Tangila kudi Yehowa bua kupeta busambi

“Ne Nzambi udi upetesha ditantamena ne busambi anufikishe ku dikala munkatshi muenu nuenu bine ne mmuenenu wa lungenyi wa muomumue ne uvua nende Kristo Yezu.”​—LOMO 15:5, NW.

1. Bua tshinyi dituku dionso didi dituala dikengedibua dinene dia busambi?

DITUKU dionso dìdì dipita didi dituala dikengedibua dinene dia busambi. Bu muakamba mufundi umue wa Bible kukadi bidimu bipite pa 1 900, ‘bifukibua bionso bidi bitua mikemu popamue ne bidi bidinyenga [“mu ditata,” NW] popamue too ne katataka.’ (Lomo 8:22) Mu tshikondo tshietu etshi ‘ditua mikemu’ ne ‘ditata’ mbivule kupita mu bikondo bionso. Biangatshile ku Mvita ya kumpala ya buloba bujima, bukua-bantu mbupetangane ne makenga malondangane bu mudi mvita, dibunda bibawu, ne bipupu bia ku tshifukilu bìdì misangu mivule bisuikakaja ku dinyangakaja dia buloba kudi bantu.​—Buakabuluibua 11:18.

2. (a) Nnganyi utudi ne bua kutamba kudiula bua makenga a bukua-bantu lelu’eu? (b) Mbualu kayi budi butupesha tshishimikidi bua busambi?

² Bua tshinyi kudi lutatu luvule nunku mu tshikondo tshietu etshi? Wakula bua dipatshibua dia Satana mu muulu diakalonda diledibua dia Bukalenge mu 1914, Bible udi wandamuna ne: “Diakabi kudi buloba ne mbuu, bualu Diabolo wapueki kunudi muikale ne tshiji tshikole, bu mudiye mumanye ne: udi ne tshikondo tshîpi.” (Buakabuluibua 12:12, NW) Tshijadiki tshia patoke tshia dikumbana dia mulayi au tshidi tshiumvuija ne: tukadi pa kufika ku ndekelu wa bukokeshi bubi bua Satana. Mbusambipu kayi pa kumanya ne: muoyo pa buloba neupingane mu tshitupa tshîpi emu ku nsombelu wa ditalala uvuaku kumpala kua Satana kufikishaye baledi betu ba kumpala ku buntomboji!

3. Ntshikondo kayi tshivua bantu kabayi bakengela busambi?

³ Ku ntuadijilu, Mufuki wa muntu wakafila budimi bulengele bu tshisombelu tshia bena dibaka ba kumpala. Tshivua tshisanganyibua mu muaba mubikila ne: Edene, mbuena kuamba ne: “Milowo” peshi “Disanka.” (Note kuinshi kua Genese 2:8, NW) Kabidi, Adama ne Eva bavua ne makanda a mubidi mapuangane, ne ditekemena dia kubenga kufua. Ela meji ku malu a bungi avuabu mua kuikala bakoleshile mbabi yabu​—didima, disonga dia bintu, diibaka, mijiki. Ela kabidi meji ku midimu yonso ya bufuki ivuabu mua kulonga eku benda bakumbaja bujitu bubapesha bua kukokesha buloba ne kubuvuija mparadizu. (Genese 1:28) Bushuwa, nsombelu ya Adama ne Eva ivua mua kuikala miûle, ki nne ditua mikemu ne ditata, kadi ne disanka ne milowo. Mbimueneke patoke se: kabavua mua kuikala bakengela busambi.

4, 5. (a) Bua tshinyi Adama ne Eva bakapangila diteta dia butumike? (b) Mmunyi muakalua bukua-bantu mu dikengela dia busambi?

⁴ Kadi, tshivua Adama ne Eva bakengela tshivua kudima dinanga diondoke ne dianyisha bua Tatuabu wa mu diulu muena bulenga. Dinanga dia nunku divua ne bua kuikala dibasaka ku ditumikila Nzambi mu nsombelu yonso. (Fuanyikija ne Yone 14:31.) Bia dibungama, bubidi buabu, baledi betu ba kumpala bakapangila kutumikila Yehowa, Mutambe bunene wabu muena bukenji. Bishilangane, bakanyisha buobu bine bua kulua ku bukokeshi bubi bua Satana Diabolo, muanjelu mupuekesha milongo. Satana ke wakateta Eva bua kuenza mpekatu pa kudia tshimuma tshikandika. Pashishe Adama wakenza mpekatu pakadiaye pende tshimuma tshia mutshi uvua Nzambi mudimuije patoke ne: “Mu dituku diudi [utshidia] wewe neufue bulelela.”​—Genese 2:17.

⁵ Mushindu’eu, bena dibaka babidi bena mpekatu bakatuadija kufua. Mu dikosa tshibawu tshia lufu, Nzambi wakambila kabidi Adama ne: ‘Buloba buakedibua mulawu bualu buebe; wewe neudie biakudia biabu ne kanyinganyinga matuku ebe onso; buloba nebukumeneshile meba ne tusokola; neudie midioko ya mu budimi.’ (Genese 3:17, 18) Nunku Adama ne Eva bakajimija ditekemena dia kuvuija buloba buvua kabuyi budima mparadizu. Bu muvuabu bipatshibue mu Edene, bavua ne bua kuenza mudimu mukole bua kupeta tshiakudia ku buloba buvua buela mulawu. Ndelanganyi yabu, mipiane nsombelu eu wa mpekatu ne wa lufu, yakalua mu dikengela dinene dia busambi.​—Lomo 5:12.

Dilaya dia busambi dikumbaja

6. (a) Ndilaya kayi dia busambi diakenza Nzambi kunyima kua bukua-bantu bumane kupona mu mpekatu? (b) Mmulayi kayi uvua utangila busambi wakamba Lemeke?

⁶ Mu dikosela musaki wa muntu ku buntomboji dinyoka, Yehowa wakadileja mudiye ‘Nzambi udi upetesha busambi.’ (Lomo 15:5, NW) Wakenza nunku pa kulaya bua kutuma “dimiinu” divua ndekelu wa bionso ne bua kupikula ndelanganyi ya Adama ku bipeta bibiabibi bia buntomboji bua Adama. (Genese 3:15, NW) Kunyima, Nzambi wakafila kabidi dimanyisha pa bupikudi ebu. Tshilejilu, ku spiritu wende, wakenzeja Lemeke, kankanunuina ka kule ka Adama mu mulongo wa muanende Seth, bua kudianjila kumanyisha bivua muana wa Lemeke ne bua kuenza: “Yeye neatusambe mu mudimu wa bianza bietu, bualu bua buloba buakedibua mulau kudi Yehowa.” (Genese 5:29) Mu diumvuangana ne dilaya edi, muana wa balume wakinyikibua dîna se: Nowa, didi diumvuija ne: “Diikisha” peshi “Busambi.”

7, 8. (a) Nnsombelu kayi wakafikisha Yehowa ku dinyingalala pa bidi bitangila difuka diende dia bantu, ne ntshinyi tshiakapangadijaye bua kuenza bu diandamuna? (b) Mmunyi muakakumbaja Nowa diumvuija dia dîna diende?

⁷ Mu tshine tshikondo atshi, Satana uvua wenda uvudija bamulondi munkatshi mua bamue banjelu ba mu diulu. Buobu aba bakavuala mibidi bu ya bantu ne kuangatabu bakaji balengele mu ndelanganyi ya Adama. Masangila akena a ku tshifukilu a nunku akanyanga bikole tshinsanga tshia bantu ne akapatula mushindu mukuabu wa bantu bakena bena Nzambi, ba-Nephilim, “bashimbudi,” bàkuuja buloba ne tshinyangu. (Genese 6:1, 2, 4, 11; Yuda 6) Nenku ‘Yehowa wakamona ne: mibi ya bantu idi idiundadiunda munkatshi mua ba pa buloba . . . Mutshima wa Yehowa wakanyingalala bualu bua yeye wakafuka bantu pa buloba; kanyinganyinga kavua mu mutshima wende.’​—Genese 6:5, 6.

⁸ Yehowa e kupangadija bua kubutula bulongolodi abu bubi ku mvula wa kabutu wa buloba bujima, kadi diambedi wakatumina Nowa dîyi bua kuenza buâtu bua kukuba muoyo. Ke mushindu wakapandishibua bukua-bantu ne mishindu mishilangane ya nyama. Mmunyipu muvua Nowa ne dîku diende ne bua kuikala bumvue disulakana kunyima kua Mvula wa kabutu pakapatukabu mu buâtu ne kutua makasa pa buloba bukezula! Mbusambipu kayi pa kusangana se: mulawu muela buloba ukavua mumbushibue, pa kuvuija midimu ya madimi mitambe kupepela! Eyowa, mulayi wa Lemeke wakamueneka mulelela, ne Nowa wakakumbaja diumvuija dia dîna diende. (Genese 8:21) Bu muvuaye musadidi wa lulamatu wa Nzambi, Nowa uvua tshiamu tshia mudimu tshitumika natshi bua kupetesha bukua-bantu ndambu wa “busambi.” Nansha nanku, buenzeji bubi bua Satana ne banjelu bende ba-demon kabuakajika ne Mvula wa kabutu au to, ne bukua-bantu mbutungunuke ne kutua mikemu muinshi mua bujitu bua mpekatu, masama, ne lufu.

Muntu munene kupita Nowa

9. Mmunyi mudi Yezu Kristo muleje mudiye muambuluishi ne musambi bua bantu banyingaladi?

⁹ Ndekelu wa bionso, ku ndekelu kua bidimu bitue ku 4 000 bia muyuki wa bantu, Dimiinu dilaya diakafika. Musakibue kudi dinanga dikole bua bukua-bantu, Yehowa Nzambi wakatuma Muanende mulela umuepele pa buloba bua kufuaye bu tshia-bupikudi bua bukua-bantu buena mpekatu. (Yone 3:16) Yezu Kristo udi utuala disulakana dinene kudi benji ba mpekatu banyingaladi bàdì benza midimu ya ditabuja mu lufu luende lua mulambu. Bonso bàdì batshipa mioyo yabu kudi Yehowa ne balua bayidi batambule ba Muanende badi bapeta dikankamijibua ne busambi bìdì binenga. (Matayo 11:28-30; 16:24) Nansha mudibu bapange bupuangane, badi bapeta disanka diondoke mu disadila Nzambi ne kuondo ka muoyo kakezuke. Mbusambipu kayi buabu pa kumanya ne: biatungunukabu ne kuenza midimu ya ditabuja kudi Yezu, nebafutshibue muoyo wa kashidi! (Yone 3:36; Ebelu 5:9) Pikalabu benze mpekatu munene bua butekete, apu badi ne muambuluishi, peshi musambi: Mfumu Yezu Kristo mubiishibue ku bafue. (1 Yone 2:1, 2) Pa kutonda mpekatu wa nunku ne pa kuela bidia bilondeshile Mifundu bua kuepuka kuikala badifidi ku mpekatu, badi bapeta disulakana, bamanye ne: ‘Nzambi udi wa kueyemenyibua ne udi ne buakane bua kubuikidila mibi yabu.’​—1 Yone 1:9; 3:6; Nsumuinu 28:13.

10. Ntshinyi tshitudi tulongela ku bishima bia Yezu bienza patshivuaye pa buloba?

¹⁰ Patshivuaye pa buloba, Yezu wakatuala kabidi dikankamija pa kusulula bavua bakuatshibue kudi ba-demon, pa kuondapa masama a mishindu yonso, ne pa kujula tshiakabidi banangibue bafue ku muoyo. Bulelela, bishima bu nunku bivua amu bua disanka dia katupa kîpi, bualu aba bakabeneshibua mushindu’eu bakakulakaja ne kufua pashishe. Kadi, Yezu wakaleja mushindu’au mabenesha a kashidi atshilualua itshikijilaye bukua-bantu buonso. Bu mukadiye mpindieu Mukalenge wa bukole, ukadi pa kuenza mu katupa kîpi emu bipite ne kule diipata anu ba-demon. Neabele mu dijimba pamue ne mfumuabu, Satana, kabayi kabidi mua kuenza bualu nansha bumue. Pashishe Bukokeshi bua Bidimu Tshinunu bua butumbi bua Kristo nebutuadije.​—Luka 8:30, 31; Buakabuluibua 20:1, 2, 6.

11. Bua tshinyi Yezu wakadibikila yeye muine ne: “Mfumu wa nsabatu”?

¹¹ Yezu wakamba ne: uvua “Mfumu wa nsabatu,” ne mavule a ku muondapa ende akenjibua mu dituku dia Nsabatu. (Matayo 12:8-13, NW; Luka 13:14-17; Yone 5:15, 16; 9:14) Bua tshinyi bivua nanku? Eyo, Nsabatu uvua umue wa ku Mikenji ya Nzambi kudi Izalele ne wakambuluisha nunku bu ‘mundidimbi wa bintu bimpe bilualua.’ (Ebelu 10:1) Matuku asambombo a mudimu a ku lumingu adi atuvuluija bidimu 6 000 bipite bia bupika bua muntu ku bukokeshi bufinakajanganyi bua Satana. Dituku dia Nsabatu ku ndekelu wa lumingu didi dituvuluija diikisha dia busambi dikala bukua-bantu mua kupeta mu bule bua Bukokeshi bua Bidimu Tshinunu bua Nowa Munene, Yezu Kristo.​—Fuanyikija ne 2 Petelo 3:8.

12. Mmalu kayi a busambi atudi mua kutekemena?

¹² Ndisulakana kayipu diumvua bakokedi ba pa buloba ba bukokeshi bua Kristo padibu, ndekelu wa bionso, badimona bapikula menemene ku buenzeji bubi bua Satana! Busambi bukuabu nebulue pikalabu ne bua kumona diondapibua ku bisama biabu bia ku mubidi, bia mu mpampakenu, ne bia mu lungenyi. (Yeshaya 65:17) Pashishe, anjibi kutshinka disanka diabu dipite bunene padibu batuadija kuakidila banangibue babu bafume ku bafue! Mu mishindu eyi Nzambi ‘neakupule tshinsonji tshionso ku mêsu kuabu.’ (Buakabuluibua 21:4) Pikala bipeta bia mulambu wa tshia-bupikudi wa Yezu bienda bipeteka ku kakese ku kakese, bakokedi bena butumike ba Bukalenge bua Nzambi nebakole too ne ku bupuangane, balua kupikudibua nunku menemene ku bipeta bibi bia mpekatu wa Adama. (Buakabuluibua 22:1-5) Pashishe Satana neasuludibue bua “tshikondo tshîpi.” (Buakabuluibua 20:3, 7, NW) Bantu bonso badi basanyika bumfumu butambe bunene bua buakane bua Yehowa nebafutshibue muoyo wa kashidi. Tshinkabi disanka dikena kuamba ne disulakana dia kuikala ‘bapikudibue [tshishiki] ku bupika bua dinyanguka’! Nenku bukua-bantu buena butumike nebupete “budikadidi bua butumbi bua bana ba Nzambi.”​—Lomo 8:21, NW.

13. Bua tshinyi bena nkristo balelela bonso badi bakengela busambi budi Nzambi upetesha?

¹³ Kadi mpindieu, tutshidi muinshi mua ditua mikemu ne ditata bìdì kudi bonso bàdì ne muoyo mu ndongoluelu eu mubi wa Satana. Divulangana dia masama a ku mubidi ne disaluka dia lungenyi didi dikuata bantu ba mishindu yonso, pamue ne bena nkristo ba lulamatu. (Filipoi 2:25-27; 1 Tesalonike 5:14) Kusakidil’apu, bu mutudi bena nkristo tudi tuakama misangu mivule disekibua kakuyi bualu ne dikengeshibua bìdì Satana utunguijila bualu tudi ‘tutumikila Nzambi, bu mfumu, pamutu pa kutumikila bantu.’ (Bienzedi 5:29, NW) Nunku, bituikala ne bua kutantamena mu dienza disua dia Nzambi too ne ku ndekelu wa bulongolodi bua Satana, tudi tukengela busambi, diambuluisha, ne bukole bìdì Nzambi upetesha.

Kua kupetela busambi

14. (a) Ndilaya kayi diakenza Yezu butuku bua kumpala kua lufu luende? (b) Ntshinyi tshidi tshikengedibua bituikala basue bua kubabidila tshishiki busambi bua spiritu munsantu wa Nzambi?

¹⁴ Butuku bua kumpala kua lufu luende, Yezu wakumvuija patoke bapostolo bende ba lulamatu se: mu katupa kîpi uvua ne bua kubashiya ne kupingana kudi Tatuende. Bualu ebu buakabapampakaja ne kubabungamija. (Yone 13:33, 36; 14:27-31) Mumanye dikengela diabu dia busambi dîba dionso, Yezu wakalaya ne: “Nendombe kudi Tatu, ne yeye neanupeshe musambi mukuabu bua kuikalaye nenu kashidi.” (Note kuinshi kua Yone 14:16, NW) Yezu uvua utela apa spiritu munsantu wa Nzambi, wakitshikijibua pa bayidi bende matuku 50 kunyima kua dibiishibua diende.a Ku biakenzaye, spiritu wa Nzambi wakabasamba munkatshi mua ntatu yabu ne kubakolesha bua kutungunuka mu dienza disua dia Nzambi. (Bienzedi 4:31) Kadi, diambuluisha dia nunku kadiena ne bua kuangatshibua bu tshintu kampanda tshidi tshidivuila nkayatshi. Bua kudibabidila tshishiki, muena nkristo yonso udi ne bua kutungunuka ne kusambila bua kupeta diambuluisha disambi didi Nzambi upetesha ku butuangaji bua spiritu wende munsantu.​—Luka 11:13.

15. Ng’imue mishindu kayi idi Yehowa utupetesha busambi?

¹⁵ Mushindu mukuabu udi Nzambi upetesha busambi nku diambuluisha dia Dîyi diende, Bible. Paulo wakafunda ne: “Malu onso akafundibua kale, akafundibua bua dishidimunyibua dietu, bua se: ku ditantamena dietu ne ku busambi budi bufuma mu Mifundu tupeteleku ditekemena.” (Lomo 15:4, NW) Ebi bidi bileja dikengela buetu tuetu dia kulonga pa tshibidilu malu mafunda mu Bible pamue ne mikanda miumvuiji ya Bible ne kueleelapu meji. Tudi tukengela kabidi kubuela pa tshibidilu mu bisangilu bia bena nkristo, muaba udi ngenyi ya busambi ya mu Dîyi dia Nzambi ifidibua. Tshimue tshia ku bipatshila bia madisangisha bu nunku ntshia kukankamijangana.​—Ebelu 10:25.

16. Ndongoluelu ya Nzambi ya busambi idi ne bua kutusaka ku dienza tshinyi?

¹⁶ Mukanda wa Paulo mutumina bena Lomo udi utungunuka ne kuleja bipeta bimpe bitudi tupetela ku ditumika ne ndongoluelu ya busambi ya Nzambi. “Ne Nzambi udi upetesha ditantamena ne busambi,” ke muakafunda Paulo, “anufikishe ku dikala munkatshi muenu nuenu bine ne mmuenenu wa lungenyi wa muomumue ne uvua nende Kristo Yezu, bua se: ku dîyi anu dimue nuikale mua kutumbisha ne mukana anu mumue Nzambi ne Tatu wa Mfumu wetu Yezu Kristo.” (Lomo 15:5, 6, NW) Ee, pa kubabidila tshishiki ndongoluelu ya busambi ya Nzambi, netulue batambe kufuanangana ne Mulombodi wetu wa dikima, Yezu Kristo. Ebi nebitusake bua kutungunuka ne kutumika ne mukana muetu bua kutumbisha Nzambi mu mudimu wetu wa bumanyishi, mu bisangilu bietu, mu diyukidilangana pa nkayetu ne bena kuitabuja netu, ne mu masambila etu.

Mu bikondo bia diteta dikole

17. Mmunyi muvua Yehowa musambe Muanende, ne kuvua tshipeta kayi?

¹⁷ Yezu “wakabanga kunyingalala mutshima” ne ‘mutshima wende wakatamba kunema’ butuku bua kumpala kua dipùnga diende ne lufu. (Matayo 26:37, 38) Nunku wakashiyangana ne bayidi bende tshitupa ne wakasambila Tatuende bua amuambuluishe. ‘Bakamumvuila bua ditshina diende dia Nzambi.’ (Ebelu 5:7) Bible udi ulonda ne: “Muanjelo wa mu diulu wakamueneka kudiye [Yezu], wakamukolesha.” (Luka 22:43) Mushindu wa bukitu ne wa bu-muntu wakatungunuka Yezu ne kutuilangana mpala ne baluishi bende udi tshijadiki tshia se: mushindu uvua Nzambi musambe Muanende uvua mutambe kukumbanyina.​—Yone 18:3-8, 33-38.

18. (a) Ntshikondo kayi tshivua tshitambe kuikala tshia ntatu mu nsombelu wa mupostolo Paulo? (b) Mmunyi mutudi mua kuikala bena busambi kudi bakulu badi bakuata mudimu mukole, ne bena luse?

¹⁸ Mupostolo Paulo pende wakapetangana ne bikondo bia diteta dikole. Tshilejilu, mudimu wende ku Efeso uvua mûle ne ‘binsonji ne makenga akalua kudiye bualu bua bifufu bia bena Yuda.’ (Bienzedi 20:17-20) Ndekelu wa bionso, Paulo wakumbuka ku Efeso pakajula batendeledi ba nzambi-mukaji Artemis diyoyo dikole mu tshimenga atshi bualu bua mudimu wende wa diyisha. (Bienzedi 19:23-29; 20:1) Pakaya Paulo mutangile ku Nord ku tshimenga tshia Troase, muanda mukuabu wakamunemenena bikole mu lungenyi. Tshikondo kampanda kumpala kua diyoyo dikole mu Efeso, ukavua mupete ngumu mipampakaji. Tshisumbu tshitshivua tshifuma ku diashibua tshia ku Kolinto tshivua tshinyanga kudi ditapulukangana, ne tshivua tshilekelela buendenda. Nunku kumbukila ku Efeso, Paulo ukavua mufunde mukanda ne dikanyina dikole ne ditekemena dia kuakaja nsombelu au. Ebu kabuvua bualu bupepele bua yeye kuenza. “Mvua munufundile mukanda awu ne dibungama dinene, ne kanyinganyinga mu muoyo, ne binsonji bivule ku mesu,” ke muakasokololaye pashishe mu mukanda wende muibidi. (2 Bena Korente 2:4, MMM) Amu bu Paulo, ki mbipepele bua bakulu bena luse bua kufilabu mibelu miakaji ne dikanyina, bualu mu mushindu kampanda mbamanye bimpe matekete abu buobu bine. (Galatia 6:1) Nunku, tudi mua kuikala bena busambi kudi aba bàdì ku mutu munkatshi muetu, pa kudiakaja bua kulonda mibelu ya dinanga, miashila pa Bible.​—Ebelu 13:17.

19. Bua tshinyi Paulo wakumbuka ku Troase mutangile ku Makedonia, ne ndekelu wa bionso mmunyi muakapetaye disulakana?

¹⁹ Pavuaye ku Efeso, Paulo kavua anu mufundile bana betu ku Kolinto, kadi wakabatumina kabidi Tito bua kubambuluisha, pa kumupa bujitu bua kutuala mu dipingana diende diandamuna diabu ku mukanda au. Paulo uvua mutekemene bua kusambakena ne Tito ku Troase. Aku, Paulo wakabeneshibua pa kupeta mishindu mivule ya kuenza bayidi. Kadi ebi biakapangila bua kusulakaja disumpakana diende bualu Tito kavua muanji kufika. (2 Kolinto 2:12, 13) Nunku wakenza luendu ku Makedonia, ne ditekemena dia kupetangana ne Tito kuinaku. Disumpakana dia Paulo diakanema bua buluishi bukole ku mudimu wende. ‘Patuakalua mu Makedonia,’ ke mudiye umvuija, ‘mibidi yetu kayivua ne dikisha, kadi tuvua tutatshishibua ku nseke yonso: mvita ivua pambidi, ne ditshina divua munda muetu. Kadi Nzambi, udi usamba bantu bapuekela, wakatusamba mu kulua kua Tito.’ (2 Kolinto 7:5, 6) Ndisulakana kayipu pakafika Tito ndekelu wa bionso bua kuambila Paulo diandamuna dimpe dia bena Kolinto ku mukanda wende!

20. (a) Anu bu muvuabi bua Paulo, mmu mushindu kayi mukuabu wa mushinga udi Yehowa upetesha busambi? (b) Mbualu kayi butuakonkonona mu tshiena-bualu tshidi tshilonda?

²⁰ Malu mamona kudi Paulo adi a busambi kudi basadidi ba Nzambi lelu’eu, bavule ba kudibu badi pabu batuilangana mpala ne mateta adi abafikisha ku dikala “bapuekela,” peshi “bena tunyinganyinga tukole.” (Phillips) Eyowa, ‘Nzambi udi upetesha busambi’ mmumanye makengela etu a muntu ne muntu, ne udi mua kukuata netu mudimu bua tuetu kuikala basambianganyi, anu bu muakapetela Paulo busambi ku luapolo lua Tito pa ngikadilu wa dinyingalala wa bena Kolinto. (2 Kolinto 7:11-13) Mu tshiena-bualu tshietu tshidi tshilonda, netukonkonone diandamuna dia musangelu dia Paulo kudi bena Kolinto ne mushindu udidi mua kutuambuluisha bua kuikala babanyanganyi bakumbanyine ba busambi bua Nzambi lelu’eu.

[Mêyi adi kuinshi]

Udi mua kuandamuna anyi?

◻ Mmunyi muakafika bukua-bantu ku dikengela dia busambi?

◻ Mmunyi mudi Yezu mudileje mudiye munene kupita Nowa?

◻ Bua tshinyi Yezu wakadibikila yeye muine ne: “Mfumu wa nsabatu”?

◻ Mmunyi mudi Nzambi upetesha busambi lelu’eu?

[Karte/​Tshimfuanyi mu dibeji 10]

(Bua kumona malu bimpe, tangila mu mukanda)

Paulo wakapeta busambi bunene ku luapolo lua Tito pa bena Kolinto

MAKEDONIA

Filipoi

GRÈCE

Kolinto

AZI

Troase

Efeso