“Yehowa kakulekela bantu bende nansha”
“Makenga a muntu muakane adi a bungi; kadi Yehowa udi umusungila ku buonso buau.”—MUSAMBU 34:19.
1, 2. (a) Mmunyi mudi Yehowa ubenesha bantu bende lelu’eu? (b) Ntshinyi tshidi bena nkristo ba bungi bakama, ne nnkonko kayi idi ijuka?
MU DIKUMBAJA dia milayi ya mu Bible, batendeledi ba Yehowa badi mu mparadizu wa mu nyuma. (2 Kolinto 12:1-4) Bantemu ba Yehowa mbena buena-muntu bua pa buloba bujima budi bumanyikile ku dinanga ne buobumue. (Yone 13:35) Badi bapeta dimanya diondoke ne dialabale dia malelela a mu Bible. (Yeshaya 54:13) Mmunyipu mudibu ne dianyisha kudi Yehowa bua mudiye ubapesha diakalenga dia kuikala babikidibue mu ntenta wende wa mu nyuma!—Musambu 15:1.
2 Nansha mudi bonso bapeta dilubuluka dia mu nyuma mu bulongolodi bua Yehowa, bamue mbenze bu badi ne ditalala ne bupole bikuatshidila padi eku bakuabu bapeta makenga a mishindu ne mishindu. Bena nkristo bavule mbadimone mu nsombelu wa binsonji ku mêsu munkatshi mua mpolo mile ya bikondo ne kabayi ne ditekemena dia kupeta disulakana. Diteketa mu mikolo mu nsombelu ya mushindu’eu ki mbualu buenyi nansha. (Nsumuinu 13:12) Makenga ntshijadiki tshia dibenga kusankisha Nzambi anyi? Yehowa utuku ufila bukubi bua pa buabu kudi bamue bena nkristo eku ulekela bakuabu anyi?
3. (a) Yehowa ke mukebeshi wa makenga adi bantu bende bapeta anyi? (b) Bua tshinyi nansha batendeledi ba Yehowa ba lulamatu badi bapeta makenga adi akuata bantu?
3 Bible udi wandamuna ne: ‘Muntu kambi biende pamuteyabu ne: Ndi muteyibue kudi Nzambi; bualu bua Nzambi kêna mumanye mua kuteyibua ne malu mabi, ne yeye muine kêna uteya muntu.’ (Yakobo 1:13) Yehowa udi Mukubi ne Mukuatshishi wa bantu bende. (Musambu 91:2-6) “Yehowa kakulekela bantu bende nansha.” (Musambu 94:14, NW) Ebi kabiena biumvuija ne: batendeledi ba lulamatu kabakupeta makenga. Ndongoluelu wa malu wa buloba bujima udiku lelu’eu mmulombola kudi bantu badi bapiane dipanga bupuangane. Bavule mbanyanguke, ne bakuabu bakese mbabi menemene. Kakuena nansha umue wabu udi utangila kudi Yehowa bua kupeta meji. Ebi bidi bifikisha ku makenga mavule a bantu. Bible udi wamba patoke ne: bantu ba Yehowa kabena misangu yonso mua kuepuka bipeta bia dibungama bia dipanga bupuangane ne bubi bia bantu.—Bienzedi 14:22.
Bena nkristo ba bulamatshi mbatekemene bua kukenga
4. Ntshinyi tshidi bena nkristo bonso mua kutekemena bu mudibu anu basombe mu ndongoluelu eu mubi wa malu, ne mbua tshinyi?
4 Nansha mudibu kabayi bena mu bulongolodi ebu, balondi ba Yezu mbasombe munkatshi mua ndongoluelu eu wa malu. (Yone 17:15, 16) Satana mmulejibue patoke mu Bible bu bukole bukokeshi budi munyima mua bulongolodi ebu. (1 Yone 5:19) Pa nanku, bena nkristo bonso badi mua kutekemena ku tototo nansha ku ndandanda bua kuakama ntatu ya katshi ku dînu. Muikale ne bualu ebu mu lungenyi, mupostolo Petelo udi wamba ne: “Dilamayi, nutabale. Muluishi wenu Satana udi utua eku utua eku bu nyama wa ntambue ukungula, ukeba wa yeye kudia. Numutuile nkanana, bashindame mu ditaba. Numanye ne: bana benu badi batangalake pa buloba badi bakenga muomumue.” (1 Petro 5:8, 9, MMM) Eyowa, nsangilu mujima wa bena nkristo udi mua kutekemena makenga.
5. Mmunyi muakaleja Yezu patoke se: bena nkristo ba lulamatu nebapete malu a dibungama mu nsombelu?
5 Nansha bituikala ne dinanga diondoke kudi Yehowa ne balamate mêyi-maludiki ende, netupete malu a dibungama mu nsombelu. Yezu wakatokesha bualu ebu mu mufuanu wende udi mu Matayo 7:24-27, muakalejaye dishilangana pankatshi pa aba badi batumikila mêyi ende ne aba badi kabayi baatumikila. Wakafuanyikija bayidi ba butumike ne muena budimu udi wibakila nzubu pa dibue dikole. Aba badi kabayi batumikila mêyi ende wakabafuanyikija ne muntu mutshimbakane udi wibakila nzubu wende mu lusenga. Panyima pa mvula wa tshipepele tshikole, anu nzubu muibakila pa dibue dikole ke udi upanduka. Bambisha ne: bua nzubu wa muena budimu, ‘mvula wakaloka, misulu yakuula, bipupu biakalua, biakakuma ku nzubu, kadi nzubu kakupuka.’ Yezu kavua mulaye ne: muena budimu uvua misangu yonso mua kupeta ditalala ne bupole. Kadi, budimu bua muntu au buvua mua kumulongolola bua kutuila mvula wa tshipepele nkanana. Lungenyi lua muomumue ndumvuija mu mufuanu wa mumiaminyi. Mu mufuanu au, Yezu udi umvuija ne: nansha batendeledi ba butumike badi ne “mitshima mimpe ne ya kalolo” bavua mua ‘kuvudija mamiinu bua [“ditantamana,” NW].’—Luka 8:4-15.
6. Mu mufuanu wa Paulo wa bintu bidi bikandamena kapia, mbanganyi badi bapitshila mu mateta a kapia?
6 Mu difundila bena Kolinto, mupostolo Paulo wakatumika ne ngakuilu wa difuanyikija bintu bua kumvuija dikengedibua dia ngikadilu idi inenga idi mua kutuambuluisha bua kuakama mateta. Bintu bitu bikandamena mudilu bu mudi or, argent, ne mabue a mushinga mukole bidi bileja ngikadilu ya buena Nzambi. (Fuanyikija ne Nsumuinu 3:13-15; 1 Petelo 1:6, 7.) Ku lunga luseke, mbafuanyikije bimanyinu bia ku mubidi ne bintu bitu bioshika. Pashishe Paulo udi wamba ne: ‘Mudimu wa muntu ne muntu neumueneshibue; bua dituku dilualua nediumueneshe, bualu bua didi dibuluibua mu kapia; ne kapia nekatete mudimu wa muntu ne muntu né udi wa mushindu kayi. Biashala mudimu wa muntu wakasaye pa mutu patshi, yeye neangate difutu.’ (1 Kolinto 3:10-14) Apa kabidi, Bible udi umvuija ne: buonso buetu mu mushindu kauyi buepuki netupete amue mateta a kapia.
7. Bilondeshile Lomo 15:4, mmunyi mudi Mifundu mua kutuambuluisha bua kutantamena mateta?
7 Kudi miyuki mivule mu Bible ya basadidi ba Nzambi ba bulamatshi bavua batantamene makenga, pamu’apa munkatshi mua bikondo bile. Kadi, Yehowa kakabalekela nansha. Mupostolo Paulo uvua pamu’apa ne bilejilu bu ebi mu lungenyi pakambaye ne: ‘Malu onso akafundabu diambedi akafundibua bua kutuyisha, bua tuetu tuikale ne ditekemena bua ditantamana dietu ne bua busambi bua mu [“Mifundu,” NW].’ (Lomo 15:4) Tangila bilejilu bia bantu basatu aba, nansha muvuabu ne malanda mashême ne Nzambi, bakapeta makenga a bungi.
Tshitudi tulongela ku miyuki ya mu Bible
8. Ntshinyi tshivua Yehowa muanyishe mu tshilumbu tshia Yozefe, ne bivua bua mutantshi bule kayi?
8 Yozefe, muana wa Yakoba, wakapeta dianyisha dia kudi Yehowa kubangila ku buana. Nansha nanku, kayi ne tshilema tshivuaye muenze, wakapeta mulongolongo wa makenga. Bakamukuata ne kumukengesha ne tshikisu tshionso kudi bana babu bine. Bakamupana bu mupika mu ditunga dia ku ba-bende muakamubandabu bia mafi ne kumuelabu mu “n[z]ubu wa mîdima.” (Genese 40:15) Muine amu, ‘bakasamisha makasa ende ne nkanu yakasuikabu nayi, bakamuela lukanu lua tshiamu tshifiike.’ (Musambu 105:17, 18) Munkatshi mua bupika buende ne diedibua mu lukanu, kakuyi mpata Yozefe wakalomba Yehowa misangu ne misangu bua kupeta disulakana. Kadi, munkatshi mua bidimu bu 13, nansha muakamukolesha Yehowa mu mishindu ya bungi, wakabika mu dinda dionso mutshikale anu mupika anyi muena buloko.—Genese 37:2; 41:46.
9. Ntshinyi tshivua Davidi ne bua kutantamena munkatshi mua bidimu bia bungi?
9 Tshilumbu tshia muomumue ntshia Davidi. Pavua Yehowa usungula muntu mukumbane bua kukokesha Izalele, wakamba ne: ‘Ngakasangana Davidi, muana wa Yishai, muntu udi mutshima wanyi musue.’ (Bienzedi 13:22) Nansha muvuaye muanyishibue ku mêsu kua Yehowa, Davidi wakakenga bikole. Mu njiwu ya lufu, wakasokoma munkatshi mua bidimu bia bungi mu tshipela, mu mbuebue, mu mitubu, ne mu matunga a ku ba-bende. Muipata bu nyama wa muitu, wakateketa mu mikolo ne wakapeta buôwa. Nansha nanku, wakatantamana mu bukole bua Yehowa. Davidi uvua mua kuamba mu bulelela buonso bilondeshile malu mamona ende ne: “Makenga a muntu muakane adi a bungi; kadi Yehowa udi umusungila ku buonso buau.”—Musambu 34:19.
10. Ndikenga kayi dipite bukole diakatulukila Nabota ne dîku diende?
10 Mu matuku a muprofete Eliya, kuvua anu bantu 7 000 mu Izalele bavua kabayi batuile nzambi wa dishima Baala binu. (1 Bakelenge 19:18; Lomo 11:4) Nabota, eu uvua pamu’apa umue wa kudibu, wakakenga bua dipanga buakane dikole dimuenzela. Bakamupuekesha milongo pakamubandabu bua dipenda Nzambi. Pakamusanganabu ne dipila, bakamupisha ne kumutuilabu tshibawu kudi mukenji wa mfumu bua bamushipe pa kumuasa mabue, ne mbua yakalaka mashi ende. Nansha bana bende ba balume bakashipibua! Pabi, kavua mumanye bualu bua dimubanda diabu nansha. Bantemu bavua bamupishe bavua bena mashimi. Tshilumbu tshionso atshi tshivua tshifufu tshienza kudi Mukalenge-mukaji Yezabele, bua se: mukalenge amone mua kuangata budimi bua mvinyo bua Nabota.—1 Bakelenge 21:1-19; 2 Bakelenge 9:26.
11. Ntshinyi tshidi mupostolo Paulo utuambila bua balume ne bakaji ba lulamatu ba mu muyuki wa mu Bible?
11 Yozefe, Davidi, ne Nabota badi patupu basatu ba mu balume ne bakaji ba lulamatu batela mu Bible bakakenga bikole. Mupostolo Paulo wakafunda diambulula dia malu a kale a basadidi ba Yehowa mu kupita kua bikondo. Wakakulamu bua aba ‘bakangata diteta dia tuseku ne mikumu, ne dia nkanu ne nzubu ya nkanu pa mutu. Bakakumibua mabue, bakakoshibua pankatshi ne nsele, bakateyibua, bakashipibua ne muele wa mvita, bakendakana baluate biseba bia mikoko ne biseba bia mbuji, bakengela bintu, bakengeshibua, benjibue bibi, bakadi ba pa buloba kabayi babakanyine, bendakana mu bipela ne mu mikuna ne mu nyongolo ne mu mena a mu buloba.’ (Ebelu 11:36-38) Kadi Yehowa kakabalekela nansha.
Yehowa udi utabalela aba badi bakenga
12. Ng’amue makenga kayi adi Bantemu ba Yehowa bapeta lelu’eu?
12 Netuambe tshinyi bua bantu ba Yehowa lelu’eu? Bu bulongolodi, tudi mua kutekemena bukubi bua Nzambi ne kupita bimpe matuku a nshikidilu ne dikenga dinene. (Yeshaya 54:17; Buakabuluibua 7:9-17) Kadi, ku muntu ku muntu, tudi tujingulula ne: “bikondo ne malu kaayi malongolola” bidi bitulukila bantu bonso. (Muambi 9:11, NW) Lelu’eu kudi bena nkristo bavule ba lulamatu badi bakenga. Bamue badi batantamena bupele bukole. Bible udi wakula bua bena nkristo ‘bana ba nshiya ne bakaji ba mu lufuila’ badi ne makenga. (Yakobo 1:27) Bakuabu badi bakenga bu tshipeta tshia bipupu bia ku bintu bifuka, mvita, dibunda bibawu, ditumika bibi ne bukokeshi, masama, ne lufu.
13. Mmalu makole kayi adi malejibue mu matuku mashale aa?
13 Tshilejilu, mu luapolo yabi ya 1996 mitumina Kasumbu Kaludiki ka Bantemu ba Yehowa, biro bia filiale ya Watch Tower biakalonda ne: bamue ba ku bana betu badi bakenga mu maloko mu nsombelu mikuate ne luse bua dilamata diabu ku mêyi-maludiki a mu Bible. Bakamuangalaja bisumbu bisatu bia mu ditunga kampanda dia ku Amerike wa ku Sud pavua bisumbu bia bena mvita bisake nkama ya Bantemu bua kumbuka muaba au. Mu ditunga kansanga dia ku Afrike wa ku Ouest, bakashipa bamue Bantemu mu mvita mikese ya bena ditunga. Mu ditunga dikuabu dia mu Amerike wa pankatshi, nsombelu wa bamue bana betu mu malu a mpetu ukavua mukole wakapita kunyanguka kabidi pakaloka mvula wa tshipepele tshikole. Mu miaba mikuabu idi bupele ne dikepela dia biakudia kabiyi pamu’apa tshilumbu tshikole, buenzeji bubi budi mua kukepesha disanka dia bamue. Bavule mbazengeja kudi bifimpakaji bia nsombelu wa buena-lelu. Bua kalèngù ka bantu, kutshidi bakuabu badi mua kumvua diteketa mu mikolo padibu bayisha lumu luimpe lua Bukalenge.
14. (a) Ntshinyi tshitudi tulongela ku tshilejilu tshia Yobo? (b) Pamutu pa kuela meji mu mushindu mubi, ntshinyi tshitudi ne bua kuenza patudi ne kanyinganyinga?
14 Katuena mua kumvuija nsombelu eyi bu tshijadiki tshia dibenga kusankisha Nzambi nansha. Vuluka tshilumbu tshia Yobo ne makenga mavule akapetaye. Uvua “muntu wa mutshima mutoke ne wa malu makane.” (Yobo 1:8) Nditeketa mu mikolo kayipu divua Yobo ne bua kumvua pakamubanda Elifaze bua bienzedi bibi! (Yobo nshapita 4, 5, 22) Katuena basue kuya lubilu bua kukomesha ne: tudi tupeta makenga bualu tudi bafuishe Yehowa bundu mu mushindu kampanda anyi bualu Yehowa mmumbushe dibenesha diende. Ngelelu wa meji wa dibipisha nende malu kumpala kua makenga udi mua kutekesha ditabuja dietu. (1 Tesalonike 3:1-3, 5) Patudi tupeta kanyinganyinga, mbitambe buimpe bua kuelangana meji pa muanda wa se: Yehowa ne Yezu badi pabuipi menemene ne bantu bakane nansha bikalaku bualu kayi.
15. Mmunyi mutudi bamanye se: Yehowa udi uditatshisha bikole bua makenga adi bantu bende bapeta?
15 Mupostolo Paulo udi utushindikila padiye wamba ne: ‘Udi mua kutupandulula ku dinanga dia Kristo nnganyi? Ntatu idi mua kuenza nunku, anyi kanyinganyinga, anyi tshinyangu, anyi tshiyole, anyi butaka, anyi njiwu, anyi muele wa mvita? . . . Ndi ngitabujijibua ne: Kakuena lufu, kakuena muoyo, kakuena banjelu, kakuena bakokeshi, kakuena malu atshidiku, kakuena malu atshilualua, kakuena makalenge, kakuena bule, kakuena ndondo, kakuena tshintu tshionso tshikuabu tshifukibua tshidi ne bukole bua kutupandulula ku dinanga dia Nzambi didi mu Kristo Yezu Mukalenge wetu.’ (Lomo 8:35, 38, 39) Yehowa udi uditatshisha bikole bua bualu buetu ne mmumanye makenga etu. Patshivuaye munyemakanyi, Davidi wakafunda ne: ‘Mêsu a Yehowa adi kudi bakane, ne matshi ende adi buashi ku kudila kuabu. Yehowa udi pabuipi ne bantu badi ne mitshima idi itamba kunyingalala.’ (Musambu 34:15, 18; Matayo 18:6, 14) Tatu wetu wa mu diulu udi ututabalela ne udi umvua luse bua aba badi bakenga. (1 Petelo 5:6, 7) Udi utupesha bitudi tukengela bua kutantamana, nansha tuetu mua kupeta makenga a mushindu kayi.
Mapa a Yehowa adi atukuatshisha
16. Nndongoluelu kayi wa kudi Yehowa udi utuambuluisha bua kutantamana, ne mmushindu kayi?
16 Nansha mutudi katuyi mua kutekemena nsombelu udi kayi ne makenga mu ndongoluelu eu wa malu mukulakaje, katuena ‘balekedibue pa nkayetu.’ (2 Kolinto 4:8, 9) Yezu wakalaya bua kupetesha balondi bende muambuluishi. Wakamba ne: “Nendombe Tatu ne neanupeshe muambuluishi mukuabu bua ikale nenu tshiendelele, spiritu wa bulelela.” (Yone 14:16, 17, NW) Mu Pentekoste wa 33 B.B., mupostolo Petelo wakambila bateleji bende ne: bavua mua kupeta “dipa dia tshianana dia spiritu munsantu.” (Bienzedi 2:38, NW) Spiritu munsantu utuku utuambuluisha lelu’eu anyi? Eyowa! Bukole buenzeji bua Yehowa budi butupesha mamuma a kukema: “dinanga, disanka, ditalala, muoyo-mule, bulenga, buimpe, ditabuja, bupole-malu, didikanda.” (Galatia 5:22, 23, NW) Yonso eyi nngikadilu idi kayiyi kutua mushinga idi ituambuluisha bua kutantamana.
17. Ng’amue malelela kayi a mu Bible adi akolesha ditabuja dietu ne dipangadika dietu dia kuindila Yehowa ne lutulu luonso?
17 Spiritu munsantu udi kabidi utuambuluisha bua kujingulula ne: makenga adiku mpindieu ‘mmakese [ne] a tshitupa tshîpi’ pa kuafuanyikija ne difutu dia muoyo wa kashidi. (2 Kolinto 4:16-18) Tudi batuishibue ne: Nzambi kakupua muoyo midimu yetu ne dinanga ditudi tumuleja. (Ebelu 6:9-12) Mu dibala mêyi a mu Bible menzeja ku spiritu, tudi tusambibua kudi bilejilu bia basadidi ba lulamatu ba kale bakatantamena makenga a bungi kadi bakabadibua bena disanka. Yakobo udi ufunda ne: ‘Bana betu, nutangile baprofete bakamba mu dîna dia Mukalenge bu tshimanyinu tshia ditantamana dia mu makenga ne tshia lutulu. Monayi, tudi tuidika bantu [“bakatantamana,” NW] ne: badi ne disanka.’ (Yakobo 5:10, 11) Bible udi ulaya “bukole budi bupite bua pa tshibidilu” buatuambuluisha bua kutantamena mateta. Yehowa udi kabidi utubenesha ne ditekemena dia dibiishibua. (2 Kolinto 1:8-10; 4:7, NW) Pa kubala Bible ku dituku ne ku dituku ne pa kuelangana meji pa malaya aa, netukoleshe ditabuja dietu ne dipangadija dietu dia kuindila Nzambi ne lutulu luonso.—Musambu 42:5.
18. (a) Ntshinyi tshidibu batukankamije bua kuenza mu 2 Kolinto 1:3, 4? (b) Mmunyi mudi batangidi bena nkristo mua kuleja mudibu mpokolo ya busambi ne dikankamika?
18 Kabidi, Yehowa mmutupeshe mparadizu wa mu nyuma mutudi mua kupetela dinanga dilelela dia bana betu bena nkristo balume ne bakaji. Tuetu bonso tudi ne mudimu wa kuenza mu disambangana umue ne mukuabu. (2 Kolinto 1:3, 4) Nangananga batangidi bena nkristo ke badi mua kuikala mpokolo munene wa busambi ne dikankamika. (Yeshaya 32:2) Bu mudibu “mapa a bantu,” mbapeshibue mudimu wa kuibaka aba badi bakenga, wa ‘kukolesha badi ne mitshima yamba kupanga,’ ne wa ‘kukuatshisha batekete.’ (Efeso 4:8, 11, 12, NW; 1 Tesalonike 5:14) Bakulu mbakankamijibue bua kutumika bimpe ne bibejibeji bia Tshibumba tshia Nsentedi ne Réveillez-vous! pamue ne mikuabu mikanda mipetesha kudi “mupika wa lulamatu ne wa budimu.” (Matayo 24:45-47, NW) Bionso ebi bidi ne mibelu mivule mishindamene pa Bible idi mua kutuambuluisha bua kujandula—ne nansha kujikila—imue ya ku ntatu idi itukebela kanyinganyinga. Tuidikijayiku Yehowa pa kusamba ne kukoleshangana umue ne mukuabu mu bikondo bikole!
19. (a) Ntshinyi tshidi tshituambuluisha bua kuepuka amue makenga? (b) Ndekelu wa bionso, nnganyi utudi ne bua kueyemena, ne ntshinyi tshiatuambuluisha bua kuakama mateta?
19 Bu mutudi tuenda tubuela bikole mu matuku a ku nshikidilu ne nsombelu idi mu ndongoluelu wa malu udiku lelu’eu yenda inyanguka bikole, bena nkristo badi benza tshidibu mua kuenza bua kuepuka makenga. (Nsumuinu 22:3) Dikonkonona dimpe dia malu, tshieledi tshia lungenyi tshiakane, ne dimanya dia mêyi-maludiki a mu Bible bidi mua kutuambuluisha bua kuangata mapangadika a meji. (Nsumuinu 3:21, 22) Tudi tuteleja Dîyi dia Yehowa ne tuditumikila bua kuepuka dienza bilema bia patupu. (Musambu 38:4) Nansha nanku, tudi bamanye bimpe ne: kakuena bungi kampanda bua madikolela atudi mua kuenza adi mua kumbusha kashidi makenga mu nsombelu yetu. Mu ndongoluelu eu wa malu, bantu bakane ba bungi badi bapeta makenga makole. Kadi, tudi mua kupita ne mateta etu bikale ne dieyemena dijima dia se: “Yehowa kakulekela bantu bende nansha.” (Musambu 94:14, NW) Ne tudi bamanye ne: ndongoluelu eu wa malu ne makenga ende nebipite mu katupa kîpi emu. Pa nanku, tudiku mua kupangadija bikole bua ‘katupangi mu kuenza kua malu mimpe; bualu bua palua tshikondo tshia kuapuola netuapuole bituikala katuyi tupanga.’—Galatia 6:9.
Ntshinyi tshitudi balonge?
◻ Mmateta kayi adibu bapeta kudi nsangilu mujima wa bena nkristo?
◻ Mbilejilu kayi bia mu Bible bidi bituambuluisha bua kujingulula ne: makenga ki ntshijadiki tshia dibenga kusankisha Yehowa?
◻ Mmunyi mudi Yehowa umvua bua makenga adi bantu bende bapeta?
◻ Ng’amue mapa kayi a kudi Yehowa adi atuambuluisha bua kutantamena mateta?
[Bimfuanyi mu dibeji 10]
Davidi, Nabota, ne Yozefe mbantu basatu bakapeta makenga