Bamanyishi ba Bukalenge badi balonda

Kanudikandi bua kumanyisha lumu luimpe

PAVUA bena ngendu ya dikebulula ba ku Mputu bakumbule bua musangu wa kumpala Golfe de Venezuela ne Dijiba dia Maracaibo, ku muelelu kuvua mitanda mikese ya nsona miashila pa mpanda mu mâyi kaayi muondoke. Tshimuenekelu tshivua tshivuluija tshimenga tshia Venise, mu Italie, muvua bantu base nzubu yabu ku muelelu kua mâyi. Nenku bena ngendu ya dikebulula bavua bakula tshiena-Espagne bakinyika tshitupa etshi ne: Venezuela, mmumue ne: “Venise mukese.”

Lelu’eu, ditunga edi dilengele ndiakidile ndongamu mukuabu wa luibaku, luibaku lua mu nyuma. Bantemu ba Yehowa mbadituemu mu dikuna ntete ya Bukalenge mu tshikondo tshionso tshiakanyine. Bintu bidi bifumina ku dinowa dia mu nyuma bidi bitamba kusamuna Yehowa Nzambi, ‘Mukalenge wa bintu bia kunowa.’​—Matayo 9:37, 38.

Pavua mutangidi muena ngendu ne mukajende bakumbule tshisumbu kampanda mu provense wa Zulia ku Nord-Ouest kua Venezuela, Bantemu ba muaba au bakalongolola bua yeye ne mukajende kukumbulabu tshidiila tshikese tshidi pabuipi apu tshibikila ne: Toas. Pavuabu mu mulongo bindile mazuwa a mâyi a pa dinda avua aya mu tshidiila atshi, Mery mukaji wa mutangidi muena ngendu wakambila muinende, muanetu wa bakaji mpanda-njila wa ku dîba ne ku dîba, bua bayukile ne bamue bena mudimu ba ku mazuwa au. Muanetu wa bakaji mpanda-njila wakitaba.

Pakasemenaye pabuipi ne mulongolodi wa mazuwa, Mery wakaleja mukanda wa Dimanya didi difikisha ku muoyo wa kashidi. Wakamuleja nshapita wa “Mushindu wa kuibaka dîku didi diambika Nzambi lumu,” ne muntu eu wakamueneka muanyishe nshapita eu. Pashishe Mery wakumvuija ne: ku diambuluisha dia mukanda eu, uvua mua kuenza dilonga dia Bible ku nzubu kuende. Wakitaba mukanda eu, ne bakalongolola bua muntu mukuabu aye kumukumbula kumbelu kuende.

Matuku makese pashishe, kuvua mpuilu wa pa buende wa dituku dimue mu tshitupa atshi. Mery wakakema bua kumonamu mulongolodi eu wa mazuwa, Muena-muabu Nava, pamue ne mukajende ne bana bende ba bakaji babidi batekete. Mery wakebeja mukaji tshivuaye umvua bua dilonga diabu dia Bible dia mu dîku. Diandamuna diende divua dikemesha bikole.

Wakamba ne: “Ndi nsakidila Yehowa bua mutudi bamanye bulelela.” Pashishe kumumvuijaye ne: “Dîba diwakayukila ne bayanyi, uvua ufuma ku dindekela bua kuya kusomba ne mukaji mukuabu. Uvua kabidi kanuayi wa dilambu. Imue misangu pavuaye ukuatshika, uvua ulua ne tshinyangu tshia bungi tshivua bantu ba mu tshinsanga tshietu tshikese kabayi basue nansha. Uvua kabidi upaka manga. Kadi dimanya dia mu Bible diakapetaye mu dilonga ndimuambuluishe bua kuenza mashintuluka manene mu nsombelu wende. Mmulekele bilele biende bionso bipange bukezuke. Baledi bende badi bikale bena Katolike mbakeme bikole bua mashintuluka aa. Badi ne disanka bua mudiye mpindieu mulume ne tatu wa kueyemena.”

Muena-muabu Nava wakatambula mu 1996 ne mpindieu udi usadila bu ministre wa ku dîba ne ku dîba. Mukajende Jenny, wakatambula mu 1997. Mashintuluka a mulongolodi eu wa mazuwa avua matamba kukemesha mulombodi wa tshimenga atshi mu mushindu wa se: yeye pende wakalomba dilonga dia Bible. Mmunyipu mudi bana betu ba bakaji aba bikale ne disanka bua muvuabu kabayi badikande bua kumanyisha lumu luimpe pavuabu mu mulongo bindile mazuwa mu dinda adi!

[Bimfuanyi mu dibeji 7]

Diyisha mulongolodi wa mazuwa lumu luimpe diakapatula bipeta bia disanka