dikala bimpe dia bana babu bavua mu nsombelu wa mu nyuma wa dilubakana eu, Akaiko, Fôtunato, ne Stefana bakaditua mu luendu batangile ku Efeso bua kukumbula mupostolo Paulo. Kusangisha ku ngumu eyi milubakaji, bidi bimueneka se: bavua batuadile Paulo mukanda mufunda kudi tshisumbu muikale ne nkonko pa malu aa. (1 Kolinto 7:1; 16:17) Mbimueneke patoke ne: kakuvua anu bana betu basatu aba nkayabu bavua baditatshisha bua nsombelu eu. Paulo mene ukavua mupetele ngumu kudi ‘ba mu nzubu wa Kaloe’ ne se: matandu avua mu tshisumbu. (1 Kolinto 1:11) Kakuyi mpata, mukenji uvua nawu bakenji aba wakambuluisha Paulo bua kumvua bilenga nsombelu uvuaku, kukeba mubelu wa kufila, ne mushindu wa kuandamuna ku nkonko mijula. Bitu bimueneka ne: mukanda ututu nawu wa Kolinto wa ku mudilu ndiandamuna dia Paulo, divua dilombola kudi spiritu munsantu wa Nzambi. Akaiko, Fôtunato, ne Stefana ke bavua mua kuikala bawufile.

Akaiko, Fôtunato, ne Stefana bavua banganyi? Ntshinyi tshitudi mua kulonga pa kubala malu adi Mifundu yamba pa bidi bibatangila?

Ba mu nzubu wa Stefana

Ba mu nzubu wa Stefana bavua “mamuma a . . . diambedi” a mudimu wa Paulo mu tshimenga tshia bena Roma tshia Akaya, ku Grèce wa ku sud, mu bidimu bu bia 50 B.B., ne bavua batambushibue kudi Paulo nkayende. Mbimueneke se: Paulo uvua ubangata bu tshitembelu, bu buenzeji bukole bubatamiji kudi bena Kolinto. Wakabatua makumbu ne musangelu wonso bua mudimu wabu muenzela tshisumbu, nunku: ‘Bana betu, ndi nnusengelela (nudi bamanye ba mu nzubu wa Stefana ne badi bu mamuma a kukuama diambedi mu Akaya, ne bakadifila bua kukuatshila bansantu mudimu) bua nuenu nuditeke muinshi mua bantu ba nunku, ne muinshi mua muntu yonso udi ukuatshishangana n’etu ne udi wenza mudimu wa Nzambi.’ (1 Kolinto 1:16; 16:15, 16) ‘Ba mu nzubu’ wa Stefana ki mbabatela patoke to. Ka-tshiambilu aka kavua mua kuikala kumvuija amu bena dîku kadi kavua mua kuikala kakongoloja kabidi bapika anyi bena mudimu. Bu muvua Akaiko dîna dia mu Latin dìvuà nangananga bua bapika, ne Fôtunato bua bantu badikadile, bamue bedi ba nseka badi batshinka se: bubidi buabu bavua mua kuikala bena mu nzubu umu’eu.

Nansha biobi bikale munyi, Paulo uvua wangata ba mu nzubu wa Stefana bu tshilejilu tshimpe. Benamu bavua ‘badifile bua kukuatshila bansanto mudimu.’ Bena dîku dia Stefana bavua ne bua kuikala bajingulule se: kuvua mudimu ùvuà ne bua kuenjibua bua diakalenga dia tshisumbu ne bakitaba ku budisuile mudimu eu bu bujitu buabu. Kakuyi diela mpata, dijinga diabu dia kuenza mudimu eu divua dikengela kuditua mpanda ne kudianyisha.

‘Bakakankamija nyuma wanyi ne nyuma yenu’

Nansha muvua Paulo uditatshisha bua nsombelu wa ku Kolinto, difika dia bakenji aba diakamukankamija. Paulo udi wamba ne: ‘Nakasanka kabidi bua difika dia Stefana ne Fôtunato ne Akaiko; bualu bua bobo bakakumbaja malu anuakapanga. Bualu bua bobo bakakankamija nyuma wanyi ne nyuma yenu.’ (1 Kolinto 16:17, 18) Pa kutangila nsombelu’eu, dipanga kuikala pamue ku mubidi ne bena Kolinto divua mua kuikala bumue mpokolo wa kanyinganyinga ka Paulo, kadi mpindieu dikalaku dia batumibue babu diakapungakaja dipanga kuikalaku dia tshisumbu tshijima. Bidi bimueneka se: ngumu ivuabu balua nayi yakambuluisha Paulo bua kumanya nsombelu wabu mu bule ne mu butshiama ne yakumbusha nansha ndambu wa buôwa buvuaye mua kuikala nabu. Imue misangu malu kaavua mua kuikala mabiipa bu muvuaye mene muela meji.

Bilondeshile Paulo, mudimu wa bakenji basatu aba uvua mukankamije nyuma wende ne mutantamije nyuma wa bena tshisumbu tshia Kolinto. Kakuyi mpata bivua disulakana bua bena mu tshisumbu etshi pa kumanya se: batumibue babu bavua bumvuije Paulo kanungu konso ka nsombelu wabu ne bavua bapingane ne mibelu yende.

Nunku bakela Stefana ne banyanende babidi ka-lumbandi ka musangelu bua mudimu wabu uvuabu benzela bena Kolinto. Dianyisha dia Paulo bua bantu aba diakamufikisha too ne ku dikeba bua ne: mu dipingana diabu bikale bantunga-mulongo mu tshisumbu tshipanduluke tshia ku Kolinto. Mupostolo udi ukankamija bana betu ne: ‘Nuditeke muinshi mua bantu ba nunku, ne muinshi mua muntu yonso udi ukuatshishangana n’etu ne udi wenza mudimu. . . . Nuitabuje bantu ba nunku.’ (1 Kolinto 16:16, 18) Ka-lumbandi ka bungi ka nunku kadi kaleja patoke bulamatshi bujima bua bantu aba nansha muvua bilumbu mu tshisumbu. Bantu ba mushindu’au badi bakengela kubangata ne mushinga.​—Filipoi 2:29.

Dieleshangana diboko dia lulamatu didi dipatula bipeta bilenga

Kakuena mpata pa muanda eu, dieleshangana diboko dimpe ne bulongolodi bua Yehowa ne baleji-mpala babu didi dipatula bipeta bilenga. Pakafunda Paulo mukanda ùdì mumanyike mpindieu bu Kolinto muibidi, katupa kîpi kunyima kua mukanda wa kumpala, malu akaavua enda bimpe mu tshisumbu. Mudimu mutungunuke muenza ne lutulu wa bana betu bu mudi Akaiko, Fôtunato, ne Stefana, kusangisha ne dikumbula dia Tito, ukavua mupatule bipeta bimpe.​—2 Kolinto 7:8-15; fuanyikija ne Bienzedi 16:4, 5.

Bena mu bisumbu bia lelu bia tshisamba tshia Yehowa badi mua kupeta masanka pa kueleela meji pa malu makese mafunda mu Mifundu pa bidi bitangila bantu aba ba lulamatu. Tshilejilu, tuambe ne: mu tshisumbu tshietu mudi nsombelu kampanda mulunguluke ukêna mua kujikijibua lukasa bua kabingila kansanga ne udi unyingalaja bana betu. Ntshinyi tshitudi mua kuenza? Tuidikijayi Stefana, Fôtunato, ne Akaiko, bakabenga kupingana tshianyima ku bujitu buabu bua kumanyisha Paulo nsombelu uvuaku ne pashishe kulekela malu mu bianza bia Yehowa ne dieyemena dionso. Kabakalekela lukunukunu bua buakane lubafikisha ku didienzela malu nkayabu anyi bua ‘kukuatshila Yehowa tshiji.’​—Nsumuinu 19:3.

Bisumbu mbia Yezu Kristo, ne mu tshikondo tshidiye mumone bu tshiakanyine, anu bu mu Kolinto, neenze bua kujikija ntatu yonso idi mua kupumbisha makanda a mu nyuma ne ditalala. (Efeso 1:22; Buakabuluibua 1:12, 13, 20; 2:1-4) Mu lupolo elu, bu tuetu mua kulonda tshilejilu tshilenga tshifila kudi Stefana, Fôtunato, ne Akaiko ne kutungunuka ne kukuatshila bana betu mudimu, netuikale petu tutua ndongoluelu wa tshisumbu nyama ku mikolo ne bulamatshi buonso, tuibaka bana betu, ne ‘tubenzeja [“tubasaka,” NW] ku dinanga ne ku dienza dia bienzedi bimpe.’​—Ebelu 10:24, 25.