Bakenza disua dia Yehowa

Petelo udi uyisha dia Pentekoste

BIVUA dinda dia muvu wa printemps mutekete, mu tshidimu tshia 33 B.B. Tshimuenekelu tshia muaba tshivua tshia musangelu! Musumba muasakane wa bena Yuda ne bena kuitabuja benyi uvua muuje misesu ya mu Yeruzaleme. Bavua bafumine ku miaba bu mudi ku Elama, ku Mezopotamiya, ku Kapadokia, ku Ejipitu, ne ku Roma. Mmunyipu muvuabi bikoka ntema pa kubamona bavuale bilondeshile bilele biabu ne pa kuteleja miakulu yabu mishilashilangane! Bamue bavua benze luendu lua kilometre mitue ku binunu bibidi bua kuikalaku mu tshibilu etshi tshia pa buatshi. Tshivua tshinyi? Pentekoste​—difesto dia disanka dia bena Yuda divua dileja ndekelu wa dinowa dia orje.​—Lewitiki 23:15-21.

Muishi uvua ufuima ufumina ku milambu pa tshioshelu tshia mu ntempelo, ne bena Lewi bimba misambu ya Hallel (Musambu wa 113 too ne ku wa 118). Diakamue kumpala kua 9:00 wa dinda, tshintu kampanda tshia dikema tshiakenzeka. ‘Tshiona tshiakafuma lubilu mulu bu tshipepele tshikole tshipita.’ Tshiakuula tente mu nzubu muonso muvua bayidi ba Yezu Kristo batue ku 120 badisangishe. Muyuki wa mu Mifundu udi wamba ne: ‘Ndimi mipanduluke yakamueneka kudibu, ivua bu kapia, kakashikama pa mutu pa muntu ne muntu. Buonso buabu bakuula tente ne [“spiritu munsantu,” NW] ne bakabanga kuakula miaku bu muakabapa [“spiritu,” NW] dîyi dia kuambabu.’​—Bienzedi 2:1-4.

Muntu yonso udi umvua muakulu wende

Mpindieu, bayidi bavule bakadiela pambelu pa nzubu. Bia kukema, bavua mua kuakula mu miakulu kabukabu ya musumba wonso! Ela meji muvuabi bikemesha pavua muenyi mufumine ku ditunga dia Perse ne muena mu Ejipitu bumvue bena Ngalileya bakula miakulu yabu ya ku tshileledi. Mbiumvuike, musumba uvua mukemeshibue bikole. “Bualu ebu budi munyi?” ke muakebejabu. Bamue bakabanga kuseka bayidi, bamba ne: ‘Mbakuatshike maluvu mapiamapia.’​—Bienzedi 2:12, 13.

Pashishe mupostolo Petelo wakimana kuulu ne kutuadija kuakula ne musumba. Wakumvuija ne: dipa edi dia tshishima dia miakulu divua bua kukumbaja mulayi wa Nzambi mufile ku butuangaji bua muprofete Yoele ne: ‘Nengitshikijile bantu bonso [“spiritu,” NW] wanyi.’ (Bienzedi 2:14-21; Yoele 2:28-32) Eyowa, Nzambi wakitshikijila bayidi ba Yezu spiritu wende. Etshi tshivua tshijadiki tshilelela tshia se: Yezu ukavua mujudibue ku bafue ne uvua mpindieu mu diulu ku tshianza tshia balume tshia Nzambi. “Nenku,” ke muakamba Petelo, “nzubu mujima wa Izalele amanye bushuwa ne: Nzambi wakamuvuija Mfumu ne Kristo, Yezu eu unuakakudika ku mutshi.”​—Bienzedi 2:22-36, NW.

Mmunyi muakandamuna bateleji? ‘Mitshima yabu yakanyingalala,’ ke mudi muyuki wamba, ‘ne bakakonka Petelo ne bapostolo bakuabu ne: Bana betu, netuenze tshinyi?’ Petelo kuandamuna ne: ‘Kudimunayi mitshima yenu, nubatijibue buonso buenu.’ Bantu batue ku 3 000 bakenza nanku! Panyima pa muanda eu, ‘bakananukila kuikala mu dilongesha dia bapostolo.’​—Bienzedi 2:37-42.

Mu dituadija kuakula mu tshikondo etshi tshia pa buatshi, Petelo wakatumika ne nsapi wa kumpala wa ku “nsapi ya Bukalenge bua [mu] diulu” ivua Yezu mumulaye bua kumupesha. (Matewuse 16:19, MMM) Nsapi eyi yakunzulula tshiibi tshia masanka bua bisumbu bishilashilangane bia bantu. Nsapi wa kumpala eu wakapetesha bena Yuda mushindu wa kulua bena nkristo bela manyi a spiritu. Pashishe, nsapi muibidi ne muisatu yakafila diakalenga edi kudi bena Samariya ne kudi Bampangano kabidi.​—Bienzedi 8:14-17; 10:44-48.

Malongesha buetu tuetu

Nansha muvua musumba eu wa bena Yuda ne bena kuitabuja benyi muambule bumpunda bua tshinsanga bua lufu lua Muana wa Nzambi, Petelo wakabambila malu ne kanemu, ubabikila ne: “bana betu.” (Bienzedi 2:29) Tshipatshila tshiende tshivua tshia kubasaka ku dinyingalala, kadi ki mbua kubapiisha nansha. Bua nanku, mbuelelu wende uvua muakane. Wakaleja bulelela ne kubushindikaye ne mvese ya mu Mifundu.

Aba badi bayisha lumu luimpe lelu badi ne bua kuidikija tshilejilu tshia Petelo. Badi ne bua kudienzeja bua kumona mushindu wa kupetangana ku mêyi ne bateleji babu, pashishe, ne budimu buonso, kuelangana nabu meji ku diambuluisha dia Mifundu. Padi bulelela bua mu Bible bulejibue mu mushindu muimpe, bantu ba mutshima muakane nebandamune.​—Bienzedi 13:48.

Lukunukunu lua Petelo ne dikima diende mu dituku dia Pentekoste bivua bishilangane bikole ne divila diende dia Yezu mbingu bu muanda-mutekete kumpala. Mu dituku adi Petelo uvua mupampakaja kudi buôwa bua bantu. (Matayo 26:69-75) Kadi Yezu ukavua mulombe bua bualu bua Petelo. (Luka 22:31, 32) Kakuyi mpata, dimuenekela dia Yezu kudi Petelo kunyima kua dibiishibua diakakolesha mupostolo eu. (1 Kolinto 15:5) Bu tshipeta, ditabuja dia Petelo kadiakateketa nansha. Anu mu katupa kakese, uvua muditue mu diyisha ne dikima. Nenku kabidi, kakayisha anu mu Pentekoste, kadi wakenza nanku mu matuku ende onso a muoyo.

Tshia kuenza ntshinyi bituikala petu benze tshilema bu muvua Petelo muenze? Tulejayi dinyingalala, tulombayi dilekela, ne tuelayi bidia bua kupeta diambuluisha dia mu nyuma. (Yakobo 5:14-16) Nenku tudi mua kuya kumpala ne dieyemena dia se: mudimu wetu wa tshijila mmuanyishibue kudi Tatuetu muena luse wa mu diulu, Yehowa.​—Ekesode 34:6.