Udi mua kuitabuja Nzambi udi ne bumuntu anyi?

“KABIENA bikulomba kuitabuja Nzambi bua wewe kuikala muena nkristo . . . Mpindieu tudi mu dishintuluka, kadi mu siekele wa 21 ekleziya neikale kayi ne Nzambi mu ngumvuilu wa pa tshibidilu,” ke muakumvuija mfumu munene kampanda wa malu a Nzambi wa mu université mu Grande-Bretagne. Uvua wakuila dingumba dia Mbuu wa Ditabuja dianyisha kudi bansaserdose bena mu Grande-Bretagne bapite pa lukama. “Bena nkristo bavidi ba dikalaku dia Nzambi” aba badi bajadika ne: ntendelelu mmufuka kudi bantu, ne se: Nzambi udi anu “lungenyi kampanda,” bu muakamba umue wabu. Nzambi udi kayi wa pa tshibidilu katshiena ukumbanangana ne ngelelu wabu wa meji.

“Nzambi mmufue” ke tshiambilu tshivua tshitangalake mu bidimu bia 1960. Tshivua tshileja mmuenenu ya Friedrich Nietzsche, muena nkindi wa bena Allemagne wa mu siekele wa 19, ne tshiakapesha bansonga bavule katamba ka kuapuka naku bua kuenza muabu muvuabu basue, bua kuditua mu buendenda ne dinua bintu bia lulengu kakuyi didikanda mu nsombelu. Kadi budikadidi bua nunku buakafikisha aba bakalua kumanyika bu ba-hippy ku nsombelu mulenga udi utamba kusankisha anyi?

Mu bine bidimu bia 1960 abi, muepiskopo muena Anglikane, John A. T. Robinson, wakapatula mukanda wende udi ujula dikokangana wa Honest to God (Muena bululame kudi Nzambi). Bavule ba ku bena diende bakamujana bua muvuaye wela meji bua Nzambi “bu anu mmuenenu wa buondoke mu malu a bantu.” Keith Ward, profesere wa teoloji wakakonka ne: “Ditabuja Nzambi didi umue mushindu wa tshitabataba tshia kale, tshidi bena meji bumbushe mpindieu anyi?” Mu diandamuna lukonko luende yeye muine, wakamba ne: “Kakuena tshintu tshidi ne mushinga mukole mu bitendelelu lelu’eu kupita dipetulula dimanya dia lungenyi lua pa tshibidilu lua Nzambi.”

Makenga ne Nzambi udi ne bumuntu

Bavule badi bitaba Nzambi udi ne bumuntu badi ne lutatu lua kusuikakaja ditabuja diabu ne malu a buôwa ne makenga adibu bamona. Tshilejilu, mu Luabanya 1996, bana batekete 16 bakashibua ku tshingoma ne bakabashipa pamue ne mulongeshi wabu, mu tshimenga tshia Dunblane, ku Écosse. Mukaji kampanda mupampakaja kudi bualu ebu wakamba ne: “Tshienaku ngumvua tshidi disua dia Nzambi to.” Tshinyongopelu tshia bualu ebu bua buôwa tshivua tshiumvuija mu kakanda kashiya pamue ne bilongo pambelu pa tshilongelu tshia bana abu. Bavua bafundepu ne: “BUA TSHINYI?” Mu diandamuna, ministre wa Katedrale ka Dunblane wakamba ne: “Kakuena diumvuija. Katuena mua kuandamuna bua tshinyi bualu ebu buvua ne bua kuenzeka.”

Pashishe mu tshine tshidimu atshi, ne tshikisu tshionso bakashipa mfumu mukuabu mutshikale nsonga ne mumanyike wa mu Ekleziya wa Angleterre. Tshikandakanda tshia Church Times tshiakamba ne: tshisumbu kampanda tshia bantu tshipampakane tshiakumvua diakre mukulu wa ku Liverpool wakula bua “dikokola ku tshiibi tshia Nzambi ne nkonko ya bua tshinyi? bua tshinyi?” Mfumu eu wa ekleziya kavua pende ne miaku ya busambi ya kudi Nzambi udi ne bumuntu.

Nenku, ntshinyi tshitudi ne bua kuitabuja? Mbia meji bua kuitabuja Nzambi udi ne bumuntu. Ke nsapi udiku bua kuandamuna nkonko mijula kuulu eku idi yeleshisha meji. Tudi tukulomba bua kutangila tshijadiki tshileja mu tshiena-bualu tshidi tshilonda.

[Tshimfuanyi mu dibeji 3]

Kakanda kavua kakonka ne: “Bua tshinyi?”

[Mêyi a dianyisha]

NEWSTEAM No. 278468/​Sipa Press