Mikoko mikuabu ne tshipungidi tshipiatshipia

‘Bantu ba bende bonso badi [“balama nsabatu,” NW] bua kabamunyangi, badi balamata tshipungidi tshianyi bikole​—nendue ne bantu aba ku mukuna wanyi wa tshijila.’​—YESHAYA 56:6, 7.

1. (a) Bilondeshile tshikena-kumona tshia Yone, ntshinyi tshidibu bakumbaja padibu bakuate mpepele ya dilumbuluisha dia Yehowa? (b) Mmusumba kayi udi ukemesha wakamona Yone?

MU TSHIKENA-KUMONA tshinayi tshia mu mukanda wa Buakabuluibua, mupostolo Yone wakamona bakuate mpepele mibutudi ya dilumbuluisha dia Yehowa, eku benda bajikija ditua tshitampi pa bena mu “Izalele wa Nzambi.” Mbantu ba kumpala ku dikala babenesha ku butuangaji bua Yezu, tshitupa tshinene tshia dimiinu dia Abrahama. (Galatia 6:16, NW; Genese 22:18; Buakabuluibua 7:1-4) Mu tshikena-kumona atshi, Yone wakamona “musumba munene uvua muntu nansha umue kayi mua kubala, wa mu matunga onso ne bisa bionso ne bisamba bionso ne miakulu yonso . . . , [bela] mbila ne dîyi dikole bamba ne: ‘Lupandu tudi balupetele kudi Nzambi wetu udi musombe mu nkuasa wa bumfumu, ne kudi Muan’a mukoko.’” (Buakabuluibua 7:9, 10, NW) Mu diamba ne: “Lupandu tudi balupetele . . . kudi Muan’a mukoko,” bena musumba munene badi baleja ne: buobu pabu mbabenesha ku diambuluisha dia Dimiinu dia Abrahama.

2. Ndîba kayi diakamueneka musumba munene, ne mmunyi mudibu buwumanye?

² Bakajingulula musumba munene eu kale mu 1935, ne lelu udi ne bantu bapite pa miliyo itanu. Batua tshimanyinu bua kupanduka ku dikenga dinene, nebateke benamu ku luseke bua muoyo wa tshiendelele patapulula Yezu “mikoko” ne ‘mbuji.’ Bena nkristo ba mu musumba munene badi munkatshi mua “mikoko mikuabo” ya mu mufuanu wa Yezu wa bikumbi bia mikoko. Mbatekemene bua kuikala ne muoyo kashidi pa buloba bua mparadizu.​—Matayo 25:31-46; Yone 10:16; Buakabuluibua 21:3, 4.

3. Mmunyi mudi bena nkristo bela manyi ne mikoko mikuabu bashilangane pa bidi bitangile tshipungidi tshipiatshipia?

³ Bua bantu 144 000, dibenesha dia tshipungidi tshia Abrahama ndifila ku butuangaji bua tshipungidi tshipiatshipia. Bu mudibu babuedi ba mu tshipungidi etshi, badi balua “muinshi mua bulenga bukena butuakanyine” ne “muinshi mua mikenji idi itangila Kristo.” (Lomo 6:15, NW; 1 Kolinto 9:21, NW) Pa nanku, anu bantu 144 000 bena mu Izalele wa Nzambi ke badi badie ne banue mu mushindu muakanyine bimanyishilu mu Tshivulukilu tshia lufu lua Yezu, ne anu buobu ke badi Yezu muenze nabu tshipungidi tshia Bukalenge. (Luka 22:19, 20, 29) Bena mu musumba munene ki mbabuedi ba mu tshipungidi tshipiatshipia. Kadi, badi badisangisha ne Izalele wa Nzambi ne badi basomba nabu mu “buloba” buabu. (Yeshaya 66:8) Nenku mbia meji bua kuamba ne: buobu pabu badi balua muinshi mua bulenga bukena butuakanyine bua Yehowa ne muinshi mua mikenji idi itangila Kristo. Nansha mudibu kabayi babuedi ba mu tshipungidi tshipiatshipia, badi bapetediku ba masanka.

“Bantu ba bende” ne “Izalele wa Nzambi”

4, 5. (a) Bilondeshile Yeshaya, ntshisumbu kayi tshivua ne bua kusadila Yehowa? (b) Mmunyi mudi Yeshaya 56:6, 7 mukumbane pa musumba munene?

⁴ Muprofete Yeshaya wakafunda ne: ‘Bantu ba bende kabidi badi balamata kudi Yehowa bua kumukuatshila mudimu, bua kunanga dîna dia Yehowa, ne bua kuikalabu [“basadidi,” NW] bende, bantu bonso badi [“balama nsabatu,” NW] bua kabamunyangi, badi balamata tshipungidi tshianyi bikole, nendue ne bantu aba ku mukuna wanyi wa tshijila, nembavudijile disanka mu nzubu wanyi wa kutendelela. Milambu yabu ya kuosha ne milambu yabu ya biakudia neyitabujibue pa tshioshelu tshianyi.’ (Yeshaya 56:6, 7) Mu Izalele, ebi biakumvuija ne: “bantu ba bende,” bavua kabayi bena Izalele, bavua mua kutendelela Yehowa​—kunanga dîna diende, kutumikila mêyi a tshipungidi tshia Mikenji, kulama Nsabatu ne kufila milambu ku ntempelo, ‘nzubu wa tshitendelelu’ wa Nzambi.​—Matayo 21:13.

⁵ Mu matuku etu aa, ‘bantu ba bende badi balamate kudi Yehowa’ mmusumba munene. Buobu aba badi basadila Yehowa pamue ne Izalele wa Nzambi. (Zekâya 8:23) Badi bafila milambu mianyishibue ya muomumue anu bu Izalele wa Nzambi. (Ebelu 13:15, 16) Badi batendelela mu ntempelo wa mu nyuma wa Nzambi, ‘nzubu [wende] wa tshitendelelu.’ (Fuanyikija ne Buakabuluibua 7:15.) Batuku balama Nsabatu wa ku lumingu luonso anyi? Nansha bela manyi peshi mikoko mikuabu ki mbalombibue bua kuenza bualu ebu. (Kolosai 2:16, 17) Kadi, Paulo wakambila bena nkristo bela manyi bena Ebelu ne: ‘Kudi kushala dikisha dia [“nsabatu,” NW] dia bantu ba Nzambi. Bualu bua [muntu] wakamana kubuela mu dikisha diende, yeye muine wakikisha kabidi ku midimu yende bu muakikisha Nzambi ku midimu yende yeye.’ (Ebelu 4:9, 10) Bena Ebelu abu bakabuela mu ‘dikisha dia nsabatu’ edi pakakokelabu “buakane bua Nzambi” ne kulekela diteta kudibingisha bua midimu ya Mikenji. (Lomo 10:3, 4) Bampangano bena nkristo bela manyi badi bapeta diikisha dia muomumue pa kukokela ku buakane bua Yehowa. Musumba munene udi udisanga kudibu mu diikisha adi.

6. Mmunyi mudi mikoko mikuabu lelu’eu iditeka muinshi mua tshipungidi tshipiatshipia?

⁶ Pashishe, mikoko mikuabu idi iditeka muinshi mua tshipungidi tshipiatshipia anu bu muakaditeka bantu ba ku ba bende muinshi mua tshipungidi tshia Mikenji. Mmu mushindu kayi? Ki mmu dilua babuedimu kadi mu dikokela mikenji misuikakajaku ne mu dipetela masanka ku ndongoluelu yatshi. (Fuanyikija ne Yelemiya 31:33, 34.) Anu bu bena diabu bela manyi, mikoko mikuabu idi ne mikenji ya Yehowa mifunda “mu mitshima yabo.” Mbanange bikole ne badi batumikila mêyi-matuma pamue ne mêyi-maludiki a Yehowa. (Musambu 37:31; 119:97) Anu bu bena nkristo bela manyi, mbamanye Yehowa. (Yone 17:3) Netuambe tshinyi bua ditengula? Bidimu bitue ku 1 500 kumpala kua dienza dia tshipungidi tshipiatshipia, Mozese wakabela bena Izalele ne: “Nuditengule mu mitshima yenu.” (Dutelonome 10:16; Yelemiya 4:4) Nansha muvua ditengula dia ku mubidi dienzeja ku bukole dijike pamue ne Mikenji, bela manyi ne mikoko mikuabu badi ne bua ‘kutengula’ mitshima yabu. (Kolosai 2:11) Ku ndekelu, Yehowa udi ubuikidila bilema bia mikoko mikuabu bua mashi mamuangalaja a Yezu a “tshipungidi tshipiatshipia.” (Matayo 26:28, NW; 1 Yone 1:9; 2:2) Nzambi kêna wangata mikoko mikuabu bu bana ba mu nyuma, bu mudiye wangata bantu 144 000. Kadi udi ubala mikoko mikuabu bu miakane, mu ngumvuilu wa se: Abrahama uvua mubadibue muakane bu mulunda wa Nzambi.​—Matayo 25:46; Lomo 4:2, 3; Yakobo 2:23.

7. Lelu’eu, nditekemena kayi didi dimueneka kumpala kua mikoko mikuabu idi mibadibue miakane bu muvua Abrahama?

⁷ Bua bantu 144 000, kubadibua bakane kudi kunzulula njila wa dipeta diabu dia ditekemena dia kukokesha ne Yezu mu Bukalenge bua mu diulu. (Lomo 8:16, 17; Galatia 2:16) Bua mikoko mikuabu, kubadibua bakane bu balunda ba Nzambi kudi kubapesha mushindu wa kupeta ditekemena dia muoyo wa tshiendelele mu buloba bua mparadizu​—nansha mu dipanduka ku Armagedone bu bena mu musumba munene anyi ku diambuluisha dia ‘dibiishibua dia bakane.’ (Bienzedi 24:15, NW) Ndisanka kayipu dia kuikala ne ditekemena bu edi ne dia kuikala mulunda wa Mfumu mukulu wa bionso, dia ‘kushikama mu nzubu [wende] wa ntenta’! (Musambu 15:1, 2) Eyowa, ne bela manyi ne mikoko mikuabu mbabenesha mu mushindu mulenga ku butuangaji bua Yezu, Dimiinu dia Abrahama.

Dituku ditambe bunene dia Dibuikidila

8. Milambu ya Dituku dia Dibuikidila muinshi mua Mikenji ivua tshimfuanyi tshia tshinyi?

⁸ Pavuaye wakula bua tshipungidi tshipiatshipia, Paulo wakavuluija babadi bende bua Dituku dia Dibuikidila dia ku tshidimu mu tshipungidi tshia Mikenji. Dituku adi, bavua bafila milambu mishilangane​—umue bua tshisa tshia buakuidi tshia Lewi ne mukuabu bua bisa 12 bivua kabiyi bia buakuidi. Muanda eu ukadi mumvuija kale ne: ntshimfuanyi tshia mulambu munene wa Yezu uvua ne bua kukuatshisha bantu 144 000 badi ne ditekemena dia muoyo mu diulu ne miliyo mivule ya bantu badi ne ditekemena dia muoyo pa buloba.a Paulo wakaleja ne: mu dikumbana dia Dituku dia Dibuikidila, badi bafila masanka a mulambu wa Yezu ku diambuluisha dia Dituku ditambe bunene dia Dibuikidila mu tshipungidi tshipiatshipia. Bu mudiye Muakuidi Munene wa dituku edi ditambe bunene, Yezu wakafila muoyo wende mupuangane bu mulambu wa dibuikidila bua kumona mua kupetela bukua-bantu ‘dipikula dia tshiendelele.’​—Ebelu 9:11-24.

9. Bu muvuabu mu tshipungidi tshipiatshipia, ntshinyi tshivua bena nkristo bena Ebelu bela manyi mua kupeta?

⁹ Bena nkristo bavule bena Ebelu ba mu siekele wa kumpala batshivua ne “lukunukunu lua miken[ji] ya Mose.” (Bienzedi 21:20) Nenku mu mushindu muakanyine, Paulo wakabavuluija ne: “[Yezu] [“udi mutuangaji wa tshipungidi tshipiatshipia,” NW]; uvua mufue bua kujikija bilema bia mu [“tshipungidi tshia kumpala,” NW], bua babikila bapete bumpianyi bua kashidi buvuabo babalaye.” (Bena Hebreyi 9:15, MMM) Tshipungidi tshipiatshipia tshiakapikula bena nkristo bena Ebelu ku tshipungidi tshia kale, tshivua tshileja patoke dikala bena mpekatu diabu. Ku diambuluisha dia tshipungidi tshipiatshipia, bavua mua kupeta “[dilaya,” NW] dia bumpianyi bua kashidi [bua mu diulu].”

10. Bela manyi ne mikoko mikuabu badi bela Nzambi tuasakidila wa tshinyi?

¹⁰ “Eu yonso” udi “uleja ditabuja kudi Muana” neapetele dikuatshisha ku mulambu wa tshia-bupikudi. (Yone 3:16, 36, NW) Paulo wakamba ne: ‘Kristo, mumana kulambula musangu amu umue bua kujimija mibi ya bantu bavule, neamueneke tshiakabidi, kabitshiyi bua mibi, kadi bua kupesha badi bamuindila lupandu.’ (Bena Hebreyi 9:28, MMM) Lelu’eu, munkatshi mua aba badi bindila Yezu ne muoyo mujima mudi bena nkristo bela manyi badi bashale ne muoyo ba mu Izalele wa Nzambi, ne bantu miliyo mivule badi benza musumba munene, badi ne bumpianyi bua tshiendelele. Bisumbu ebi bionso bibidi bidi bisakidila Nzambi bua tshipungidi tshipiatshipia ne bua mabenesha mafidi a muoyo adi masuikilaku, ne bua Dituku ditambe bunene dia Dibuikidila ne bua mudimu wa Yezu, Muakuidi Munene, mu Mutambe Bunsantu wa mu diulu.

Ne bivule bia kuenza mu mudimu wa tshijila

11. Bikale ne kuondo ka muoyo kakezula ku diambuluisha dia mulambu wa Yezu, ntshinyi tshidi bela manyi ne mikoko mikuabu benza ne disanka?

¹¹ Mu mukanda wende mufundila bena Ebelu, Paulo wakazangika mushinga mubandile wa mulambu wa Yezu mu ndongoluelu wa tshipungidi tshipiatshipia patudi tuwufuanyikija ne milambu ya mpekatu mifila mu tshipungidi tshia kale. (Ebelu 9:13-15, NW) Mulambu mutambe buimpe wa Yezu udi ne bukokeshi bua ‘kukezula tuondo tuetu tua muoyo ku midimu mifue bua tumone mua kuenzela Nzambi wa muoyo mudimu wa tshijila.’ Bua bena nkristo bena Ebelu, “midimu mifue” ivua yumvuija “ntupakanyi muinshi mua tshipungidi tshikulukulu.” Bua bena nkristo lelu’eu, midimu eyi idi ikonga mpekatu mienza kale idibu balejile dinyingalala dilelela ne idi Nzambi mubabuikidile. (1 Kolinto 6:9-11) Bikale ne tuondo tua muoyo tukezuke, bena nkristo bela manyi badi benzela “Nzambi wa muoyo mudimu wa tshijila,” ne ke mudi musumba munene wenza. Bamane kukezula tuondo tuabu tua muoyo ku diambuluisha dia “mashi a Muan’a mukoko,” badi mu ntempelo munene wa mu nyuma wa Nzambi, “bamuenzela mudimu wa tshijila munya ne butuku.”​—Buakabuluibua 7:14, 15, NW.

12. Mmunyi mutudi tuleja ne: tudi ne “dishindika dia tshishiki dia ditabuja”?

¹² Kabidi, Paulo wakamba ne: “Tusemenayi ne mitshima milelela mu dishindika dia tshishiki dia ditabuja, bamane kuikala ne mitshima yetu, bua dimiamina, mikezula ku kuondo ka muoyo kabi ne mibidi yetu miowesha ne mâyi makezuke.” (Ebelu 10:22, NW) Mmunyi mutudi mua kuleja ne: tudi ne “dishindika dia tshishiki dia ditabuja”? Paulo wakabela bena nkristo bena Ebelu ne: “Tulamayi bikole dijikula dia patoke dia ditekemena dietu [dia mu diulu] kakuyi ditenkakana, bualu udi mulaye mmuena lulamatu. Tukenketanganayi bua kusakangana ku dinanga ne ku midimu milenga, katuyi tulekela didisangisha dietu popamue, anu bu mudi tshilele tshia bamue, kadi tukankamijanganayi, ne tutambe kuenza nunku bu munudi numona dituku dienda disemena pabuipi.” (Ebelu 10:23-25, NW) Bikala ditabuja dietu ne muoyo, tuetu petu ‘katuakulekela didisangisha dietu popamue.’ Netusanke bua kusaka bana betu, buobu pabu batusaka ku dinanga ne ku midimu milenga ne bua batukoleshe bua mudimu wa mushinga mukole wa dimanyisha patoke ditekemena dietu, nansha bikaladi dia muoyo pa buloba anyi mu diulu.​—Yone 13:35.

‘Tshipungidi tshia tshiendelele’

13, 14. Mmu mishindu kayi mudi tshipungidi tshipiatshipia tshikale tshia tshiendelele?

¹³ Ntshinyi tshidi tshienzeka padi ba ndekelu ba ku bantu 144 000 bakumbaja ditekemena diabu dia mu diulu? Tshipungidi tshipiatshipia netshilekele ditumika anyi? Dîba adi, muntu nansha umue muena mu Izalele wa Nzambi kakuikala mushale pa buloba. Babuedi bonso ba mu tshipungidi nebikale ne Yezu ‘mu bukalenge bua Tatu [wende].’ (Matayo 26:29) Kadi tudi tuvuluka mêyi a Paulo mu mukanda wende mutumina bena Ebelu ne: ‘Nzambi wa ditalala wakabisha mulami munene wa mikoko munkatshi mua bafue kabidi ku mashi a tshipungidi tshia tshiendelele.’ (Ebelu 13:20, disendamija miaku ndietu; Yeshaya 55:3) Mmu ngumvuilu kayi mudi tshipungidi tshipiatshipia tshikale tshia tshiendelele?

¹⁴ Tshia kumpala: ntshishilangane ne tshipungidi tshia Mikenji ne kabakupingaja tshikuabu pa muaba watshi. Tshibidi: bipeta bia mudimu watshi mbia kashidi, anu mudi mene bukokeshi bua Yezu. (Fuanyikija Luka 1:33 ne 1 Kolinto 15:27, 28.) Bukalenge bua mu diulu budi ne muaba wa kashidi mu malongolola a Yehowa. (Buakabuluibua 22:5) Ne tshisatu: mikoko mikuabu neyitungunuke ne kupetela masanka ku ndongoluelu wa tshipungidi tshipiatshipia. Mu Bukokeshi bua Bidimu Tshinunu bua Kristo, bantu bena lulamatu nebatungunuke ne ‘kuenzela [Yehowa] mudimu wa tshijila munya ne butuku mu ntempelo wende’ anu bu mudibu benza mpindieu. Yehowa kakujula tshiakabidi mpekatu yabu ya kale ikavuaye mubabuikidile pa tshishimikidi tshia “mashi [a Yezu] a tshipungidi.” Nebatungunuke ne kuikala ne ngikadilu muakane bu balunda ba Yehowa, ne mikenji yende neyishale mifunda mu mitshima yabu.

15. Umvuija malanda ikala nawu Yehowa ne batendeledi bende ba pa buloba mu bulongolodi bupiabupia.

¹⁵ Yehowa neikale mua kuamba dîba adi bua bantu aba basadidi ne: ‘Ndi Nzambi wabu, ne buobu badi bantu banyi’ anyi? Eyowa. ‘Yeye neikale nabu, ne buobu nebikale bantu bende; ne Nzambi muine neikale nabu.’ (Buakabuluibua 21:3, disendamija miaku ndietu.) Nebalue “tshitudilu tshia bansanto,” baleji-mpala ba pa buloba ba “musoko munangibue,” mukaji musela wa mu diulu wa Yezu Kristo. (Buakabuluibua 14:1; 20:9; 21:2) Bionso ebi nebikale mua kuenzeka bua ditabuja diabu mu “mashi [a Yezu] a tshipungidi” mamuangalaja ne bua dikokela diabu kudi bakalenge ne bakuidi ba mu diulu, aba bavua benza Izalele wa Nzambi patshivuabu pa buloba.​—Buakabuluibua 5:10.

16. (a) Mmalu kayi adi mindile aba babiishibua pa buloba? (b) Mmabenesha kayi alua ku ndekelu kua bidimu tshinunu?

¹⁶ Netuambe bishi bua bafue badibu babiisha pa buloba? (Yone 5:28, 29) Buobu pabu nebabikidibue bua ‘kudibenesha’ ku diambuluisha dia Yezu, Dimiinu dia Abrahama. (Genese 22:18, NW) Nebikale kabidi ne bua kunanga dîna dia Yehowa, kumusadila, kufila milambu mianyishibue ne kuenza mudimu wa tshijila mu nzubu wende wa tshitendelelu. Aba badi benza nenku nebabuele mu diikisha dia Nzambi. (Yeshaya 56:6, 7) Pabuipi ne ku ndekelu kua bidimu tshinunu, bena lulamatu bonso nebikale bakadi bafikisha ku bupuangane bua bumuntu ku butuangaji bua busadidi bua Yezu Kristo ne bakuidi nende 144 000. Nebikale bakane, ki mbabadibue patupu bakane bu balunda ba Nzambi. ‘Nebapete muoyo,’ bikale badikadile kashidi ku mpekatu ne lufu bipiana kudi Adama. (Mamanyisha 20:5, MMM; 22:2) Adi nedikale dibenesha kayipu! Bilondeshile mmuenenu wetu lelu, bidi bimueneka ne: mu tshikondo atshi mudimu wa buakuidi wa Yezu ne wa bantu 144 000 newikale ukadi mukumbaja. Mabenesha a Dituku ditambe bunene dia Dibuikidila nebikale bamane kuakumbaja tshishiki. Pashishe, Yezu ‘neafile bukalenge kudi Nzambi, Tatu mene.’ (1 Kolinto 15:24) Nekuikale diteta dia ndekelu bua bukua-bantu, ne pashishe nebabutule bua kashidi Satana ne ba-demon bende.​—Buakabuluibua 20:7, 10.

17. Pa kutangila disanka didi dituindile, ntshinyi tshidi yonso wa kutudi ne bua kuikala mupangadije bua kuenza?

¹⁷ Mmudimu kayi, bikalauku, wikala nawu ‘tshipungidi tshia tshiendelele’ mu tshikondo tshia disanka tshiatuadija dîba adi? Katuena ne tshia kuamba pa bualu ebu. Bikadi Yehowa musokolole mbikumbane bua mpindieu. Bidi bitukemesha bikole. Anji kuela meji​—muoyo wa tshiendelele bu bena mu ‘diulu dipiadipia ne buloba bupiabupia’! (2 Petelo 3:13) Tshintu nansha tshimue katshitekeshiku dijinga dietu dia kupiana dilaya adi. Pamu’apa ki mbipepele bua kushala bashindame. Paulo wakamba ne: “Nudi nukengela ditantamana, bua se: panyima pa nuenu bamane kuenza disua dia Nzambi, nudi mua kupeta dikumbana dia dilaya.” (Ebelu 10:36, NW) Kadi vuluka ne: lutatu luonso lutudi ne bua kutshimuna, buluishi buonso butudi ne bua kutantamena, bidi bilua tshianana patudi tubifuanyikija ne disanka didi dituindile. (2 Kolinto 4:17) Pa nanku, muntu nansha umue wa kutudi kikadiku ‘munkatshi mua badi baluka tshianyima too ne ku dibutuka.’ Kadi, tudilejeku bikale ‘munkatshi mua badi ne ditabuja too ne ku dipeta dia muoyo.’ (Ebelu 10:39) Buonso buetu tuikaleku ne dieyemena dia tshishiki kudi Yehowa, Nzambi wa bipungidi, bua dibenesha dia tshiendelele dia muntu yonso wa kutudi.

[Mêyi adi kuinshi]

Uvua mumvue anyi?

◻ Pa kumbusha bena nkristo bela manyi, mbanganyi badi benda babeneshibua ku butuangaji bua Dimiinu dia Abrahama?

◻ Mu dikala babenesha ku butuangaji bua tshipungidi tshipiatshipia, mmunyi mudi mikoko mikuabu mifuane ba-prozelite muinshi mua tshipungidi tshia kale?

◻ Mmunyi mudi mikoko mikuabu mibenesha ku diambuluisha dia Dituku ditambe bunene dia Dibuikidila?

◻ Bua tshinyi Paulo wakabikila tshipungidi tshipiatshipia ne: ‘tshipungidi tshia tshiendelele’?

[Kazubu mu dibeji 21]

Mudimu wa tshijila mu ntempelo

Musumba munene udi utendelela ne bena nkristo bela manyi mu lubanza lua pa buloba lua ntempelo munene wa mu nyuma wa Yehowa. (Buakabuluibua 7:14, 15; 11:2) Kakuena kabingila bua kukoma ne: badi mu Lubanza lutapulula lua Bampangano. Pavua Yezu pa buloba, kuvua Lubanza lua Bampangano mu ntempelo. Kadi, mu plan mienzeja ku spiritu wa Nzambi ya ntempelo wa Solomo ne wa Yehezekele, kamuvua ndongoluelu wa Lubanza lua Bampangano. Mu ntempelo wa Solomo muvua lubanza lua pambelu muvua bena Izalele ne ba-prozelite, balume ne bakaji, batendelela pamue. Etshi ntshilejilu tshia tshiprofete tshia lubanza lua pa buloba lua ntempelo wa mu nyuma, muvua Yone mumone musumba munene wenza mudimu wa tshijila.

Kadi, anu bakuidi ne bena Lewi ke bavua mua kubuela mu lubanza lua munda, muaba uvua tshioshelu tshinene tshisanganyibua; anu bakuidi ke bavua mua kubuela mu Munsantu; ne anu muakuidi munene ke uvua mua kubuela mu Mutambe Bunsantu. Mbiumvuike ne: lubanza lua munda ne Munsantu bidi mundidimbi wa nsombelu wa pa buende wa mu nyuma wa bena nkristo bela manyi badi pa buloba. Ne Mutambe Bunsantu udi tshimfuanyi tshia diulu dine, muaba udi bena nkristo bela manyi bapetela muoyo udi kawuyi ufua pamue ne Muakuidi wabu Munene wa mu diulu.​—Ebelu 10:19, 20.

[Tshimfuanyi mu dibeji 23]

Pa kutangila disanka didi dituindile, ‘tuikalayi ne ditabuja too ne ku dipeta dia muoyo’