Tshidi bamue bashintuluila bitendelelu biabu

Bua bantu bavule, tshitendelelu ntshishale anu tshimanyinu patupu. Tshidi mua kuleja muaba utu muntu uya ku misangu mu Dia lumingu, muaba udiye uselangana, ne muaba wamujiikabu. Kadi katshiena tshileja mushindu udi muntu anyi tshidiye mumanye ne tshidiye witabuja. Tshilejilu, dikonkonona kampanda diakaleja ne: bantu 50 pa lukama ba ku badi badiamba mudibu bena nkristo kabavua bamanye uvua muenze Muyuki wa pa Mukuna. Ee, kadi Mohandas Gandhi, mulombodi ne muena Hindu muende lumu wa mu Inde, uvua mumanye diandamuna dia lukonko alu!

BIDI bikemesha bua mudi bantu bapatuka mu bitendelelu padi ba bungi ba kudibu bamanye malu makese menemene bua ditabuja diabu anyi? Tòo, kabiena bikemesha nansha. Nansha nanku, kudi kabidi mushindu wa kubiepuka. Aba badi bitabe diambuluisha bua kulonga Bible batu misangu mivule bakema bua kumona mushindu udiye utamba kubakuatshisha. Bible nkayende udi wamba ne: ‘Meme ndi Yehowa Nzambi webe, udi ukuyisha bua wewe wikale ne diakalengele, udi ukulombola mu njila uudi ne bualu bua kuendela.’​—Yeshaya 48:17, disendamija miaku ndietu.

Ntshinyi tshidi aba badi ne nzala ya mu nyuma ikena mijikija ne bua kuenza? Kabena ne bua kulekela disadila Nzambi nansha! Kadi badi ne bua kutangila mu Bible ne kumona bidi Nzambi nkayende ubapetesha.

Mandamuna ku nkonko mikole

Pavuaye ne bidimu muanda-mutekete, Bernd wakamona muvua mamuende ufua.a Mu dikola diende, uvua udiebeja ne: ‘Mamu udi penyi? Bua tshinyi ndi ne bua kukola tshiyi nende?’ Pakaluaye nsonga, Bernd uvua mulondi muzanzamuke wa ekleziya. Muikale uditatshisha bua makenga a bukua-bantu, uvua mutekemene bua kulua muena mudimu udi wambuluisha mu matunga mapele. Nansha nanku, uvua mutatshisha kudi nkonko ivua ekleziya wende kayi mufile mandamuna avua asankisha.

Pashishe Bernd wakakula ne mulongi nende uvua muikale Ntemu wa Yehowa. Ku diambuluisha dia Bible, nsonga eu wakaleja Bernd se: mamuende kavua mumanye bualu, mmulale mu lufu. Bernd wakamanya mvese ya bungi ya mu Bible idi yumvuija bualu ebu, bu mudi Muambi 9:5: “Bafue kabena bamanye bualu [nansha] bumue.” Nenku Bernd kavua ne kabingila ka kudiela nkonko bua kumanya bikala mamuende uvua ukenga mushindu kampanda mu mpurgatoriyo​—anyi muaba mutambe bubi. Nansha mudibu balongesha dibenga kufua dia anyima mu bitendelelu bia bungi, Bernd wakamona mu Bible ne: anyima wa muntu ke muntu mene. Padi muntu ufua, anyima udi ufua. “Anyima udi wenza mpekatu​—yeye muine neafue.”​—Yehezekele 18:4, NW.

Bernd wakalonga kabidi pa bidi bitangila ditekemena dia dikema bua bafue. Wakadibadila nkayende mu mukanda wa mu Bible wa Bienzedi ne: “Nekuikale dibiishibua dia bakane ne dia bakena bakane.” (Bienzedi 24:15, NW) Mmunyipu muvuaye musanke bua kumanya se: dibiishibua edi nedienzeke pa buloba apa, buikala Nzambi mua kuvuija mparadizu!​—Musambu 37:29; Buakabuluibua 21:3, 4.

Katupa kîpi dimanya dia bushuwa dia mu Bible diakajikija majinga a Bernd a mu nyuma. Bernd kakalekela malu a Nzambi. Kadi, wakumbuka mu ekleziya uvua kayi mua kujikija nzala yende ne kusungulaye ntendelelu mushindamene bikole pa Bible. Udi wamba ne: “Bidimu 14 bikadi bipite, ne tshitu muanji kunyingalala bua tshidia tshindi muele. Mpindieu ndi mumanye se: Mufuki katu ukebelangana makenga. Satana ke nzambi wa ndongoluelu eu, ne yeye ke wa kudiwula bua nsombelu idi mitunyunguluke. Kadi mu katupa kakese emu Nzambi nealongolole bualu bubi buonso budi bulongolodi bua Satana buenze. Mamu pende neapingane ku muoyo mu dibiishibua. Nebikale bualu bua disanka!”

Bernd mmukumbaje tshipatshila tshiende tshia kuenza mudimu ku ba bende bua kuambuluisha bakuabu. Udi wenza mudimu mu ditunga dia ku ba bende, wambuluisha bakuabu bua kulonga malu a Bukalenge bua Nzambi, mushindu mulelela wa kujikija makenga abu. Bu Bernd, bantu miliyo mivule mbalonge ne: mu katupa kîpi emu Nzambi neajikije makenga a bantu. Badi ne disanka bua kumona se: kudi tshitendelelu tshidi tshikumbaja majinga abu a mu nyuma.​—Matayo 5:3.

Muoyo udi ne tshipatshila kayi?

Bu mudi matunga adi kaayi a ba-Koministe a ku Mputu ne ku Amerike atamba kulekela malu a Nzambi, bantu ba bungi badi badiebeja ne: ‘Muoyo udi ne tshipatshila kayi?’ Tudi ne bua kupeta diandamuna mu Bible, bu muakasokolola Michael. Munkatshi mua bidimu bia 1970, Michael uvua musue kubuela mu kasumbu ka bena tshinyangu. Uvua anu ne tshipatshila tshimuepele mu nsombelu​—kutatshisha bantu bavuaye wangata bu bakebeshi ba tunsungasunga tua ndongoluelu wa ba-kapitaliste. Udi wamba ne: “Tshivua muanji kumbuka kumbelu tshiyi ne tshingoma tshianyi. Tshipatshila tshianyi tshivua tshia kushipa bena tshididi ne ba-kapitaliste ba bungi bavua ku mutu. Mvua mua kuikala mufile muoyo wanyi bua muanda eu.”

Michael uvua mulondi wa ekleziya, kadi muntu nansha umue mu ekleziya wabu kavua mua kumumvuija tshipatshila tshilelela tshia muoyo. Nenku pakamukumbula Bantemu ba Yehowa kuende ne kumuleja mandamuna a mu Bible ku nkonko yende, Michael wakateleja ne ntema. Wakatuadija kubuela mu bisangilu bua kutendelela mu Nzubu wa Bukalenge wa Bantemu ba Yehowa ba muaba au.

Balunda ba Michael bavua bakeba kumanya disankidila diende dipiadipia dia Bible. Michael wakababela ne: “Luayi mu tshisangilu mu Dia lumingu edi. Nushalemu bua katupa kakese. Bikala binudi numvua kabiyi binusankisha, nenku nualukile kumbelu.” Biakenzeka nanku, panyima pa muyuki wa minute 45 mushindamene pa Bible, bavule ba ku balunda bende bakapatuka. Kadi anu muntu umue​—Susan—​ke wakashala. Bivua nsongakaji eu mumvue biakakoka ntema yende. Panyima, Michael ne Susan bakaselangana ne bakatambula bu Bantemu ba Yehowa. Michael udi wamba ne: “Mpindieu ndi mumanye bua tshinyi tudi pa buloba apa. Tuvua bafukibue kudi Yehowa. Tshipatshila tshietu tshilelela mu nsombelu ntshia kufika ku dimumanya ne kuenza disua diende. Ke muanda udi ufila disankishibua dilelela!”

Bantu miliyo mivule badi ne ditabuja dia Michael. Badi bavuluka mêyi aa a mu Bible: “Nkomenu wa bualu, bionso bimana kumvua, udi se: Utshine Nzambi mulelela ne ulame mêyi-matuma ende. Bualu etshi ke tshionso tshidi muntu ne bua kuenza.”​—Muambi 12:13, NW.

Mua kupita ne ntatu ya mu nsombelu

Tuetu bonso tudi tumona dikumbana dia mulayi udi mu 2 Timote 3:1, (NW): “Mu matuku a ku nshikidilu bikondo bikole mua kupita nabi nebikaleku.” Muntu nansha umue kêna mua kuepuka ntatu ya “bikondo bikole” ebi. Kadi Bible udi utuambuluisha mua kupita nayi.

Tangila Steven ne Olive, bena dibaka. Pakatuadijabu kulonga Bible ne Bantemu ba Yehowa, anu bu bantu bakuabu ba bungi, bavua ne ntatu ya mu dibaka. Steven udi umvuija ne: “Tuvua tuenda tuabulukangana. Tuvua ne bipatshila ne malu bishilangane.” Ntshinyi tshiakabambuluisha bua kushala pamue? Steven udi utungunuka ne: “Bantemu ba Yehowa bakatuleja mushindu utuvua mua kutumikila mêyi-maludiki a mu Bible mu nsombelu wetu. Bua musangu wa kumpala, tuakalonga tshidi dikala muena kalolo ne muena ditabalela diumvuija. Kutumikila mêyi-maludiki a mu Bible kuakatulamakaja pamue. Mpindieu tudi ne dibaka dikole ne dia disanka.”

Malanda mashême ne Nzambi

Bilondeshile dikonkoloja dia Gallup matuku adi panshi aa, bena Amerike 96 pa lukama badi bitabuja Nzambi, ne bavule ba kudibu batu bamulomba. Kadi, dikonkoloja dikuabu diakaleja ne: dibuela mu ekleziya ne mu nsunagoga nditambe kukepela mpindieu mu bidimu 50. Bena Amerike batue ku 58 pa lukama badi bamba ne: batu babuela mu ekleziya musangu umue ku ngondo umue anyi panyima pa ngondo ya bungi. Bushuwa, bitendelelu ki mbibasemeje pabuipi ne Nzambi. Ne lutatu elu ki nduimanyine anu mu États-Unis nansha.

Linda mmukolele mu rejon wa Bavière. Uvua muena Katolike mudifile ne uvua usambila pa tshibidilu. Mu tshine tshikondo atshi, uvua ne buôwa bua matuku avua alua kumpala. Kavua ne tshivuaye mumanye pa bidi bitangila dilongolola dia Nzambi bua bantu. Pakakumbajaye bidimu 14 patupu, Linda wakapetangana ne Bantemu ba Yehowa, ne udi ulonda ne: “Bivuabu bamba bivua bisankisha, nenku ngakitaba mikanda ibidi idi yambuluisha bua kulonga Bible ne ngakayibala diakamue.” Panyima pa bidimu bibidi, Linda wakatuadija kulonga Bible ne Bantemu ba Yehowa. Udi wamba ne: “Malu onso angakalonga mu Bible adi atangila Nzambi avua umvuika a meji.” Linda wakakosa makasa mu ekleziya wende ne kutambulaye bu Ntemu wa Yehowa pavuaye ne bidimu 18.

Ntshinyi tshiakasaka Linda bua kushintulula tshitendelelu tshiende? Udi umvuija ne: “Ekleziya wanyi wakangambuluisha bua kumona se: Nzambi udiku, ne ngakalonga bua kumuitabuja. Kadi kavua mumanyike bu muntu ne uvua mutantshi mule. Dilonga dianyi dia Bible kadiakashindika patupu ditabuja dianyi kudi Nzambi kadi diakangambuluisha kabidi bua kufika ku dimumanya ne dimunanga. Mpindieu ndi ne malanda a mushinga mukole a nsungasunga ne Nzambi, muanda udi ne mushinga wa bungi kupita tshintu tshikuabu tshionso.”

Tshitendelelu tshilelela tshidi ne mushinga!

Tshitendelelu tshiebe tshitu tshikupesha buludiki bua mu nyuma, ne tshikuleja mudi Bible mua kukuambuluisha mua kupita ne ntatu ya mu nsombelu anyi? Tshitu tshilongesha ditekemena dia mu Bible bua matuku atshilualua anyi? Ntshikufikishe ku malanda mashême ne a nsungasunga ne Mufuki, mashindamene pa dimanya dijalame dia mu Bible anyi? Bikalabi kabiyi nanku, kuteketshi mu maboko. Pamutu pa kulekela malu a Nzambi, keba ntendelelu udi mushindamene bikole pa Bible. Nenku newikale bu aba bavuabu bamanyishe bualu buabu mu mukanda wa mu Bible wa Yeshaya ne: ‘Mukalenge Yehowa udi wamba ne: Tangilayi, bantu banyi nebadie, bantu banyi nebanue, bantu banyi nebasanke, bantu banyi nebimbe misambu bua disanka dia mu mitshima yabu.’​—Yeshaya 65:13, 14.

[Mêyi adi kuinshi]

[Bimfuanyi mu mabeji 4, 5]

Bible udi utuambuluisha bua kufika ku dimanya ne dinanga Nzambi