Kudi muoyo kunyima kua lufu anyi?

NKONKO ibidi mmipampakaje bukua-bantu kukaadi binunu bia bidimu: Bua tshinyi tudi ne bua kukulakaja ne ndekelu wa bionso kufua? Kudiku muoyo wa mushindu mukuabu kunyima kua lufu anyi?

Lukonko lua kumpala ndutatshishe bantu bavule bualu nansha dimanya dia malu a luondapu dia matuku etu aa, ne masokolola àdì a dikema, ndipangile bua kufila diandamuna dimpe ne didi disankisha.

Lukonko luibidi ndupete mandamuna mavulavulayi. Nansha nanku, misangu yonso mandamuna pa bidi bitangila dikala ne muoyo kunyima kua lufu mmimanyine pankatshi pa aba badi bamba ne: bionso kabiena bishikila ne muoyo eu to, ne pa aba badi bamba bia muomumue ne dishindika dionso ne: muoyo mulelela udi ujika ku lufu. Bavule ba mu tshisumbu tshia ndekelu etshi badi batuambila ne: kakuena mpata mu bieledi biabu bia lungenyi bua se: muoyo wa muntu wa tshitupa tshîpi ke tshionso tshidiye mua kutekemena. Pa tshibidilu, mêyi kayi onso mapatula bua kupindulula ku lungenyi elu adi ajikidibua ne dikosa ku mêyi edi: “Ee, katshia muntu nansha umue ki mmupingane bua kutuambila, ki mmuomu anyi?”

Anu bu mudibi ne nkonko mikuabu mikondakane, kudi bavule badi kabayi banji kupangadija​—dishindika dia se: badi misangu yonso mua kufika ku ditaba mushindu umue peshi mukuabu. Kadi bamue nebandamune, imue misangu pa kuela bilele ne: “Tudi ne bua kuindila bua kumona pakumbana dîba!”

Lukonko lua mutantshi mule

Lukonko lua ntuadijilu pa bidi bitangila muoyo kunyima kua lufu luvua luedibue kukaadi bidimu bitue ku 3 500 kudi Yobo, muena ku Orient mumanyike bimpe, udi mutumbe bua lutulu luende kumpala kua makenga. Yobo wakela lukonko luende mushindu eu: ‘Muntu udi ufua ne bukole buende budi bujimina; e, muntu udi ukula muoyo wende, pashishe, udi kudi kunyi? Bu mudi mâyi a mu dijiba akama, ne bu mudi musulu uma ne ukamuka, nunku muntu udi ulala panshi kêna ubika kabidi . . . Biafua muntu, neikale ne muoyo kabidi, anyi?’​—Yobo 14:10-14.

Kadi Yobo kavua nkayende mu didiela nkonko pa bidi bitangila muoyo kunyima kua lufu to. Tshibungu kampanda (The Encyclopædia of Religion and Ethics) tshidi tshifila dimanyisha didi ditokesha bualu ebu muinshi mua mutu wa bualu mukese “Ngikadilu wa bafue” ne: “Tshiena-bualu nansha tshimue tshisuikakaja ku ngikadilu wa muoyo wa muntu ki ntshianji kukuata lungenyi lua muntu nunku bu mudi tshia ngikadilu wende kunyima kua lufu. [Bantu bena musoko] mu bitupa bionso bia buloba badi pa tshibidilu ne ngenyi mifumba ne mishindika ya dikalaku dia muaba wa ba spiritu​—muoyo mu muaba au, bimanyishilu biawu, bimuenekelu biawu—​ne ebi bidi bifila lungenyi lua diditatshisha ne tshiena-bualu etshi. Buôwa butangalake bikole bua bafue budi buleja lungenyi lua kale lua se: ngikadilu wabu kavua ndekelu wa muoyo wabu nansha. Lufu luvua lujikija makanda; abi bivua bimueneka anu bilelela; kadi kakuvuaku makole makuabu avua enza mudimu anyi? Peshi makole au kaavuaku mua kudileja mu mishindu ya budimu ne idi ikuatshisha buôwa anyi? Bikala bantu bavua kumpala bitabuja ne: kudi spiritu, anyima, peshi mukishi udi mutapuluke ku mubidi, anyi kabiyi nanku, kudi kumueneka kabingila kalelela ka kuitaba ne: bavua bangata bafue bu badi anu batungunuka ne mushindu kampanda wa dikalaku.”

Udi mua kukuata ku umue wa ku mishindu isatu mileja kulu eku: kubenga kujadika tshidi tshienzeka kunyima kua lufu; kuikala mutuishibue ne: kudi muoyo wa mushindu kampanda kunyima kua lufu; anyi kuikala mutuishibue ne: bionso bidi bishikila ne muoyo eu. Nansha biobi bia munyi, tudi tukulomba bua kukonkonona ne ntema tshiena-bualu tshidi tshilonda. Tangila né wasanganamu bijadiki bituishi bia mu Bible bia se: kudi ditekemena dia dikema dia muoyo wa disanka kunyima kua lufu, mmunyi muenzekabi, mmuaba kayi, ne ntshikondo kayi.