Budikadidi bua bitendelelu mbusanyika mu Japon

MUNKATSHI mua bidimu bia bungi mu Japon, bansonga Bantemu ba Yehowa balongi bavua biimane mukolo mule ne muîpi: Bavua ne bua kulonda kuondo kabu ka muoyo kalongesha kudi Bible, anyi kulonda tshisumbu tshia malongesha a mu tshilongelu àdì anyanga kuondo kabu ka muoyo. Bua tshinyi mukolo mule ne muîpi? Bualu mu bilongelu biabu, mishindu ya diakaja mubidi bua diluangana idi tshitupa tshia dilongesha dia dibidija mubidi. Bantemu bansonga bakajingulula ne: dibidija mubidi dia mushindu’eu bua diluangana kadiena dipetangana ne mêyi-maludiki a mu Bible, bu edi didi mu Yeshaya nshapita 2, mvese 4 (NW). Tudi tubala ne: “Nebikale ne bua kufula miele yabu ya mvita bua kuyivuija nkasu ya kudima nayi ne mafuma abu nebaavuije tushola tua kukosa natu bilongo. Ditunga dimue kadiakujudila ditunga dikuabu muele wa mvita nansha, ne kabakulonga kabidi mua kuluangana mvita to.”

Kabayi bajinga bua kulonga mishindu ya diakaja mubidi bua mvita, idi yumvuija kututa muntu mukuabu, Bantemu bansonga bena nkristo bakumvuija balongeshi babu ne: bua kuondo kabu ka muoyo, kabavua mua kubuela mu manaya a diluangana. Panyima pa bamane kupima bua kuitabijija balongi aba tshisumbu tshia malongesha aa, balongeshi ba bungi bàvuà ne lumvu bakanemeka ndekelu wa bionso kuondo ka muoyo ka balongi ne kufila mishindu mikuabu ya manaya.

Kadi, bamue balongeshi bakajabala ne muoyo munda, ne bimue bilongelu biakabengela Bantemu bansonga dianyisha dia kubelela mpué mu dilongesha dia dibidija mubidi. Mu 1993, bakabengela Bantemu batue ku tshitema dianyisha dia kubanda mu kalasa kakuabu ne bakenzejibua bua kumbuka mu tshilongelu peshi kuipatshibua bua dibenga kubuela mu manaya a diluangana.

Mbimueneke patoke ne: bivua tshikondo tshia kubingisha bukenji bua bena nkristo bansonga bua kupetabu ndongeshilu ukena unyanga kuondo kabu ka muoyo. Balongi batanu bavuabu babengele bua kubanda mu kalasa kakuabu mu Lycée municipal technique et industriel mu Kobe (mu tshikoso: Kobe Tech) bakangata dipangadika dia kuya ku kabadi.

Ntshilumbu kayi tshivuaku?

Mu printemps wa 1990 pakabuela balongi aba batanu mu tshilongelu tshia Kobe Tech, bakumvuija balongeshi ne: kabavua mua kubuela mu manaya a kendo (dinaya dia mu Japon dia miele ya nshiba) bua mmuenenu yabu miashila pa Bible. Balongeshi ba dibidija mubidi bakabenga ne muoyo umue ne bakababengela mishindu kayi yonso mikuabu bua kupetabu mpué mu dilongesha dia dibidija mubidi. Ndekelu wa bionso, balongi bakabula mu dilongesha dia dibidija mubidi mu kalasa ne bu tshipeta, bavua ne bua kuambulula tshidimu tshia kumpala (tshidimu tshia kumpala tshia malonga mu Lycée). Mu Tshisanga 1991 bakafikisha tshilumbu ku Kabadi ka distrike ka Kobe, bamba ne: dipangadika dia tshilongelu divua dishipe mêyi ne mikandu bia nshindamenu bìdì bijadika budikadidi bua ntendelelu.a

Tshilongelu etshi tshiakamba muvua difila midimu mikuabu mua kuikala disua kumvuija dileja dianyisha kudi tshitendelelu kampanda tshisunguluke ne didi mua kunyanga ndubidilu wa tshilongelu tshia bantu bonso. Kabidi, bakamba ne: kabavua ne mishindu milongolola anyi bena mudimu bua kupetesha dilongesha dikuabu dia dibidija mubidi.

Dipangadika dia Kabadi ka distrike didi dilundula mioyo ya bamanyi ba bualu ebu

Pavuabu munkatshi mua diteleja tshilumbu, babidi ba ku balongi batanu aba bakapangila kabidi bua kubanda mu kalasa kakuabu bua dilongesha dia dibidija mubidi, eku bakuabu basatu ne lutatu lukole kubandabu mu kalasa kakuabu. Mêyi ne mikandu bia tshilongelu bivua biamba ne: balongi bàvuà ne bipeta bishadile ne bavua bambulula kalasa kamuekamue bidimu bibidi bilondangane, bavua ne bua kuipatshibua. Pa kumona bualu ebu, umue wa ku balongi aba babidi wakapangadija bua kumbuka mu tshilongelu kumpala kua kuipatshibuaye, kadi mukuabu, Kunihito Kobayashi, wakabenga bua kumbuka. Nenku bakamuipata. Bia kukema, muayene wa bipeta bia Kunihito bua malongesha onso kusangisha ne dia dibidija mubidi, diakapangilaye ne tshipeta tshia mpué 48, uvua wa mpué 90,2 pa 100. Pa balongi 42 yeye uvua wa kumpala mu kalasa kende.

Mu dia 22 Luishi 1993, Kabadi ka distrike ka Kobe kakabingisha tshilongelu tshia Kobe Tech ne kuamba ne: “Mapangadika mangata kudi tshilongelu etshi kaavua manyange mêyi ne mikandu bia tshibungu tshinene,” nansha muakitabaku ne: “kakuena mushindu wa kuvila ne: budikadidi bua ntendelelu bua bafundianganyi buvua mu mushindu kampanda bufimpakaja kudi malu malomba a tshilongelu bua kubuela mu manaya a kendo.”

Anu bu mupostolo Paulo mu siekele wa kumpala, bafundianganyi bakapangadija bua kuya kudi bakokeshi ba ku mutu bavua bakumbanyine. (Bienzedi 25:11, 12) Tshilumbu tshiakaya ku Kabadi kanene ka ku Osaka.

Ngikadilu ukena buiminyi wa bafundianganyi

Mushikuluji kampanda muende lumu, Profesere Tetsuo Shimomura wa mu Université wa Tsukuba, wakitaba bua kufila tshijadiki bu ntemu wa dimanya dipiluke mu Kabadi kanene ka ku Osaka. Bu mushikuluji wa malu a ndongeshilu ne mikenji, wakashindika mushindu ùvuà mapangadika a tshilongelu etshi apepejangana mu ditangila malu a balongi. Kunihito Kobayashi wakumvuija nyanji (sentiments) yende ku kabadi, ne mmuenenu wende wa muoyo umue wakalenga mitshima ya aba bavua mu tshilumbuluidi atshi. Pashishe, mu dia 22 Luishi 1994, Nsangilu wa balumbuluidianganyi ba mu Kobe, mu diamba ne: mapangadika a tshilongelu mmanyange budikadidi bua ntendelelu bua Kunihito ne bukenji buende bua kupeta ndongeshilu, wakatuma dîyi bua tshilongelu tshimupingaje mu kalasa.

Bu muakasemena tshikondo bua kukosabu tshilumbu ku Kabadi kanene ka ku Osaka, bena nkristo bansonga bonso bena tshilumbu etshi bavua ne dijinga dikole dia kuikala mu diluangana edi too ne ku ndekelu. Bakajingulula ne: bavua baluangana mvita miakane bua diakalenga dia nkama ya Bantemu bansonga bàdì bakama tshilumbu tshimuetshimue etshi mu bilongelu bia mu Japon mujima. Kadi bu muvuabu kabayi bipatshibue mu tshilongelu etshi, bivua bimueneke bimpe ne: kabadi kavua ne bua kujikija tshilumbu tshiabu. Ne bakamona se: bu buobu bapingaje difunda diabu, dipangila butshintshikidi dia tshilongelu mu dipata Kunihito divua mua kumueneka patoke. Nenku, balongi bonso pa kumbusha Kunihito bakapangadija bua kulekela tshilumbu atshi.

Mu dia 22 Tshisua-munene 1994, Nzuji mulombodi Reisuke Shimada wa Kabadi kanene ka ku Osaka wakakosa nsambu ne dipangadika diakashipa nkoselu wa bilumbu wa Kabadi ka distrike ka Kobe. Kabadi aka kakasangana ne: kabingila ka Kunihito ka dibenga manaya a diluangana a kendo kavua kalelela, kabidi ne: bubi bumuenzela bua dipangadika diende dishindamene pa mitabuja a tshitendelelu tshiende mbunene butambe. Nzuji mulombodi Shimada wakamba ne: tshilongelu tshivua ne bua kuikala tshifile midimu mikuabu mishilangane. Dipangadika edi dilenga diakapeta diandamuna dimpe mu mitshima ya aba bavua baditatshisha bua manême a bantu. Kadi, tshilongelu etshi tshiakafikisha tshilumbu etshi ku Kabadi kakulu ka Japon, pa kupangisha Kunihito bua kulonga bua tshidimu tshijima tshikuabu.

Ku Kabadi kakulu

Ka-diosha mu tshikandakanda tshia Kobe Shimbun kakamba pashishe ne: “Balombodi ba bilongelu ba mu tshimenga tshia Kobe pamue ne tshilongelu etshi bavua ne bua kuikala bitabe dipingana dia muena-muabu Kobayashi mu tshilongelu mu tshikondo atshi [panyima pa dipangadika dia Kabadi kanene ka ku Osaka]. . . . Mmuenenu wabu wa dikokangana wa patupu mmupangishe muntu tshikondo tshia mushinga tshia bunsonga buende.” Nansha nanku, tshilongelu tshia Kobe Tech tshiakumisha mutshima mu tshilumbu etshi. Bu tshipeta, muanda eu wakalua tshiena-bualu tshia ngumu mitangalaja mu ditunga dijima. Balongeshi ne balombodi ba bilongelu ba mu ditunga dijima bakatabalela bualu ebu, ne dipangadika dia kabadi ka ku mutu kua tuonso mu ditunga divua ne bua kuikala tshilejilu tshia mushinga bua bilumbu bimuebimue biamu matuku atshilualua.

Mu dia 17 Tshiongo 1995, panyima bu pa lumingu lujima tshilongelu tshimane kufikisha tshilumbu ku Kabadi kakulu, tshikumina tshia mu Kobe tshiakakuma mu tshimenga tshia Ashiya muvua Kunihito ne dîku diende basombele. Bu pa dîba itanu ne minute makumi anayi mu dinda adi, minute mikese kumpala kua tshikumina kututatshi mu tshijengu atshi, Kunihito wakumbuka ku nzubu bua kuya ku mudimu wende wa tshitupa tshia dituku. Uvua wendesha dikalu muinshi mua njila munene wa Hanshin, ne pakatuta tshikumina, ukavua usemena pabuipi menemene ne tshitupa tshiakupuka. Musangu umue wakapingana kumbelu ne wakasangana tshisasa tshia kumpala tshia nzubu wende tshibumbula tshionso. Kunihito wakamona se: uvua mua kuikala mujimije muoyo wende bipepele mu tshikumina, ne wakela Yehowa tuasakidila bua dimulekela bua kupandukaye. Bu yeye mufue, pamu’apa tshilumbu tshia kendo tshivua kuikala tshijike kakuyi dipangadika dia Kabadi kakulu.

Mu Japon, Kabadi kakulu katu pa tshibidilu kakonkonona bilumbu anu pa mabeji ne kalumbuluisha nansha bikala mapangadika a kabadi kashadile avua majalame anyi kâyi majalame. Kakuena diela dia nkonko, anu padiku kabingila kanene ka kushipela dipangadika dia kabadi kashadile. Kabadi aka kakena kamanyisha bena bilumbu dituku dìdì dipangadika dia ndekelu ne bua kufidibua. Nenku Kunihito wakakema mu dinda dia 8 Luabanya 1996, pakamuambilabu ne: dipangadika divua ne bua kuangatshibua mu dinda adi. Wakasanka ne wakatshionkomoka pakamanyaye ne: Kabadi kakulu kakakuata ku dipangadika dia Kabadi kanene ka ku Osaka.

Ba-nzuji banayi, pamue ne Nzuji mulombodi Shinichi Kawai, ku dîyi dimue bakakosa tshilumbu bamba ne: “mapangadika [a tshilongelu] mine avua ne bua kuangatshibua bu akena makumbane mu mushindu munekesha pa kutangila mêyi mitaba a mu nsangilu wa bantu pa kusambuka tshitupa tshia manême a didiangatshila mapangadika, ne pa nanku, mmabengangane ne mikenji.” Kabadi aka kakanyisha bulelela bua dibenga dia Kunihito dia kuenza manaya a diluangana a kendo ne kakamba ne: “Kabingila ka eu udi mufundibue bua dibenga kuenza manaya a diluangana a kendo kavua ka muoyo umue ne kasuikakaja bikole ku nshindamenu wa ditabuja diende.” Kabadi kakulu kakakosa nsambu ne: tshilongelu etshi tshivua kuikala tshifile ne tshidi ne bua kufila mishindu mikuabu [ya manaya] bua se: mitabuja a tshitendelelu a udi mufundibuemu ikale ne bua kunemekibua.

Tshipeta tshia buenzeji bunene

Dipangadika edi kakuyi mpata nedifile tshilejilu tshimpe mu dianyisha budikadidi bua ntendelelu mu bilongelu. Tshikandakanda tshia The Japan Times tshiakamba ne: “Dikosa tshilumbu edi ndia kumpala dienza kudi Kabadi kakulu pa tshilumbu tshia ndongeshilu ne budikadidi bua ntendelelu.” Nansha nanku, dipangadika edi kadiena diumbusha bujitu bua nsonga yonso mulongi bua kuangata diende dipangadika bilondeshile kende kuondo ka muoyo kumpala kua mateta a ditabuja.

Profesere Masayuki Uchino wa mu Université wa Tsukuba wakela nseka ne: bumue bua ku malu akasaka ba-nzuji bua kubingisha Kunihito buvua bua se: uvua “mulongi wa muoyo muimpe uvua ne bipeta bia ndekelu wa tshidimu bia pa buabi.” Bible udi ufila mubelu eu kudi bena nkristo bàdì bakama mateta a ditabuja diabu: “Nuikale misangu yonso ne nsombelu muimpe munkatshi mua bena matunga, bua se: nansha padibu banuamba munudi benji ba malu mabi, bafike ku ditumbisha Nzambi mu dituku dia dikontolola diende, bua midimu yenu mimpe idibu badimuena ne mêsu.” (1 Petelo 2:12, NW) Bena nkristo Bansonga ba lulamatu badi mua kuleja ne: tshikadilu tshiabu tshiashila pa Bible ntshiakanyine kanemu ka bantu pa kuikala ne nsombelu mujima umvuangana ne mêyi-makulu a mu Bible.

Panyima pa dipangadika edi dia Kabadi kakulu, Kunihito Kobayashi wakanyishibua kabidi mu tshilongelu tshia Kobe Tech. Bavule ba ku balongi bàkabuelà mu tshilongelu etshi pamue ne Kunihito bakavua bamane kupeta mapolome. Kunihito udi mpindieu ulonga pamue ne balongi badi bashadile kudiye ku bidimu bitanu. Ku dimona dia bantu ba bungi mbimueneke ne: bidimu bitanu bia mushinga mukole bia bunsonga buende mbijimija patupu. Nansha nanku, muoyo-mutoke wa Kunihito udi ne mushinga mukole ku mêsu kua Yehowa Nzambi, ne didifila diende kadiena bushuwa dia patupu.

[Mêyi adi kuinshi]

[Bimfuanyi mu dibeji 20]

Ku dia bakaji: nzubu wa Kunihito kunyima kua tshikumina

Kuinshi: Kunihito lelu’eu