Nzambi utu ulomba dilama tshijila anyi?

MIKENJI ya Nzambi mifila ku butuangaji bua Mozese ivua ilomba dilama tshijila anu musangu umue​—mu Dituku dia Dibuikidila dia ku tshidimu. Mikenji ivua ituma dîyi ne: mu dituku adi, bena Izalele bavua ne bua ‘kukengesha anyima yabu,’ bidi biumvuija ne: bavua balama tshijila. (Lewitiki 16:29-31; 23:27; Musambu wa 35:13) Kadi, dilama tshijila edi kadivua patupu muanda wa budingidiji. Disekelela dia Dituku dia Dibuikidila divua disaka tshisamba tshia Izalele ku dijingulula diondoke dia ngikadilu wabu wa bena mpekatu ne dikengela dia bupikudi. Bavua kabidi balama tshijila dituku adi bua kuleja dibungama bua mpekatu yabu ne dinyingalala ku mêsu kua Nzambi.

Nansha muvua dilama tshijila edi dikale anu dimuepele divua dilombibue muinshi mua Mikenji ya Mozese, bena Izalele bavua balama bijila mu bikondo bikuabu. (Ekesode 34:28; 1 Samuele 7:6; 2 Kulondolola 20:3; Ezela 8:21; Esetê 4:3, 16) Munkatshi mua ebi muvua bijila bia ku budisuile bu mushindu wa kuleja dinyingalala. Yehowa wakabela bena Yuda bena mpekatu ne: ‘Nupingane kundi ne mitshima yenu yonso, jilayi biakudia, dilayi, asayi miadi.’ Eu kauvua muanda wa kuleja ku mêsu nansha, bualu Nzambi udi utungunuka ne kuamba ne: ‘Pandayi mitshima yenu, kanupandi bivualu bienu.’​—Yoele 2:12-15.

Ndekelu wa bionso, bavule bakalama tshijila bua kudingidija ku mêsu. Yehowa wakabenga dilama tshijila dia nunku dikena dia muoyo umue, ne pa nanku wakakonka bena Izalele bena lubombo ne: ‘Kujila aku kua biakudia nkujila kunakusungula, ndituku dia kunyingalaja mutshima wende anyi? Kudi bua muntu kuinama mutu wende bu disele, bua kuadija bilulu bikayabala ne butue muinshi muende anyi? Neubikile bualu ebu ne: kujila kua biakudia, ne dituku didi disankisha Yehowa anyi?’ (Yeshaya 58:5) Pamutu pa kuleja ku mêsu tshimuenekelu tshia dilama diabu dia tshijila, bantu aba batomboke bavua balombibue bua kuenza midimu mikumbanyine dinyingalala.

Bimue bijila bijadika kudi bena Yuda kabiakanyishibua kudi Nzambi katshia ku ntuadijilu. Tshilejilu, mu tshikondo kampanda bantu ba mu Yuda bavua ne bijila binayi bia ku tshidimu bua kuvuluka makenga makole masuikakaja ku dikuata dia Yeruzaleme ne dibutudibua diende mu siekele wa muanda-mutekete K.B.B. (2 Bakelenge 25:1-4, 8, 9, 22-26; Zekâya 8:19) Pakamana bena Yuda kulekeledibua ku bupika mu Babilone, Yehowa wakamba ku butuangaji bua muprofete Zekâya ne: ‘Panuakajila biakudia . . . ne mu bidimu ebi makumi muanda-mutekete, nuakajila biakudia bua bualu buanyi mene anyi?’ Nzambi kakanyisha bijila ebi nansha, bualu bena Yuda bavua balama tshijila ne badila bua malumbuluisha avua mafumine kudi Yehowa yeye muine. Bavua balama tshijila bua dikenga dikole diakabatulukila, ki mbua malu mabi abu akafikishaku nansha. Pakamanabu kupingajibua mu buloba buabu, tshivua tshikondo bua buobu kusanka pamutu pa kunyingalala bua malu a kale.​—Zekâya 7:5.

Dilama tshijila ndia bena nkristo anyi?

Nansha muvua Yezu Kristo katshia kayi mutumine bayidi bende dîyi bua kulama tshijila, yeye ne balondi bende bavua balama tshijila mu Dituku dia Dibuikidila bualu bavua muinshi mua Mikenji ya Mozese. Kabidi, bamue ba ku bayidi bende bavua balama tshijila ku budisuile buonso mu bimue bikondo, bualu Yezu kavua mubalombe bua kuepuka tshilele etshi mu ka-bujima katshi nansha. (Bienzedi 13:2, 3; 14:23) Kadi, kabavua nansha kakese ne bua ‘kuenda ne mpala muletele bua bantu bamone ne: badi mu tshijila.’ (Matewuse 6:16, MMM) Dileja ku mêsu dia ditshina dia Nzambi dia nunku didi mua kufikisha ku lutangilu lua dikatshila ne ku biambilu bia dianyisha bia kudi bantu bakuabu. Kadi, Nzambi kêna usanka bua tshimuenekelu tshia mushindu’eu nansha.​—Matayo 6:17, 18.

Yezu wakakula kabidi bua dilama tshijila dia balondi bende mu tshikondo tshia lufu luende. Kavua ujadika dilama tshijila dia mukiya nansha. Bishilangane, uvua uleja diandamuna ku dibungama dikole divuabu ne bua kupeta. Diakamue pavuaye ne bua kubiishibua, uvua ne bua kuikala nabu tshiakabidi, ne kakuvua ne bua kuikala kabidi kabingila kampanda bua buobu kulama tshijila nansha.​—Luka 5:34, 35.

Mikenji ya Mozese yakatua ku ndekelu ‘pakafidibua Kristo musangu umue bua kutualaye mibi ya bantu ba bungi.’ (Ebelu 9:24-28) Pamue ne ndekelu wa Mikenji, dîyi-dituma dia kulama tshijila mu Dituku dia Dibuikidila diakatua padi ku ndekelu. Nenku, dilama tshijila dimuepele dilombibue ditela mu Bible diakumbushibua.

Netuambe tshinyi bua Kareme?

Nenku, ntshinyi tshidi nshindamenu wa tshilele tshia Bukua-buena-nkristo tshia dilama tshijila mu tshikondo tshia Kareme? Ekleziya ya Katolike ne Mishonyi yonso mmimanye Kareme, nansha mudi mushindu wa dienza tshilele etshi mushilangane ku ekleziya ne ekleziya. Bamue badi badia anu musangu umue ku dituku munkatshi mua matuku onso 40 a kumpala kua Paska. Bakuabu badi bajila bionso mu Disatu dia Butu ne mu Ditanu Dinsantu. Bua bamue, Kareme kadi kalomba kudilama ku munyinyi, mishipa, mayi, ne bintu bienza ne mabele.

Badi bamba mudi Kareme kashindamene pa matuku 40 a dilama tshijila dia Yezu panyima pa batismo wende. Uvua pa nanku ujadika mukiya wa kulonda ku tshidimu tshionso anyi? Kabiena nanku to. Ebi mbilelela bualu Bible kêna uleja tshilele nansha tshimue bu etshi munkatshi mua bena nkristo ba kumpala. Bakenza Kareme bua musangu wa kumpala mu siekele muinayi kunyima kua Kristo. Anu bu mudi malongesha makuabu a bungi a Bukua-buena-nkristo, bakangata tshilele etshi mu bilele bia bampangano.

Pikala Kareme didikija dia dilama tshijila dia Yezu mu tshipela panyima pa batismo wende, bua tshinyi badi benza muanda eu mu mbingu idi mitangile ku Paska​—udibu bamba mudiye tshikondo tshia dibiishibua diende? Yezu kakalama tshijila mu matuku a kumpala kua lufu luende to. Miyuki ya mu Evanjeliyo idi ileja ne: yeye ne bayidi bende bakakumbula bantu ne bakadia biakudia mu Betania matuku makese patupu kumpala kua kufuaye. Ne wakadia bidia bia Kupita kua Yehowa butuku bua kumpala kua lufu luende.​—Matayo 26:6, 7; Luka 22:15; Yone 12:2.

Kudi tshintu tshitudi ne bua kulongela ku dilama tshijila dia Yezu panyima pa batismo wende. Uvua ku ntuadijilu wa mudimu wa mushinga mukole. Bivua bitangila dibingisha dia bumfumu butambe bunene bua Yehowa ne matuku atshilualua a bantu bonso. Tshivua tshikondo tshia dieleela meji dikole ne tshia ditangija mulongolongo wa masambila kudi Yehowa bua kupeta diambuluisha ne buludiki. Mu tshikondo etshi Yezu wakalama tshijila mu mushindu muakanyine. Ebi bidi bileja ne: dilama tshijila didi mua kuikala ne dikuatshisha padidi dienza ne tubingila tuimpe ne mu tshikondo tshikumbanyine.​—Fuanyikija ne Kolosai 2:20-23.

Padi dilama tshijila mua kuikala ne dikuatshisha

Tutangilayi bimue bikondo lelu’eu bìdì mutendeledi wa Nzambi mua kulama tshijila. Muntu udi muenze mpekatu kêna mua kumvua mua kudia bua lupolo lua tshikondo. Ebi kabikadi bua kukemesha bakuabu peshi kuikala ne tshiji bua dinyoka dipeta. Ne bushuwa, dilama tshijila diodi nkayadi kadiena ne bua kuakaja malu ne Nzambi nansha. Kadi, muntu munyingaladi wa bushuwa neumvue kanyinganyinga kanene bua mudiye mubungamije Yehowa ne pamu’apa balunda ne bena dîku. Disumpakana dinene ne masambila makole bua kulomba dilekelela dia bubi bidi mua kupangisha dijinga dia biakudia.

Mukalenge wa Izalele Davidi wakapeta pende bualu bumue bumue. Pavuaye kumpala kua ditekemena dia kujimija muanende wa kudi Bath-sheba, wakafila bukole buende buonso mu disambila kudi Yehowa bua kupeta luse bua muana. Bu muvua mpampakenu yende ne bukole buende bikale mu masambila, wakabuela mu tshijila. Bia muomumue lelu’eu, didia biakudia kadiena mua kumueneka dikumbanyine mu bimue bikondo bia nsombelu ya dibungama dikole lelu’eu.​—2 Samuele 12:15-17.

Kudi mua kuikala kabidi bikondo bidi muntu muena Nzambi ujinga bua kutabalela malu kampanda muondoke a mu nyuma. Makebulula a mu Bible ne mu mikanda ya Buena-nkristo adi mua kuikala akengedibua. Tshikondo kampanda tshia dîba tshidi mua kukengedibua bua kuelangana meji. Munkatshi mua tshitupa etshi tshia dilonga dia didifila dikole, muntu udi mua kusungula bua kubenga kupumbakajibua kudi didia dia biakudia.​—Fuanyikija ne Yelemiya 36:8-10.

Kudi bilejilu bia mu Mifundu bia basadidi ba Nzambi bakalama tshijila pavua mapangadika manene ne bua kuangatshibua. Mu matuku a Nehemiya bavua ne bua kuenza mutshipu kudi Yehowa, ne bena Yuda bavua ne bua kuikala banyika ku mulawu bu buobu baushipe. Bavua ne bua kuditshipa bua kulekela bakaji babu ba bisamba bia bende ne bua kudilama batapuluke ku matunga avua mabanyunguluke. Kumpala kua kuenza mutshipu eu ne munkatshi mua ditonda dia dipiila diabu, tshisumbu tshijima tshiakabuela mu tshijila. (Nehemiya 9:1, 38; 10:29, 30) Padiye kumpala kua mapangadika makole, muena nkristo udi pa nanku mua kujila biakudia bua tshikondo kampanda tshia dîba tshîpi.

Diangata mapangadika kudi tusumbu tua bakulu mu tshisumbu tshia kumpala tshia bena nkristo divua pamu’apa dishindikija kudi dilama tshijila. Lelu’eu, bakulu ba tshisumbu badi batuilangana ne mapangadika makole, imue misangu àdì atangila malu a dilumbuluishangana, badi mua kudilama ku biakudia padibu bakonkonona tshilumbu etshi.

Disungula bua kulama tshijila mu imue nsombelu ndipangadika dia muntu pa nkayende. Muntu mukuabu kêna ne bua kulumbuluisha mukuende pa tshilumbu etshi nansha. Katuena ne bua kusua ‘kudileja bakane ku mêsu kua bantu’; peshi katuena ne bua kuvuija biakudia bu muanda wa mushinga mutambe ùdì upangisha ditabalela dia malu manene. (Matewuse 23:28, MMM; Luka 12:22, 23) Ne Bible udi uleja ne: Nzambi kêna utulomba bua kulama tshijila peshi utukandika ku ditshilama nansha.

[Tshimfuanyi mu dibeji 7]

Udi mumanye bua tshinyi Yezu wakalama tshijila munkatshi mua matuku 40 panyima pa batismo wende anyi?