Ikala mu bukubi bu muena mu bulongolodi bua Nzambi
‘Dîna dia Yehowa didi tshibumba tshikole; muntu muakane udi unyemenaku, udi upanduka.’—NSUMUINU 18:10.
1. Bilondeshile disambila dia Yezu, bena nkristo badi mu nsombelu kayi mukole?
KATUPA kîpi kumpala kua kufuaye, Yezu wakasambila Tatuende wa mu diulu ulombela balondi bende. Ne diditatshisha dia dinanga wakamba ne: ‘Ngakabapa dîyi diebe, ba pa buloba badi nabu lukuna, bualu bua buobu kabena ba pa buloba, bu mundi meme tshiyi wa pa buloba. Tshiena nkulomba ne: ubumushe pa buloba; ndi nkulomba ne: ubasungile kudi [mubi].’ (Yone 17:14, 15) Yezu uvua mumanye ne: pa buloba pavua mua kuikala muaba wa njiwu bua bena nkristo. Ba pa buloba bavua ne bua kuleja lukuna luabu kudibu mu dibashiminyina malu ne mu dibakengesha. (Matayo 5:11, 12; 10:16, 17) Ba pa buloba bavua ne bua kuikala kabidi mpokolo wa dinyanguka.—2 Timote 4:10; 1 Yone 2:15, 16.
2. Nkuepi kudi bena nkristo mua kupeta muaba wa bukubi bua mu nyuma?
2 Ba pa buloba bavua ne bua kukina bena nkristo mbenza ne bantu badi kule ne Nzambi ne badi ku bukokeshi bua Satana. (1 Yone 5:19) Ba pa buloba aba mbavule kupita tshisumbu tshia bena nkristo, ne Satana muine udi ne bukole bua bungi kupita muntu yonso wa pa buloba. Nanku lukuna lua ba pa buloba ludi njiwu ya bushuwa. Nkuepi kudi balondi ba Yezu mua kupeta bukubi bua mu nyuma? Mêyi a mu nimero wa Tshibumba tshia Nsentedi tshia 1 Tshisua-munene 1922 (Angl.), akafila diandamuna ne: “Mpindieu tudi mu matuku mabi. Mvita mmikutuke pankatshi pa bulongolodi bua Satana ne bulongolodi bua Nzambi. Mmvita mikole.” Mu mvita eyi, bulongolodi bua Nzambi ke muaba wa bukubi bua mu nyuma. Muaku “bulongolodi” kawena mu Bible to, ne tshiambilu “bulongolodi bua Nzambi” tshiakatuadija kale mu bidimu bia 1920. Nenku bulongolodi ebu ntshinyi? Ne mmunyi mutudi mua kupetamu bukubi?
Bulongolodi bua Yehowa
3, 4. (a) Bilondeshile nkonga-miaku kampanda ne Tshibumba tshia Nsentedi, bulongolodi ntshinyi? (b) Mmu ngumvuilu kayi mudi bu-wetu bua buloba bujima bua Bantemu ba Yehowa mua kubikidibua bu bulongolodi?
3 Bilondeshile nkonga-miaku kampanda (Concise Oxford Dictionary), bulongolodi “nkasumbu kalongolola.” Bikale ne bualu abu mu lungenyi, tudi tumvua ne: bualu bapostolo bavua balongolole bena nkristo ba mu siekele wa kumpala ne benze bisumbu miaba ivuabu ku bulombodi bua kasumbu kaludiki kavua mu Yeruzaleme, mbiakanyine bua kuakula bua “nsangilu [au] wa bana betu” bu bulongolodi. (1 Petelo 2:17, NW) Lelu’eu Bantemu ba Yehowa badi ne bulongolodi buenza mushindu wa muomumue. Buobumue bua kasumbu ka mu siekele wa kumpala buvua bukolesha kudi “mapa a bantu,” bu mudi “balami ne balongeshi.” Bamue ba kudibu bavua benza ngendu mu tshisumbu ne mu tshisumbu, eku bakuabu bikale bakulu mu bisumbu bia miaba ivuabu. (Efeso 4:8, 11, 12, NW; Bienzedi 20:28) “Mapa” a muomumue adi akolesha buobumue bua Bantemu ba Yehowa lelu’eu.
4 Tshibumba tshia Nsentedi tshia 1 Kasuabanga 1922 (Angl.) tshiakamba bua muaku “bulongolodi” ne: “Bulongolodi nnsangilu wa bantu bikale ne tshipatshila tshia kukumbaja mpàngu kampanda.” Tshibumba tshia Nsentedi atshi tshiakatungunuka ne kumvuija ne: kubikila Bantemu ba Yehowa ne: bulongolodi kakuvua kubavuija “kasumbusumbu ka malu a Nzambi mu ngumvuilu udibu batumike ne muaku eu nansha, kadi kudi kumvuija patupu ne: Balongi ba Bible [Bantemu ba Yehowa] badi badienzeja bua kukumbaja malongolola a Nzambi ne benza anu mudi Mfumu wenza malu onso, mu bulongame.” (1 Kolinto 14:33) Bia muomumue mupostolo Paulo wakaleja ne: bena nkristo ba mu matuku ende bakenza malu mu bulongame. Wakafuanyikija bu-wetu bua bena nkristo bela manyi ne mubidi wa muntu muenza ne bitupa bia bungi, tshitupa tshionso tshikumbaja mudimu watshi mutshipesha bua mubidi umone mua kuenda biakane. (1 Kolinto 12:12-26) Au mmufuanu mutambe buimpe bua bulongolodi! Bua tshinyi bena nkristo bavua balongolola? Bua kukuatshila “malongolola a Nzambi” mudimu, bua kuenza disua dia Yehowa.
5. Bulongolodi bua Nzambi budi bumueneka ntshinyi?
5 Bible wakadianjila kuamba ne: bena nkristo balelela lelu’eu bavua ne bua kuikala mu buobumue, basangisha pamue mu “buloba” bumue bu “tshisamba” tshimue, muvuabu ne bua kuikala ‘bakenka bu bimunyi bia butoke panu.’ (Yeshaya 66:8; Bena Filipe 2:15, Mukenji Mulenga) “Tshisamba” etshi tshilongolola tshidi mpindieu ne bantu bapite pa miliyo itanu ne tshitupa. (Yeshaya 60:8-10, 22) Kadi bulongolodi bujima bua Nzambi ki mbushikile apu nansha. Mudi kabidi banjelu.
6. Mu ngumvuilu wabu mutambe kualabala, mbanganyi badi benza bulongolodi bua Nzambi?
6 Kudi bilejilu bia bungi bidi bileja mudi banjelu benza mudimu pamue ne basadidi ba Nzambi ba pa buloba. (Genese 28:12; Danyele 10:12-14; 12:1; Ebelu 1:13, 14; Buakabuluibua 14:14-16) Nenku mbiakanyine muakamba Tshibumba tshia Nsentedi tshia 15 Lumungulu 1925 (Angl.) ne: “Banjelu bansantu bonso mbena mu bulongolodi bua Nzambi.” Tshiakamba kabidi ne: “Ku mutu kua bulongolodi bua Nzambi [kudi] Mfumu Yezu Kristo, muikale ne bukole ne bukokeshi buonso.” (Matayo 28:18) Nanku mu ngumvuilu wabu mutambe kualabala, bulongolodi bua Nzambi mbuenza ne aba bonso badi mu diulu ne pa buloba badi bikale bakuata mudimu pamue bua kuenza disua dia Nzambi. (Tangila kazubu.) Ndiakalenga kayipu dia mpatshi dia kuikalamu! Ne ndisanka kayipu dia kutekemena tshikondo tshikala bifukibua bionso bidi ne muoyo, bia mu diulu ne bia pa buloba, bilongolola bua kusamuna Yehowa Nzambi mu buobumue! (Buakabuluibua 5:13, 14) Kadi mbukubi kayi budi bulongolodi bua Nzambi bufila lelu’eu?
Mmunyi mudi bulongolodi bua Nzambi butukuba?
7. Mmu mushindu kayi mudi bulongolodi bua Nzambi butukuba?
7 Bulongolodi bua Nzambi budi mua kutuambuluisha bua kudikuba kudi Satana ne ku mayele ende. (Efeso 6:11) Satana udi utatshisha, ukengesha, ne uteta batendeledi ba Yehowa, muikale anu ne tshipatshila tshimue mu meji: kubumbusha mu ‘njila udibu ne bua kuendela.’ (Yeshaya 48:17; fuanyikija ne Matayo 4:1-11.) Mu ndongoluelu eu wa malu katuena mua kuepuka tshishiki mvita ayi nansha. Kadi malanda etu mashême ne Nzambi ne bulongolodi buende bidi bitukolesha ne bitukuba ne nenku bituambuluisha bua kushala mu ‘njila.’ Bu tshipeta, katuena tupanga kupeta difutu dia ditekemena dietu.
8. Mmunyi mudi bulongolodi bua Yehowa budi kabuyi bumueneka bukuatshisha basadidi bende ba pa buloba?
8 Mmunyi mudi bulongolodi bua Nzambi bufila bukubi ebu? Tshia kumpala: tudi ne dikuatshisha dikole dia basadidi ba Yehowa ba mu nyuma. Pavua Yezu mu lutatu lukole, muanjelu wakamuambuluisha. (Luka 22:43) Pavuaye mu njiwu ya lufu, Petelo uvua musungila mu tshishima kudi muanjelu. (Bienzedi 12:6-11) Nansha mudiku kakuyi bishima bia nunku lelu’eu, mbalaye bantu ba Yehowa dikuatshisha dia banjelu mu mudimu wabu wa buambi. (Buakabuluibua 14:6, 7) Misangu mivule batu ne bukole bupite bua pa tshibidilu padibu mu nsombelu mikole. (2 Kolinto 4:7) Kabidi, mbamanye ne: ‘Muanjelu wa Yehowa udi wasa tshitudilu tshiende tshinyunguluke badi bamutshina, udi ubasungila.’—Musambu 34:7.
9, 10. Mmunyi mutudi mua kuamba ne: “dina dia Yehowa didi tshibumba tshikole,” ne mmunyi mudi muanda eu utangila bulongolodi bujima bua Nzambi?
9 Bulongolodi bua Yehowa budi bumueneka budi pabu bukubi. Mmushindu kayi? Tudi tubala mu Nsumuinu 18:10 ne: ‘Dîna dia Yehowa didi tshibumba tshikole; muntu muakane udi unyemenaku, udi upanduka.’ Ebi kabiena biumvuija ne: kuambulula patupu dîna dia Nzambi kudi kufila bukubi nansha. Kadi kusokomena kuetu mu dîna dia Nzambi kudi kumvuija ne: tudi tueyemena anu Yehowa nkayende. (Musambu 20:1; 122:4) Kudi kumvuija kutua bumfumu buende bukulu nyama ku mikolo, kulamata mikenji ne mêyi-maludiki ende, ne kuitabuja malaya ende. (Musambu 8:1-9; Yeshaya 50:10; Ebelu 11:6) Kudi kumvuija kuleja Yehowa bulamate bukena buabanya. Anu aba badi batendelela Yehowa mushindu’eu ke badi mua kuamba pamue ne mufundi wa misambu ne: ‘Mitshima yetu idi isanka [mu Yehowa], bualu bua tudi tueyemena dîna diende dia tshijila.’—Musambu 33:21; 124:8.
10 Mpindieu bonso badi mu bulongolodi bua Nzambi budi bumueneka badi bamba pamue ne Mika ne: “Kadi tuetu netuende mu dina dia Yehowa Nzambi wetu tshiendelele.” (Mika 4:5) Bulongolodi bua matuku etu aa mbuele “Izalele wa Nzambi” munkatshi, udibu babikila mu Bible bu ‘bantu badi ne dîna diende.’ (Galatia 6:16, NW; Bienzedi 15:14; Yeshaya 43:6, 7; 1 Petelo 2:17) Nanku kuikala bena mu bulongolodi bua Yehowa kudi kumvuija kuikala munkatshi mua bantu badi bakeba ne bapeta bukubi mu dîna dia Nzambi.
11. Mmu mishindu kayi misunguluke mudi bulongolodi bua Yehowa bukuba benamu?
11 Kabidi, bulongolodi bua Nzambi budi bumueneka ntshinsanga tshia ditabuja, nsangilu wa bena kuitabuja netu badi bakoleshangana ne bakankamijangana. (Nsumuinu 13:20; Lomo 1:12) Mmuaba udi balami bena nkristo batabalela mikoko, bakankamija idi isama ne idi mibungame, ne bakeba bua kujula idi midishinde. (Yeshaya 32:1, 2; 1 Petelo 5:2-4) “Mupika wa lulamatu ne wa budimu” udi ufila “biakudia mu tshikondo tshiakanyine” ku butuangaji bua bulongolodi ebu. (Matayo 24:45, NW) “Mupika” au, muenza ne bena nkristo bela manyi, udi ufila tshintu tshitambe buimpe menemene tshia ku bintu bia mu nyuma—dimanya dijalame dishindamene pa Bible didi mua kufikisha ku muoyo wa kashidi. (Yone 17:3) Ku diambuluisha dia buludiki bua kudi “mupika” eu, bena nkristo mbapete diambuluisha bua kulama mêyi-makulu matumbuke a tshikadilu tshimpe ne bua kuikala “ne budimu bu bua nyoka ne bu nyunyu ya nkutshi idi kayi[yi] iluishangana” mu muaba wa njiwu udibu. (Matayo 10:16) Ne mbabambuluishe misangu yonso bua kuikala ne “bivule bia kuenza mu mudimu wa Mukalenge,” udi muikale wowu nkayawu bukubi bukole.—1 Kolinto 15:58, NW.
Mbanganyi badi bena mu bulongolodi bua Nzambi?
12. Mbanganyi badibu baleje bu bena mu bulongolodi bua Nzambi bua mu diulu?
12 Bu mudi bukubi ebu buikale kudi aba badi bena bulongolodi bua Nzambi, nenku mbanganyi badi benamu? Bua bulongolodi bua mu diulu, kakuena dielakana bua kuandamuna lukonko elu nansha. Satana ne banjelu bende kabatshiena mu diulu to. Ku lunga luseke, banjelu ba lulamatu batshidi “[mu] disangisha dinene.” Mupostolo Yone wakamona ne: mu matuku a ku nshikidilu, “Muana wa mukoko,” bakeluba (“bifukibua binayi bidi ne muoyo”), ne “banjelu ba bungi” bavua ne bua kuikala pabuipi menemene ne nkuasa wa bumfumu wa Nzambi. Bakulu 24 bavua ne bua kuikala nabu—baleja bena nkristo abu bela manyi bakadi babuele mu bumpianyi buabu bua butumbi bua mu diulu. (Ebelu 12:22, 23; Buakabuluibua 5:6, 11; 12:7-12, NW) Kakuyi mpata bonso mbena mu bulongolodi bua Nzambi. Kadi munkatshi mua bantu malu ki mmatambe kusunguluka to.
13. Mmunyi muvua Yezu muleje aba badi bena mu bulongolodi bua Nzambi ne badi kabayi benamu?
13 Yezu wakamba bua bamue bavua mua kuamba mudibu bamulonda ne: ‘Dituku adi bantu ba bungi nebangambile ne: Mukalenge, Mukalenge, katuena bambile bantu bualu buebe mu dîna diebe anyi? Katuena bumushe ba-demon mu dîna diebe anyi? Katuena benze malu a kukema a bungi mu dîna diebe anyi? Dituku adi nembambile ne: Tshiakunumanya; umukayi kundi, nudi benji ba malu mabi.’ (Matayo 7:22, 23) Bikala muntu muenji wa malu mabi, bushuwa kêna muena mu bulongolodi bua Nzambi to, nansha yeye muambe tshinyi, ne nansha yeye uya kutendelela muaba kayi. Yezu wakaleja kabidi mushindu wa kumanya muntu udi muena mu bulongolodi bua Nzambi. Wakamba ne: ‘Bantu batu bambikila ne: Mukalenge, Mukalenge, kabena babuela bonso mu bukalenge bua mu diulu, anu yeye utu wenza bu mudi Tatu wanyi udi mu diulu musue.’—Matayo 7:21.
14. Mbitupa kayi bia disua dia Nzambi bidibu baleje bu malu adi bena mu bulongolodi bua Nzambi ne bua kuenza?
14 Nanku bua kuikala muena mu bulongolodi bua Nzambi—budi ne ‘bukalenge bua mu diulu’ bu tshitupa tshiabu tshia nshindamenu—muntu udi ne bua kuikala wenza disua dia Nzambi. Disua diende ntshinyi? Paulo wakaleja tshitupa tshiadi tshia mushinga mukole pakambaye ne: “[Nzambi] udi musue bua bantu ba mishindu yonso bapandishibue ne bafike ku dimanya dijalame dia bulelela.” (1 Timote 2:4, NW) Bikala bushuwa muntu ukeba bua kupeta dimanya dijalame dia mu Bible, bua kuditumikila mu nsombelu wende ne bua kuditangalaja kudi “bantu ba mishindu yonso,” udi wenza disua dia Nzambi. (Matayo 28:19, 20; Lomo 10:13-15) Disua dia Nzambi didi kabidi dilomba bua badishe mikoko ya Yehowa ne bayitabalele. (Yone 21:15-17) Bisangilu bia bena nkristo bidi ne mushinga wa bungi mu muanda eu. Muntu udi ne budikadidi bua kubuela mu bisangilu ebi kadi ulengulula bua kuenza nenku mmupange dianyisha bua muaba wende mu bulongolodi bua Nzambi.—Ebelu 10:23-25.
Bulunda ne malu a pa buloba
15. Ndidimuija kayi divua Yakobo mupeshe bisumbu bia mu matuku ende?
15 Bidimu bitue ku 30 kunyima kua lufu lua Yezu, muanabu Yakobo wakaleja amue malu adi mua kuteka muaba wa muntu mu bulongolodi bua Nzambi mu njiwu. Wakafunda ne: ‘Nuenu, bena masandi, kanuena bamanye ne: bulunda bua malu a pa buloba budi ne Nzambi lukuna anyi? Nunku muntu yonso wasua kuikala mulunda wa malu a pa buloba, udi udivuija muena lukuna kudi Nzambi.’ (Yakobo 4:4) Bushuwa muluishi wa Nzambi ki mmuena mu bulongolodi buende nansha. Nenku kudia bulunda ne malu a pa buloba ntshinyi? Mbumvuije ne: kudi mishindu mishilangane, bu mudi dipunga anyi dibuelakana ne malunda mabi. Kabidi, Yakobo wakashindamena pa tshintu kampanda tshitambe kusunguluka—mmuenenu mibi idi ifikisha ku tshikadilu tshidi katshiyi tshiakanyine.
16. Mmalu kayi avua madianjidile didimuija dia Yakobo dia se: bulunda ne malu a pa buloba mbuluishi ne Nzambi?
16 Mu Yakobe 4:1-3 (MMM), tudi tubala ne: ‘Mvita idi ifuma penyi? Diluishangana didi munkatshi muenu ndifume penyi? Bidi amu bifuma ku [“majinga a bisankasanka,” NW] adi aluangana mu mubidi wenu. Nudi nualakana tshintu kanuyi natshi. Ke panudi nushipangana. Nudi numvua lubabu bua tshintu tshinudi kanuyi mua kupeta. Ke panudi nutandangana, nuluangana mvita. Kanuena nupeta bintu, bualu kanuena nubilomba to. Nudi nulomba kanuyi nupeta, bualu nudi nulomba bibi, bua numone mua kusankisha [“majinga enu a bisankasanka,” NW].’ Panyima pa difunda mêyi aa ke pavua Yakobo mudimuije bua kubenga kudia bulunda ne malu a pa buloba.
17. Mmu mushindu kayi muvuaku “mvita” ne “matandu” mu tshisumbu tshia bena nkristo tshia mu siekele wa kumpala?
17 Siekele mivule kunyima kua lufu lua Yakobo, bena nkristo ba dishima bakaluishangana ne kushipangana mu ngumvuilu mulelela. Kadi, Yakobo uvua ufundila bena “Izalele wa Nzambi” ba mu siekele wa kumpala, bavua ne bua kulua ‘bakuidi ne bakalenge’ ba mu diulu. (Buakabuluibua 20:6) Buobu kabavua bashipangane mu mvita miena dîna nansha. Kadi bua tshinyi Yakobo wakakula bua malu a mushindu’eu munkatshi mua bena nkristo? Mupostolo Yone wakabikila muntu yonso udi mukine muanabu bu mushipianganyi. Ne Paulo wakakula bua makokangana a bumuntu ne nkinu bivua mu bisumbu bu “mvita” ne “matandu.” (Tito 3:9, Muanda Mulenga Lelu; 2 Timote 2:14; 1 Yone 3:15-17) Mu muanda muine eu, bidi bimueneka ne: Yakobo uvua usua kuakula bua dipanga kunanga bena nkristo nabu. Munkatshi muabu nkayabu, bena nkristo bavua benzelangana malu anu bu mutu ba pa buloba benzelangana.
18. Ntshinyi tshidi mua kufikisha ku bienzedi ne meji bibule dinanga munkatshi mua bena nkristo?
18 Bua tshinyi malu bu aa akenzeka mu bisumbu bia bena nkristo? Bua mmuenenu mibi, bu mudi lukuka ne “majinga a bisankasanka.” Lutambishi, lubabu ne dialakana bidi kabidi mua kukosolola bu-wetu bua dinanga bua bena nkristo mu tshisumbu. (Yakobo 3:6, 14) Mmuenenu ya nunku idi ivuija muntu mulunda wa malu a pa buloba ne pa nanku muluishi wa Nzambi. Muntu udi ulama mmuenenu ya buena eyi kêna mua kutekemena bua kushala muena mu bulongolodi bua Nzambi nansha.
19. (a) Nnganyi utudi ne bua kudiwula diambedi biasangana muena nkristo meji mabi enda ela miji mu mutshima wende? (b) Mmunyi mudi muena nkristo mua kutshimuna meji mabi?
19 Nnganyi utudi mua kudiwula bituasangana meji mabi enda ela miji mu mutshima wetu? N’Satana anyi? Nyeye mu bualabale kampanda. Udi “mfumu wa makokeshi a mu lupepele” a pa buloba ebu, padi mmuenenu eyi mitangalake. (Efeso 2:1, 2, MML; Tito 2:12) Kadi pa tshibidilu miji ya meji mabi itu isanganyibua mu mubidi wetu mupange bupuangane. Panyima pa mumane kudimuija bua kubenga kudia bulunda ne malu a pa buloba, Yakobo wakafunda ne: ‘Nudi nuela meji ne: [“mufundu,” NW] udi wamba patupu ne: nyuma wakatutekelaye munda muetu udi ujinga too ne ku mukawu anyi?’ (Yakobo 4:5) Bonso buetu tudi ne meji a ku tshilelelu matangile ku dienza bubi. (Genese 8:21; Lomo 7:18-20) Kadi tudi mua kuluisha meji au bituitaba mateketa etu ne kutekemena diambuluisha dia kudi Yehowa bua kuatshimuna. Yakobo udi wamba ne: “Bulenga bukena butuakanyine budi [Nzambi] ufila mbunene [kupita meji etu a ku tshilelelu a mukawu].” (Yakobo 4:6, NW) Ku diambuluisha dia spiritu munsantu wa Nzambi ne dikuatshisha dia bana betu bena nkristo ba lulamatu, ne ku butuangaji bua mushinga wa mulambu wa tshia-bupikudi wa Yezu, bena nkristo ba lulamatu ki mbatshimuna kudi mateketa a mubidi wabu nansha. (Lomo 7:24, 25) Badi mu bukubi mu bulongolodi bua Nzambi, mbalunda ba Nzambi, ki mba malu a pa buloba nansha.
20. Mmabenesha kayi mavule adi bena mu bulongolodi bua Nzambi bapeta?
20 Bible udi ulaya ne: ‘Yehowa neapeshe bantu bende bukole, Yehowa neasankishe bantu bende ne ditalala.’ (Musambu 29:11) Bituikala bushuwa bena mu “tshisamba” tshia Yehowa tshia matuku etu aa, bulongolodi buende budi bumueneka, netupete bukole budiye ufila ne ditalala didiye ubenesha nadi bantu bende. Kakuyi mpata, ba pa buloba bua Satana mba bungi bikole kupita bulongolodi bua Yehowa budi bumueneka, ne Satana udi ne bukole bua bungi kutupita. Kadi Yehowa ng’Wa-Bukole-Buonso. Bukole buende buenzeji kabuena kutshimuna to. Banjelu bende ba bukole badi pabu badisangishe netu mu dienzela Nzambi mudimu. Nenku, nansha mudibu batukine, tudi mua kushala bashindame. Anu bu Yezu, tudi mua kutshimuna ba pa buloba.—Yone 16:33; 1 Yone 4:4.
Udi mua kumvuija anyi?
◻ Bulongolodi bua Nzambi budi bumueneka ntshinyi?
◻ Mmu mishindu kayi mudi bulongolodi bua Nzambi bufila bukubi?
◻ Mbanganyi badi bena mu bulongolodi bua Nzambi?
◻ Mmunyi mutudi mua kuepuka dikala balunda ba malu a pa buloba?
[Kazubu mu dibeji 9]
Bulongolodi bua Nzambi ntshinyi?
Mu mikanda ya Bantemu ba Yehowa, tshiambilu “bulongolodi bua Nzambi” ntshitumika natshi mu mishindu isatu.
1. Bulongolodi bua Yehowa bua mu diulu budi kabuyi bumueneka buenza ne bifukibua bia mu nyuma bia lulamatu. Badi babubikila mu Bible ne: ‘Yeruzaleme wa mu diulu.’—Galatia 4:26.
2. Bulongolodi bua Yehowa budi bumueneka buenza ne bantu. Lelu’eu, mbuenza ne bashadile bela manyi batua munyima kudi musumba munene.
3. Bulongolodi bujima bua Yehowa. Lelu’eu, mbuenza ne bulongolodi bua Yehowa bua mu diulu pamue ne bela manyi bende, badiye muangate bu bana bende ba pa buloba, badi ne ditekemena dia muoyo mu diulu. Ndekelu wa bionso nebukonge kabidi bantu bavuija bapuangane bikala pa buloba.
[Tshimfuanyi mu dibeji 10]
Biakudia bia mu nyuma bitambe buimpe mbifila ku butuangaji bua bulongolodi bua Yehowa