Tulongelayi ku bilema bia kale

MIKENJI ya Mufuki wetu ya nsombelu wa tshitembu nya kashidi ne kayitu ishintuluka. Bua kabingila aka dîyi-diludiki didi mu Galatia 6:7 didi ditumika lelu’eu: “Tshintu tshionso tshidi muntu ukuna, ntshiotshio tshia[p]uoleye.” Bulelela, muntu udi mua kuvila mudiye kayi ne tshilumbu kudi Nzambi, kadi dîyi dijadika kudi Nzambi didi dishala muomumue. Ndekelu wa bionso, kakuena muntu udi muepula ku bipeta bibi bia bienzedi biende.

Netuambe tshinyi bua muntu udi ne nsombelu wa buntomboji ne pashishe ushintuluka, ulua musadidi wa Nzambi? Udi mua kutungunuka ne kuikala ne bipeta bibi bia nsombelu wende wa kale. Kadi kabiena biumvuija ne: Nzambi ki mmumubuikidile nansha. Masandi a Mukalenge Davidi ne Bath-sheba akamutuadila dikenga divule mu nsombelu wende. Kavua mua kudiepuka. Kadi wakanyingalala, ne Nzambi wakamubuikidila.​—2 Samuele 12:13-19; 13:1-31.

Ukadiku mudiumvue mutekete mu mikolo paudi umona bipeta bibi bia bilema biuvua muenze anyi? Patudi tudiangata mu mushindu muakane, dinyingalala didi mua kutuambuluisha bu divuluija bua ‘tudimuke bua [“katutangiji,” NW] mutshima wetu ku bualu bubi.’ (Yobo 36:21) Eyowa, kunyingalala kudi mua kutuambuluisha bua kuepuka dienzulula bualu bubi. Bitambe mene buimpe, Davidi wakatumika ne dimanya dipetela ku mpekatu wakenzaye bua kudiambuluisha ne kuambuluisha bakuabu kabidi. Wakamba ne: ‘Nenyishe badi bapambuke njila yebe, ne bantu babi nebapingane kuudi.’​—Musambu 51:13.

[Bimfuanyi mu dibeji 7]

Davidi wakalongela ku mpekatu wende ne Bath-sheba