Mukanda bua bantu bonso

‘Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’​—BIENZEDI 10:34, 35.

1. Mmunyi muakandamuna mulongeshi kampanda pakamukonkabu tshivua meji ende pa Bible, ne ntshinyi tshiakapangadijaye bua kuenza?

MULONGESHI uvua kumbelu mu Dia lumingu kampanda mu mapingaja, kayi mutekemene muenyi nansha umue. Kadi pakamukumbulabu kudi muanetu wa bakaji muena nkristo, wakateleja. Muanetu wa bakaji eu wakakula bua dinyanguka dia nyunguluilu ne bua matuku atshilualua a buloba​—biena-bualu ebi biakasankisha mulongeshi. Kadi, pakabueja muanetu Bible mu diyuki diabu, mulongeshi wakamueneka muikale ne mpata. Nenku muanetu wa bakaji wakamukonka tshivua meji ende pa Bible.

“Mmukanda muimpe uvuabu bafunde kudi bamue bantu ba meji,” ke muakandamuna mulongeshi, “kadi katuena ne bua kuangata Bible ne mushinga wa bungi.”

“Ukadiku mubale Bible anyi?” muanetu eu kumuebejaye.

Mupapuisha, mulongeshi eu uvua ne bua kuitaba ne: kavua muanji kumubala.

Pashishe muanetu kumukonkaye ne: “Mmunyi muudi mua kuakula ne dituishibua dikole pa mukanda uudi kuyi muanji kubala?”

Muanetu wa bakaji eu uvua muambe mêyi avua atuisha. Mulongeshi wakapangadija bua kukonkonona Bible ne pashishe kupetelapu mmuenenu kampanda.

2, 3. Bua tshinyi Bible mmukanda udi kauyi mumanyike bua bantu ba bungi, ne ebi bidi bitukebela lutatu kayi?

² Mulongeshi eu kêna nkayende. Bantu ba bungi badi ne mmuenenu misumisha pa Bible nansha mudibu kabayi banji kumubala buobu bine. Badi mua kuikala ne Bible. Badi mene mua kuanyisha mfundilu wende anyi mushinga wa malu a kale adimu. Kadi bua bantu bavule, mmukanda utubu kabayi banji kubala. Bamue batu bamba ne: ‘Tshiena ne dîba dia kubala Bible.’ Bakuabu batu badiebeja ne: ‘Mmunyi mudi mukanda wa kale mua kuikala ne mushinga mu nsombelu wanyi?’ Mmuenenu bu eyi idi itukebela lutatu lua bushuwa. Bantemu ba Yehowa badi bitaba ne dishindika dionso ne: Bible “mmuenzeja ku spiritu wa Nzambi ne udi ne mushinga bua kulongesha.” (2 Timote 3:16, 17, NW) Kadi, mmunyi mutudi mua kutuisha bantu se: badi ne bua kukonkonona Bible nansha buobu ba dikoba, tshisamba anyi tshisa kayi?

³ Tutangilayi tumue tubingila tudi tuleja bua tshinyi Bible mmuakanyine dimukonkonona. Dikonkonona dia nunku didi mua kutukumbaja bua kuelangana meji ne aba batudi tupeta mu mudimu wetu, pamu’apa kubatuisha ne: badi ne bua kukonkonona tshidi Bible wamba. Kabidi, dikonkonona edi didi ne bua kukolesha ditabuja dietu tuetu bine dia se: Bible udi bushuwa tshidiye wamba​—‘dîyi dia Nzambi.’​—Ebelu 4:12.

Mukanda udibu batambe kuabanya pa buloba bujima

4. Bua tshinyi tudi mua kuamba ne: Bible mmukanda udibu batambe kuabanya pa buloba bujima?

⁴ Tshia kumpala, Bible mmuakanyine dimuangata ne mushinga bualu mmukanda udibu batambe kuabanya ne kukudimuna mu miyuki yonso ya bantu. Kukadi bidimu bipite pa 500, mpatuidi wa kumpala mutapa ku biamu bia maleta adi enda wakapatukila ku tshitapilu tshia mikanda tshia Johannes Gutenberg. Katshia pinapu, mbatape ku biamu bungi butshinka bua miliyare inayi ya Bible, mujima anyi bitupa. Mu 1996 bavua bakudimune Bible mujima anyi bitupa biende mu miakulu minene ne mikese 2 167.a Bantu bapite pa bia pa lukama 90 badi mua kupeta nansha tshitupa tshia Bible mu muakulu wabu. Kakuena mukanda mukuabu nansha umue​—wa malu a Nzambi anyi wa manga malu—​udi mua kusemena pabuipi ne Bible!

5. Bua tshinyi tudi ne bua kutekemena bua bantu kupetabu Bible pa buloba bujima?

⁵ Bishiferi nkayabi kabiena bijadika ne: Bible n’Dîyi dia Nzambi. Nansha nanku, tudi ne bua kutekemena se: bushuwa muyuki muenzeja ku spiritu wa Nzambi uvua ne bua kufika kudi bantu pa buloba bujima. Ndekelu wa bionso, Bible nkayende udi utuambila ne: ‘Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’ (Bienzedi 10:34, 35) Kayi bu mukanda kayi mukuabu, Bible mmusambuke mikalu ya matunga ne mmutshimune bijikilu bia makoba ne bisa. Bulelela, Bible mmukanda bua bantu bonso!

Muyuki wa pa buawu wa dilamibua

6, 7. Bua tshinyi kabiena bikemesha bua mudiku kakuyi kumanyike nansha umue wa ku mikanda ya Bible ya ku ntuadijilu, ne ebi bidi bijula lukonko kayi?

⁶ Kudi kabingila kakuabu kadi kaleja bua tshinyi Bible mmuakanyine dimukonkonona. Mmupanduke ku bipumbishi bia ku tshifukilu ne bia kudi bantu. Muyuki wa muvuabu bamulame nansha muvuaku bipumbishi bungi tshianana udi bushuwa wa pa buawu munkatshi mua mikanda ya kale.

⁷ Kakuyi mpata bafundi ba Bible bakafunda miaku yabu ne mâyi a mukanda pa nyandu (mienza ne tshikunyibua tshia mu Ejipitu tshibikila ku dîna dia muomumue) ne pa parshemen (muenza ne biseba bia nyama).b (Yobo 8:11) Kadi, bintu bia difundila ebi bidi ne bintu bia ku tshifukilu bidi bibiluisha. Mushikuluji Oscar Paret udi umvuija ne: “Bintu ebi bibidi bia difundila mbiteka mu njiwu ya muomumue kudi tshitalela, bungu ne bikusu kabukabu. Tudi bamanyine ku malu a dituku dionso mutu dibeji nansha tshiseba tshikole binyanguka bipepele padibi pambelu anyi mu nzubu mudi tshitalela.” Nenku kabiena bikemesha bua mudiku kakuyi kumanyike mukanda nansha umue wa ku mikanda ya ku ntuadijilu; pamu’apa ikadi minyanguke kale. Kadi bikala mikanda ya ku ntuadijilu mibutula kudi biluishi bia ku tshifukilu, mmunyi muakapanduka Bible?

8. Mmunyi muvua mikanda ya Bible milamibue munkatshi mua siekele mivule?

⁸ Katupa kîpi panyima pa bamane kufunda mikanda ya ku ntuadijilu, bakatuadija kupatula kopi mifunda ku bianza. Bushuwa, ditentula Mikenji ne bitupa bikuabu bia Mifundu Minsantu diakalua mudimu mu Izalele wa kale. Tshilejilu, muakuidi Ezela mmumvuija bu “mufundi muakane wa mikenji ya Mose.” (Ezela 7:6, 11; fuanyikija ne Musambu 45:1.) Kadi kopi mipatula ivua kabidi mua kunyanguka; ndekelu wa bionso bavua ne bua kupingaja kopi mikuabu mifunda ku bianza pa muaba wayi. Mudimu eu wa ditentula kopi wakatungunuka munkatshi mua siekele mivule. Bu mudi bantu kabayi bapuangane, bilema bia batentudi biakashintulula bikole mifundu ya mu Bible anyi? Bijadiki bivule bidi biamba ne: tòo!

9. Mmunyi mudi tshilejilu tshia ba-Masorete tshileja ntema mikole ne bujalame bua batentudi ba Bible?

⁹ Batentudi kabavua anu bapiluke bikole kadi bavua kabidi ne kanemu kondoke bua mêyi akatentulabu. Muaku wa tshiena-Ebelu bua “mutentudi” udi utuma lungenyi ku dibala bungi ne difunda. Bu tshilejilu tshia ntema mikole ne bujalame bua batentudi, tangila ba-Masorete, batentudi ba Mifundu ya tshiena-Ebelu bavuaku pankatshi pa siekele muisambombo ne wa dikumi B.B. Bilondeshile mushikuluji Thomas Hartwell Horne, bavua babala “bungi bua misangu ivua dileta dionso dia mu nsangilu wa maleta [a bena Ebelu] dimueneka mu Mifundu yonso ya tshiena-Ebelu.” Elabi meji tshidibi biumvuija! Bua kubenga kutumpika dileta nansha dimue, batentudi aba badifile bavua babala ki ng’anu miaku ivuabu batentula kadi ne maleta kabidi. Ee, bilondeshile dibala dia mushikuluji kampanda, bakalondesha maleta 815 140 ku dimue ku dimue mu Mifundu ya tshiena-Ebelu! Madikolela a tshisumi a nunku akafila tshijadiki tshia bujalame bubandile.

10. Mbijadiki kayi bikole bidiku bua se: mifundu ya tshiena-Ebelu ne tshiena-Greke idi nkudimuinu ya lelu mishindamene idi ileja mêyi a bafundi ba ku ntuadijilu ne bujalame buonso?

¹⁰ Bushuwa, kudi tshijadiki tshikole tshidi tshileja ne: mifundu ya tshiena-Ebelu ne tshiena-Greke idi nkudimuinu ya lelu mishindamene idi ileja miaku ya bafundi ba ku ntuadijilu ne lulamatu lua pa bualu. Tshijadiki etshi ntshia binunu bia kopi mifunda ku bianza ya maniskri a Bible​—bungi butshinka bua kopi 6 000, yonso anyi bitupa, ya Mifundu ya tshiena-Ebelu ne kopi mitue ku 5 000 ya Mifundu ya tshiena-Greke ya Buena-nkristo—​idi mipanduke too ne matuku etu aa. Dikonkonona dia lubatshi ne dia difuanyikija dia maniskri mavule adiku ndiambuluishe bashikuluji ba mifundu bua kuangula bilema bionso bia batentudi ne kujadika mfundilu wa ku ntuadijilu. Mu diela nseka pa miaku ya mu Mifundu ya tshiena-Ebelu, mushikuluji William H. Green wakamba nenku: “Tudi mua kuamba kakuyi dikokangana ne: kakuena mukanda mukuabu wa kale nansha umue udi mutufikile ne bujalame bua mushindu’eu.” Tudi mua kuikala ne dieyemena dia muomumue mu Mifundu ya tshiena-Greke ya Buena-nkristo.

11. Pa kutangila 1 Petelo 1:24, 25, bua tshinyi Bible mmupanduke too ne mu matuku etu aa?

¹¹ Mmunyipu muvuabi kuikala bipepele bua Bible kujimina bu kuoku kakuyi kopi mifunda ku bianza yakapingana pa muaba wa kopi ya ku ntuadijilu, pamue ne mukenji wayi wa mushinga mukole! Kudi anu kabingila kamue bua dipanduka diende​—Yehowa udi Mulami ne Mukubi wa Dîyi diende. Anu bu mudi Bible nkayende wamba mu 1 Petro 1:24, 25 (Mukenji Mulenga) ne: ‘Mubidi wonso udi bu tshisosa, kabidi lumu luawu luonso ludi bu tshilongo tshia tshisosa: tshisosa tshidi tshiuma kabidi tshilongo tshidi tshipopoka. Kadi [“dîyi dia Yehowa,” NW] didi dishala kashidi.’

Mu miakulu idi bantu bakula

12. Kusakidila ku siekele ya ditentulula, ntshipumbishi kayi tshikuabu tshiakapeta Bible?

¹² Dipanduka munkatshi mua siekele mivule ya ditentulula divua lutatu lunene, kadi Bible wakapeta tshipumbishi tshikuabu​—dimukudimuna mu miakulu idiku. Bible udi ne bua kuakula mu muakulu wa bantu bua kumona mua kulenga mitshima yabu. Kadi, dikudimuna Bible​—ne nshapita yende mipite pa 1 100 ne mvese 31 000—​ki mmudimu mutekete nansha. Pabi, munkatshi mua siekele mivule bakudimunyi badifile bakaditua ne disanka dionso mu mudimu eu, imue misangu bapeta bipumbishi bidi bimueneka bu bivua kabiyi kutshimuna.

13, 14. (a) Ndutatu kayi luvua mukudimunyi wa Bible Robert Moffat mupete mu Afrike ku ntuadijilu wa siekele wa 19? (b) Mmunyi muvua bena muakulu wa Tswana bandamune pakapatuka Evanjeliyo wa Luka mu muakulu wabu?

¹³ Tshilejilu, tangila muakafikabu ku dikudimuna Bible mu miakulu ya mu Afrike. Mu tshidimu tshia 1800, kuvua anu miakulu mifunda mitue ku dikumi ne ibidi mu Afrike mujima. Nkama ya miakulu mikuabu ivuabu bakula kayivua ne mfundilu nansha umue. Elu ke lutatu luakapeta mukudimunyi wa Bible Robert Moffat. Mu 1821, pavuaye ne bidimu 25, Moffat wakasa mision munkatshi mua bantu bena muakulu wa Tswana ba mu Afrique du Sud. Bua kulonga muakulu wabu uvua kauyi mufunda, wakadia malanda ne bantu abu. Moffat wakananukila ne, kakuyi diambuluisha dia mikanda ya nshindamenu bua kubala anyi nkonga-miaku, ndekelu wa bionso kumanya muakulu au, kuenzaye mfundilu wawu, ne kulongeshaye bamue ba-Tswana bua kubala mfundilu au. Mu 1829, panyima pa dienza mudimu bidimu muanda-mukulu munkatshi mua ba-Tswana, wakajikija dikudimuna dia Evanjeliyo wa Luka. Wakamba pashishe ne: “Ndi mumanye bantu bavua bafumina mutantshi wa nkama ya kilometre bua kupeta kopi ya Luka Munsantu. . . . Ngakabamona bangata bitupa bia Luka Munsantu, ne badila bua bualu buabi, ne bayiteka mu biadi biabu, ne bapuekesha binsonji bia dianyisha, too ne pangakambila bantu ba bungi ne: ‘Nenunyange mikanda yenu ne binsonji bienu.’” Moffat wakamba kabidi bua mulume kampanda wa mu Afrike wakamona bantu ndambu babala Evanjeliyo wa Luka ne kubebejaye tshivuabu natshi. Bakandamuna ne: “Ndîyi dia Nzambi.” Muntu au kukonkaye ne: “Didi diakula anyi?” Kuandamunabu ne: “Eyowa, didi diakuisha mutshima.”

¹⁴ Bakudimunyi badifile bu Moffat bakapesha bena mu Afrike bavule mpunga wabu wa kumpala bua buobu kuyukila mu mikanda. Kadi bakudimunyi aba bakapesha bena mu Afrike dipa dia mushinga mukole mutambe​—Bible mu muakulu wabu. Kabidi, Moffat wakamanyisha ba-Tswana dîna dia Nzambi, ne wakatumika ne dîna adi mu nkudimuinu wende mujima.c Nenku, ba-Tswana bavua bakula bua Bible bu “mukana mua Yehowa.”​—Musambu 83:18.

15. Bua tshinyi Bible udi ne bukole bua bungi lelu’eu?

¹⁵ Bakudimunyi bakuabu mu bitupa bishilangane bia buloba bakapeta bipumbishi bia muomumue. Bamue bakamba kujimija mioyo yabu bua kukudimuna Bible. Elabi meji bua bualu ebu: Bu Bible mushale anu mu tshiena-Ebelu ne tshiena-Greke bia kale, uvua ne bua kuikala “mufue” kuonso aku, bualu miakulu ayi bavua kunyima bayipue muoyo menemene kudi bantu ba bungi ne kayitshivua mimanyike mu bitupa bivule bia buloba. Kadi, Bible udi ne bukole bua bungi bualu, kayi bu mudi mukanda mukuabu wonso, udi mua “kuakuisha” bantu pa buloba bujima mu muakulu wabu. Bu tshipeta, mukenji wende mmushale ‘wenza mudimu munda mua badi bawitabuja.’ (1 Tesalonike 2:13, MML) Bible de Jérusalem udi wandamuna mêyi aa ne: ‘Utshidi bukole bua muoyo munkatshi muenu nuenu badi bawitabuja.’

Wa kueyemena

16, 17. (a) Bua Bible kuikalaye wa kueyemena, ntshijadiki kayi tshidi ne bua kuikalaku? (b) Fila tshilejilu tshimue tshidi tshileja muoyo mululame wa mufundi wa Bible, Mozese.

¹⁶ ‘Tudi bushuwa mua kueyemena Bible anyi?’ ke mudi bamue mua kudiebeja. ‘Udi wakula bua bantu bavua ne muoyo, miaba ivuaku bushuwa ne malu akenzeka bulelela anyi?’ Bituikala ne bua kumueyemena, kudi ne bua kuikala tshijadiki tshia se: uvua mufunda kudi bafundi ba lubatshi ne bena bululame. Ebi bidi bitufikisha ku kabingila kakuabu bua kukonkonona Bible: Kudi bijadiki bikole bia se: mmujalame ne wa kueyemena.

¹⁷ Bafundi bena bululame bavua bafunda ki ng’anu bipeta bimpe kadi ne malu mapangila kabidi, ki ng’anu ngikadilu ya bukole kadi ne matekete kabidi. Bafundi ba Bible bakaleja bululame ebu budi bukolesha. Tshilejilu, tangila muoyo mululame wa Mozese. Munkatshi mua malu akafundaye mu bulelela muvua dipanga diende yeye muine dia ludimi lupepele, divua, ku mmuenenu wende, dimuvuije kayi mukumbane bua kuikala mulombodi wa Izalele (Ekesode 4:10); tshilema tshinene tshiakenzaye tshiakamupangisha bua kubuela mu Buloba Bulaya (Nomba 20:9-12; 27:12-14); dipambuka dia muanabu Arona, wakambuluishangana ne bena Izalele bantomboji bua kuenza lupingu lua kana ka ngombe (Ekesode 32:1-6); buntomboji bua muanabu wa bakaji Miriyame ne dinyoka diakamupuekesha milongo (Nomba 12:1-3, 10); dipanga kanemu ka bintu binsantu dia Nadaba ne Abihu, bana ba muanabu (Lewitiki 10:1, 2); ne didiabakena dia munanunanu ne dinungana dia tshisamba tshine tshia Nzambi. (Ekesode 14:11, 12; Nomba 14:1-10) Muyuki eu mulelela ne wa bululame kawenaku uleja diditatshisha ne muoyo umue bua bulelela anyi? Bu muvua bafundi ba Bible badiakaje bua kufila mamanyisha avua kaayi mimpe adi atangila banangibue babu, tshisamba tshiabu, ne nansha buobu bine, kakuenaku kabingila kimpe bua kueyemena mifundu yabu anyi?

18. Ntshinyi tshidi tshijadika se: mifundu ya bafundi ba Bible nya kueyemena?

¹⁸ Dipetangana dia bafundi ba Bible didi kabidi dijadika mudi mifundu yabu ya kueyemena. Bidi bushuwa bikemesha bua mudi bantu 40 bafunda mu lupolo lua bidimu bitue ku 1 600 bikale mu diumvuangana, nansha padibi bitangila tunungu tukese. Kadi diumvuangana edi ki ndilongolola ne lubatshi luonso bua kusaka ku diela meji mabi a se: kudi diumvuangana dia muinshimuinshi. Kadi, kakuena bushuwa dijinga dia kukeba diumvuangana dia tunungu tushilangane; misangu mivule diumvuangana edi didi bushuwa dia ku mpukapuka.

19. Mmunyi mudi miyuki ya mu Evanjeliyo ya dikuatshibua dia Yezu isokolola diumvuangana didi bushuwa kadiyi dilongolola?

¹⁹ Tshilejilu, tangila muanda wakenzeka butuku buakakuatabu Yezu. Bafundi bonso banayi ba Evanjeliyo badi bafunda ne: umue wa ku bayidi wakapatula muele ne kutapa mupika wa muakuidi munene, kukosaye ditshi dia muntu au. Kadi, anu Luka ke udi utuambila ne: Yezu “wakalenga ditshu dia muntu awu ne wakamondapa.” (Luka 22:51, MML) Kadi atshi ki ntshituvua mua kutekemena kudi mufundi uvua mumanyike bu “munganga wetu munanga” anyi? (Kolosai 4:14, MML) Muyuki wa Yone udi utuambila ne: ku bayidi bonso bavuapu, wakatumika ne muele uvua Petelo​—bualu budi kabuyi bukemesha pa kutangila meji a Petelo a disua kuikala muena malu a lukasalukasa ne muena tshivuma. (Yone 18:10; fuanyikija ne Matayo 16:22, 23 ne Yone 21:7, 8.) Yone udi uleja kanungu kakuabu kadi kamueneka bu kadi kakayi ne mushinga: “Dina diende divua Malkuse.” Bua tshinyi Yone nkayende udi uleja dîna dia muntu eu? Diumvuija ndifila kudi bualu bukese buamba mu lupitapita budi anu mu muyuki wa Yone​—Yone “bavua bamumanye kudi muakuidi munene.” Bena mu nzubu wa muakuidi munene bavua kabidi bamumanye; basadidi bavua bamanyangane nende, ne yeye uvua mumanyangane nabu.d (Yone 18:10, 15, 16) Nenku, mu diumvuangana ne dimanyangana edi, Yone ke uvua anu ne bua kutela dîna dia muntu uvuabu batape, padi eku bafundi bakuabu ba Evanjeliyo, bavua bushuwa kabayi bamumanye, bapange kuditela. Diumvuangana pankatshi pa tunungu etu tuonso ndia pa buadi, kadi bushuwa ki ndilongolola. Kudi bilejilu bia muomumue bungi tshianana mu Bible mujima.

20. Ntshinyi tshidi bantu ba mutshima mululame ne bua kumanya pa Bible?

²⁰ Nenku tudi mua kueyemena Bible anyi? Kakuyi dielakana! Muoyo mululame wa bafundi ba Bible ne diumvuangana dia munda dia Bible bidi bimupesha ngikadilu mulenga wa bulelela. Bantu ba mutshima mululame badi ne bua kumanya ne: badi mua kueyemena Bible, bualu n’Dîyi dienzeja ku spiritu dia “Yehowa Nzambi wa bulelela.” (Musambu 31:5, NW) Kudi tubingila tukuabu tudi tuleja bua tshinyi Bible mmukanda bua bantu bonso, bu mualeja tshiena-bualu tshidi tshilonda.

[Mêyi adi kuinshi]

Newandamune munyi?

◻ Bua tshinyi tuvua ne bua kutekemena bua Bible kuikalaye mukanda udi utamba kumueneka pa buloba bujima?

◻ Ntshijadiki kayi tshidiku tshia se: bavua balame Bible mu bujalame buonso?

◻ Mbipumbishi kayi bivua bantu bakakudimuna Bible bapete?

◻ Ntshinyi tshidi tshijadika ne: mifundu ya mu Bible nya kueyemena?