Bamanyishi ba Bukalenge badi balonda

Nzambi udi uyikolesha mu Alaska

MUINSHI mua tshitatutatu tshia neje ne mabue a mashika, katete kakese nkindile mpunga wa kudiunda kufika ku dikola. Munda mua ngondo mîpi isatu ya muvu wa été mu Alaska, lutete lua shu lua bunene bua milimetre 3 ludi mua kudiunda kufika nansha ku kilo 40! Eyowa, ditunga edi divua bantu ba bungi bela meji kumpala ne: mbuloba buatuke ne bua mashika makole didi mua kupatula bimuma bivule.

Mbilelela nangananga bua budimi bua mu nyuma mu Alaska. Muine amu, mu ditunga dia mivu ya hiver mile, Bantemu ba Yehowa badi batungunuka ne kukuna ntete ya Bukalenge. Anu bu mu bitupa bikuabu bia buloba, Nzambi udi ukolesha lutete mu mitshima ya bufuke.​—1 Kolinto 3:6, 7.

● Pavuaye mu bise wa balongi, nsonga kampanda Ntemu mubikila ne: Vanessa wakamona mulongi nende, Ann, uvua misangu yonso musombe pa nkayende. Ann uvua umueneka mubungame, ke Vanessa kubikila Ann bua kusombaye pabuipi nende. Kabiena bikemesha muvua Ann mubungame! Mamuende uvua mufue disama dia mioyo, ne katupa kîpi pashishe, tatuende kufuaye kansere. Ke bua tshinyi Ann uvua musombele ku balela bende mu Alaska.

Vanessa wakapitshila ku nzubu kuvua mumanyangana nende mupiamupia eu pavuaye mu mudimu wa budimi mu Disambombo kampanda, ne kumushilaye broshire wa Dieu se soucie-t-il vraiment de nous? Mu Dimue diakalonda pavuabu mu kalasa, Ann wakakeba nsonga eu Ntemu. Ann uvua ne nkonko ya bungi pa Bible, nkonko yakandamuna Vanessa. Wakebeja ne: “Nutu nuenzela bisangilu bienu penyi?” Dilolo adi Ann wakabuela mu tshisangilu tshiende tshia kumpala ku Nzubu wa Bukalenge.

Kabiakanenga mutantshi mule bua muan’a nshiya eu wa bidimu 17 kupetaye ‘batatu’ ne ‘bamamu’ bavule, anu bu muakalaya Yezu. (Matayo 19:29) Ne tshivua tshikondo tshia disanka bua kumona Ann musangale ne ufukisha mimuemue pavuaye uleja didilambula diende kudi Yehowa pa kutambula mu mâyi mu Mpungilu wa Distrike wa “Batuadi ba mukenji wa ditalala dia Nzambi.”

● Mu bitupa bia kule bia mu rejon mualabale wa Arktike ku Alaska​—mudi misoko mitapulula kudi nkama mivule ya maloba kaayi masa—​mbatumike ne ndeke wa makapakapa abidi wa Société Watch Tower bua kukuna ntete ya Bukalenge mu binsanga bipite pa 150. Kadi didiunda dia mu nyuma ku diambuluisha dia dilonga dia Bible dia pa tshibidilu ndishindamene pa difundilangana mikanda. Bu mudi difunda mikanda dikale bualu bukole bua bantu ba bungi, bidi bikengela bua mulongeshi wa Bible ikale muntu mutabuluke bua kumona mua kulama disankidila dia mulongi ne luya. Mmunyi mudibi mua kukumbana?

Kathy wakalombola dilonga dia Bible didi dilubuluka ne Edna, nansha muvuabu bashilangane mutantshi wa kilometre 600! Pamutu pa kutentula patupu nkonko mu mukanda udi wambuluisha bua kulonga, Kathy wakasakidila dibeji dikuabu pa bule divua ne nkonko ne wakashiya muaba wa kufundila mandamuna. Panyima pa Edna mumane kuujamu mandamuna, Kathy uvua wandamuna ne usakidilamu mumvuija avua akengedibua bua kutokesha kanungu kampanda. Kathy udi wamba ne: “Ngakalama Disatu dilolo bua ‘dilonga’ dietu, ne ngakateta bua kunemeka ndongamu (programe) eu anu mumvua mua kuenza bua dîba dijadika bua dilonga dionso dia Bible. Mvua ntumina kabidi Edna amvelope mulamika ntembele muikale ne adrese wanyi. Bu muvuabi bilomba mbingu ibidi bua mukanda kufikawu, dilonga ku diambuluisha dia difundilangana mikanda diakamueneka bu dia majetete.”

Ela meji bua disanka divuaku pavua Kathy ne Edna bapetangane mpala ne mpala mu mpungilu wa distrike mu Anchorage panyima pa ngondo dikumi ya dilonga ku diambuluisha dia difundilangana mikanda! Bantemu bavua kabidi ne disanka dia kuikala ne balongi ba Bible ne basankididi bakuabu munkatshi mua babuedi ba mu mpungilu bafume mu misoko mivule miditole ya mu Alaska.

Nansha mudi didiunda mua kumueneka pamu’apa bu dia majetete, imue “mitshi miana” idi ikola ne lukasa padiyi ku butoke bua bulelela. Patudi tutangila muayene, basamunyi bapiabapia ba Yehowa bapite pa lukama badi batambula ku tshidimu tshionso mu Alaska! Tudi tuamba ne: “Tuasakidila, Yehowa,” bua diyikolesha!