Udi muvuluke anyi?

Udiku muanyishe dibala dia nimero ya ndekelu ya Tshibumba tshia Nsentedi anyi? Nanku anji tangila né udi mua kuandamuna ku nkonko idi ilonda eyi:

◻ Bua nsonga muena nkristo, malonga adi ne tshipatshila kayi tshinene?

Tshipatshila tshinene tshia malonga tshidi ne bua kuikala tshia kuambuluisha nsonga bua kuikalaye ministre mukumbane wa Yehowa. Ne ndongeshilu mutambe mushinga ku yonso ng’wa mu nyuma.​—15/8, dibeji dia 21.

◻ Ntubingila kayi tudiku bua kumanyisha bakulu bubi bunene buenza kudi muena nkristo netu?

Kamue kabingila kadiku bua kumanyisha bubi bunene nka se: bidi biambuluisha bua kukuba bukezuke bua tshisumbu. Kakuabu nka se: kuenza nunku kudi tshienzedi tshia dinanga dia Buena-nkristo diashila pa mêyi-maludiki dileja Nzambi, tshisumbu, ne muenji wa bubi.​—15/8, mabeji 28, 30.

◻ Kulama “bikole mu lungenyi dikalaku dia dituku dia Yehowa” kudi kumvuija tshinyi? (2 Petelo 3:12, NW)

Kudi kumvuija kubenga kusemeja “dituku dia Yehowa” kule mu lungenyi luetu. Katuena ne bua kupua muoyo se: dituku dialua Yehowa kubutula ndongoluelu eu wa malu dikadi pabuipi. Didi ne bua kutamba kuikala dilelela kutudi mu mushindu wa se: tudi tudimona patoke, bu didi buludiludi kumpala kuetu. (Sefanya 1:7, 14)​—1/9, dibeji dia 19.

◻ Bua tshinyi matuku a nshikidilu a ndongoluelu eu mubi mmatungunuke kupita muvua bavule batekemene?

Yehowa udi wangata ne mushinga tshintu tshidi bua diakalenga dia bukua-bantu buonso. Udi uditatshisha bua mioyo ya bantu. (Yehezekele 33:11) Tudi mua kuikala ne dieyemena dia se: nshikidilu nealue anu pa dîba diakane bua kukumbaja dilongolola dia Mufuki wetu wa meji onso ne wa dinanga.​—1/9, dibeji dia 22.

◻ Mmunyi mudi aba badi mu mudimu wa ku dîba ne ku dîba mua kulama disanka diabu nansha buobu mua kutuilangana ne ntatu?

Badi ne bua kuela meji ku mabenesha mavule adibu nawu ne kumanya se: bakuabu binunu bivule badi ne ntatu mipite bunene. (1 Petelo 5:6-9)​—15/9, dibeji dia 24.

◻ William Tyndale uvua ne tshipatshila kayi mu dikudimuna dia Bible?

Tshipatshila tshia Tyndale tshivua tshia kulekela Mifundu yakula ne muntu yonso mu mêyi majalame ne mapepele.​—15/9, dibeji dia 27.

◻ Mmunyi mutudi mua kuleja ne: tudi babingishi bena bulamatshi ba Dîyi dia Nzambi?

Tudi tuleja bulamatshi buetu ku Dîyi dia Nzambi pa kudiyisha bakuabu ne lukunukunu. Bu mutudi balongeshi, tudi ne bua kutumika ne Bible ne lubatshi luonso, katuyi tumukonyangaja anyi tualabaja kupitshisha tshidiye wamba bua tshiakanangane ne ngenyi yetu. (2 Timote 2:15)​—1/10, dibeji dia 20.

◻ Mmunyi mudi lungenyi lua mulùngu lua bulongolodi ebu mua kutekesha muoyo-mutoke wetu?

Lungenyi lua bulongolodi ebu ludi mua kutekesha muoyo-mutoke wetu pa kutuvuija katuyi ne disankishibua bua bitudi nabi ne kutusumpakeja bua kuteka bitudi tukengela ne bipatshila bietu nkayetu kumpala kua bia Nzambi. (Fuanyikija ne Matayo 16:21-23.)​—1/10, dibeji dia 29.

◻ Kusadila Yehowa ne anyima mujima kudi kumvuija tshinyi?

“Anyima” udi uleja muntu mujima, ne makokeshi ende onso a ku mubidi ne a mu lungenyi. Kusadila Yehowa ne anyima mujima kudi kumvuija didifila dietu, ditumika ne makokeshi etu onso ne ditumika ne makanda etu mu mushindu mutambe bunene udiku mu mudimu wa Nzambi. (Mâko 12:29, 30)​—15/10, dibeji dia 13.

◻ Ntshinyi tshidi nsapi bua kuikala muntu udi ulonda mêyi-maludiki a buena Nzambi?

Nsapi udi bushuwa kumanya Yehowa, bidiye musue, bidiye mubenge, ne malongolola ende. Padi mêyi-maludiki aa a nshindamenu adi atangila Nzambi mikale alombola nsombelu wetu, bushuwa adi alua mêyi-maludiki adi ne muoyo. (Yelemiya 22:16; Ebelu 4:12)​—15/10, dibeji dia 29.

◻ Basadidi ba Yehowa badi ne mmuenenu kayi wa nkatshinkatshi pa bidi bitangila bukokeshi bua bantu?

Badi ne ndubidilu mu malu a tshididi bualu badi basadila bu milopo anyi ba-ministre ba Bukalenge bua Nzambi. (2 Kolinto 5:20) Ku lukuabu luseke, badi bakokela aba badi mu bukokeshi bilondeshile kuondo kabu ka muoyo.​—1/11, dibeji dia 17.

◻ Ndilongesha kayi ditudi mua kupetela ku nsombelu wa muprofete Elisha?

Pakamubikilabu bua kuenza mudimu wa pa buawu ne Eliya, diakamue Elisha wakashiya budimi buende bua kusadila Eliya, nansha muvua imue ya ku midimu yende mikale mipuekele. (2 Bakelenge 3:11) Bamue ba ku basadidi ba Nzambi mbaleje lelu’eu lungenyi lua muomumue lua didipangisha amue masanka pa kulekela biabu bia kudikuatshisha nabi bua kuya kuyisha lumu luimpe mu teritware ya kule.​—1/11, dibeji dia 31.

◻ Mmibelu kayi ya dikuatshisha idi mu mukanda wa Yakobo?

Udi utuleja mushindu wa kuakama mateta, utubela bua kukandamena disungulula, ne utulomba bua kuikala ne bienzedi bilulame. Yakobo udi utubela bua kukanda ludimi, bua kukandamena buenzeji bua bulongolodi ebu, ne bua kulubuluja ditalala. Mêyi ende adi kabidi mua kutuambuluisha bua kuikala bena lutulu ne badifidi mu masambila.​—15/11, dibeji dia 24.

◻ Bua tshinyi Yehowa udi “mudiakaje bua kubuikidila”? (Musambu 86:5, NW)

Mu mushindu mupepele Yehowa udi ubuikidila bualu kêna upua muoyo bua se: tudi bifukibua bia lupuishi, tudi ne butekete budi tshipeta tshia dipanga bupuangane. (Musambu 103:12-14)​—1/12, mabeji 10, 11.

◻ Bua tshinyi tudi ne bua kuikala badiakaje bua kubuikidila bakuabu?

Bituabenga kubuikidila bakuabu padiku kabingila bua kuleja luse, bidi mua kunyanga malanda etu tuetu bine ne Nzambi. (Matayo 6:14, 15)​—1/12, dibeji dia 17.