Bululame​—Mu mpukapuka anyi ku budisuile?

“NANSHA mundi tshiyi pa tshibidilu muena bululame, imue misangu ntu muena bululame mu mpukapuka.” Ke mudi Autolycus muntu mupange bululame wamba mu mukanda wa The Winter’s Tale mufunda kudi William Shakespeare. Ebi bidi bileja butekete bua nshindamenu bua muntu​—dinyikibua dietu ku dienza bubi, didi difumina mu ‘mutshima udi udinga muntu.’ (Yelemiya 17:9; Musambu 51:5; Lomo 5:12) Kadi ebi bidi biumvuija ne: katuena ne disungula mu bualu ebu anyi? Tshikadilu tshia nsombelu mukezuke mbualu bua mu mpukapuka patupu anyi? Nansha kakese!

Bangabanga ne bana ba Izalele kubuelabu mu Buloba Bulaya, Mozese wakakula nabu patshivuabu basombe mu ntenta mu bibanda bia Moaba. Wakateka kumpala kuabu masungula abidi masunguluke. Bavua mua kutumikila mêyi-matuma a Nzambi ne kupeta dibenesha diende anyi kuabenga ne kunowa mamuma mabi a mpekatu. (Dutelonome 30:15-20) Disungula divua kudibu.

Bu mutudi ne budisunguidi bua malu, tudi petu ne disungula. Muntu nansha umue​—kusangisha ne Nzambi—​kêna utuenzeja bua kuenza bimpe anyi bibi. Kadi, bamue badi mua kudikonka bimpe ne: ‘Bikala mitshima yetu minyikibue ku bubi, mmunyi mutudi mua kuenza tshidi tshimpe?’ Eyowa, munganga wa mênu utu ukenketa mênu biakane bua kumona dimungutuka peshi dibola dia mênu kumpala kua kunyangukawu bikole. Bia muomumue, tudi tukengela bua kukonkonona mutshima wetu wa mu tshimfuanyi mu dikeba dia mateketa ne dibola dia malu a tshitembu. Bua tshinyi? Bualu Yezu wakamba ne: ‘meji mabi ne kushipa kua bantu ne masandi ne tshiendenda ne buivi ne mashimi ne kupenda Nzambi bidi bilopoka mu mutshima.’​—Matayo 15:18-20.

Bua kukuba dînu, munganga wa mênu udi ne bua kumusha menemene bukoya buonso budiye usangana. Mu mushindu wa muomumue, dienza malu ne dipangadika didi dikengedibua bua kukezula mutshima ku “meji mabi” pamue ne majinga mabi. Pa kubala ne kuelela meji pa Dîyi dia Nzambi, Bible, katuena tufika anu ku dimanya patupu njila ya Mutufuki wetu kadi tudi tulonga kabidi bua kuenza tshidi tshimpe.​—Yeshaya 48:17.

Davidi Mukalenge wa Izalele wakadiakaja bua kubabidila diambuluisha dikuabu divua dikengedibua mu diluangana bua kuenza tshidi tshimpe. Wakasambila ne: “Ufuke munda muanyi mutshima mukezuke, Ô Nzambi, ne uteke munda muanyi spiritu mupiamupia, mushindame.” (Musambu 51:10, NW) Eyowa, pa kueyemena Yehowa Nzambi ne muoyo umue, tuetu petu tudi mua kutshimuna dinyikibua dietu dia kuenza tshidi tshibi ne kudima “spiritu mupiamupia” bua kuenza bimpe. Mu mushindu eu, katuakulekela bululame bua kuikalabu mu mpukapuka. Nebuikale muanda wa disungula.

[Tshimfuanyi mu dibeji 21]

Bu mu tshilumbu tshia Davidi, kusambila Yehowa kudi mua kutuambuluisha bua kuenza tshidi tshimpe