Dîyi dia Nzambi didi dienza “bishima”

ANU BU MUDIBI BILONDA KUDI THÉRÈSE HÉON

Dimue dituku mu 1965, meme kubuela mu nzubu kampanda wa bungenda bua kuabanya bibejibeji bia Tshibumba tshia Nsentedi ne Réveillez-vous! kudi bangenda-mushinga. Ngela nyima bua kupatuka, meme kumvua tshikuma. Disashi e kututa panshi pabuipi ne makasa anyi. “Au ke mushindu wa kuenza ne Bantemu ba Yehowa,” ke muakamba umue wa ku bangenda-mushinga ne tshiji.

BUALU bumona abu buakantshinyisha​—kadi kabuakakumbana bua kundekeesha mudimu wa ku dîba ne ku dîba. Malelela a mu Bible ankavua mulonge avua ne mushinga wa bungi bua kulekela bualu kayi buonso bumfikisha ku dilekela mudimu wanyi. Lekelayi nnumvuije bua tshinyi ndi ngamba nunku.

Kunyima kua diledibua dianyi mu Kashipu 1918, baledi banyi bakasombela mu Cap-de-la-Madeleine, musoko kampanda mukese mu Quebec, ku Canada, mumanyibue bu Muaba wa Bishima. Benyi bavua bakukilaku bua kukukuila lupingu lua Virgo Mariya. Nansha muvua bishima bivuabu bambika Mariya kabiyi mua kujadikibua, Dîyi dia Nzambi ndienze bushuwa bualu bua tshishima mu nsombelu ya bantu bavule bu mudi musoko mudiunde mulue tshimenga tshia bantu bapite pa 30 000.

Pankavua ne bidimu bu 20, tatuanyi wakamona dijinga dianyi dia kumanya bivule mu malu a Nzambi ne wakampa Bible wende. Pangakatuadija kumubala, ngakakema bikole pa kulonga mu Ekesode nshapita wa 20 se: ntendelelu wa bimfuanyi mmupiishibue patoke. Diakamue meme kujimija dieyemena mu malongesha a Ekleziya Katolike ne dibuela mu Misa. Tshivua musue kutendelela mpingu. Ntshidi mvuluka muvua tatu wamba ne: “Thérèse, kuena uya ku nzubu wa Nzambi anyi?” “Tòo,” ke mungakandamuna, “ndi mbala Bible.”

Dibala dia Bible diakatungunuka ne kuikala tshitupa tshia nsombelu wanyi too ne kunyima kua disedibua dianyi mu Kabitende 1938. Bu muvua bayanyi, Rosaire, utumika pa tshibidilu butuku, mvua ne tshibidilu tshia kubala Bible pavuaye ku mudimu. Tshiakanenga bua kukomesha ne: Nzambi udi ne bua kuikala ne bantu bende, ne meme kutuadija kubakeba.

Dikeba dianyi dia tshisamba tshia Nzambi

Bua malu amvua mulonge mu ekleziya, pantshivua muana, mvua ne buôwa bua kuya kulala bua se: tshilu kubiika nkadi mu inferno. Bua kuluisha buôwa bua nunku, mvua ne tshibidilu tshia kudiambila ne: Nzambi wa dinanga kakulekela tshintu tshibi tshia mushindu’eu tshienzeke. Ne dieyemena dionso, mvua ntungunuka ne dibala Bible, ngenda nkeba bulelela. Mvua amu bu mutungula muena Ethiopie uvua ubala kadi kayi umvua.​—Bienzedi 8:26-39.

Muanetu André ne mukajende, bavua basombele mu nzubu muinshi mua tshisasa tshietu, bakatuadija kulonga Bible ne Bantemu ba Yehowa bu mu 1957. Ngakambila mukaji wa muanetu bua kundimuija pa kukuma mu tshisasa tshiende pavua Bantemu balua bua kuyisha ku nzubu au wa bisasa. Mushindu eu tshivua ne bua kuandamuna. Dimue dituku wakapua muoyo bua kundimuija.

Dituku adi meme kunzulula tshiibi ne kupetangana ne Kay Munday, mpanda-njila kampanda, mùdì ba-ministre Bantemu ba Yehowa ba ku dîba ne ku dîba babikidibua. Wakayukila nanyi pa bidi bitangila dîna dia Nzambi, pa kumvuija ne: Nzambi udi ne dîna diende nkayende, Yehowa. Pakamanaye kunshiya, ngakakeba mu Bible wanyi bua kushindika ne: tshivuaye muambe tshivua bushuwa tshijadika kudi mifundu ya mu Bible. Dikebulula dianyi diakansankisha bikole.​—Note kuinshi kua Ekesode 6:3, Douay Version; Matayo 6:9, 10; Yone 17:6.

Pakalua Kay tshiakabidi, tuakayukila pa dilongesha dia Katolike dia Busatu Bunsantu, dìdì diamba ne: Nzambi udi bantu basatu mu Nzambi umue. Pashishe ngakakonkonona ne ntema yonso Bible wanyi muine bua kudishindikila se: kêna ulongesha Busatu Bunsantu. (Bienzedi 17:11) Didilongela dianyi diakashindika se: Yezu kêna diatshimue ne Nzambi. Uvua mufukibue. Uvua ne ntuadijilu, kadi Yehowa kavua nende. (Musambu wa 90:1, 2; Yone 14:28; Kolosai 1:15-17; Buakabuluibua 3:14) Musankishibue ne bimvua ndonga, mvua ne disanka dia kutungunuka ne diyukidilangana pa Bible.

Dimue dituku mu 1958, mu ngondo wa Kasuabanga mu tshipepele tshia neje, Kay wakambikila bua kubuela mu mpuilu kampanda wa tshijengu uvua wenjibua dilolo adi mene mu nzubu wa difutshila. Meme kuitaba dibikila edi ne kubabidila programe eu. Pashishe, mu diyukidilangana ne Ntemu kampanda wakasemena kundi, ngakebeja ne: “Muena nkristo mulelela udi ne tshia bua kuyisha ku nzubu ne ku nzubu anyi?”

“Eyowa,” ke muakambaye, “lumu luimpe ludi ne tshia bua kumanyishibua, ne Bible udi usokolola ne: dikumbula bantu ku mbelu kuabu didi ngenzelu wa mudimu wa mushinga wa diyisha.”​—Bienzedi 20:20.

Mmunyipu mungakasanka bua diandamuna diende! Diakantuisha ne: mvua mupete tshisamba tshia Nzambi. Bu yeye muambe ne: “Tòo, kabiena bikengela kuyisha,” mvua ne bua kuela mpata se: mvua mupete bulelela, bualu mvua mumanye tshivua Bible wamba pa bidi bitangila diyisha ku nzubu ne ku nzubu. Kutuadija tshikondo atshi, ngakalubuluka lukasa lukasa mu nyuma.

Kunyima kua mpuilu wa tshijengu au, ngakatuadija kubuela mu bisangilu bia Bantemu ba Yehowa bivua bienjibua mu tshimenga tshiena-mutumba tshia Trois-Rivières. Amu Kay ne muinende, Florence Bowman, ke Bantemu bavua basombele tshikondo atshi mu Cap-de-la-Madeleine. Dimue dituku meme kuamba ne: “Nemvue bua kuyisha nenu makelela.” Bakasanka bua meme kupatuka nabu.

Diyisha mu tshimenga tshindelela

Mvua ngela meji ne: muntu yonso uvua ne bua kuitaba mukenji wa mu Bible, kadi ngakalonga lukasa ne: kabivua nanku. Pakatumibua Kay ne Florence ku muaba mukuabu, ngakashala amu nkayanyi mu tshimenga atshi bua kuyisha ku nzubu ne ku nzubu malelela a mu Bible. Ne dikima dionso, meme kutungunuka ne kuyisha nkayanyi munkatshi mua bidimu bu bibidi too ne ku batismo wanyi mu dia 8 Kabalashipu 1963. Dituku adi mene meme kufundisha dîna mu tshivua tshibikidibua tshikondo atshi ne: mudimu wa bumpanda-njila wa mu diikisha.

Ngakatungunuka bu mpanda-njila wa mu diikisha bua tshidimu tshimue. Pashishe, Delvina Saint-Laurent wakalaya bua kulua ku Cap-de-la-Madeleine ne kutumika pamue nanyi musangu umue ku lumingu luonso bu meme mua kulua mpanda-njila wa pa tshibidilu. Nunku ngakuuja dilomba dianyi dia bumpanda-njila. Kadi, bia dibungama, mbingu amu ibidi kumpala kua meme kutuadija mudimu wa ku dîba ne ku dîba eu, Delvina wakafua. Ntshinyi tshimvua mua kuenza? Ee, nkavua mumane kuuja dilomba ne tshivua musue kupingana panyima. Nunku mu Kasuamansense 1964, ngakatuadija mudimu wanyi wa ku dîba ne ku dîba. Bua bidimu binayi biakalonda, mvua nya ku nzubu ne ku nzubu nkayanyi.

Bena katolike bena didifila ba mu Cap-de-la-Madeleine bavua misangu mivule baluishi. Bamue bavua babikila bampulushi bua kuteta bua kumpangishisha bua kuyisha. Dimue dituku, bu mumvua muleje ku ntuadijilu, ngenda-mushinga kampanda wakateta bua kuntshinyisha pa kuasa tshingoma ku makasa anyi. Ee, bualu ebu buakanyungusha tshimenga. Televizion wa mu tshimenga wakabubikila ne: kampanye ka diluisha Bantemu ba Yehowa. Bualu ebu buakafila bumanyishi buimpe. Mu mpukapuka, bidimu dikumi kunyima, mulela kampanda wa ngenda-mushinga eu uvua mutute tshingoma kundi wakalua yeye muine Ntemu.

“Bishima” bienza kudi Dîyi dia Nzambi

Mu kupita kua bidimu, ndi mumone tshimanu tshia buluishi ku malelela a mu Bible tshiupuka ku kakese ku kakese mu Cap-de-la-Madeleine. Bu mu 1968, bamue Bantemu bakaluaku, ne basombi ba mu tshimenga bakatuadija kuandamuna ku malelela a mu Bible. Ku ntuadijilu wa bidimu bia 1970, bushuwa kuvua didiunda dinene mu bungi bua malonga a Bible. Bua ditamba kuvula diawu, biakamfikisha ku dilomba bakuabu Bantemu bua kuangata mavule a ku malonga a Bible amvua ndombola bua meme kumona mua kutungunuka ne kudifila mu mudimu wa ku nzubu ne ku nzubu.

Dimue edi nsongakaji kampanda wakangata mukanda ùdì wambuluisha bua kulonga Bible wa Bulelela budi bufikisha ku muoyo wa kashidi. Nyanende tshikondo atshi uvua nsongalume kampanda muena dîna dia André, uvua umueneka mubundi wa bibawu muena malu makole wakadisangisha mu muyuki wetu. Diyukidilangana ne André diakajula dijinga diende dia kumanya bivule, ne tuakatuadija kulonga nende Bible. Pashishe kakanenga bua kutuadija kuyukila ne balunda bende pa bivuaye wenda ulonga.

Tshikondo kampanda, mvua ndonga Bible ne ba-kanke banayi, umue wa kudibu kavua utamba kuakula kadi uvua uteleja bikole. Dîna diende divua Pierre. Butuku kampanda bu pa dîba ibidi, bayanyi ne meme tuakumvua bakokola ku tshiibi. Fuanyikija muanda eu: Ba-kanke banayi bavua biimane ku tshiibi ne nkonko ya kungela. Diakalenga, Rosaire kakadiabakena bua makumbula akena a pa dîba diakanyine a mushindu’eu.

Kumpala balume banayi aba bakabuela mu bisangilu. Kadi, amu André ne Pierre ke bakananukila. Bakashintulula nsombelu wabu mu diumvuangana ne mêyi-makulu a Nzambi ne kutambuishibua. Bidimu bipite pa 20 mpindieu, balume bonso babidi aba mbasadile Yehowa ne lulamatu. Pakatuadijabu kulonga, bavua bamanyibue bimpe bua mudimu wabu wa dibunda bibawu ne bavua babakeba kudi bampulushi. Imue misangu bampulushi bakalua kubakeba kunyima kua dimue dia ku malonga etu a Bible anyi munkatshi mua tshisangilu kampanda tshia tshisumbu. Ndi ne disanka mumvua muyishe “bantu ba mishindu yonso,” ne mudimuenene ne mêsu anyi mudi Dîyi dia Nzambi dienzeja mashintuluka àdì amueneka bushuwa bu a mu tshishima.​—1 Timote 2:4, NW.

Bu buobu bangambile ku ntuadijilu wa mudimu wanyi se: nekuikale Nzubu wa Bukalenge mu Cap-de-la-Madeleine, ne se: neikale ne bua kuujibua ne bantu ba Yehowa, tshivua mua kuitaba. Bia disanka, tshisumbu tshikese tshimue tshia mu tshimenga tshiena-mutumba tshia Trois-Rivières ntshidiunde tshilue kupatula bisumbu bisambombo bìdì bitanta ne bisangila mu Nzubu ya Bukalenge isatu, pa kukonga ne etshi tshia mu Cap-de-la-Madeleine.

Ndi mupete disanka dia kuambuluisha bantu batue ku 30 bua kufika ku diditshipa ne ku batismo. Mpindieu, ne bidimu 78, ndi mua kuamba bushuwa se: ndi ne disanka mumvua mulambule muoyo wanyi kudi Yehowa. Kadi, ndi ne bua kuitaba se: ndi mupete bimue bikondo bia diteketa mu maboko. Bua kulubuluka mu bikondo bia mushindu’eu, ntu mbulula misangu yonso Bible wanyi ne mbala imue mvese ìdì inkankamija bikole. Kabiena mua kuenzeka bua meme kupitshisha dituku dijima tshiyi mubale Dîyi dia Nzambi. Mvese udi unkankamija nangananga ng’eu wa Yone 15:7, muaba ùdì wamba ne: ‘Binuikala munda muanyi, bikala mêyi anyi munda muenu, nulombe tshionso tshinuasua, nebanuenzeletshi.’

Ditekemena dianyi ndia kumona Rosaire mu bulongolodi bupiabupia bukaadi pabuipi menemene. (2 Petelo 3:13; Buakabuluibua 21:3, 4) Kumpala kua lufu luende mu 1975, uvua wenda ulubuluka wipatshila batismo. Bua mpindieu, ndi mupangadike bua kunanukila mu mudimu wa ku dîba ne ku dîba ne kutungunuka ne kupeta disanka mu mudimu wa Yehowa.