“Bia bukole ne bituishi”

“NENTUMIKE nende kubangila makelela mu mudimu wa buambi, bualu bijadikilu bidimu bidi bushuwa bia bukole ne bituishi,” ke muakafunda Ntemu wa Yehowa kampanda wa mu France. Ntemu mukuabu wa mu États-Unis wakafunda ne: “Ngakamubala diakamue ne tshiena mua kujingakana bua kutumika nende mu mudimu wa budimi, bualu tudi tupetangana ne bantu bavule batambe badi ne kalèngù ne badi kabayi beyemena Bible.” Bavua bakula bua tshinyi? Broshire wa mabeji 32 udi ne tshiena-bualu tshia Un livre pour tous (Mukanda bua bantu bonso), mupatula kudi Société Watch Tower mu Mpungilu ya Distrike ya “Ditabuja mu Dîyi dia Nzambi” mienza mu 1997/98.

Mukanda eu uvua mulongoluela bateleji kampanda ba pa buabu​—aba badi mua kuikala balonge bikole kadi kabayi batambe kumanya Bible. Bantu bavule ba nunku badi ne mmuenenu mikolakane pa Bible, nansha mudibu kabayi banji kudibadilaye. Tshipatshila tshia broshire eu ntshia kutuisha mubadi bua se: mu mishindu yonso Bible mmuakanyine dimukonkonona. Broshire eu kêna usaka mubadi bua itabe mmuenenu wa se: Bible mmuenzeja ku spiritu wa Nzambi. Kadi, udi ulekela malu menzeka adiakuila nkayawu. Mfundilu ki ng’wa diambu, kadi mmutoke ne wa buludiludi.

Anu mudi mumvuija matela kuulu eku aleja, aba bavua mu mpungilu ayi bavua ne dijinga dikole dia kutumika ne broshire eu mu mudimu wabu wa budimi. Tshilejilu, mu France bakalongolola kampanye ka bumanyishi bua pa buabu mu dia 23 ne dia 24 Tshimungu pavua bansonga bakumbudi nkama ya binunu ba ku ntengu yonso ya buloba basangile mu Paris bua Dituku dia Bansonga bua Buloba bujima. Bantemu batue ku 2 500 (nangananga ba bidimu bibangile ku 16 too ne ku 30) bakabanya kopi 18 000 ya broshire eu mu Anglais, Mfualansa, tshiena-Allemagne, tshiena-Italie, tshiena-Pologne ne mu tshiena-Espagne.

Mu mishindu yonso, tutumikayi ne broshire eu wa Un livre pour tous mu mudimu wetu. Mukanda eu wikaleku ne dikuatshisha mu dituisha bantu bedi ba meji bua se: badi ne bua kudikonkonuena Bible.