Busambi munkatshi mua bidimu binayi bia mvita

MUNKATSHI mua bidimu binayi bia mvita mu buloba bua Yougoslavie wa kale, bantu bavule bakapetangana ne ntatu ne dipangika dikole dia bintu. Munkatshi muabu muvua nkama ya Bantemu ba Yehowa, bakatungunuka ne kutendelela “Nzambi wa busambi buonso” ne lulamatu luonso.​—2 Kolinto 1:3.

Mu Sarajevo, bantu bakapeta lutatu lukuabu lua kuikala basombele mu tshimenga tshialabale tshivua tshijingila mu tshikondo tshia mvita. Kakuvua nzembu, mâyi, nkunyi, ne biakudia. Mmunyi muakatumika tshisumbu tshia mu Sarajevo tshia Bantemu ba Yehowa mu nsombelu eyi mikolakane? Bena nkristo ba mu matunga a ku mutumba bakateka mioyo yabu mu njiwu bua kutuala bintu bivule bia kuambuluisha nabi. (Tangila Tshibumba tshia Nsentedi, 1 Kasuabanga 1994, mabeji 23-27.) Kabidi, bana betu ba mu Sarajevo bakabanyangana bivuabu nabi umue ne mukuabu, pa kuzangika diabanyangana bintu bia mu nyuma kumpala kua bionso. Mu tshikondo tshia dijingidibua edi, mutangidi muena nkristo wa mu tshimenga atshi wakafila luapolo elu:

“Tudi tuangata bisangilu bietu ne mushinga mukole mutambe. Mukajanyi ne meme, pamue ne bantu bakuabu 30, tudi tuenda kilometre 15 misangu yonso mu diya ne mu dipingana mu bisangilu. Imue misangu bavua bamanyisha ne: nebafile mâyi mu mêba atuvua tuenza bisangilu. Ntshinyi tshivua bana betu ne bua kuenza? Bavua ne bua kushala kumbelu anyi peshi kubuela mu bisangilu? Bana betu bakasungula bua kubuela mu bisangilu. Bana betu bavua misangu yonso bambuluishangana; tshionso tshivuabu natshi, bavua batshiabanyangana. Muanetu mukuabu wa bakaji mu tshisumbu tshietu mmusombele ku muelelu mene wa tshimenga, pabuipi ne ditu; nunku mbipepele kakese bua yeye kupeta ndambu wa nkunyi. Udi kabidi utumika ku tshioshedi tshia mampa, ne udi upeta bukula bu difutu. Padiku mushindu, udi wenza mulungu munene wa diampa ne ulua nawu mu bisangilu. Kunyima kua bisangilu, mu dipingana, udi upesha muntu ne muntu tshipesa.

“Mbia mushinga se: nansha umue wa ku bana betu ba balume anyi ba bakaji ki mmudiumvue mulekelela. Nansha umue wa kutudi ki mmumanye muntu wakengela diambuluisha pashishe mu nsombelu kampanda mubi. Pakuula njila ne neje ne pakasama muanetu kampanda wa bakaji, bana betu ba balume bansonga, ba makanda, bakamuambula bua kuya nende mu bisangilu pa ditempu didi diselemuka.

“Tuetu bonso tudi badifile mu mudimu wa diyisha, ne Yehowa mmubeneshe madikolela etu. Mmumone nsombelu wetu mukole mu Bosnie, kadi mmutubeneshe ne didiunda​—didiunda dituvua katuyi bamone kumpala kua mvita.”

Bia muomumue, mu bitupa bikuabu bia Yougoslavie wa kale mùdì mvita itua ipela, Bantemu ba Yehowa mbapete didiunda nansha muvuaku ntatu mikole. Tudi bapete luapolo elu lumbukila ku biro bia Bantemu ba Yehowa bia mu Croatie ludi lutangila kasumbu kampanda ka Bantemu: “Bana betu badi basombele mu Velika Kladuša bavua mu bikondo bitambe kukola menemene mua kupita nabi. Tshimenga tshivua tshibundibue misangu ne misangu. Bana betu bavua ne bua kumvuija ndubidilu wabu kudi bena Croatie, bena Serbie, ne biluilu kabukabu bia ba-Mizilman. Bulelela, bavua ne bua kutantamena bipite​—dikuatshibua mu buloko, ditutshibua, nzala, njiwu ya lufu. Pabi, bonso bakashala ne lulamatu ne badi ne muabi wa dikema wa kumona dibenesha dia Yehowa pa midimu yabu.”

Nansha mu ntatu eyi mikole, Bantemu ba Yehowa mu Velika Kladuša ne mu tshimenga tshia pabuipi tshia Bihać mbatungunuke ne kupeta didiunda padibu benda babanyangana ne lukunukunu mukenji wa Nzambi wa busambi ne bena mutumba nabu. Bungi busanga bua bamanyishi 26 ba Bukalenge ba ku miaba ibidi eyi badi balombola malonga a Bible 39 kumbelu!