Buobumue bua buloba bujima​—Nebuikaleku bualu bulelela anyi?

“BITUIKALA ne bua kupatula bipeta bimpe mu ndelanganyi mikese idi ilua kumpala mu dishintulula buloba ebu budi ne matunga madikadile mutudi basombe bua bulue nsangilu mulelela wa buloba bujima, . . . nenku netuikale kabidi bajikije bushuwa mvita . . . Kadi bituapangila, pamu’apa kakuakuikala . . . nshidimukilu nansha.” Ke mudi Gwynne Dyer, mushikuluji wa malu a kale a mvita wamba mu mukanda wende udi ne tshiena-bualu ne: Mvita.

Dyer udi wamba ne: mikanda ya malu a kale mmiûle ne miyuki ya matunga ne bisumbu bikuabu bia bukole biakaditua mu mvita bua kujikija bilumbu biawu. Dipanga buobumue diawu diakabutuisha mioyo ya miliyo mivule ya bantu. Diumvuija dia Mukalenge Solomo dia mushindu uvua muanda eu muikale ne buenzeji kudi bantu mu tshikondo tshiende ditshidi diakanyine too ne lelu. Wakafunda ne: ‘Ngakatangila kabidi makenga onso adibu bakengesha nawu bantu muinshi mua dîba; monayi binsonji bia bavua bakengeshibua kabayi ne musambi! Bakabakengesha bavua ne bukole, bobu kabavua ne musambi.’​—Muambi 4:1.

Lelu’eu, anu bu mudi mushikuluji wa malu a kale mutela kuulu eku uleja, pa kumbusha luse bua ‘binsonji bia bavua bakengeshibua,’ kudi kabingila kakuabu bua kupeta mushindu kampanda wa kukudimuna buloba budi ne matunga madikadile mu nsangilu kampanda mulelela wa buloba bujima. Ke bua tshinyi lupandu mene lua nshidimukilu ludi mu njiwu! Mvita ya buena lelu idi ifila kabingila ka kutekemena dibutuka dia ditunga dionso didi dibuela mu mvita ne kayakushiya mutshimunyi nansha umue.

Buobumue bua buloba bujima nebuenzeke anyi?

Mmatekemena kayi bua buobumue bua buloba bujima? Nsangilu wa bantu udi mua kutshimuna makole adi atapululangana ne adi ateka lupandu lua buloba mu njiwu anyi? Bamue bantu badi bela meji nanku. John Keegan, mufundi wa tshikandakanda tshia mu Grande Bretagne tshia Daily Telegraph tshidi tshiakula bua malu a busalayi, udi ufunda ne: “Nansha mudiku dibuelakaja dia malu ne dielakana, kudi anu mushindu wa kumona ditundubuka ku kakese ku kakese dia tshidi tshimueneka bu buloba budi kabuyi mvita.”

Ntshinyi tshidi tshimupesha mmuenenu eu muimpe? Bua tshinyi bantu bavule badi bamueneka bikale ne ditekemena nansha mudi muyuki wa bukua-bantu wa mvita mule ne mudi dipangila bukokeshi bua kudilombola biakane dimueneke? (Yelemiya 10:23) Bamue bakamba umue musangu ne: ‘Bukua-bantu mbutangile kumpala. Miyuki ya kale idi ileja tshitembelu tshia dilubuluka ditungunuke.’ Nansha lelu’eu, bantu bavule badi bitabuja ne: mu mushindu kampanda bulenga bua muntu bua ku tshifukilu nebutshimune bubi. Adi nditekemena dilelela anyi? Peshi ntshingenyingenyi patupu tshiafikisha bantu ku dijimija ditekemena? J. M. Roberts, mushikuluji wa malu a kale, wakafunda bushuwa mu mukanda wende wa Shorter History of the World ne: “Mbikole bua kuamba ne: mu matuku atshilualua buloba ebu nebuikale mu bukubi ne bupole. Nshikidilu wa makenga a bantu kêna umueneka mpindieu to, peshi katuena ne nshindamenu wa kuitabila se: nekuikale nshikidilu ku makenga a bantu.”

Kudiku tubingila tulelela bua kuitabuja ne: bantu ne matunga nebatshimune bushuwa dipanga kueyemenangana diabu ne bilumbu bidi bibatapulula anyi? Peshi bidi bikengela bualu kampanda budi bupite madikolela a bantu? Tshiena-bualu tshidi tshilonda netshikonkonone nkonko eyi.

[Mêyi a dianyisha bua tshimfuanyi mu dibeji 2]

Tshimfuanyi tshia dibulungu pa tshizubu: Mountain High Maps® Copyright © 1995 Digital Wisdom, Inc.