Tulamatayi bikole ku ditabuja dietu dia mushinga mukole!

‘Kudi bantu bakangata ditabuja dia mushinga mukole muomumue ne ditudi nadi.’​—2 PETELO 1:1.

1. Ntshinyi tshiakamba Yezu bua kudimuija bapostolo bende, kadi mmunyi muakaditumbisha Petelo?

DILOLO dia muladilu wa lufu luende, Yezu wakamba ne: bapostolo bende bonso bavua ne bua kumulekela. Petelo, umue wabu, wakaditambisha wamba ne: “Nansha bakuabu bonso balenduke bualu buebe, meme tshiakulenduka nansha kakese!” (Matayo 26:33, NW) Kadi Yezu uvua mumanye se: kabivua nanku to. Ke bua tshinyi wakambila Petelo muine musangu au ne: ‘Ngakakulombela wewe Nzambi bua ditabuja diebe kadipangi; wewe, pawakudimuka, ukoleshe mitshima ya bana benu.’​—Luka 22:32.

2. Nansha muvuaye ne didieyemena dipite, mbienzedi kayi bia Petelo biakela patoke butekete bua ditabuja diende?

² Petelo, eu uvua ne didieyemena dipite bua ditabuja diende, wakavila Yezu anu buine butuku abu. Misangu isatu wakavila muvuaye kayi nansha mumanye Kristo! (Matayo 26:69-75) ‘Pakakudimukaye,’ mêyi a Mfumu wende a se: “ukoleshe mitshima ya bana benu,” avua ne bua kuikala mamuluile bimpe mu lungenyi. Matuku a muoyo wa Petelo avua alonda akapeta buenzeji bukole bua mubelu au, bu mudibi bijadika kudi mikanda ibidi yakafundaye idi mu Bible.

Tshivua Petelo mufundile mikanda yende

3. Bua tshinyi Petelo wakafunda mukanda wende wa kumpala?

³ Bidimu bu 30 panyima pa lufu lua Yezu, Petelo wakafunda mukanda wende wa kumpala, mutumina bana babu ba mu Ponto, Galatia, Kapadokia, Asia, ne Bitunia, bitupa bidi bienze mpindieu Turquie wa ku Nord ne ku Ouest. (1 Petelo 1:1) Kakuyi mpata, bamue bena Yuda ba ku aba bavua mua kuikala balue bena nkristo mu Pentekoste wa mu 33 B.B., bavua munkatshi mua bavua Petelo mufundile. (Bienzedi 2:1, 7-9) Bavule bavua Bampangano bavua bikale mu mateta makole a kudi baluishi. (1 Petelo 1:6, 7; 2:12, 19, 20; 3:13-17; 4:12-14) Nenku Petelo wakafundila bana betu aba bua kubakankamija. Kipatshila kende kavua ka kubambuluisha bua bangate ‘nshikidilu wa ditabuja [diabu], lupandu lua mioyo [yabu].’ Nenku, mu mubelu wende wa ku ndekelu kua mukanda, wakamba ne: ‘Nutantamene [Diabolo] bajalame mu ditabuja dienu.’​—1 Petelo 1:9; 5:8-10.

4. Bua tshinyi Petelo wakafunda mukanda wende muibidi?

⁴ Pashishe, Petelo wakafundila bena nkristo aba mukanda muibidi. (2 Petelo 3:1) Bua tshinyi? Bualu kuvua mene njiwu mipite bunene. Bantu babi bavua bateta bua kukankamija bikadilu biabu binyanguke munkatshi mua bena kuitabuja ne bua kupambuisha bamue! (2 Petelo 2:1-3) Kupita apu, Petelo wakadimuija bua basekianganyi. Ukavua mufunde mu mukanda wende wa kumpala ne: “nshikidilu wa bionso ukadi pabuipi,” ne mpindieu mbimueneke se: bamue bavua baseka lungenyi alu. (1 Petro 4:7, MMM; 2 Petelo 3:3, 4) Tukonkononayi mukanda muibidi wa Petelo ne tumone muakakoleshawu bana betu bua kushala bashindame mu ditabuja. Mu tshiena-bualu etshi tshia kumpala, netukonkonone 2 Petelo nshapita 1.

Tshipatshila tshia nshapita 1

5. Mmunyi mudi Petelo ulongolola babadi ba mukanda wende bua dikonkonona dia bilumbu?

⁵ Petelo kêna diakamue wakula bua bilumbu binene. Kadi, udi ulongolola njila bua kufika ku dikonkonona dia bilumbu ebi pa kukolesha dianyisha dia babadi ba mukanda wende bua tshivuabu bapete pakaluabu bena nkristo. Udi ubavuluija malaya a dikema a Nzambi ne mudi milayi ya mu Bible mikale ya kueyemena. Udi wenza nunku pa kubalondela bua dikudimuka mpala, tshikena-kumona tshiakapetaye yeye muine tshia Kristo mu bukokeshi bua Bukalenge.​—Matayo 17:1-8; 2 Petelo 1:3, 4, 11, 16-21.

6, 7. (a) Ndilongesha kayi ditudi mua kupetela ku mbuelelu wa mukanda wa Petelo? (b) Patudi tufila mibelu, mbualu kayi budi mua kuambuluisha imue misangu butudi ne bua kuitaba tuetu bine?

⁶ Tudiku mua kupetela dilongesha kampanda ku mbuelelu eu wa Petelo anyi? Batuteleji kabenaku mua kutamba kuanyisha mibelu patudi tuanji kukonkonona nabu pamue ngikadilu ya ditekemena dinene dia Bukalenge ditudi tuangata bonso ne mushinga anyi? Ne netuambe tshinyi bua ditumika ne malu mamonamona etu nkayetu? Bivua mua kuikala se: panyima pa lufu lua Yezu, Petelo wakakula misangu mivule bua dimona dia tshikena-kumona atshi tshia Kristo mu butumbi bua Bukalenge.​—Matayo 17:9.

⁷ Kabidi, vuluka se: mu mishindu yonso tshikondo tshiakafunda Petelo mukanda wende muibidi, bakavua bamane kuabanya bikole Evanjeliyo wa Matayo ne mukanda wa mupostolo Paulo mutumina bena Galatia. Nenku bilema bia Petelo bia bumuntu pamue ne malu a ditabuja diende bivua mua kuikala bimanyike bimpe munkatshi mua bena tshikondo tshiende. (Matayo 16:21-23; Galatia 2:11-14) Nansha nanku, ebi kabiakamumbusha budikadidi buende bua diakula. Bushuwa, bivua mua kuikala bienze ne: mukanda wende utambe kusankisha aba bavua bamanye bimpe matekete abu buobu bine. Pa nanku, patudi tuambuluisha aba badi ne ntatu, kabienaku mua kuikala bimpe bua kuitaba se: tuetu petu tudi bafuanyike kuenza bilema anyi?​—Lomo 3:23; Galatia 6:1.

Diela muoyo didi dikolesha

8. Mmu ngumvuilu kayi muvua Petelo mua kuikala mutumike ne muaku “ditabuja”?

⁸ Tangila mpindieu mudi Petelo welangana muoyo. Udi utela diakamue muanda wa ditabuja, wakula ne babadi ba mukanda wende bu ‘bantu bakangata ditabuja dia mushinga mukole muomumue ne ditudi nadi.’ (2 Petelo 1:1) Apa muaku “ditabuja” udi bu udi umvuija “ditabijija dishindame” ne udi ufunkuna bungi busanga bua mitabuja anyi malongesha a bena nkristo, budibu babikila imue misangu mu Mifundu ne: “bulelela.” (Galatia 5:7; 2 Petelo 2:2; 2 Yone 1) Muaku “ditabuja” mmutumika nawu misangu mivule mu ngumvuilu eu kupita mu ngumvuilu wa pa tshibidilu wa dieyemena anyi ditekemena muntu kampanda anyi tshintu kansanga.​—Bienzedi 6:7; 2 Kolinto 13:5; Galatia 6:10; Efeso 4:5; Yuda 3.

9. Bua tshinyi dielangana muoyo dia Petelo divua ne bua kuikala diumvuike dia musangelu, nangananga kudi Bampangano?

⁹ Diela muoyo dia Petelo divua ne bua kuikala diumvuike dia musangelu nangananga kudi babadi Bampangano. Bena Yuda kabavua bendelangana ne Bampangano, bavua mene babapetula, ne dielela Bampangano meji mabi diakatungunuka munkatshi mua bena Yuda bakavua balue bena nkristo. (Luka 10:29-37; Yone 4:9; Bienzedi 10:28) Kadi, Petelo, muena Yuda wa ku tshilelelu ne mupostolo wa Yezu Kristo, wakamba ne: babadi ba mukanda wende​—bena Yuda ne Bampangano—​bavua ne ditabuja diodimue ne bavua ne muabi wa muomumue ne wabu.

10. Mmalongesha kayi atudi mua kupetela ku dielangana muoyo dia Petelo?

¹⁰ Elabi meji bua malongesha malenga adi dielangana muoyo dia Petelo ditupesha lelu’eu. Nzambi kêna ne kansungasunga; kêna usungula dikoba kampanda peshi ditunga kansanga kumpala kua dikuabu. (Bienzedi 10:34, 35; 11:1, 17; 15:3-9) Anu bu muakalongesha Yezu muine, bena nkristo bonso mbena muntu, ne muntu nansha umue wa kutudi kêna ne bua kudiumvua mutambe bakuabu. Kabidi, dielangana muoyo dia Petelo didi dizangika ne: tudi benze bushuwa buena-muntu bua pa buloba bujima, budi ne ditabuja “muomumue” ne divua nadi Petelo ne bapostolo nende.​—Matayo 23:8; 1 Petelo 5:9.

Dimanya ne malaya a Nzambi

11. Mumane kuelangana muoyo, mmalu kayi a mushinga mukole adi Petelo uzangika?

¹¹ Panyima pa diela diende dia muoyo, Petelo udi ufunda ne: “Bulenga bukena butuakanyine ne ditalala bivulanganeku kunudi.” Mmunyi mudi bulenga bukena butuakanyine ne ditalala mua kuvulangana kutudi? “Ku dimanya dijalame dia Nzambi ne dia Yezu Mfumu wetu,” ke mudi Petelo wandamuna. Pashishe udi wamba ne: “Bukole . . . bua bunzambi mbutupeshe tshianana bintu bionso bidi bitangila muoyo ne bulamate kudi Nzambi.” Kadi mmunyi mutudi tupeta bintu ebi bia mushinga mukole? “Ku diambuluisha dia dimanya dijalame dia eu wakatubikila bua butumbi ne buimpe.” Nenku, misangu ibidi Petelo udi uzangika ne: dimanya dijalame dia Nzambi ne dia Muanende didi ne mushinga.​—2 Petelo 1:2, 3, NW; Yone 17:3.

12. (a) Bua tshinyi Petelo udi wela kashonyi pa mushinga wa dimanya dijalame? (b) Bua kupeta malaya a Nzambi, ntshinyi tshituikala ne bua kuenza kumpalampala?

¹² “Balongeshi ba dishima” badi Petelo udimuija bualu buabu mu nshapita 2 badi batumika ne “miaku ya didinga” bua kushima bena nkristo. Badi bakeba mushindu eu bua kulobesha bena nkristo bua bapingane mu tshiendenda mukavuabu bapikula. Bipeta bua aba bonso bakavua bapikula ku diambuluisha dia “dimanya dijalame dia Mfumu ne Mupandishi Yezu Kristo” ne balue kupona pashishe mu dishimibua dia nunku mbia kabutu. (2 Petelo 2:1-3, 20, NW) Mbimueneke patoke se: Petelo udi ne lungenyi lua kukonkonona tshilumbu etshi pashishe, padiye wela kashonyi ku ntuadijilu mene kua mukanda wende pa muaba wa dimanya dijalame mu dilama ngikadilu mukezuke kumpala kua Nzambi. Petelo udi ufunda ne: Nzambi ‘wakatupa malaya ende a mushinga mukole ne matambe bunene; bua ku malaya aa nuenu nulue babanyanganyi nende ba muoyo wa bunzambi.’ Kadi Petelo udi wamba ne: bua kupeta malaya aa, adi mikale tshitupa tshinene tshia ditabuja dietu, tudi ne bua kuanji kuikala bamane ‘kupanduka ku malu mabole adi mu buloba bualu bua nkuka mibi.’​—2 Petelo 1:4.

13. Nku tshinyi kudi bena nkristo bela manyi pamue ne “mikoko mikuabo” bapangadije bua kulamata bikole?

¹³ Mmunyi muudi wangata malaya a Nzambi? Mmu mushindu udi bashadile ba ku bena nkristo bela manyi baangata anyi? Mu 1991, Frederick Franz, eu uvua mulombodi wa Société Watch Tower musangu au, uvua mutungunuke mu mudimu wa ku dîba ne ku dîba munkatshi mua bidimu bipite pa 75, wakamba mu tshikoso bua nyanji ya aba badi ne ditekemena dia kukokesha pamue ne Kristo: “Tudi balamate bikole too ne mpindieu, ne netulamate bikole too ne padi Nzambi ujadika bushuwa se: udi ukumbaja ‘malaya ende a mushinga mukole ne matambe bunene.’” Muanetu Franz wakashala mueyemene dilaya dia Nzambi dia dibiishibua dia mu diulu, ne wakalamata bikole ku ditabuja too ne pakafuaye ne bidimu 99. (1 Kolinto 15:42-44; Filipoi 3:13, 14; 2 Timote 2:10-12) Bia muomumue, bantu miliyo mivule mbalamate bikole ku ditabuja, batuishile mêsu abu pa dilaya dia Nzambi dia mparadizu wa pa buloba muikala bantu ne muoyo wa kashidi ne disanka. Udi umue wa ku bantu aba anyi?​—Luka 23:43; 2 Petelo 3:13; Buakabuluibua 21:3, 4.

Diandamuna ku malaya a Nzambi

14. Bua tshinyi Petelo udi utela buimpe bu ngikadilu wa kumpala wa kukumbaja ku ditabuja?

¹⁴ Tudiku tuleja dianyisha kudi Nzambi bua bidiye mulaye anyi? Bikalabi nanku, Petelo udi wamba ne: tudi ne bua kudileja. “Eyowa, bua kine kabingila aka” (bualu Nzambi mmutupeshe malaya a mushinga mutambe bukole), tudi ne bua kuenza madikolela a bushuwa bua kuikala ne nzanzu. Katuena mua kusanka anu bua dikala patupu mu ditabuja peshi bua dibidilangana patupu ne bulelela bua mu Bible. Ki mbikumbane nansha! Pamu’apa mu tshikondo tshia Petelo bamue bavua bakula bikole bua ditabuja mu bisumbu kadi bikale babuelakane mu bikadilu bibi. Bivua bikengela bua nsombelu wabu ikale wa buimpe, ke Petelo kubela ne: “Nukumbaje ku ditabuja dienu buimpe.”​—2 Petelo 1:5, NW; Yakobo 2:14-17.

15. (a) Bua tshinyi dimanya nditela panyima pa buimpe bu ngikadilu wa kukumbaja ku ditabuja? (b) Nngikadilu kayi mikuabu yatuambuluisha bua kulamata bikole ku ditabuja?

¹⁵ Panyima pa ditela buimpe, Petelo udi utela ngikadilu mikuabu isambombo itudi ne bua kukumbaja, anyi kusakidila ku ditabuja dietu. Bidi bitukengela yonso wa ku ngikadilu eyi bituikala basue ‘kushindama mu ditabuja.’ (1 Kolinto 16:13, NW) Bualu batontolodi bavua ‘bakonyangaja Mifundu’ ne bamuangalaja “malongesha adi adinga,” Petelo udi utela pashishe dimanya bu didi dia mushinga mukole, wamba ne: “Ku buimpe buenu [nukumbaje] dimanya.” Pashishe udi utungunuka ne: “Ku dimanya dienu [nusakidile] didikanda, ku didikanda dienu ditantamana, ku ditantamana dienu bulamate kudi Nzambi, ku bulamate buenu kudi Nzambi disuangana dia buena-muntu, ku disuangana dienu dia buena-muntu dinanga.”​—2 Petelo 1:5-7; 2:12, 13; 3:16, NW.

16. Ntshinyi tshienzeka bikala ngikadilu idi Petelo utela mikumbaja ku ditabuja, kadi ntshinyi tshienzeka bikalayi kayiyi mikumbaja?

¹⁶ Mbualu kayi buenzeka bikala malu aa muanda-mutekete makumbaja ku ditabuja dietu? Petelo udi wandamuna ne: “Bikala malu aa munda muenu ne avulangana, neanukande ku dikala bafube anyi batuke bua bidi bitangila dimanya dijalame dia Mfumu wetu Yezu Kristo.” (2 Petelo 1:8, NW) Ku lunga luseke, Petelo udi wamba ne: “Udi kayi nawo udi mpofu, kena umona kule, mmupue muoyo muvuabo bamukezule ku mibi yende ya kale.” (2 Petro 1:9, MMM) Bambisha ne: Petelo udi ulekela kuakula ku bungi, ne utuadija kuakula ku bumue. Nansha mudibi bibungamija mudi bamue bikale bampofu, bena tshipua-muoyo, ne kabayi bakezuke, ne bulenga buonso Petelo kêna usua kumvuija ne: mubadi yonso wa mukanda wende udi umue wa ku bantu aba.​—2 Petelo 2:2.

Udi ukolesha bana babu

17. Ntshinyi tshivua mua kuikala tshienzeje Petelo bua kusengelelaye ne dinanga dionso bua kuenza “malu aa”?

¹⁷ Pamu’apa mu dijingulula se: nangananga bapiabapia ke badi mua kudingibua bipepele, ne dinanga dionso Petelo udi ubakankamija ne: ‘Bana betu, nutambe kunanukila bua kujadika dibikidibua dienu ne disungula dienu; bua binuenza malu aa, kanuena nulenduka tshiendelele.’ (2 Petelo 1:10; 2:18) Bena nkristo bela manyi badi bakumbaja ku ditabuja diabu malu aa muanda-mutekete nebapete difutu dinene, bu mudi Petelo wamba ne: “Ke muanunzuluilabo kabidi tshiibi tshia Bukalenge bua kashidi bua Mfumu ne Mupandishi wetu Yezu Kristo.” (2 Petro 1:11, MMM) “Mikoko mikuabo” neipete bumpianyi bua kashidi pa buloba mu Bukalenge bua Nzambi.​—Yone 10:16; Matayo 25:33, 34.

18. Bua tshinyi Petelo mmudilongolole ‘misangu yonso bua kuvuluija’ bana babu?

¹⁸ Ne muoyo umue Petelo udi ujinga difutu dinene dia nunku bua bana babu. Udi ufunda ne: ‘Nunku nengikale mudilongolole misangu yonso bua kunuvuluija malu aa, nansha nuenu baamanye, ne nansha nuenu bajalame mu malu malelela.’ (2 Petelo 1:12) Petelo udi utumika ne muaku wa tshiena-Greke ste·riʹzo, mukudimuna apa ne: “bajalame” kadi muandamuna ne: “ukoleshe” mu mubelu wa kumpala uvua Yezu mupeshe Petelo: “Ukoleshe mitshima ya bana benu.” (Luka 22:32) Ditumika ne muaku au didi mua kufila lungenyi lua se: Petelo mmuvuluke mubelu mukole wakapetaye kudi Mfumu wende. Petelo udi wamba mpindieu ne: ‘Ndi ngela meji ne: bidi bimpe, pantshidi mu nzubu eu wa mubidi [mubidi wa bumuntu] bua meme kutabuluija mitshima yenu ku dinuvuluija dianyi, mumanye bianyi ne: diumusha dia nzubu wanyi eu wa mubidi dilualua lubilu.’​—2 Petelo 1:13, 14.

19. Ndiambuluisha kayi ditudi tukengela lelu’eu?

¹⁹ Nansha mudi mu bulenga buonso Petelo wamba mudi babadi ba mukanda wende bikale “bajalame mu malu malelela,” udi ujingulula ne: ditabuja diabu ndifuanyike kupueka ne mâyi. (1 Timote 1:19) Bu mudiye mumanye se: ukadi ne mikolo ku tshina, udi ukolesha bana babu pa kutela malu adibu mua kuvuluka pashishe bua kushalabu bakole mu nyuma. (2 Petelo 1:15; 3:12, 13) Bia muomumue, lelu’eu tudi tukengela mavuluija a ku musangu ne ku musangu bua kushala bashindame mu ditabuja. Kabiyi kutangila tshitudi anyi matuku atudi benze mu bulelela, katuena mua kulengulula dibala Bible pa tshibidilu, dilonga dia pa nkayetu, ne dibuela mu bisangilu bia tshisumbu. Bamue badi bakeba kua kudingila bua kubenga kubuela mu bisangilu, pa kuamba ne: mbatshioke bikole peshi ne: bisangilu bidi anu ne malu amue-amue anyi se: kabena babienza bimpe, kadi Petelo uvua mumanye mudi yonso wa kutudi mua kujimija ne lukasa luonso ditabuja bu tuetu mua kutamba kudieyemena.​—Mâko 14:66-72; 1 Kolinto 10:12; Ebelu 10:25.

Nshindamenu mukole bua ditabuja dietu

20, 21. Mmunyi muvua dikudimuka mpala dikoleshe ditabuja dia Petelo ne dia babadi ba mikanda yende, ne tuetu petu lelu’eu?

²⁰ Ditabuja dietu ndishindamene patupu pa mianu mifuikakaja ne budimu buonso anyi? Petelo udi wandamuna ne dishindika dionso ne: ‘Tuetu katuakalonda nsumuinu yakambabu ku budimu bua bantu patuakanumanyisha bua bukole ne bua [“dikalaku,” NW] bia Mukalenge wetu Yezu Kristo, kadi tuetu tuakadi bamonyi ba butumbi buende ku mêsu etu.’ Petelo, Yakobo, ne Yone bavua ne Yezu pakamonabu tshikena-kumona tshia Yezu mu bukokeshi bua Bukalenge. Petelo udi umvuija ne: ‘Yeye wakangata bunême ne butumbi kudi Nzambi Tatu pakalua dîyi dia nunku kudiye munkatshi mua butumbi bua bunême ne: Eu udi Muana wanyi munanga, disanka dianyi dionso didi kudiye; ne tuetu tuakumvua dîyi edi difuma mu diulu patuakadi nende ku mukuna au wa tshijila.’​—2 Petelo 1:16-18.

²¹ Pavua Petelo, Yakobo, ne Yone bamone tshikena-kumona atshi, bushuwa Bukalenge buakalua tshintu tshilelela kudibu! Petelo udi wamba se: ‘Ne tudi ne dîyi diakamba baprofete ditamba kujadikibua; nunku nudi nuenza bimpe [“mu diteyaku ntema,” NW].’ Eyowa, babadi ba mukanda wa Petelo, ne tuetu petu lelu’eu, tudi ne kabingila kimpe bua kuteya ntema ku milayi ya Bukalenge bua Nzambi. Mmunyi mutudi ne bua kuteya ntema? Petelo udi wandamuna ne: ‘Bu mudibu kudi muinda udi utema mu muaba wa mîdima, too ne patshia butuku ne pabanda mutoto wa nkesha mu mitshima yenu.’​—2 Petelo 1:19; Danyele 7:13, 14; Yeshaya 9:6, 7.

22. (a) Nku tshinyi kudi mitshima yetu ne bua kushala mitabale? (b) Mmunyi mutudi tuteya ntema ku dîyi diakamba baprofete?

²² Mitshima yetu ivua mua kuikala mu mîdima bu kuoku kakuyi bukenke pa dîyi diakamba baprofete. Kadi pa kuteya ntema ku dîyi edi, mitshima ya bena nkristo mmishale mitabale too ne padi butuku butshia, padi “mutoto wa nkesha,” Yezu Kristo, ubanda mu butumbi bua Bukalenge. (Buakabuluibua 22:16) Mmunyi mutudi lelu’eu tuteya ntema ku dîyi diakamba baprofete? Mmu dilonga dia Bible, didilongolola bua bisangilu ne didifilamu, ne mu ‘dinanukila kuikala mu malu aa, badifile ne mutshima wonso kudiwu.’ (1 Timote 4:15) Pikala dîyi diakamba baprofete ne bua kuikala bu muinda udi utema mu “muaba wa mîdima” (mitshima yetu), tudi ne bua kuanyisha bua dikale ne buenzeji buondoke kutudi​—mu majinga, mpampakenu, bisonsodi, ne bipatshila bietu. Tudi ne bua kuikala balongi ba Bible, bualu Petelo udi ukoma nshapita 1 ne: “Mulayi nansha umue wa Mifundu kawena ufuma ku dijingulula dia muntu pa nkayende. Bualu katshia mulayi ki mmutuala kudi disua dia muntu, kadi bantu bakakula malu a kudi Nzambi bu muvuabu benzeja kudi spiritu munsantu.”​—2 Petelo 1:20, 21, NW.

23. Nku tshinyi kudi nshapita wa kumpala wa 2 Petelo mulongolole babadi?

²³ Mu nshapita wa mbangilu wa mukanda wende muibidi, Petelo wakafila tshisonsodi tshikole bua tuetu kulamata bikole ku ditabuja dietu dia mushinga mukole. Tudi mpindieu balongolola bua kukonkonona malu a mushinga adi alonda. Tshiena-bualu tshidi tshilonda netshikonkonone nshapita 2 wa 2 Petelo, mudi mupostolo eu wakula bua lutatu lua buenzeji bubi bukavua bubuele mu bisumbu.

Udi muvuluke anyi?

◻ Bua tshinyi Petelo udi uzangika mushinga wa dimanya dijalame?

◻ Ntshinyi tshidi mua kuikala kabingila ka mudi buimpe butedibue bu ngikadilu wa kumpala wa kusakidila ku ditabuja?

◻ Bua tshinyi Petelo mmudilongolole misangu yonso bua kuvuluija bana babu malu?

◻ Nnshindamenu kayi mukole udi Petelo ufila bua ditabuja dietu?

[Tshimfuanyi mu dibeji 9]

Mapanga a Petelo kaakamufikisha ku dilekela ditabuja diende