Tudi ne bua kulota

UTUKU ulota anyi? Kabiena pamu’apa mua kujula mpata pa kuela meji ne: utu ulota, bualu tuetu bonso tutu tulota patudi tulala, nansha bituikala mua kuamba se: katutu tulota. Mbatshinke se: kupita pa bia pa lukama 95 bia bilota bionso kabitu bivulukibua. Mbilota kayi biutu uvuluka? Bushuwa, ebi bitutu tuvuluka ng’ebi bitudi tupeta diakamue kumpala kua kubiika.

Bakebuludi mu malu a bilota mbamone se: tulu tudi luendu lutungunuke ludi lutambe kukola mu mêba makese a ku ntuadijilu ne pashishe lulua kuteketa bikole kunyima. Dilota didi dienzeka nangananga mu bikondo bidi mêsu atuta lukasa lukasa, bibikila ne: tshilu tshia mêsu atuta lukasa. Bikondo ebi bidi bilondangana ne bikondo bidi mêsu kaayi atuta lukasa lukasa. Dilondangana dionso dia tulu tukole ne tulu tutekete didi dinenga minute mitue ku 90, ne malondangana aa mmambulula misangu itanu anyi isambombo butuku bujima, ne dia ndekelu dilua kuenzeka diakamue kumpala kua tuetu kubiika.

Nditupakana pa kuela meji ne: buongo buebe kabuena butamba kutumika paudi mulale. Mbamone se: buongo budi butumika mu bikondo bia dilota kupita mu bimue bikondo bitudi batabale, pa kumbusha imue selile mu tshitupa tshia buongo, idi misuikakaja ku ntema ne ku tshivulukilu. Selile eyi idi imueneka bu idi ikisha mu tshilu tshia mêsu atuta lukasa. Kadi pa tshibidilu selile ya mijilu ya mu buongo itu ne diumvuangana ditungunuke munkatshi muayi.

Buongo buetu ntshitupa tshia dikema tshia mubidi tshikena kumvuija tshidi ne miliyare mivule ya tutupa tudi tupatula tu-bimanyinu pabuipi ne lukama anyi nkama ibidi peshi nkama isatu mine mu kasunsa kamue. Kudi tutupa tukese tua bungi mu buongo bua muntu umue kupita bungi bua bantu badi pa buloba. Bamue bakebuludi badi batshinka se: budi ne tutupa tukese kumbukila ku miliyare 20 kupita too ne ku miliyare 50. Mushindu udibu kabuyi kumvuija udi ushindika tshiakamba mufundi wa Bible Davidi pa bidi bitangila mubidi wa muntu ne: “Nenkusamune bualu, mu mushindu mukuate buôwa, ndi mufukibue mu mushindu wa kukema. Midimu yebe idi ikemesha.”​—Musambu wa 139:14, NW.

Munkatshi mua bilota

Patudi batabale, biumvuilu bietu bitanu bidi misangu yonso bifila mamanyisha ne bimfuanyi ku buongo, kadi patudi tulala kabiena nanku to. Buongo budi bupatula bimfuanyi munda muabu kakuyi disonsola difumine pambelu pabu. Nunku, bitudi tumona mu bilota ne bienzedi bitudi tumonamu bitu imue misangu bu dilotakana. Dilotakana didi mua kutufikisha ku dienza malu adi kaayi mu diumvuangana mene ne mikenji ya ku tshifukilu, bu mudi dibuuka [bu kanyunyi] anyi didishinda kumbukila ku mukuna mule kakuyi njiwu. Dilondangana dia bikondo didi mua kukodiakajibua mu mushindu wa se: malu a kale amueneke bu a mpindieu. Peshi patuikala tuteta mua kunyema lubilu, katuena tumueneka bu bikale ne bukokeshi bua dinyungakana dietu​—mikolo yetu kayena isua kuambuluka. Bivua bitutue bikole ku muoyo ne malu menzeke atuvua mua kuikala bapete patutshivua batabale, bidi bushuwa mua kuikala ne buenzeji pa bilota bietu. Bavule bakaadi bamonamone malu makuate buôwa a mu mvita ki mbipepele bua buobu kuapua muoyo, anyi mene bakuabu kabatu bapua muoyo didiumvua dia kuikala babundibue kudi muenzedianganyi wa bibi. Malu adi atatshisha a nunku patudi batabale adi mua kulua kumueneka patudi tulota, enza bilota bikuate buôwa. Malu a pa tshibidilu atu mu bieledi bietu bia lungenyi patudi tuya kulala adi mua kulua mu bilota bietu.

Imue misangu patudi tuteta kujikija tshilumbu kampanda, dijandula didi dituluila patudi balale. Ebi bidi mua kuleja ne: tulu tuonso katuena amu bua kulota nansha. Tshimue tshitupa tshia tulu tshitu diela meji.

Mukanda kampanda wa malu a bilota ne buongo buetu udi wamba ne: “Mushindu mutambe kumanyika wa mudimu wa lungenyi ku tulu ki ndilota, kadi ndiela meji. Diela meji ku tulu kadiena dienda pamue ne bimuenekelu kampanda bia ku biumvuilu ne ki ndibengangane ne malu a pa tshibidilu. Ndimueneke dia pa tshibidilu, dikala diditatshisha misangu mivule bua malu a ku bùntù a dituku dishale anyi a dituku dilualua, ne ditu dia patupu, kadiyi difuka malu, ne dia diambulula.”

Bamue bantu badi bela meji ne: biena-bualu bia bilota biabu bidi ne mikenji ya pa buayi buabu buobu. Bua kupeta mushindu wa kumvuija bilota ebi, badi balama pabuipi ne bulalu buabu karné bua kumona mua kubifunda padibu batabala. Pa bidi bitangila dikuatshisha dia mikanda idi iteta bua kufila diumvuija ku bimanyinu bia bilota, mukanda wa The Dream Game, wa Ann Faraday, udi wamba ne: “Mu mikanda ya bilota muudi ukebulula mumvuija a mitu ne bimanyinu bia bilota kayitu ne dikuatshisha mene, nansha bikalayi ya pa tshibidilu anyi mishindamene pa lungenyi kampanda lua buena-lelu lua malu a dimanya dia ngikadilu.”

Bu mudibi bimueneka se: bilota bidi bitamba kufumina mu buongo, kabiena bia meji bua kutshinka se: bidi ne mikenji ya pa buayi buetu. Tudi ne bua kubiangata bu midimu ya pa tshibidilu ya buongo idi yambuluisha bua kubulama bimpe ne makanda.

Kadi netuambe munyi bua aba batu bamba ne: bavua balote bua lufu lua mulela kampanda anyi lua mulunda kansanga ne kubamanyishabu dituku diakalonda se: muntu au uvua mufue? Abi kabienaku bileja ne: bilota bidi mua kumanyisha malu atshilualua anyi? Mu tshiena-bualu tshidi tshilonda, netukonkonone tshidi tshisokome mu bilota bidi bimanyisha malu atshilualua.