Diabanyangana busambi budi Yehowa upetesha

‘Ditekemena dietu bua bualu buenu didi dijalama; bualu tudi bamanye ne: bu munudi babanyanganyi netu ba makenga, nunku nudi babanyanganyi netu ba busambi kabidi.’​—2 KOLINTO 1:7.

1, 2. Mmalu kayi adibu bamone kudi bavule badi balue bena nkristo lelu’eu?

BABADI ba bungi ba Tshibumba tshia Nsentedi ba lelu mbakole kabayi ne dimanya dia bulelela bua Nzambi. Pamu’apa bidi bilelela buebe wewe muine. Pikalabi nanku, vuluka mushindu uwakumvua pakatuadija kubululuka mêsu ebe a tshiumvuilu. Tshilejilu, musangu wa kumpala uwakajingulula ne: bafue kabena bakenga ne ki mbamanye bualu nansha bumue, kuakapeta disulakana anyi? Ne pawakamanya ditekemena bua bafue, dia se: miliyare ya kudibu nebabiishibue bua kuikala ne muoyo mu bulongolodi bupiabupia bua Nzambi, kuvuaku mupete busambi anyi?​—Muambi 9:5, 10; Yone 5:28, 29.

² Netuambe munyi bua dilaya dia Nzambi dia kujikija bubi ne kukudimuna buloba ebu mparadizu? Pawakamanya bualu ebu, kabuvuaku bukusambe ne bukûje ne ditekemena dikole anyi? Mmunyi muwakumvua pawakamanya bua musangu wa kumpala mushindu udiku wa kubenga kufua kashidi kadi wa kupanduka ne kuikala mu Mparadizu au wa pa buloba utshilualua? Kakuyi mpata uvua musanke bikole. Eyowa, wakalua mupetshi wa mukenji wa busambi wa Nzambi ùdì uyishibua mpindieu pa buloba bujima kudi Bantemu ba Yehowa.​—Musambu wa 37:9-11, 29; Yone 11:26; Buakabuluibua 21:3-5.

3. Bua tshinyi aba badi babanyangana mukenji wa busambi wa Nzambi ne bakuabu badi pabu bakengeshibua?

³ Nansha nanku, pawakateta bua kuabanyangana ne bakuabu mukenji wa mu Bible, wakalua kabidi kujingulula se: ‘bonso kabena ne ditabuja.’ (2 Tesalonike 3:2) Pamu’apa bamue ba ku balunda bebe ba kale bakakuseka bua dileja diebe dia ditabuja mu malaya a mu Bible. Uvua mene mua kuikala mupetangane ne dikengeshibua bua ditungunuka diebe ne kulonga kua Bible pamue ne Bantemu ba Yehowa. Buluishi buvua mua kuikala buenda bukola pawakatuadija kuenza mashintuluka bua kuakaja nsombelu webe mu diumvuangana ne mêyi-maludiki a mu Bible. Wakatuadija kupeta makenga àdì Satana ne bulongolodi buende batuadila bonso bàdì bitaba busambi bua kudi Nzambi.

4. Mmu mishindu kayi mishilangane mudi bantu batshidi basankidila bulelela mua kuandamuna ku makenga?

⁴ Bia dibungama, anu bu muakadianjila Yezu kuamba, makenga adi afikisha bamue ku dilenduka ne ku dilekela didisangisha diabu pamue ne tshisumbu tshia bena nkristo. (Matayo 13:5, 6, 20, 21) Bakuabu badi batantamena makenga pa kulama bieledi biabu bia lungenyi bijalamija pa malaya a busambi adibu benda balonga. Ndekelu wa bionso badi batshipa mioyo yabu kudi Yehowa ne batambuishibua bu bayidi ba Muanende, Yezu Kristo. (Matayo 28:19, 20; Mâko 8:34) Bushuwa, makenga kaena ajika diakamue padi muena nkristo utambuishibua nansha. Tshilejilu, dilama bunonoke didi mua kuikala diluangana dikole bua muntu uvua muena buendenda kumpala. Bakuabu badi ne bua kukandamena misangu yonso buluishi bua kudi bena dîku bakena bena kuitabuja. Nansha makenga mikale a munyi, bonso bàdì bipatshila ne lulamatu luonso nsombelu wa diditshipa kudi Nzambi badi mua kujadika bualu bumue ebu. Mu mushindu udi utangila muntu pa nkayende menemene, nebapete busambi ne diambuluisha bia kudi Nzambi.

“Nzambi wa busambi buonso”

5. Pa kumbusha mateta mavule akapeta Paulo, mmalu kayi makuabu akamonaye?

⁵ Muntu wakanyisha bikole busambi bùdì Nzambi upetesha uvua mupostolo Paulo. Kunyima kua tshikondo tshia diteta dikole mu Azi ne mu Makedonia, wakapeta disulakana dinene pa kumvua se: tshisumbu tshia bena Kolinto tshivua tshiandamune bimpe ku mukanda wende wa mibelu. Ebi biakamusaka bua kubafundila mukanda muibidi, mutudi tusangana tshiambilu tshiumvuiji tshia disamuna tshidi tshilonda etshi: “Mubeneshibue ikale Nzambi ne Tatu wa Mukalenge wetu Yezu Kristo, Tatu wa luse luengeleki ne Nzambi wa busambi buonso, udi utusamba mu makenga etu onso.”​—2 Kolinto 1:3, 4, NW.

6. Ntshinyi tshitudi tulongela ku mêyi a Paulo àdì asanganyibua mu 2 Kolinto 1:3, 4?

⁶ Mêyi aa menzeja ku spiritu adi amba bivule bipitshidile. Tuanjayi kuakonkonona. Padi Paulo umvuija disamuna edi kudi Nzambi anyi umuela tuasakidila peshi wenza dilomba kudiye mu mikanda yende, tudi tusangana pa tshibidilu se: udi ubuejamu kabidi dianyisha diende diondoke bua Yezu, Mfumu wa tshisumbu tshia bena nkristo. (Lomo 1:8; 7:25; Efeso 1:3; Ebelu 13:20, 21) Nunku, Paulo udi utuma mêyi aa a disamuna nawu kudi “Nzambi ne Tatu wa Mukalenge wetu Yezu Kristo.” Pashishe, bua musangu wa kumpala mu mifundu yende, udi utumika ne muaku wa tshiena-Greke mukudimuna ne: “luse luengeleki.” Muaku eu mmufumine ku muaku mutumika nawu bua kuleja dibungama padi mukuabu muntu muikale mu dikenga. Pa nanku Paulo udi umvuija nyanji miengeleki ya Nzambi bua yonso wa ku basadidi Bende ba lulamatu bàdì bapetangana ne makenga​—nyanji miengeleki idi isaka Nzambi ku dibenzela malu mu mushindu wa luse. Ndekelu wa bionso, Paulo uvua wangata Yehowa bu mpokolo wa ngikadilu eu mulenga pa kumubikila ne: “Tatu wa luse luengeleki.”

7. Bua tshinyi tudi mua kuamba ne: Yehowa udi “Nzambi wa busambi buonso”?

⁷ “Luse luengeleki” lua Nzambi ludi lupetesha disulakana kudi eu udi upetangana ne makenga. Nunku Paulo udi utungunuka ne difunkuna Yehowa bu “Nzambi wa busambi buonso.” Pa nanku, busambi kayi buonso butudi mua kupetela ku bulenga bua bena kuitabuja netu, tudi mua kuangata Yehowa bu mpokolo wabu. Kakuena busambi bulelela, bùdì bunenga bùdì kabuyi bufumina kudi Nzambi. Kabidi, nyeye wakafuka muntu ku tshimfuanyi tshiende, utupetesha nunku mushindu wa kuikala basambianganyi. Kabidi, spiritu munsantu wa Nzambi ke udi usaka basadidi bende bua kuleja luse luengeleki kudi aba badi bakengela busambi.

Bashidimuna bua kuikala basambianganyi

8. Nansha mudi Nzambi kayi mpokolo wa mateta etu, mbuenzeji kayi bulenga budi ditantamena dietu mu makenga mua kuikala nabu kutudi?

⁸ Nansha mudi Yehowa Nzambi ulekelela mateta kabukabu àdì atulukila basadidi bende ba lulamatu, katu nansha kakese mpokolo wa mateta a nunku. (Yakobo 1:13) Kadi, busambi budiye upetesha patudi tutantamena makenga budi mua kutushidimuna bua kutamba kuandamuna ku majinga a bakuabu. Ne tshipeta kayi? ‘Bua tuetu tumanye mua kusamba bakuabu mu makenga abu onso ne busambi butudi tusambibua nabu kudi Nzambi.’ (2 Kolinto 1:4) Nunku Yehowa udi utushidimuna bua kuikala babanyanganyi bakumbanyine ba busambi buende pamue ne bena kuitabuja netu ne aba batudi tupetangana nabu mu mudimu wetu bu mutudi tuidikija Kristo ne “[tusamba] bonso badi mu madilu.”​—Yeshaya 61:2; Matayo 5:4.

9. (a) Ntshinyi tshiatuambuluisha bua kutantamena makenga? (b) Mmunyi mudi bakuabu basambibua patudi tutantamena makenga ne lulamatu luonso?

⁹ Paulo wakatantamena makenga ende a bungi, ku diambuluisha dia busambi buvule buakapetelaye kudi Nzambi ku butuangaji bua Kristo. (2 Kolinto 1:5) Tuetu petu tudi mua kupeta divulangana dia busambi pa kueleela meji pa malaya a mushinga mukole a Nzambi, pa kusambila bua kupeta dikuatshisha dia spiritu munsantu, ne pa kumona mandamuna a Nzambi ku masambila etu. Nunku netukoleshibue bua kutungunuka ne kusanyika bumfumu butambe bunene bua Yehowa ne kujadikila Diabolo se: udi muena mashimi. (Yobo 2:4; Nsumuinu 27:11) Patudi batantamene ne lulamatu luonso makenga a mishindu yonso, amu bu Paulo, tudi ne bua kupesha Yehowa bukenji buonso, yeye muena busambi bùdì buambuluisha bena nkristo bua kushala ne lulamatu mu diteta. Ditantamena dia bena nkristo ba lulamatu didi ne buenzeji busambi pa buena-muntu buetu, bufikisha bakuabu ku dikala bapangadije bua “kutantamena makenga a muomumue.”​—2 Kolinto 1:6, NW.

10, 11. (a) Ng’amue malu kayi akakebela tshisumbu tshia mu Kolinto wa kale dikenga? (b) Mmunyi muvua Paulo musambe tshisumbu tshia ku Kolinto, ne nditekemena kayi diakumvuijaye?

¹⁰ Bena Kolinto bavua ne tshiabu tshitupa mu makenga àdì akuata bena nkristo bonso balelela. Kusakidil’apu, bavua bakengela mibelu bua kuipatabu muena buendenda uvua kayi unyingalala. (1 Kolinto 5:1, 2, 11, 13) Dipangila bua kuangata dipangadika edi, ne bua kujikija diluangana ne matapuluka diakafuisha tshisumbu tshionso bundu. Kadi bakalonda ndekelu wa bionso mibelu ya Paulo ne bakaleja dinyingalala dilelela. Ke bualu kayi, wakabela ka-lumbandi ne musangelu ne kuambaye ne: diandamuna diabu dilenga ku mukanda wende divua dimusambe. (2 Kolinto 7:8, 10, 11, 13) Mbimueneke se: muntu wakipatabu ukavua pende munyingalale. Nunku Paulo wakababela bua ‘kumufuila luse ne kumusamba, bua muntu wa mushindu’eu kavu kuminyibua, mu mushindu kampanda peshi kansanga, kudi tunyinganyinga tuende tupite bukole.’​—2 Kolinto 2:7, NW.

¹¹ Mukanda muibidi wa Paulo uvua ne bua kuikala musambe bushuwa tshisumbu tshia bena Kolinto. Ne etshi ke tshivua tshimue tshia ku bipatshila biende. Wakumvuija ne: ‘Ditekemena dietu bua bualu buenu didi dijalama; bualu tudi bamanye ne: bu munudi babanyanganyi netu ba makenga, nunku nudi babanyanganyi netu ba busambi kabidi.’ (2 Kolinto 1:7) Ku nkomenu wa mukanda wende, Paulo wakabela ne: ‘Nusambibue . . . ne Nzambi wa dinanga ne ditalala neikale nenu.’​—2 Kolinto 13:11.

12. Ntshinyi tshidi bena nkristo bonso bakengela?

¹² Ndilongesha kayipu dia mushinga ditudi mua kulongelaku! Bena mu tshisumbu tshia bena nkristo bonso badi ne bua ‘kuabanyangana busambi’ budi Nzambi upetesha ku diambuluisha dia Dîyi diende, spiritu munsantu wende, ne bulongolodi buende bua pa buloba. Nansha badi bipatshibue badi mua kuikala mu dikengela dia busambi pikalabu banyingalale ne balongolole njila wabu mubi. Nunku, “mupika wa lulamatu ne wa budimu” mmuenze ndongoluelu wa luse bua kubambuluisha. Musangu umue ku tshidimu bakulu babidi badi mua kukumbula bamue bantu bipatshibue. Buobu aba badi mua kuikala kabatshiyi baleja mmuenenu wa buntomboji anyi kabayi baditue mu mpekatu munene ne badi mua kuikala dijinga ne diambuluisha bua kuela bidia bidi bikengedibua bua kupingajibua mu tshisumbu.​—Matayo 24:45, NW; Yehezekele 34:16.

Makenga a Paulo mu Azi

13, 14. (a) Mmunyi muakumvuija Paulo tshikondo kampanda tshia dikenga dikole diakapetaye mu Azi? (b) Mbualu kayi buvua Paulo mua kuikala nabu mu lungenyi?

¹³ Mushindu ùvuà dikenga diakapeta tshisumbu tshia ku Kolinto kauvua mua kufuanyikijibua ne makenga àvuà Paulo ne bua kutantamena. Nunku, uvua mua kubavuluija ne: ‘Bana betu, katuena basue nuenu nupange kumanya bua makenga akatukuata mu Azi, bu muakatamba bujitu kutunemena, bupita bukole buetu, too ne patuakamanya ne: netufue; kadi tuetu tuvua ne dipiila dia lufu pambidi petu bua tuetu katuditekemenyi, kadi bua tuetu tutekemene Nzambi udi ubiisha bafue; wakatusungila ku lufu lunene nunku, neatusungileku kabidi; utudi tueyemena mu ditekemena dietu ne: yeye neatusungile kabidi.’​—2 Kolinto 1:8-10.

¹⁴ Bamue bashikuluji ba Bible badi bela meji ne: Paulo uvua utela ndululu ya ku Efeso, ìvuà mua kujimija muoyo wa Paulo pamue ne wa bena luendu nende babidi ba ku Makedonia, Gayo ne Alistâko. Bena nkristo babidi aba bavua babueja ku bukole mu nzubu wa manaya uvua mûle ne musumbasumba wa bantu “[bakela] mbila meba bu abidi majima ne: ‘Artemise [nzambi-mukaji] wa bena Efeze ke udi munene!’” Ndekelu wa bionso, munene kampanda wa mu tshimenga wakafika ku dipuwisha musumba wa bantu au. Njiwu eyi ya lufu bua Gayo ne Alistâko ivua ne bua kuikala mipeteshe Paulo tunyinganyinga tupite bukole. Bushuwa, uvua musue kubuela munda mua nzubu au ne kuelangana meji ne musumbasumba au wa banekeshi, kadi bakamukanda bua kateki muoyo wende mu njiwu mushindu’au.​—Malu Menza 19:26-41, MMM.

15. Nnsombelu kayi mukole menemene udi mua kuikala mumvuija mu 1 Kolinto 15:32?

¹⁵ Nansha nanku, Paulo uvua mua kuikala umvuija nsombelu mukuabu mukole menemene kupita bualu butuatedi ebu. Mu mukanda wende wa kumpala mufundila bena Kolinto, Paulo wakakonka ne: “Bingikala muluangane ne nyama ku Efeso bu mudi tshilele tshia bantu, bualu ebu budi bunkuatshisha munyi?” (1 Kolinto 15:32) Ebi bidi mua kumvuija ne: Paulo uvua mua kuikala mu njiwu ya lufu ki ng’anu bua bantu bavua bu nyama, kadi bua nyama ya luonji miena dîna ivua mu tshipalu tshia manaya tshia ku Efeso. Babundi ba bibawu bavua imue misangu banyokibua pa kubenzeja ku bukole bua kuluangana ne nyama ya luonji eku misumba ya bantu bàvuà basue kumona mashi itshikila bikale babandila. Bikala Paulo musue kumvuija ne: uvua mutuilangane mpala ne nyama ya luonji miena dîna, uvua ne bua kuikala ku ndekelu mene musungidibue mu tshishima ku lufu lua tshikisu, amu bu muakapandishibua Danyele mukana mua ntambue miena dîna.​—Danyele 6:22.

Bilejilu bia mu matuku etu aa

16. (a) Bua tshinyi bavule ba ku Bantemu ba Yehowa badi mua kumona makenga muomumue ne akapeta Paulo? (b) Ntshinyi tshitudi ne bua kujadika pa bidi bitangila aba bakafua bua ditabuja diabu? (c) Mbuenzeji kayi buimpe budi bulue padi bena nkristo bepuke ku lufu mu mushindu mukole?

¹⁶ Bena nkristo bavule ba lelu badi mua kumona makenga muomumue ne akapeta Paulo. (2 Kolinto 11:23-27) Lelu’eu kabidi, bena nkristo ‘mbakengeshibue bikole menemene, kupita ne pa makanda abu,’ ne bavule mbatuilangane ne nsombelu ‘muvuabu badiumvue se: kabavua mua kuikala kabidi ne muoyo.’ (2 Kolinto 1:8, NW) Bamue mbafuile ku bianza bia bashipianganyi ne bakengeshanganyi ba tshikisu. Tudi mua kujadika se: bukole busambi bua Nzambi buvua bubambuluishe bua kutantamena, ne se: bakafua ne mitshima ne bieledi bia lungenyi bijalamija tendee pa dikumbana dia ditekemena diabu, dia muoyo mu diulu anyi pa buloba. (1 Kolinto 10:13; Filipoi 4:13; Buakabuluibua 2:10) Mu nsombelu mikuabu, Yehowa wakalongolola malu, ne bana betu bakasungidibua ku lufu. Kakuyi mpata, aba bàdì bapete disungidibua dia nunku mbadime dieyemena dibandile ‘kudi Nzambi udi ubiisha bafue.’ (2 Kolinto 1:9) Pashishe, bakafika ku diakula ne dishindika dipite bunene mene mu diabanyangana mukenji wa busambi wa Nzambi ne bakuabu.​—Matayo 24:14.

17-19. Mmalu kayi mamona adi aleja ne: bana betu mu Rwanda badi babanyanganyi ba busambi bua Nzambi?

¹⁷ Bidimu bishal’ebi bana betu basuibue ba mu Rwanda bakapetangana ne malu a muomumue ne a Paulo ne ba-nyanende. Bavule bakajimija mioyo yabu, kadi madikolela a Satana akapangila bua kubutula ditabuja diabu. Bishilangane, bana betu mu ditunga edi mbamone busambi bua Nzambi mu mishindu mivule ya muntu pa nkayende. Munkatshi mua dibutula dia bisa dia ba-Tutsi ne ba-Hutu badi basombele mu Rwanda, kuvua ba-Hutu bavua bateke mioyo yabu mu njiwu bua kukuba ba-Tutsi ne ba-Tutsi bakakuba ba-Hutu. Bamue bakashipibua kudi baluanganyi banekeshi bua dikuba dia bena kuitabuja nabu. Tshilejilu, Ntemu Hutu kampanda mubikidibue ne: Gahizi wakashipibua bua muvuaye musokoke muanetu wa bakaji Tutsi mubikidibue ne: Chantal. Jean, bayende wa Chantal, Tutsi, bavua bamusokoke mu muaba mukuabu kudi muanetu wa bakaji Hutu mubikidibue ne: Charlotte. Munkatshi mua matuku 40 Jean ne muanetu wa balume mukuabu Tutsi bakashala basokoka mu mumbunda munene wa mu nzubu, bamupatuka amu bua mêba makese butuku. Tshikondo tshionso etshi, Charlotte uvua ubapetesha biakudia ne bukubi, nansha muvuaye musombele pabuîpi ne kamponya ka basalayi ba-Hutu. Pa dibeji edi, udi mua kumona foto wa Jean ne Chantal bapetangane tshiakabidi, bàdì ne dianyisha bua muvua batendeledi nabu ba-Hutu ‘bafile nshingu yabu’ bua bualu buabu, anu bu muakenza Pisikila ne Akula bua mupostolo Paulo.​—Lomo 16:3, 4.

¹⁸ Ntemu mukuabu Hutu, Rwakabubu, bakamutumbisha mu tshikandakanda tshia Intaremara bua muvuaye mukube bena kuitabuja nende ba-Tutsi.a Tshiakamba ne: “Kudi kabidi Rwakabubu, umue wa ku Bantemu ba Yehowa, wakatungunuka ne kusokoka bantu eku ne kuaka munkatshi mua bana babu (ke mudi bena kuitabuja nende babikilangana). Uvua ne tshibidilu tshia kupitshisha dituku dijima ubatuadila biakudia ne mâyi a kunua nansha mudiye muena disama dia mfuènke. Kadi Nzambi wakamuvuija mukole mu mushindu wa dikema.”

¹⁹ Kabidi, tangila bena dibaka babidi ba-Hutu, basankididi ba bulelela, umue diende Nicodeme, ne mukuabu Athanasie. Kumpala kua dibudika dia dibutula dia bisa, bena dibaka aba bavua balonga Bible ne Ntemu umue Tutsi mubikidibue ne: Alphonse. Mu njiwu ya lufu, bakasokoka Alphonse mu nzubu muabu. Pashishe bakalua kumona se: nzubu kavua muaba wa bukubi bualu bena mutumba nabu ba-Hutu bavua bamanye mulunda wabu Tutsi. Pa nanku, Nicodeme ne Athanasie bakasokoka Alphonse mu tshina mu lubanza luabu. Edi divua disakibua dimpe bualu bena mutumba bakatuadija kulua kukeba Alphonse pabuipi ne dituku dionso. Pakashalaye mulale mu tshina atshi matuku 28, Alphonse wakeleela meji pa miyuki ya mu Bible bu mudi eu wa Rahab, wakasokoka bena Izalele babidi pa musonga wa nzubu wende mu Yeriko. (Yoshua 6:17) Lelu’eu Alphonse udi utungunuka mu mudimu wende mu Rwanda bu muyishi wa lumu luimpe, uleja dianyisha bua muvua balongi bende ba Bible ba-Hutu bateke mioyo yabu mu njiwu bua bualu buende. Kadi bidi munyi bua Nicodeme ne Athanasie? Bakadi Bantemu ba Yehowa batambule ne badi balombola malonga a Bible mapite pa 20 ne bantu basankididi ba bulelela.

20. Mmu mushindu kayi mudi Yehowa musambe bana betu mu Rwanda, kadi ndikengela kayi ditungunuke didi nadi bavule ba kudibu?

²⁰ Tshikondo tshiakatuadija dibutula dia bisa mu Rwanda, kuvua bamanyishi ba lumu luimpe 2 500 mu ditunga dijima. Nansha muakajimija nkama ya bantu mioyo yabu anyi kuenzejibua ku bukole bua kunyema mu ditunga, bungi bua Bantemu mbubande kupita bantu 3 000. Atshi ntshijadiki tshia se: bushuwa Nzambi wakasamba bana betu. Netuambe munyi bua bana ba nshiye ne bakamba bavule munkatshi mua Bantemu ba Yehowa? Bulelela, buobu aba batshidi bapeta makenga ne badi bakengela busambi bua misangu yonso. (Yakobo 1:27) Binsonji biabu nebikupudibue bionso nkong amu padi dibiishibua dienjibua mu bulongolodi bupiabupia bua Nzambi. Nansha nanku, ku diambuluisha dia midimu mienza kudi bana babu, ne bualu mbatendeledi ba “Nzambi wa busambi buonso,” mbakokeshe mua kuakama ntatu ya mu nsombelu.

21. (a) Mmuaba kayi mukuabu uvua bana betu bikale mu dikengela dikole dia busambi bua Nzambi, ne mmushindu kayi umue utudi tuetu bonso mua kuambuluisha? (Tangila mu kazubu “Busambi munkatshi mua bidimu binayi bia mvita.”) (b) Ntshikondo kayi tshiakumbajibua tshishiki dikengela dietu dia busambi?

²¹ Mu miaba mikuabu ya bungi, bu mudi mu Érythrée, Singapour, ne mu Yougoslavie wa kale, bana betu mbatungunuke ne kusadila Yehowa ne lulamatu nansha mu dikenga. Tuambuluishayi bana betu aba pa kuenza misangu yonso milombo bua se: bapete busambi. (2 Kolinto 1:11) Ne tutantamenayi ne lulamatu luonso too ne tshikondo tshikala Nzambi mua ‘kukupula tshinsonji tshionso ku mêsu etu’ mu ngumvuilu wa tshishiki ku butuangaji bua Yezu Kristo. Tshikondo atshi, netumone busambi buapetesha Yehowa mu mushindu mûle zabazaba mu bulongolodi buende bupiabupia bua buakane.​—Buakabuluibua 7:17; 21:4; 2 Petelo 3:13.

[Mêyi adi kuinshi]

Udi mumanye anyi?

◻ Bua tshinyi Yehowa mmubikidibue ne: “Nzambi wa busambi buonso”?

◻ Mmunyi mutudi ne bua kuangata makenga?

◻ Nnganyi utudi mua kuabanyangana nende busambi?

◻ Mmunyi muakumbajibua tshishiki dikengela dietu dia busambi?

[Tshimfuanyi mu dibeji 17]

Jean ne Chantal, nansha muvuabu Bantemu ba-Tutsi, bakasokokibua mu miaba mishilangane kudi Bantemu ba-Hutu mu tshikondo tshia dibutula dia bisa mu Rwanda

[Tshimfuanyi mu dibeji 17]

Bantemu ba Yehowa mbatungunuke ne kuabanyangana mukenji wa busambi wa Nzambi ne bantu nabu mu Rwanda