Bujitu budi buenda pamue ne kumanya kua tshitendelelu tshilelela
“Bena disanka mbadi bumvua dîyi dia Nzambi ne badilama!”—LUKA 11:28, NW.
1. Padibu diakamue bamanya tshitendelelu tshilelela, mbantu ba mushindu kayi badi biibakilapu nsombelu wabu?
KI MBIKUMBANE bua kumanya patupu tshitendelelu tshilelela. Bituikala banangi ba bidi biakane ne bilelela, patudi tutshipeta, netuibakilepu nsombelu wetu. Tshitendelelu tshilelela katshiena anu mamanya a mu lungenyi; tshidi kabidi mushindu wa nsombelu.—Musambu wa 119:105; Yeshaya 2:3; fuanyikija ne Bienzedi 9:2.
2, 3. (a) Mmunyi muvua Yezu mushindamene pa mushinga wa kuenza disua dia Nzambi? (b) Mbujitu kayi budi pa makaya a muntu yonso udi mumanye tshitendelelu tshilelela?
2 Yezu Kristo wakashindamena pa mushinga wa kuenza ebi biakamanyisha Nzambi bu disua Diende. Mu difila nkomenu wa etshi tshiakamanyika bu Diyuki dia pa Mukuna, Yezu wakamanyisha se: ki ng’aba buonso badi bamubikila Mukalenge (bamba nenku mudibu bena nkristo) babuela mu Bukalenge [buende]; kadi anu aba badi benza disua dia Tatuende. Wakamba ne: bakuabu nebabengibue bu “bapetudi ba mikenji.” Bua tshinyi kupetula kua mikenji? Bualu anu mudi Bible wamba, kupanga kuenza disua dia Nzambi mmpekatu, ne mpekatu yonso idi kupetula kua mikenji. (Matayo 7:21-23, NW; 1 Yone 3:4; fuanyikija ne Lomo 10:2, 3.) Muntu udi mua kumanya tshitendelelu tshilelela, kuela aba badi batshilongesha ka-lumbandi, kusamuna pamu’apa aba badi batshienza, kadi udi kabidi ne bujitu bua kutshitumikila mu nsombelu wende yeye muine. (Yakobo 4:17) Pikalaye mua kuitaba bujitu abu, neasangane se: nsombelu wende neikale mua kupeta mushinga mukole, kabidi neapete disanka didi kadiyi mua kuvuila mu njila mukuabu.
3 Mu tshiena-bualu tshishale, tuvua bakonkonone bisambombo bia ku bimanyinu bia tshitendelelu tshilelela. Tshionso tshia kudibi katshivua anu tshituambuluisha bua kusunguluja tshitendelelu tshilelela apu tshivua kabidi tshituleje tuetu bine ne malu matulomba ne bikondo bitudi mua kuakumbaja. Mmushindu kayi?
Udi wandamuna munyi ku Dîyi dia Nzambi?
4. (a) Padi bapiabapia batuadija kudisangisha ne Bantemu ba Yehowa, ntshinyi tshidibu bamona ne lukasa luonso pa bidi bitangila mushindu udi Bantemu benza mudimu ne Bible? (b) Mmunyi mudi didishibua mu nyuma dikolesha basadidi ba Yehowa?
4 Padi Bantemu ba Yehowa balonga Bible ne bantu bapiabapia, bavule ba ku bapiabapia aba badi basunguluja ne lukasa luonso se: bidibo balongesha mbifumine mu Bible. Mu diandamuna ku nkonko yabu, kabena babatuma ku mikenji ya ekleziya, ku bilele bia bantu anyi ku mmuenenu ya bantu banene. Dîyi dia Nzambi mene ke didi ne bumfumu. Padibu baya ku Nzubu wa Bukalenge, badi bamona kabidi se: Bible ke mukanda wa nshindamenu. Kabiena bikengela mutantshi mule bua bakebi ba bulelela ba muoyo muimpe kumonabu se: disanka didi nadi Bantemu ba Yehowa didi difumina ku didishibua diabu dia mu nyuma ku Dîyi dia Nzambi.—Yeshaya 65:13, 14.
5. (a) Mbualu kayi budi bukemesha aba badi babandila Bantemu ba Yehowa? (b) Mmunyi mudibu mua kupeta disanka dia Bantemu?
5 Biwikala mua kuanyisha bualu ebu, utu wandamunaku munyi? Biwikala mumvue tshidibi biumvuija, kuena mua kuikala anu mubandidi patupu, peshi kuena mua kujinga kuikala nanku. Bible udi utuleja se: aba badi “bateleji patupu” kadi kabayi “batumikidi ba dîyi” badi ‘badidinga nkayabu ne mmuenenu ya dishima.’ (Yakobo 1:22, NW) Badi badidinga bualu mbapangile mua kujingulula se: nansha buobo mua kuamba tshinyi, kupangila kuabu kua kutumikila Nzambi kudi kuleja se: ki mbamunange menemene to. Ditabuja didi kadiyi ditua bianza kudi midimu nditabuja difue. (Yakobo 2:18-26; 1 Yone 5:3) Bishilangane, eu udi musakibue kudi dinanga bua Yehowa bua kuikala “muenji wa mudimu” neikale “wa diakalenga pa kuwenza.” Eyowa, anu mudi Yezu Kristo umvuija, “bena disanka mbadi bumvua dîyi dia Nzambi ne badilama!”—Yakobo 1:25, NW; Luka 11:28; Yone 13:17.
6. Bituikala tuanyisha bushuwa Dîyi dia Nzambi, mmalu kayi atudi ne bua kubabidila?
6 Disanka edi nediondoke pawudi ukola mu dimanya dia disua dia Nzambi ne mu ditumikila dia bikuabu bintu biwudi ulonga. Mmakanda bungi munyi awafila bua kudilongela Dîyi dia Nzambi? Binunu bia bantu bavua kabayi bamanye kubala bakenza madikolela a bungi bua kulonga mua kubala, nangananga bua kumonabu mua kubala Mifundu ne kuyilongesha bakuabu. Bamue badi babiika patshiatshia bua kumonabu mua kuangata dîba dikese ku dituku bua kubala Bible ne mikanda ya kulonga nayi Bible, bu mudi Tshibumba tshia Nsentedi. Mu dibala diebe dia Bible peshi mu dikeba dia mvese mifidibue mu mikanda mikuabu, utabalele ne ntema mikenji ya Yehowa ne mêyi-matuma ende, ne ukebe mua kusunguluja mêyi-maludiki mavule adimu bua kulombodibua nawu. Welele meji pa tshidi tshitupa tshionso tshiumvuija pa bidi bitangila Nzambi, dilongolola diende, ne malanda ende ne bukua-bantu. Angata dîba bua bionso ebi bifuimbe mutshima webe. Konkonona bikalaku mishindu ya wewe kutamba kutumikila mibelu ya Bible mu nsombelu webe nkayebe.—Misambu 1:1, 2; 19:7-11; 1 Tesalonike 4:1.
Didifila diebe kudi Yehowa ndijima anyi?
7. (a) Mmunyi mudi dilongesha dia Busatu-Bunsantu dinyange madikolela a bantu bua kutendelela Nzambi? (b) Ntshinyi tshidi mua kuenzeka padi muntu ulonga bulelela budi butangila Yehowa?
7 Bua miliyo ya bantu, bivua disulakana pa kumanya se: Nzambi mulelela kêna Busatu-Bunsantu. Diumvuija dia se: “mbualu busokome” kadivuaku dibasankishe to. Mmunyi muvuabu mua kusemena menemene kudi Nzambi uvuabu kabayi mua kumanya? Bu tshipeta tshia dilongesha edi, bakasakibua ku dilengulula Tatu (udibu kabayi bumvua dîna diende mu ekleziya) ne bua kutendelela Yezu bu Nzambi anyi bua kutuma ditendelela kudi Mariya (uvuabu babalongeshe se: ke “Mamuende wa Nzambi”). Kadi mitshima yabu yakandamuna ne musangelu pavua umue wa ku Bantemu ba Yehowa mubulule Bible ne mubaleje dîna dia Nzambi, Yehowa. (Musambu wa 83:18) Mukaji kampanda wa bena Venezuela uvua musanka bikole pakamulejabu dîna mene dia Nzambi ke kuelaye mu tshitupà nsongakayi Ntemu uvua mumumanyishe bulelela ebu bua mushinga mukole ne wakitaba bua kulonga nende Bible. Padi bantu ba mushindu’eu bamanya ne: Yezu wakakula bua Tatuende bu “Nzambi wanyi ne Nzambi wenu” ne bua se: Yezu wakabikila Tatuende ne: “Nzambi umuepele mulelela,” bakasangana se: bidi Bible ulongesha pa bidi bitangila Nzambi ki mbikole mua kubiumvua to. (Yone 17:3; 20:17, NW) Padibu bafika ku dimanya bikadilu bilenga bia Yehowa, badi badiumvua basemejibue kudiye, batuadija kumusambila, ne bajinga kumusankisha. Ne tshipeta kayi?
8. (a) Bua dinanga diabu bua Yehowa ne dijinga diabu dia kumusankisha, ntshinyi tshidi miliyo ya bantu benze? (b) Bua tshinyi batismu wa bena nkristo udi ne mushinga?
8 Munkatshi mua bidimu dikumi biapitshi ebi, bantu 2 528 524 ba pa buloba bujima ne mu bidiila bakalambula muoyo wabu kudi Yehowa, ne pashishe kuleja didilambula edi ku batismu mu mâyi. Uvua pebe umue wa kudibu anyi, peshi udi udilongolola mpindieu bua kutambula? Batismu mbualu bua mushinga mukole mu nsombelu wa muena nkristo mulelela yonso. Yezu wakapesha bamulondi bende mudimu wa kuvuija bantu ba bisamba bionso balongi ne kubatambuisha. (Matayo 28:19, 20) Mbualu bunene kabidi pa kumona se: katupa kakese kunyima kua batismu wa Yezu, Yehowa nkayende wakakuila mu mawulu wamba ne: “Udi Muana wanyi munanga, udi unsankisha bimpe.”—Luka 3:21, 22.
9. Bua kuikala ne malanda manyishibue ne Yehowa, ntshinyi tshidi tshilombibue kutudi?
9 Malanda adi asankisha Yehowa ntshintu tshia kunanga bikole. Biwikala mubuele mu malanda a mushindu’eu ku didilambula ne batismu, epuka tshintu tshionso tshidi mua kuanyanga. Kulekedi ntatu ya mu nsombelu ne malu adi akutonda biasemeja pa muaba muibidi to. (1 Timote 6:8-12) Bushuwa, ikalayi mu diumvuangana ne mubelu eu udi mu Nsumuinu 3:6 (NW): “Umuangate [Yehowa] ne mushinga mu njila yebe yonso, ne yeye, nealulamije tujila tuebe.”
Dinanga dia Kristo didi ne buondoke kayi kuudi?
10. Bua tshinyi ditendelela dietu dia Yehowa kadiena mua kutupangisha bua kumanya Yezu?
10 Bushuwa, dianyisha dia Yehowa bu Nzambi umuepele mulelela kadiena mua kufikisha muntu ku dipanga kumanya Yezu Kristo. Kadi, Buakabuluibua 19:10 (NW) udi wamba ne: “Mêyi a milayi akafundibua ku spiritu wa Nzambi bua kufila bumanyishi budi butangila Yezu.” Kubangila ku Genese too ne ku Buakabuluibua, milayi mifundisha ku spiritu idi ifila mumvuija pa bidi bitangila mudimu wa Yezu Kristo mu dilongolola dia Yehowa. Padi muntu wibidilangana ne malu awu, tshimfuanyi tshikuabu tshilenga tshidi tshimueneka mu lungenyi luende katshiyi ne makonyangaja ne mmuenenu mibi idi ifumina ku malongesha a dishima a mu bukua-buena-nkristo.
11. Mmunyi muvua dimanya dia bidi Bible ulongesha menemene pa Muana wa Nzambi dienze kudi mukaji wa ku ditunga dia Pologne?
11 Kumvua bulelela pa bidi bitangila Muana wa Nzambi kudi mua kuikala ne tshipeta tshiondoke pa muntu kampanda. Ke muvuabi bua Danuta, mukaji wa ku ditunga dia Pologne. Uvua uyukilangana ne Bantemu ba Yehowa munkatshi mua bidimu muanda-mukulu, usankidila bivuabu bamulongeshe kadi kavua uvuija ntendelelu mulelela mushindu wende wa nsombelu to. Pashishe wakapeta mukanda wa Le plus grand homme de tous les temps, udi umvuija muoyo wa Kristo mu mushindu mupepele.a Dîba dimane kupita mu dia mulolo, kubuululaye mukanda ne dijinga dia kubala nshapita umuepele patupu. Kadi, pa kabundubundu, pakajikijaye kubala mukanda mujima, wakawuteka ku luseke. Wakela muadi ne binsonji. “Yehowa, umfuile luse,” ke muakalombaye. Bu tshipeta tshia bivuaye mubale, wakamona bimpe bitambe kupita bangabanga dinanga diakaleja Yehowa ne Muanende. Wakajingulula se: munkatshi mua bidimu muanda-mukulu, kavua ne dianyisha pa kubenga diambuluisha divuabu bamutuadila ne dinanga kudi Nzambi ne lutulu luonso. Mu 1993 wakatambushibua bua kuleja diditshipa diende kudi Yehowa pa nshindamenu wa ditabuja Yezu Kristo.
12. Mmunyi mudi dimanya dijalame dia Yezu Kristo dishintulula nsombelu wetu?
12 “Dimanya dijalame dia Mukalenge wetu Yezu Kristo” didi dienda pamue ne kuikala muena nkristo muenji wa mitalu ne mukuami wa mamuma. (2 Petelo 1:8) Ntshitupa bunene kayi tshia mudimu eu tshiwikala pebe mua kuenza pa kuabanyangana ne bakuabu mukenji wa Bukalenge? Bungi bua mudimu budi bantu mua kuenza budi bulondeshila malu mashilangane. (Matayo 13:18-23) Katuena mua kushintulula amue a ku malu aa; kadi makuabu tudi mua kuashintulula. Ntshinyi tshidi tshitusaka bua kusunguluja ne kuenza mashintuluka adi mua kuenjibua? Mupostolo Paulo wakafunda ne: “Dinanga dia Kristo didi dituenzeja”; mu mikuabu miaku, dinanga diakalejaye pa kufila muoyo wende bua diakalenga dietu nditambe bunene, ke padi dianyisha dietu bualu buadi dienda didiunda, mitshima yetu idi isakibua mu buondoke buayi. Bu tshipeta, tudi tumona se: mbibi bitambe bua kuipatshila bintu bietu nkayetu ne kukeba anu nsombelu wa budisankishi. Pamutu pa nanku, tudi ne bua kulongolola nsombelu wetu bua kuteka pa muaba wa kumpala mudimu wakalongesha Kristo balongi bende mua kuenza.—2 Kolinto 5:14, 15.
Batapuluke ne bulongolodi ebu—Mutantshi bule kayi?
13. Bua tshinyi katuena basue kubuelakana mu tshitendelelu tshidi tshidienza tshia mu bulongolodi ebu?
13 Ki mbikole bua kumona malu menza kudi bukua-buena-nkristo bualu pamue ne bitendelelu bikuabu mbusue kuikala tshitupa tshia bulongolodi ebu. Bakangata mfranga ya ekleziya bua kuenza midimu ya buntomboji. Bansaserdose bakalua bena mvita ya buntomboji. Ku dituku ne ku dituku, bikandakanda bidi bimanyisha mudi bitendelelu biluishangana bimue ne bikuabu miaba mishilangane pa buloba bujima. Bianza biabu mbiuwule tente ne mashi. (Yeshaya 1:15) Ne pa buloba bujima bamfumu ba ekleziya mbatungunuke ne kukeba mua kulombola mianda ya tshididi. Batendeledi balelela kabena ne muaba mu bionso ebi.—Yakobo 4:1-4.
14. (a) Ntshinyi tshitudi ne bua kuepuka tuetu bine bituikala basue kushala batapuluke ne bena bulongolodi ebu? (b) Ntshinyi tshidi mua kutuambuluisha bua kuepuka dikuatshibua mu buteyi bua ngikadilu ne bienzedi bia bena bulongolodi ebu?
14 Kadi bua kutapuluka ne bulongolodi ebu bidi bikengela kupitshisha pine apa. Bulongolodi budi ne tshimanyinu tshia dinanga dia mfranga ne bidi mfranga mua kusumba, dijinga dia butumbi, ne diipatshila dia masanka kadiyi diikisha, bionso ebi pamue ne dipanga dia diditatshisha dilelela bua bakuabu, mashimi ne ngakuilu mubi, ditombokela bukokeshi, ne kupanga mua kuleja didikanda. (2 Timote 3:2-5; 1 Yone 2:15, 16) Bua kupanga kuetu kua bupuangane, tudi imue misangu mua kuleja bimue bikadilu. Ntshinyi tshidi mua kutuambuluisha mu diluangana dietu bua kuepuka mateyi a mushindu’eu? Tudi tukengela kuvuluka eu udi mu nyima mua bionso ebi. “Bena mu bulongolodi ebu buonso badi ku bukokeshi bua mubi.” (1 Yone 5:19, NW) Nansha ngikadilu kampanda mua kutulengelela mushindu kayi, nansha bantu bungi munyi mua kuikala muine mushindu au, patudi tumona Satana Diabolo, Muluishi munene wa Yehowa mu nyima muabi, tudi tumona bubi budibi bikale.—Musambu wa 97:10.
Dinanga diebe ndifike mutantshi bule kayi?
15. Mmunyi muvua dinanga kadiyi tshia kasombela diudi mumone mua kukuambuluisha bua kusunguluja tshitendelelu tshilelela?
15 Pawakatuadija kudisangisha ne Bantemu ba Yehowa, dinanga didi munkatshi muabu diakakusankisha bua dishilangana diadi ne mmuenenu wa bena mu bulongolodi ebu. Dishindamena pa dinanga didi kadiyi tshia kasombela didi, diteka ntendelelu mukezuke wa Yehowa pa muaba mushilangane ne ntendelelu mikuabu yonso. Pamu’apa ke tshiakakujadikila se: Bantemu ba Yehowa badi bushuwa tshitendelelu tshilelela. Yezu Kristo yeye muine wakamba ne: “Buonso nebanumanye munudi balongi banyi ku tshimanyinu etshi: tshia dinanga dinuikala banangangane.”—Yone 13:35, Mukenji mulenga.
16. Mmishindu kayi idi mua kuikalaku buetu tuetu ya kualabaja dinanga dietu?
16 Tshikadilu etshi tshidi kabidi tshikusunguluja bu umue wa ku balongi ba Kristo anyi? Kudi mishindu yiwudi mua kudiundishibua mu kuleja kuebe kua dinanga anyi? Kabiyi mpata tudi buonso mua kuenza nenku. Kudi bia bungi bia kuenza kupita dileja bakuabu bulunda ku Nzubu wa Bukalenge. Ne bu tuetu mua kualabaja dinanga anu kudi aba badi batunange, ndishilangana kayi ditudi mua kuikala nadi ne bena mu bulongolodi ebu? “Ku mutu kua malo onso nuikalangane ne dinanga dikole munkatshi muenu,” ke tshidi Bible utubela bua kuenza. (1 Petelo 4:8) Mbanganyi batudi mua kuleja dinanga dipitshidile? Mmuanetu muena nkristo mulume anyi mukaji wa nkoleshilu mushilangane ne wetu ne udi muena ngenzelu idi ituenza tshiji anyi? Ng’eu udi, bua disama peshi bua bukulakaje, kayi mua kubuela mu bisangilu pa tshibidilu anyi? Mmuena dibaka wetu anyi? Peshi, imue misangu, mbaledi betu badi benda bakulakaja anyi? Bamue bavua baleja biakane mamuma a spiritu, bu mudi dinanga, bakadiumvua bu badi balonga tshiakabidi mamuma aa wonso pakapetabu nsombelu mikole mitambe yakapatuka ne ikengela kufila ntema yonso kudi muena dîku uvua mulue mulema. Bushuwa, nansha ne ntatu eyi, dinanga dietu didi ne bua kufika kabidi kudi aba badi kabayi ba mu nzubu muetu.
Bumanyishi bua Bukalenge—Budi ne mushinga kayi kûdi?
17. Bituikala bapete bipeta bilenga mu makumbula a Bantemu ba Yehowa, tudi tudiumvua basakibue bua kuenza tshinyi?
17 Mushindu munene wa kuleja dinanga bua bantu netu nkubamanyisha Bukalenge bua Nzambi. Anu tshisumbu tshimue tshia bantu ke tshidi tshienza bivua Yezu mudianjile kumanyisha. (Mako 13:10) Bantu aba mBantemu ba Yehowa. Tudi bapetemu mabenesha tuetu bine. Mpindieu disanka dietu ndia kuambuluisha bakuabu. Bituikala ne mmuenenu wa Nzambi pa bualu ebu, mudimu eu newikale pa muaba munene mu nsombelu wetu.
18. Mmunyi mudi dibala dietu dia mukanda wa Les Témoins de Jéhovah—Prédicateurs du Royaume de Dieu mua kuakaja bumanyishi buetu bua Bukalenge?
18 Miyuki ya dikema ya mushindu udi mukenji wa Bukalenge mufikishibue ku bitupa bia kule kule bia buloba mu matuku aa a ku nshikidilu mmilonda mu mukanda wa Les Témoins de Jéhovah—Prédicateurs du Royaume de Dieu (Bantemu ba Yehowa—Bamanyishi ba Bukalenge bua Nzambi). Pikalawu mu muakulu wenu, kanupangi kuwubala to. Ne mu dienza nanku, funda mishindu yonso ya pa buayi ivua bantu bafile bumanyishi pa Bukalenge. Imue ya kudiyi idi mua kuikala tshilejilu tshiudi mua kulonda anyi? Kudi mishindu ya bungi miunzuluila yonso wa kutudi. Dinanga dietu bua Yehowa ditusake bua kuenza nayi mudimu biakane.
19. Mmunyi mutudi tubeneshibua patudi tuanyisha bujitu budi buenda pamue ne dimanya dia tshitendelelu tshilelela?
19 Nenku, patudi tudifila mu dienza dia disua dia Yehowa, tudi tupeta diandamuna ku lukonko elu: Muoyo udi ne mushinga kayi? (Buakabuluibua 4:11) Katuena kabidi tuenda tububuta to, tudiumvua bu badi bashale munda mutupu. Kakuena mudimu utudi mua kuenza udi mua kututuadila disanka dinene kupita didifila ne muoyo mujima ku mudimu wa Yehowa Nzambi. Ne mmatuku kayipu a dikema atutuadilabu! Muoyo wa kashidi wa nsombelu wa nsongo mu bulongolodi buende bupiabupia, mutuikala ne bua kuenza mudimu ne makokeshi etu mu kabujima kawu mu diumvuangana ne dilongolola diuwule tente ne dinanga divua Yehowa mufukile bukua-bantu.
[Mêyi adi kuinshi]
a Mupatula kudi Watchtower Bible and Tract Society of New York, Inc.
Udi mua kuandamuna munyi?
◻ Bua tshinyi mbia mushinga mukole bua tshitendelelu kuanyishatshi Bible bu Dîyi dia Nzambi ne kutumbisha Yehowa bu Nzambi mulelela?
◻ Ntshinyi tshidi tshitendelelu tshilelela tshilongesha pa bidi bitangila muaba wa Yezu wa Mufidi wa tshia-bupikudi?
◻ Bua tshinyi bena nkristo badi ne bua kuditapulula ku bulongolodi ebu ne kuenza bienzedi bia dinanga didi kadiyi ne tshia kasombela?
◻ Mmudimu kayi udi bumanyishi bua Bukalenge nawu mu tshitendelelu tshilelela?
[Bimfuanyi mu dibeji 16]
Batismu udi tshiidia tshia mushinga mukole mu dianyisha dia majitu a ntendelelu mulelela. Ku ngondo wonso, bantu batue mu 25 000 pa buloba bujima bakeela tshiidia etshi
Russie
Sénégal
Papouasie-Nouvelle-Guinée
Etats-Unis
[Bimfuanyi mu dibeji 17]
Kuabanyangana bulelela bua mu Bible ne bakuabu ntshimue tshia ku bitupa bia ntendelelu mulelela
Etats-Unis
Brezile
Etats-Unis
Hong Kong